Ga Be “Son” Fa?

“Me ere mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got, ma gimed be sonnag e chirofen nem, ni ir e Rran rok Got, mi gimed athamgiliy nrogon nrayog romed nge papey nge taw ngay!”​—2 PETER 3:11, 12.

1, 2. Mang e rayog ni ngada taarebnag nga lanin’dad ni gad be “sonnag” e rran rok Jehovah?

AMU LEMNAG u wan’um chon reb e tabinaw ni yad be sonnag boch e girdi’ ni bay ra bad ko abich. Kan duguliy e ngiyal’ nra yib fa pi cha’ mab papey iyib e re ngiyal’ i n’em. Chitiningin fare tabinaw e be lum. Ma pumoon rok nge fapi bitir e yad be pi’ e ayuw ya nge fel’ e urngin. Yad gubin ma yad ba falfalan’. Arrogon, urngin chon e tabinaw e yad be sonnag e piin ni bay ra bad ko abich ma ngar ked e ggan nib fel’ ma nge falan’ e piin ni tafager u taabang.

² Gad e pi Kristiano e gad be sonnag ban’en ni ka baga’ fan boch. Mang e gad be sonnag? Gad be sonnag e “rran rok Jehovah”! Chiney ni dawori yib e re rran nem e thingar da boded Micah ni profet ni gaar: “Machane gag e gu be tor ngak Somol. Bay ug par ni ke l’agan’ug ngak Got ma gu be sonnag, yi ir e bayi ayuwegneg.” (Micah 7:7) Ngan sonnag ban’en e be yip’ fan ni dariy ban’en ni ngan rin’, fa? Danga’. Ya boor e maruwel ni ngan rin’.

3. Rogon e thin ni bay ko 2 Peter 3:11, 12, susun uw rarogon laniyan’ e pi Kristiano?

³ Ke ayuwegdad apostal Peter ni nge puluw lanin’dad u nap’an ni gad be son. Be gaar: “Mit i mang girdi’ e susun e ngam boded? Pangimed e nge par nib thothup ma kam pied gimed nga pa’ Got ma gimed be sonnag e chirofen nem ni ir e rran rok Got, mi gimed athamgiliy nrogon nrayog romed nge papey nge taw ngay!” (2 Peter 3:11, 12) Mu tay fanam iyan riy ni gathi be deeriy Peter ko miti mang girdi’ ni ngada boded ni gowa de nang. U lan fagali babyor ni yoloy Peter u lan e Bible e ke weliy ngak e pi Kristiano ko miti mang girdi’ ni susun ngar boded. Ki weliy ngorad ni “pangirad e nge par nib thothup ma ngar pied yad nga pa’ Got.” Yugu aram rogon ni 30 e duw ni ke yan ni ka nap’an ni weliy Jesus Kristus fare pow ko “tomren e re m’ag ney,” kub t’uf ni nge ayuw e Kristiano. (Matthew 24:3) Thingar ra “sonnaged ma ngar tedan’rad” ko rran rok Jehovah.

4. Mang e kub muun ko “tayan’ ko rran rok Jehovah”?

⁴ Fare bugithin nu Greek ni kan pilyeg ni “tayan’” e be yip’ fan ni “nge papey nge taw ngay.” Riyul’ ni dabiyog ni ngada “paynaged” e rran rok Jehovah. Dabiyog ya dada nanged e “re rran nem ara re awa nem” ni ra yib Jesus Kristus riy nge gechignag e pi toogor rok e Chitamangin. (Matthew 24:36; 25:13) Reb e babyor ni ma weliy fan yu bugithin nu Greek e be yog ni fare bugithin ni “tayan’” e be yip’ fan ni “ngan paynag ara be yip’ fan e pasig ara maruwel nib gel ara ngan tayan’ nga ban’en.” Ere be yog Peter ngak e pi Kristiano ni “ngar adaged” ni nge yib e rran rok Jehovah. Ngar adaged ni faanra ngar tedan’rad ngay. (2 Peter 3:12, footnote) Kari chugur e “rran rok Jehovah ni reb e rran ni ba ga’ ma ba gel e gafgow riy” ere thingar da sonnaged ni gad be tayan’ ngay.​—Joel 2:31.

