Chon Mini’ E Toogor Rok Got?

En Pilungen e toogor rok Got e Satan ni fare Moonyan’. Cha’nem e ba kan ni ir e ke togopuluw ngak Jehovah. Ka be ulul Satan ngay ni nge cham ngak Got ya yugu be k’aring e wagey ko girdi’. Satan e ba kireb laniyan’. Ba malulfith l’igin mab tathang e fan.​—John 8:44.

Yugu boch e kan ni kar uned ngak Satan kar togopuluwgad ku Got. Ma pining e Bible e demon ngorad. Bod Satan, ma pi demon nem e ku yad e toogor rok e girdi’. Yad baadag ni nguur gafgowniged e girdi’. (Matthew 9:32, 33; 12:22) Me Jehovah bayi thang Satan nge pi demon rok ni manemus. Ke ngoch nap’rad ni ka ba’ ni yad be gafgownag e girdi’.​—Revelation 12:12.

Faanra ga baadag ni ngam fager ngak Got ma dab um rin’ e tin baadag Satan ni ngam rin’. Satan nge fapi demon e yad ba fanenikay Jehovah. Yad e pi toogor rok Got, me ere ku yad baadag ni ngar suruyed gur ngkum mang toogor rok Got. Gur e ngam mel’eg ko mini’ e ngam fl’eg laniyan’​—Satan fa Jehovah. Faanra ga baadag e yafos ni manemus, ma nga mel’eg ni ngam rin’ e tin baadag Got. Boor e kanawo’ nge boch e gosgos ni ma bannag Satan e girdi’ riy. Ke yoor e girdi’ ni ke bannagrad.​—Revelation 12:9.