Kan Biechnagrad Ni Yad E Girdi’ Ni Fan Ko Maruwel Nib Fel’

“Ere ngad pithiged gadad u urngin ban’en ni ma alitnag e dowef nge lanin’uy, ma ngad gayed rogon ni ngad pired ni gadad ba thothup, ni aram e nguud pired ni ba’ madgun Got u wan’dad.”​—2 KORINTH 7:1.

1. Mang e baadag Jehovah ni nge rin’ e piin ni be pigpig ngak?

“MINI’ e ke yog rok ni nge yan nga daken e burey rok Jehovah, ma mini’ e ra sak’iy u tagil’ nib thothup?” David ni Pilung nu Israel kakrom e ir e ke yog e re deer ney ni ra pug e tafinay rok e girdi’ nrogon nib l’ag ko liyor ni baadag Jehovah. Me pi’ e fulweg riy ni gaar: “En de alitnag pa’ ko tin kireb mab biech gum’irchaen, ma de rin’ ban’en ni be dariyfannag e yaal Rog, ara ke micheg ban’en u fithik’ e sasalap.” (Psalm 24:3, 4, NW) Rogon ni nge fel’ be’ u wan’ Jehovah, ni ir e yaan e tin nib thothup, ma aram e thingari par nib biech mab thothup. U m’on riy, me puguran Jehovah ko ulung nu Israel ni gaar: “Ngam pired ni gimed ba thothup, yi gag e gub thothup.”​—Leviticus 11:44, 45; 19:2.

2. Uw rogon ni ke gagiyelnag Paul nge James rogon ni ngan par nib klin e rib ga’ fan ko tin riyul’ e liyor?

² Me yan boch e chibog nga tomren, me yol Paul ni apostal ngak fapi Kristiano ni ma par u Korinth ni aram e mach nib sug ko ngongol nib kireb ni gaar: “Pi tafager rog ni gimed ba t’uf rog, urngin e pi thin ney e ke yog Got nra rin’ ngodad! Ere ngad pithiged gadad u urngin ban’en ni ma alitnag e dowef nge lanin’uy, ma ngad gayed rogon ni ngad pired ni gadad ba thothup, ni aram e nguud pired ni ba’ madgun Got u wan’dad.” (2 Korinth 7:1) Biyay e be dag e biney ni rayog rok be’ ni nge fel’ thilrow Got ma rayog ni nge yog ngak e tin ni ke micheg, ma thingari par nib biech e dowef rok ko tirok Got ma dabi un ko ngongol ni sasalap. Taab rogon ko thin ni yoloy James ni gachalpen murung’agen e liyor nib fel’ u wan’ Got me yog ni gaar: “Baaray e n’en ni be finey Got ni Chitamangiy ni ir e bin nib machalbog ma ba riyul’ e liyor ngak, ni aram e ngan ayuweg e bitir ndariy e gallabthir rorad nge piin ni ppin ni ke yim’ e pumoon rorad ma yad be gafgow, mu un ayuwegey nge dabi kirebnagey e kireb nu fayleng.”​—James 1:27.

3. Rogon ni ra fel’ e liyor rodad u wan’ Got, ma ngar da tedan’dad ko mang?

³ Bochan ni par nib klin, mab thothup, ma dan alit ma aram e tin ni ri baga’ fan ko bin riyul’ e liyor, ma aram e en ni baadag ni nge fel’ u wan’ Got e thingari athamgil ni nge rin’ e re n’en ney. Ya girdi’ ko ngiyal’ ney e ba thil thil e kanawo’ nge lem rorad u rogon ni ngan par nib klin, mab t’uf ni nge tamilang u wan’dad e lem rok Jehovah u rogon ni ngan par nib klin ma ngada folgad riy. Ba t’uf ni ngada fal’eged i gay ngad nanged ko mang e baadag Got ni nge rin’ e pi tapigpig rok nge mang e ke rin’ nge ayuwegrad ngar manged e girdi’ nib klin ma ur pared ni aram rogon ma yad ra fel’ u wan’.​—Psalm 119:9; Daniel 12:10.