Ngada Songad Ni Be “Par Pangidad Nib Thothup”

5. Uw rogon ni gad ra dag ni ri gad adag ni ngada guyed e “rran rok Jehovah”?

⁵ Faanra gad ba adag ni ngada pared ni gadad ba fas ko rran rok Jehovah ma thingari m’ug ni gad ba adag ni nge “par pangidad nib thothup ma kada pied gadad nga pa’ Got.” Fare thin ni “pangiy nib thothup” e ma puguran ngodad e thin rok Peter ni gaar: “Um folgad rok Got ma tin nib kireb ni um m’ad ni bochan ko ngiyal’ ndawor mu nanged Kristus riy e dab kum paged nge mang ir e i gagiyegnag pangimed. Machane ngam pired ni gimed ba thothup u fithik’ urngin e tin ni gimed be rin’, ni bod rogon Got nib thothup ni ir e ke pininged. Ya be gaar e babyor nib thothup, “Thingar mpired ni gimed ba thothup, ya gub thothup.””​—1 Peter 1:14-16.

6. Mang e thingar da rin’ed ni fan ni ngada thothupgad?

⁶ Faanra ngada thothupgad ma thingar da pared nib biech e dowef rodad, mab biech lanin’dad, nge yalen rodad mab biech e machib rodad. Gad be fl’eg rogodad ni fan ko “rran rok Jehovah” ni gad be par ni gad ba thothup ni bay fithingan Jehovah u dakendad, fa? Gathi ban’en nib mom ni ngada pared ni gad bbiech ni bochan e ka be kireb iyan yalen e fayleng. (1 Korinth 7:31; 2 Timothy 3:13) Gad be pirieg ni kab gel e thil ko yalen ni gad be fol riy nge yalen ni be fol e fayleng ngay, fa? Faan manga de gel e thil riy ma thingar da tedan’dad. Sana kab fel’ e yalen ni gad be fol riy ko yalen e fayleng, machane be war iyan, fa? Faan manga arrogon, ma thingar da rin’ed ban’en ngada yal’uweged ya nge falan’ Got ngodad.

7, 8. (a) Uw rogon nrayog ni ngada paged talin fene ga’ fan ni nge “par pangidad ni ba thothup”? (b) Mang e thingar da rin’ed ni ngada yal’uweged gadad?

⁷ Chiney e bay e tin puwlag ban’en u lan e Internet ni rayog ni nge yib nga lan e computer ma rayog ni ngan yaliy nib mith u tabinaw, ere i yog reb e togta ni “dabi mus urngin e puwlag” nrayog ni nge yaliy e girdi’ u computer rorad. Faan manga gad ra gay e puwlag u lan e Internet ma gad be dariy fannag e motochiyel u Bible ni nge “dab mmath nga ban’en ni dab ni math ngay.” (Isaiah 52:11) Faanra arrogon ma gad be “tayan’ ko rran rok Jehovah,” fa? Gad be tay ni de chugur e re rran nem, ma rayog ni nge alit lanin’dad ko tin puwlag, ya bay e tayim riy ni ngada biechnaged lanin’dad, fa? Faanra kada pirieged ni bay e re magawon ney rodad, ma ri baga’ fan ni ngada yibilayed Jehovah ni nge “n’igin lan owchedad ni nge chuw ko tin ni dariy fan ban’en ma nge ayuwegdad ni ngada pared nib fas u kanawo’ rok”!​—Psalm 119:37.

