Riyul’ ni Yib fare Thin nib Fel’ Rok Got, Fa?

1. Mini’ e Thin rok e bay u lan e Bible?

Bay e thin nib fel’ ni kan yoloy nga lan e Bible ni be yog nra par e girdi’ u fayleng ni manemus. (Psalm 37:29) Bay 66 e babyor u lan e Bible. I fanay Got 40 e pumoon ni ngar yoloyed e pi babyor ney. Fa lal ken nem e babyor nib m’on ko Bible e Moses e yoloy ni ke pag 3,500 e duw ni ke yan. Apostal John e yoloy e bin tomur e babyor ni ke pag 1,900 e duw ni ke yan. Lem rok mini’ e yoloy e pi girdi’ ney nga Bible? I fanay Got gelngin nib thothup ni nge thagthagnag e thin rok nga lanin’rad. (2 Samuel 23:2) Kar yoloyed e thin rok Got, ma gathi thin rorad. Ere, Thin rok Jehovah e bay u lan e Bible.​—Mu beeg e 2 Timothy 3:16; 2 Peter 1:20, 21.

2. Uw rogon ma gad nang nib riyul’ e thin nu Bible?

Gad manang ni Bible e yib rok Got ni bochan e ba puluw e pi yiiy ni bay riy. Dariy be’ nrayog rok ni nge rin’ ban’en ni aram rogon. (Joshua 23:14) Kemus ni Got ni Gubin Ma Rayog Rok e rayog ni nge nang e n’en nra buch rodad boch nga m’on.​—Mu beeg e Isaiah 42:9; 46:10.

Bochan ni Bible e yib rok Got, ma dariy ba ken e babyor ni taareb rogon ngay. Bokum bilyon ken e Bible ni kan wereg u boor mit e thin. Yugu aram rogon ni ke n’uw nap’an ni kan yoloy e Bible, machane ba puluw e thin riy ko science. Yugu aram rogon ni 40 e girdi’ nra yoloyed e Bible, ma de togopluw reb e thin riy nga reb. N’en ni be yog e Bible u murung’agen e t’ufeg e yib rok e bin riyul’ e Got, ni aram fare Got ko t’ufeg, ma bay gelngin ni nge thilyeg e yafas ko girdi’. Pi n’ey e be micheg ngak bokum milyon e girdi’ ni Bible e Thin rok Got.​—Mu beeg e 1 Thessalonika 2:13.

3. Mang e be weliy e Bible?

Fare thin nib fel’ ni murung’agen e n’en nib m’agan’ Got ngay ni fan ko girdi’ e aram e n’en nib ga’ ni be weliy e Bible murung’agen. Be tamilangnag rogon ni ke mul fare tow’ath u pa’ e girdi’ ni ngan par u paradis u fayleng, nge rogon ni yira sulweg bayay.​—Mu beeg e Revelation 21:4, 5.

Bay e motochiyel, nge kenggin e motochiyel, nge fonow ko Thin rok Got ni aram e Bible. Ku bay riy murung’agen e pi n’en ni i rin’ Got ko girdi’ kakrom ni be tamilangnag rarogon. Bible e ra ayuwegem ngam nang Got. Be tamilangnag rogon nrayog ni ngam mang fager rok.​—Mu beeg e Psalm 19:7, 11; James 2:23; 4:8.

4. Uw rogon nrayog ni ngam nang fan e thin nu Bible?

Rogon ni kan yoloy e re ke babyor ney ni nge ayuwegem ni ngam nang fan e thin nu Bible, e ku aram rogon ni i machib Jesus. I weliy ma be tamilangnag “fan” e thin ni bay u lan e babyor nib thothup.​—Mu beeg e Luke 24:27, 45.

Gathi ri boor ban’en nib fel’ ni bod rogon fare thin nib fel’ ni yib rok Got. Machane, boch e girdi’ e yad be darifannag e re thin ney ma dubrad ni ngar motoyilgad ngay. Machane, dabi mulan’um, ya athap rom ko yafas ni manemus e be yan u rogon e athamgil ni ga ra tay ni ngam nang Got nib fel’ rogon.​—Mu beeg e John 17:3.