KENGGIN E RE KE BABYOR NEY | KE CHUGUR E TOMUR, FA?
Boor E Girdi’ ni yad ra Magey U Nap’an Nra Yib E Tomur—mus Ngom Ni Ku Rayog Ni Ngam Magey Ni Gab Fos
Be yog e Bible nnap’an nra yib e tomur, ma bay boch ban’en ni yira chuweg. Be gaar: “Gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran . . . Machane ke lichnag Got e pi rran nem; ya faan mang e dabi rin’ ni aram rogon, ma dariy be’ nra fos.” (Matthew 24:21, 22) Machane, ke micheg Got ngodad ni boor e girdi’ ni yad ra magey ni yad ba fos u nap’an e re ngiyal’ i n’em. Ke yog ni gaar: “Re fayleng ney . . . , e bayi m’ay; machane en nra rin’ e tin nib m’agan’ Got ngay e ra par nib fos ndariy n’umngin nap’an.”—1 John 2:17.
Ere, mang e susun ni ngam rin’ ni faanra ga baadag ni ngam magey ni gab fos mag ‘par ndariy n’umngin nap’an’ u tomuren ni kan thang e re m’ag nib kireb ney? Gur, ireray e ngiyal’ ni ngam kunuy boor e chugum ngam tay nga bang ni fan ngom ko re ngiyal’ i n’em? Danga’. Ba thil e n’en ni be yog e Bible ni ngad rin’ed. Be gaar: “Faanra urngin ban’en ma bay ni kirebnag ni ara’ rogon, me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got.” (2 Peter 3:10-12) Be tamilangnag e thin ni bay u m’on ngu tomuren e re thin nu Bible ney ni “urngin ban’en” ni yira kirebnag e ba muun ngay urngin e pi n’en ni be gagiyegnag e re fayleng ney nge urngin e piin ni kar paged e pi n’ey ni nge mang ir e gagiyegnagrad, ma gathi Got. Ere, ba tamilang ni faan gad ra ulunguy boch e chugum nga bang, ma dabi ayuwegdad u nap’an ni yira thang e re m’ag ney.
N’en nra ayuwegdad ni ngad mageygad ni gad ba fos u nap’an nra yib e tomur e aram e ngad pared ni gad ba yul’yul’ ngak Jehovah Got ma gad fil murung’agen e re miti ngongol nge pangin nib m’agan’ ngay. (Zefaniah 2:3) Ba t’uf ni ngaud pared ‘ma gad be sonnag e chirofen, ni ir e Rran rok Got’ ko bin ni ngaud folgad ko pi n’en ni be rin’ yooren e girdi’ e ngiyal’ ney, ma dab da tedan’dad ko pi pow ni be dag ni gad be par ko tin tomuren e rran. Rayog ni nge dag e Pi Mich Rok Jehovah ngom u Bible rogon nrayog ni ngam magey ni gab fos u nap’an nra yib e re rran nem.