Guruy ni 9

Thingari Par e Pi Tapigpig ku Got nib Biech

Mang fan ni thingar da biechgad u gubin ban’en? (1)

Mang fan e re n’ey ni nge biech lanin’uy? (2) nge gafarig? (3) nge tafinay? (4) nge dowef? (5)

Bmiti mang thin e de biech ni susun ngad paloggad riy? (6)

1. Jehovah Got e ba thothup mab biech. Ere ma finey ni piin ma liyor ngak e ngar pared ni yad ba biech—ni rogon lanin’rad, nge gafarig rorad, nge tafinay rorad, nge dowef rorad. (1 Peter 1:16) Ngar guyed rogon ni nga ur pared ni yad biech u owchen Got. Ya gad be par u ba fayleng ni ke alit. Ku gad ma cham ko arar nib kireb. Machane nguuda athamgilgad.

2. Nge Biech Lanin’uy: Faanra gad ba adag ni nga uda pigpiggad ku Jehovah ma dab kuda uneged nga yug boch e yalen nge machib ko teliw ni googsur. Thingar da chuwgad ko teliw ni googsur ma dakuriy ban’en riy ni nga kuda pied e ayuw ngay. (2 Korinth 6:14-18; Revelation 18:4) Ya nap’an ni gad ra fil e tin riyul’ u morngaagen Got ma aram e thingar da kol ayuwgad ni nge dabki wawliydad e piin yad ma machibnag bogi ban’en ni googsur.—2 John 10, 11.

3. Nge Biech e Gafarig: Ba adag Jehovah ni gubin ngiyal’ ma pi tapigpig rok e yad ra ngongol nib puluw ko tin riyul’ e Kristiano. (1 Peter 2:12) Ma guy urngin ban’en ni gad ma rin’ ni mus ko tin ba mith. (Hebrews 4:13) Ere thingar da paloggad ko ngongol nde yalen nib golong nge ku boch e ngongol nib alit ko re fayleng ney.—1 Korinth 6:9-11.

4. Nge Biech e Tafinay: Faan gad ra suguy lanin’dad ko lem nib machalbog mab biech ma ra biech e ngongol rodad. (Filippi 4:8) Ma faanra uda pared ni gad be lemnag e tin ba alit ban’en, ma ra munmun ma gad ra un ko ngongol nib kireb. (Matthew 15:18-20) Susun ngad paloggad ko pi n’en ni yima falfalan’ ngay nra alitnag e lem rodad. Rayog ni da suguyed laniyan’dad ko tin biech e lem ni faanra uda filed e Thin Rok Got.

5. Nge Biech e Dowef: Ya nge m’ug rarogon Got riy, ere pi Kristiano susun ngari par nib biech dowrad, nge mad rorad. Susun ngad lukniged paadad u tomren ni kad sulod u kolosis, nge m’on ni ngan abich ara ngan fl’eg rogon e ggan. Faanra dariy rom e kolosis nib fel’ rogon, ma thingar mu k’eyag e pi magungan. (Deuteronomy 23:12, 13) Ra un par ni yab biech ma ra fel’ fithik’ i dowey. Tabinaw ko Kristiano susun nge par ni biech ni wuru’ nge langgin e naun. Susun nge par u lan reb e binaw ni ngan folwok riy yab fel’ yaan.

6. Nge Biech e Thin: Pi tapigpig ku Got e thingar urogned e thin nriyul’ u gubin ngiyal’. Ya piin ba malulfith l’igin e dab ra uned ko gin suwon Got. (Efesus 4:25; Revelation 21:8) Pi Kristiano dabra uned i yog e thin nib kireb. Dabra uned i yog ara ura motoyilgad ko thin ni puwlag ara thin ni gosgos nib alit ara yat. Bochan nib biech e thin ni yad ma yog ma be lingagilnagrad u taban e maruwel, nge skul nge piin ni yad buguli yoror ni yad ba thil.—Efesus 4:29, 31; 5:3.

[Sasing ko page 18, 19]

Pi tapigpig rok Got e thingara pared nib biech u urngin ban’en