Guruy ni 1

Ra Diin Ma Ga Nang e Tin ni Ba T’uf ni Ngad Rin’ed ku Got?

Mang e ri baga’ fan ni be tamilangnag e Bible? (1)

Thin rok mini’ e bay u Bible? (2)

Mang fan ni ngari mu fil e Bible? (3)

1. Bible e ba taw’ath ni rib ga’ fan ni yib rok Got. Bod bangi babyor ni yoloy ba matam nib fel’ nge yib ngak pi fak. Ma weliy ngodad e tin riyul’ u morngaagen Got—nge ir mini’ nge rogon e ngongol ni ba adag. Ma weliy rogon ni ngan athamgil u fithik’ e pi magawon nge rogon min pirieg e bin riyul’ e falfalan’. Kari mus ni goo Bible e ra yog ngodad rogon e n’en ni thingar da rin’ed ni ra falan’nag Got.—Psalm 1:1-3; Isaiah 48:17, 18.

2. Fare Bible e yoloy 40 e girdi’ ni yad ba thilthil ni ke pag 1,600 e duw, ni tabab ko 1513 B.C.E. Ma kan fl’eg ni nochi ke babyor ni 66 ken. Pi cha’ ni ra yoloyed e Bible e Got e yib i pi’ nga laniyan’rad. Ere kar yoloyed ni lem rok Got ma gathi yad. Ere Got nu tharmiy ma gathi be’ u fayleng e Ani Thin Rok e Bible.—2 Timothy 3:16, 17; 2 Peter 1:20, 21.

3. Got e ke guy rogon ni nge dabni pag e Bible ma ke n’igin ni ngan yoornag ken. Ere dariy ba mit e babyor ni kan fl’eg ni bod urngin ken e Bible. Gathi gubin e girdi’ e yad ra falfalan’ ngay ni yad ra guyem ni ga be fil e Bible, machane dab mu tal ni bochan e re n’em. Ya tin bay yib nga m’on ni dabi mus ni fan ngom e ra yan u rogon ni ngam nang Got ma ga rin’ e tin nib m’agan’ ngay ni yugu demtrug rogon e togopuluw nra yib riy ngom.—Matthew 5:10-12; John 17:3.