⁸ Baga’ ni be fol e Pi Mich Rok Jehovah ni yad ba fel’ yangaren ara yad pilibthir ko yalen rok Got, ma yad be palog ko tin nu fayleng ni be waliyey. Be “par pangirad nib thothup” ya yad manang ni baga’ fan e ngiyal’ ni gad be par riy ma ra yib e “rran rok Jehovah ni bod ba moro’ro’” (2 Peter 3:10) Ngongol rorad e be micheg ni yad “be sonnag ma yad be tayan’ ko rran rok Jehovah.”a

Ngada Songad Ni “Kada Pied Gadad Nga Pa’ Got”

9. Mang e gad ra rin’ ni bochan e rib t’uf Got rodad?

⁹ Ri baga’ fan ni “ngada pied gadad nga pa’ Got” ni fan e nge par e rran rok Jehovah u lanin’dad. Ngada pied gadad nga pa’ Got e be yip’ fan ni gad be liyor ngak ma re liyor nem e ra n’igindad ni ngada rin’ed e tin nib falan’ ngay. Yul’yul’ rodad ngak Got e aram e n’en ni ma suruydad ni ngada ngongolgad nrogon e liyor rodad ngak Got. Mm’agan’ Got ngay ni nge “urngin e girdi’ ni ngar thapgad ngak ma ngar nanged e tin nib riyul’.” (1 Timothy 2:4) “Dubun Got ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (2 Peter 3:9) Ere susun e ngada gelnaged e athamgil rodad ni ngada ayuweged yugu boch e girdi’ ni ngar nanged Jehovah ma ngar folwokgad rok ni bochan e liyor rodad ngak Got e be’ k’aringdad ni ngada rin’ed, fa?​—Efesus 5:1.

10. Mang fan ni ngada ayuwgad ko “gelngin e sasalap ko chogowen e salpiy”?

¹⁰ Faan gad ra m’oneg Gil’ilungun Got ma ra yoor ban’en ni gad ra rin’ ni gad be liyor ngak Got. (Matthew 6:33) Ere thingari puluw e chugum nu fayleng u wan’dad. I ginangdad Jesus ni gaar: “Mu ayuwgad mi gimed guy rogomed rok urngin mit e chogow; ya bin riyul’ e yafos ku be’ e gathi ni ngongliy ko pi n’en ni ir e mmil suwon ngak faanem, ndemturug rogon feni yoor ban’en rok.” (Luke 12:15) Sana mo’maw’ ni ngada lemnaged ni gad ra magawon ni bochan chogowen e salpiy, machane ngada ayuwgad ya rayog rok e “magafan’ ko re par rodad ney u fayleng nge chogowen e fel’ rogon e yib i thang u wun’dad fare thin rok Got nnog ngodad.” (Matthew 13:22) Mo’maw’ ni ngada maruweliyed e tin ni nge yog ngodad ni fan ko yafas rodad. U boch e nam nu fayleng e ma lemnag boch e girdi’ riy ni thingar ranod nga yugu boch e nam ni boor ban’en riy ma ngar chuwgad ko chon e tabinaw rorad ni bokum e duw ni fan e nge fel’ boch e par rorad. Mus ko boch e girdi’ rok Got ni kar lemgad ni aram rogon. Sana rayog ni nge yog boch e tin nib fel’ ngak chon e tabinaw rorad ni bochan e kar ranod nga yugu reb e nam. Machane uw rarogon e michan’ rok e piin ni yad ba t’uf rok ni yad bay u tabinaw? Faanra dariy lolgen e tabinaw ma bay gelngin e michan’ rorad ni fan e ngar pared ni yad ba fas ko chirofen ni rran rok Jehovah, fa?

11. Uw rogon ni dag be’ ni i maruwel u yugu reb e nam ni gathi nam rok ni ka baga’ fan e liyor ku Got ko bin ni nge yog e salpiy ngak?

¹¹ Be’ nu Manila ni ma maruwel u Sapan e i fil e machib nu Bible rok e Pi Mich Rok Jehovah u Sapan. Nap’an ni fil morngaagen e maruwel ni ke mil fan ngak ni ir lolgen e tabinaw rok, me nang ni thingari ayuweg chon e tabinaw rok ni ngar liyorgad ngak Jehovah. (1 Korinth 11:3) I togopuluw e ppin rok ko fare machib ni ka fini pirieg e pumoon rok ma ba adag ni ngki pi’ e salpiy ko bin ni nge sul nga tabinaw nge fil e machib ngak chon e tabinaw rok. Machane ke sul fare pumoon nga tabinaw ni bochan e manang ni ke ngoch nap’an maku bochan e ke t’ufeg girdien e tabinaw rok. I gum’an’ u puluwon chon e tabinaw rok me yib angin. Ya munmun me liyor chon e tabinaw rok ngak Got u taabang, ma ppin rok e ma machib ni gubin ngiyal’ ni ir e pioneer.

