Guruy ni 4

Mini’ Moonyan’?

Satan ni Moonyan’ e yib u uw? (1, 2)

Uw rogon ni ma bannag Satan e girdi’? (3-7)

Mang fan ni susun ni ngam togopuluw ku Moonyan’? (7)

1. Fan fare thin ni “moonyan’ ” e ba sor fan ku be’ ni be thibthibnag be’. Ma fan e “Satan” e toogor ara ta togopuluw. Kan pining e gal ngochol ney ngak e an toogor rok Got nth’abi ga’. Som’on ma immoy rok Got u tharmiy nib engel nib flont. Ma faani munmun, mi i lemnag fene sorok me adag ni rib fel’ ni nga un liyor ngak ni wod ni yima liyor ku Got.—Matthew 4:8-10.

2. Re engel ney ni Satan e ir e non ngak Efa u l’igin e porchoyog. I bannag me n’igin ni nge th’ab Efa e motochiyel ku Got. Ere ke togopuluw Satan nga mat’awun Got ko n’en ni ka nog e “sovereignty” ngay fa liw rok ni ir e An Th’abi Tolang. Yog Satan ni de mat’aw rogon e gagiyeg rok Got ma der ayuweg e girdi’ Rok. Miki guy rogon ni nge maruwar u wan’uy ni rayog rok e girdi’ ni ngar pared ni yad ba yul’yul’ ku Got. Ma bochan ni ke rin’ ni aray rogon, ma ar fan ni ke mang toogor rok Got. Ma ar fan ni kan nog Satan ni Moonyan’ ngak.—Genesis 3:1-5; Job 1:8-11; Revelation 12:9.

3. Ma sasalipy Satan e girdi’ ni ngar liyorgad ngak. (2 Korinth 11:3, 14) Reb e kanawo’ ni ma chafeg e girdi’ riy nga orel e daken e pi yurba’ i teliw ni googsur. Faanra be machibnag barba’ e teliw e tin de riyul’ ni morngaagen Got ma riyul’ ni be pigpig ku Satan nrogon nib m’agan’ ngay. (John 8:44) Ere piin girdien e pi yurba’ i teliw ni googsur e kari mich u wan’rad ni yad be liyor ku fa bin riyul’ e Got. Machane rriyul’ ni yad be pigpig ku Satan. Ya ri ir ‘fare got ko re fayleng ney.’—2 Korinth 4:4.

4. Pig e ku aram reb e kanawo’ ni ma fanay Satan ni nge tay e girdi’ riy nga tan gelngin. Yad ma pining e kan ni ngan ayuwegrad, min kirebnag boch e girdi’, mi nog ko mang e bayi buch boch ngaram, fa ni fl’eg boch e maanang. Ere Satan e ir fare gelngin e kireb ni be ta’ tanggin e pi n’ey ni gubin. Ma faanra nge felan’ Got ngodad ma ngad pared u orel ko pig.—Deuteronomy 18:10-12; Acts 19:18, 19.

5. Ku ma bannag Satan e girdi’ u daken e tolangan’ ko yu raba’ i girdi’ nge liyor ni yima tay fan boch e ulung ko am. Ma boch e girdi’ e ma lemnag ni nam rorad ara birorad e raen e kab fel’ boch ko tirok yugu boch e girdi’. Machane de riyul’ e re n’ey. (Acts 10:34, 35) Ma boch e girdi’ e ma sap nga boch e ulung ni ngan pithig e magawon ko girdi’. Ma faan yira rin’ ni aray rogon ma aram e kar siyeged Gil’ilungun Got. Ma kari mus e re n’en ra pithig e pi magawon rodad.—Daniel 2:44.

6. Ku reb e kanawo’ ni ma wawliy Satan e girdi’ ngay e ararnag ko denen. Ke yog Jehovah ngodad ni ngad paloggad ko ngongol ni denen ya ra kirebnagdad. (Galatia 6:7, 8) Sana ra piningem boch e girdi’ ni ngam un ngorad i rin’ e pi n’em. Ma dab mu pag talin ni Satan e ir e ba adag ni ngam rin’ e pi n’en nem.—1 Korinth 6:9, 10; 15:33.

7. Ku ma fanay Satan e gafgow nge togopuluw ni ngeb ngom ya ngam pag Jehovah. Sana boch e girdi’ ni rib t’uf rom e yad ra damumuw ngom ni ga be fil e Bible. Ma boch e yad ra moningnagem. Ma susun mini’ e ngam pi’ puluwon e yafas rom ngak? Ba adag Satan ni nge k’aringem ngam tal i fil morngaagen Jehovah. Dab mu pag Satan nge gel! (Matthew 10:34-39; 1 Peter 5:8, 9) Faan ga ra togopuluw ku Moonyan’ ma aram e rayog ni mu falfalan’nag Jehovah ma ga be dag ni kam tay tanggin mat’awun e gagiyeg Rok.—Proverbs 27:11.

[Sasing ko page 9]

Pi yurba’ i teliw ni googsur, nge pig, nge ufanthin ni fan ko nam rom e ma bannag e girdi’

[Sasing ko page 9]

Ga ra togopuluw ku Satan ni ga ra ul’ul’ i fil morngaagen Jehovah