Guruy ni 8

Tabinaw ni Ma Falan’nag Got

Mang e liw ku figirngiy u tabinaw? (1)

Susun uw rogon e ngongol ko ani figirngiy ngak leengin? (2)

Mang e ba mil fan ngak e matam? (3)

Mang e liw ko an leengiy u lan e tabinaw? (4)

Mang e ba t’uf ku Got ni nge rin’ e gallabthir nge piin bitir? (5)

Mang e be yog e Bible u morngaagen e mabgol ni ra be’ ma be par u bang nge tin ni ke dar? (6, 7)

1. Be yog e Bible ni ani figirngiy e ir lolugen e tabinaw. (1 Korinth 11:3) Ra reb i figirngiy ma ri taareb leengin. Ma kar mabgolgow nib puluw ko motochiyel.—1 Timothy 3:2; Titus 3:1.

2. Susun thingari t’ufeg e an figirngiy leengin ni gowa ir. Susun rogon e ngongol rok ngak e nge bod rogon e ngongol rok Jesus ngak pi gachalpen. (Efesus 5:25, 28, 29) Susun dabi li’ leengin fa i rin’ e tin ba kireb ngak ni yug demtrug rogon. Ya susun nga i ta’ fan mi i pining e magar ngak.—Kolose 3:19; 1 Peter 3:7.

3. Ra reb e matam ma susun nge maruwel nib gel ni nge ayuweg chon e tabinaw rok. Thingari yognag e ggan nge mad, nge naun ni fan ngak leengin nge bitir. Maku thingari ayuweg e tabinaw rok ko tirok Got ban’en. (1 Timothy 5:8) Ir e nge pow’iy e tabinaw rok me ayuwegrad ngar filed morngaagen Got nge tin ba m’agan’ ngay.—Deuteronomy 6:4-9; Efesus 6:4.

4. Ma an leengin e susun nge mang ta ayuw nib fel’ ngak figirngin. (Genesis 2:18) Susun nge ayuweg figirngin nge fil boch ban’en ko bitir rorow. (Proverbs 1:8) Rib t’uf ku Jehovah ni an leengiy e nge ayuweg e tabinaw rok u fithik’ e t’ufeg. (Proverbs 31:10, 15, 26, 27; Titus 2:4, 5) Susun ngari ta’ fan figirngin.—Efesus 5:22, 23, 33.

5. Rib t’uf ku Got ni piin bitir e thingara folgad ko gallabthir rorad. (Efesus 6:1-3) Ke ta’ chilen ko pi gallabthir ni ngar fonownaged pi fakrad mar yal’uweged yad. Piin gallabthir e ba t’uf ni ngar ted ba ngiyal’ ngar chaggad pi fakrad mar filed e Bible ngorad, mar ayuweged yad ko tirok Got nge tin ba t’uf nga laniyan’rad. (Deuteronomy 11:18, 19; Proverbs 22:6, 15) Pi gallabthir e dabra gechignaged pi fakrad ni kaygi pag rogon ngar gafgowgad.—Kolose 3:21.

6. Faanra bay e magawon u thilin e mabgol ni ke mo’maw ni ngar parew u taabang, ma aram e susun ngar guyew rogon ngar folgow ko fonow nu Bible. Ya be yog e Bible ngodad ni ngad daged e t’ufeg nge n’ag fan e kireb. (Kolose 3:12-14) De puluw ko Thin Rok Got ni nge chuw be’ ko ani mabgol rok ni bochan e magawon ni ba achig. Machane an leengiy e sana ra turguy ni nge chuw ku figirngin ni faanra (1) dabun ni nge ayuweg e tabinaw rok, (2) fa ir be’ nib tacham ma ke magawon e yafas rok leengin, fa (3) ir be’ nib tatogopuluw ma dabkiyog ko fare ppin ni nge liyor ku Jehovah.—1 Korinth 7:12, 13.

7. Fa wu’ i mabgol e thingar ra parew ni yow ba yul’yul’ ngorow. Par ku be’ ni gathi mabgol rok e reb e denen nib togopuluw ku Got ma ku ba togopuluw ko ani mabgol rok. (Hebrews 13:4) Par ku be’ nga wu’ru e mabgol rok e ka ri mus rogon ni rayog ni nge dar e mabgol nib metaw rogon ko bible ma ki yog ni ra bag yow ma ki mabgol bayay. (Matthew 19:6-9; Roma 7:2, 3) Ma fanenikay Jehovah e mabgol ni ke dar ni de puluw ko Bible min un ko mabgol ngak yugu be’.—Malaki 2:14-16.

[Sasing ko page 16, 17]

Ba t’uf rok Jehovah ni nge skulnag e gallabthir e bitir rorad ngar yal’uweged yad

[Sasing ko page 17]

Reb e matam ni ma t’ufegey e ma ayuweg e tabinaw rok ko tirok Got ban’en nge chugum