12. Mang fan ni nge m’on e tirok Got ban’en u wan’dad?

¹² Rayog ni ngan taarebnag rarogodad ngak e piin ni yad ma par u lan ba naun ni be muuruf. Bay e llowan’ riy ni ngan gurgur ngan ayuweg e pi chugum u lan fare naun ni be yik’ ni be n’en ni nge puth, fa? Gathi ka baga’ fan boch ni ngan ayuweg e yafas​—ni yafas rodad nge yafas rok girdien e tabinaw rodad nge yugu boch e girdi’ ni ma par u lan e re naun nem, fa? Be n’en ni nge puth e re m’ag nib kireb ney ma ke magawon e yafas rok e girdi’. Gad manang ni aram rogon, ere gad ma m’oneg e tirok Got ban’en ma gad ba pasig ma gad ma tayan’ ko fare machib u morngaagen Gil’ilungun Got ni ra ayuweg e yafas rok e girdi’.​—1 Timothy 4:16.

Ngam Pired Ni Gimed Mmachalbog

13. Susun uw rarogodad u nap’an ni yib e rran rok Jehovah?

¹³ I tamilangnag Peter ni thingar da son gad ni gaar: “Pi tafager rog, n’umngin nap’an ni gimed be par ni gimed be sonnag e re rran nem e nguum athamgiliyed ngam pired ni gimed mmachalbog ma dariy thibngimed u p’eowchen Got ma ngam pired nib aw e gapas u thilmed Got.” (2 Peter 3:14) I fonownag Peter e pi Kristiano ni nge par pangirad nib thothup ma ngar pied yad nga pa’ Got, maku be yog ni thingari piriegrad Jehovah ni yad bbiech ni bochan rachaen Jesus. (Revelation 7:9, 14) Ere thingari mich e maligach rok Jesus u wan’ be’ me ognag ir ngak Got nge un ko taufe ni ir e tapigpig rok Jehovah.

14. Mang e ra rin’ be’ ya nge par nib machalbog?

¹⁴ I yog Peter ngodad ni ngada athamgilgad ni ngada pared ni gad “machalbog.” Gad ma par nib biech e ngongol rodad nge pangidad, fa? Ri dariy bochi alit ko fayleng u dakendad, fa? Nap’an ni gad ra pirieg ni bay bochi alit u daken e mad rodad gad ma ra guy rogon ni ngada chuweged ko chi ngiyal’ nem. Ma faanra rib t’uf e re mad nem, gad ra klinnag nib fel’ rogon. Ku arrogon lanin’dad ni faanra gowa ke alit madan e Kristiano ni aram e bay bochi thibngin pangidad ara ngongol rodad, fa?

15. (a) Mang fan ni ka nog ngak piyu Israel ni nge tat’ar taban e mad rorad? (b) Mang fan ni ba lingagil e pi tapigpig rok Jehovah e ngiyal’ ney ni yad ba thil ko yugu girdi’?

¹⁵ Kan tay chilen ngak piyu Israel ni nge “tat’ar taban e mad rorad” ma ngar ted “bochi tret ni raen blue u charen e gin nib tat’ar ko mad rorad.” Mang fan? Ya nge puguran ngorad e pi motochiyel rok Jehovah ma ngar folgad ngay ma ngar “thothupgad” u p’eowchen e Got rorad. (Numbers 15:38-40) Gad e pi tapigpig rok Jehovah e ngiyal’ ney ma gad ba lingagil ni gad ba thil ko fayleng ni bochan e gad ma fol ko pi motochiyel nge pi machib rok Got. Susun, bbiech e yalen ni gad ma fol ngay, ma gad tay nib thothup e racha’, ma dab da uned ko meybil ko urngin miti liyos. (Acts 15:28, 29) Boor e girdi’ ni ma tay fadad ni bochan e mudugil u wan’dad ni ngada pared ni dariy e alit u dakendad.​—James 1:27.

