Pi Deer Ni Bay E Fulweg Riy U Bible

Riyul’ ni Bible e Thin rok Got, Fa?

Dakuriy reb e babyor u bang ni bod e Bible. Bokum bilyon ken ni kan fal’eg u boor mit e thin. Thin nu Bible e bay e gonop riy ma bay gelngin ni nge thilyeg e ngongol ko girdi’ nge yag ni ngar rin’ed e tin nib mat’aw.​—Mu beeg e 1 Thessalonika 2:13; 2 Timothy 3:16.

Gad manang ni Bible e yib rok Got ya bochan ni thin riy e be yiiynag e pi n’en nra buch boch nga m’on. Dabiyog rok be’ ni nge yiiynag e pi n’en ni bay nga m’on. Mu lemnag fare babyor rok Isaiah. Kan pirieg ba ken e re babyor nem u lan ba bokngo nib chugur ko fare Dead Sea ni kan fal’eg ni ke pag raay e duw u m’on ni gargelnag Jesus. Bay e thin ko re babyor nem ni be weliy ni dakuriy be’ ni ku ra par ko fare mach nu Babylon. I lebug e re n’em u tomuren boor e duw ni machib Jesus.​—Mu beeg e Isaiah 13:19, 20; 2 Peter 1:20, 21.

Uw rogon ni kan yoloy e Bible?

Fare Bible e kan yoloy u lan 1,600 e duw. Aningeg i ragag e girdi’ nra yoloyed e Bible, ma taareb e kenggin e machib nra folgad riy, ma pi n’en nra yoloyed e de togopuluw reb nga reb. Uw rogon ni kar rin’ed e re n’ey? I thagthagnag Got nga lanin’rad ni ngar yoloyed e thin riy.​—Mu beeg e 2 Samuel 23:2.

Yu ngiyal’ e ma non Got ngak e piin ni ur yoloyed e Bible u daken e pi engel, ara ma piliyeg e changar ko girdi’, ara u daken e pi n’en ni ka nog u malik’ay. Ba ga’ ni ma thagthagnag Got e tin nib m’agan’ ngay nga laniyan’ e en ni nge yoloy bang ko Bible, me pag ni nge mel’eg yu bugithin ni ir e nge fanay ni nge tamilangnag fan e thin rok.​—Mu beeg e Revelation 1:1; 21:3-5.

Faanra ga baadag ni ngkum nang boch, mag guy e guruy ni 2 ko re ke babyor ney ni ke fal’eg e Pi Mich Rok Jehovah

Rayog ni ngam downloadnag ko www.jw.org