Thingar Da Pared Ni “Dariy Thibngidad”

16. Mang e ra rin’ be’ ya nge par ni “dariy thibngin”?

¹⁶ Ku be yog Peter ni ngada pared ni “dariy thibngidad.” Uw rogon nrayog ni nge dariy thibngidad? Rayog ni ngan falay ara chuweg bochi yang e alit, machane dabiyog ni ngan falay thibngin ban’en. Ya ba thibngin e ba ubchiya’ boch ma be yip’ fan ni bay ban’en u fithik’ ni ba kireb. I yog apostal Paul ngak e pi Kristiano nu Filippi ni gaar: “Um rin’ed urngin ban’en ndab um gun’gun’gad ara um tugthingad nge yog ni mpired ndariy thibngimed ma gimed mmachalbog, ma pi fak Got gimed ni gimed ba yal’uw ni gimed be par u fayleng u fithik’ e girdi’ ndar yal’uwgad ma yad ba kireb.” (Filippi 2:14, 15) Faan gad ra fol ko re fonow nem, ma dab da gun’gun’gad ma dab da uned ko tugthin ma gad ra pigpig ku Got nib puluw lanin’dad. Ya gad ra pigpig ni bochan e ba t’uf Jehovah rodad ma kub t’uf e girdi’ rodad ma aram fan ni gad ra machibnag “fare thin nib fel’ ni morngaagen Gil’ilungun Got.” (Matthew 22:35-40; 24:14) Ma gad ra machibnag fare thin nib fel’ ni yugu aram rogon ni de nang e girdi’ fan ni gad ma pag e tayim rodad nge gelngidad ni ngada ayuweged yugu boch e girdi’ ni ngar nanged Got nge Thin Rok ni Bible.

17. Susun mang fan ni ngada adaged ni ngada pigpiggad u lan e ulung ni Kristiano?

¹⁷ Gad ba adag ni ngada pared ni “dariy thibngidad” ere gad ra fl’eg i yaliy fan ni gad ma rin’ fapi n’en ni gad ma rin’. Kada paged kanawoen e fayleng ni yad ma rin’ ban’en ni fan ngorad ara nge yog e salpiy ngorad fa nge gilbugurad. Faan gad be athamgil ni nge yog boch e maruwel ngodad u lan e ulung ni Kristiano, ngada rin’ed ni bochan e ba t’uf Jehovah rodad ma kub t’uf yugu boch e girdi’ rodad. Ba fel’ ni ngan guy e pumoon ni yad “ba adag ni ngari mang reb e girdi’ ni ngi i tay murung’agen girdien e galesiya” ni yad ba falan’ ngay ma yad ba sobut’an’ ni ngar pigpiggad ku Jehovah nge piin ni ke mich u wan’rad. (1 Timothy 3:1; 2 Korinth 1:24) Piin ni ke bung rogorad ni ngar manged e piilal e thingar ra “gafaliyed fare ran’ ni saf ni Got e ke pi’ ngorad, nguur gafaliyed yad nib m’agan’rad ngay nrogon nib m’agan’ Got ngay ni ngar rin’ed, ma gathi nguur rin’ed nde m’agan’rad ngay. Ra ngongliyed e maruwel rorad ni gathi ke mus ni bochan e salpiy ni yibe pi’ riy ngorad, machane ngar ngongliyed ni fan e ri yad ba adag ni ngar pigpiggad ngak Got. Dab ra guyed rogon ni ngar suweyed e piin ni kan pi’rad ngorad ni ngar gafaliyed yad, machane ngar pired nib fel’ pangirad ya nguun folwokgad rorad.”​—1 Peter 5:1-4.

Thingar Da Pared Ni Gad “Ba Gapas”

18. Ba lingagil e Pi Mich Rok Jehovah ni bochan e mang?

¹⁸ Tomur riy me yog Peter ngodad ni ngada pared ni gad “ba gapas.” Faan gad ra fol ko re thin ney ma thingari gapas thildad Jehovah nge yugu boch e girdi’. I tamilangnag Peter ni baga’ fan ni “ngari bigimed me t’uf rok bigimed” ma nge par e gapas u thilin e pi Kristiano. (1 Peter 2:17; 3:10, 11; 4:8; 2 Peter 1:5-7) Faanra nge gapas thildad ma thingar nge bagadad ma nge t’uf bagadad rok. (John 13:34, 35; Efesus 4:1, 2) Ri ba lingagil e t’ufeg rodad nge gapas rodad u nap’an e international convention rodad ni ma muulung boor e nam u taabang. U nap’an reb e convention u Costa Rica ko duw ni 1999 e ke kireban’ be’ ni bay e kantin rok u skojo ya Pi Mich Rok Jehovah e kar magawonnaged e gini bay e kantin rok ni dar naabgad ngay. Machane bin migid e rran e ke guy faanem e t’ufeg nge gapas ko Pi Mich Rok Jehovah ni yugu aram rogon ni de nang e girdi’ ko re nam nem e piin ni yad be yib ko fare convention. Bin tomur e rran e ke un faanem ni bay e kantin rok i pining e magar ngak e piin ni yad be yib ko convention me pining be’ ni nge fil e Bible study ngak.

19. Mang fan ni thingar da athamgilgad ni nge gapas thildad e piin ni ke mich u wan’rad?

¹⁹ Gelngin e athamgil ni gad be tay ni nge aw e gapas u thildad e pi walagdad ni girdien e ulung e ku aram gelngin e athamgil ni gad be tay ni gad be sonnag e rran rok Jehovah nge fare m’ag nib biech ni ke micheg. (Psalm 37:11; 2 Peter 3:13) Faan manga mo’maw’ ni nge aw e gapas u thildad be’ ni girdien e ulung e chine ma ga be lemnag ni rayog rodad ni ngada pared ni gad ba gapas u Paradis, fa? Faanra bay e magawon u thildad reb e walagdad ma thingar da “fl’eged thildad walagdad ni ka chi ngiyal’ nem.” (Matthew 5:23, 24) Thingar da rin’ed ya nge gapas thildad Jehovah.​—Psalm 35:27; 1 John 4:20.

20. Uw boch e kanawo’ ni ra m’ug riy ni gad be “son”?

²⁰ Ere “gad be sonnag ma gad be athamgiliy nrogon nrayog rodad nge papey nge taw e rran rok Jehovah,” fa? Be m’ug ni gad ba adag ni nge yib tomren e re m’ag nib kireb ney ni faanra gad be par ni gad ba thothup u fithik’ e re fayleng ney ni de yalen. Maku be m’ug ko ngongol rodad ni gad be liyor ngak Got ni gad ba adag ni nge yib e rran rok Jehovah ma gad ba adag ni ngada pared u tan pa’ Gil’ilungun Got. Maku be m’ug ni gad ba adag ni ngada pared u lan e gapas ko fare m’ag nib biech ya gad be guy rogon ni nge aw e gapas u thildad pi walagdad e chiney. Aram e pi kanawo’ ni gad be dag ni gad “be sonnag” ma “gubin ngiyal’ ma bay e rran rok Jehovah u lanin’dad.”

[Footnote]

Ka Ga Manang?

• Mang fan fare thin ni “ngada tedan’dad ko rran rok Jehovah”?

• Uw rogon ni ra m’ug ko pangidad ni gad be “son”?

• Mang fan nib t’uf ni nge m’ug ko ngongol rodad ni gad ma liyor ngak Got?

• Mang e thingar da rin’ed ya nge piriegdad Jehovah ni “gad machalbog ma dariy thibngidad ma gad ba gapas”?

[Picture on page 7]

Be m’ug ni gad be “son” ko pangidad nib thothup

[Pictures on page 8]

Fare maruwel ni ngan machibnag Gil’ilungun Got e ma ayuweg e yafas

[Picture on page 10]

Nap’an ni gad be sonnag e rran rok Jehovah, ngada athamgilgad ni nge gapas thildad yugu boch e girdi’