Biech ni Fan ko Bin Riyul’ e Liyor

4 Mu weliy rogon ni be weliy fare Bible murung’agen e nga un par nib klin.

⁴ Ke chuchugur ni urngin e girdi’ e yad be lemnag, ni rogon ni ngan par nib klin e kemus ni ngan palog ko tin ba alit ara tin nra alitnagey. Machane, be dag e Bible e thin ni Hebrew nge Greek ni be weliy rogon ni ngan par nib klin ni gathi kemus ni fan ko dowef ya boor yay ni weliy murung’agen e gafarig nge tirok Got. Arfan ni, reb e Bible encyclopedia e ke yog ni gaar: “Gali thin ni ‘biech’ nge ‘alit’ ney e gathi ri yima fanay nrogon nib peth ko ngan biechnag e dowef, machane baga’ ni bay rogon ko teliw. Rogon ni yog u roy e kenggin fare bugithin ni ‘ngan par nib biech’ e ban’en ni ba’ rogon nga chuchugur i urngin ban’en ko yafas.”

5. Uw ga’ngin yang fare Motochiyel ni kan pi’ ngak Moses e be dag ngak piyu Israel rogon ni ngan par nib klin?

⁵ Riyul’, ni fare Motochiyel rok Moses e ba muun ngay e motochiyel u chuchugur i urngin ban’en ko yafas rok yu Israel, ni be gagiyelnag e tin nib klin mab fel’ u wan’uy nge tin danga’. Ni bod rogon, u lan e Leviticus ko guruy ni 11 nge ma dako 15, ma gadad ra pirieg e fonow riy nib l’ag ko tin nib klin nge tin ni de klin. Boch e gamanman e de klin, ma piyu Israel e dab ra lunguyed. Gargel ma ra tay fare pin ni daki klin ni ba mudugil n’umngin nap’an. Bay boch e m’ar ko biyach, ni rib ga’ ni daraw, nge be’ nib pumoon ara ppin ni yugu ma yib logowen dow e ku ra tay faanem ni de klin. Fare Motochiyel e ku be dugliy rogon e n’en nga un rin’ ko n’en nde klin. Ni bod rogon, u Numbers 5:2, (NW) e be gaar: “Mu motochiyelnag ngak pi fak yu Israel ni ngar ted nga wuru’ e camp urngin e daraw nge urngin e piin ni yugu be yib logowen dowrad nge urngin e piin nde klin ni bochan be’ ni ke yim’.”

6. Ni fan ko mang ma kan pi’ fare motochiyel ko klin?

⁶ Dariy e maruwar riy, ni pi n’en ney nge yugu boch e motochiyel ni yib rok Jehovah e ba l’ag ngay e lem u murung’agen e tafalay nge physiological ni ke n’uw nap’an ma ka fini nang e scientist nge togta murung’agen, ma nap’an ni ra fol e girdi’ riy ma ra fel’ rogorad. Machane, pi motochiyel nem e dan pi’ ni kemus ni bogi babyor ni ngara yaliyed ni fan ni ngar ayuweged dowrad ara ngan fanay ni kemus ni fan ni nge ayuwegrad ngar gayed reb e falay. Pi n’en nem e bang ko bin riyul’ e liyor. Bochan ni pi motochiyel nem e ba m’ag ko par ko girdi’ u gubin e rran ni bod e​—abich, nge gargel, nge rarogon e par ko mabgol, nge ku boch ban’en—​ni ireray e pi n’en ni be dag ni Got rorad, i Jehovah e bay mat’awon ni nge dugliy boch ban’en ni fan ngorad ko mang e ffel’ nge tin de fel’ ko urngin ban’en ko yafas rorad, ni kara ognaged ku Jehovah u polo’ i lanin’rad.​—Deuteronomy 7:6; Psalm 135:4.

7. Ra ngan fol ko fare Motochiyel, ma mang flaab e ra yib ngak fare nam nu Israel?

⁷ Maku fare Motochiyel ko m’ag e ku ke ayuweg piyu Israel ni dabi af ngorad e ngongol nib kireb ni ma rin’ girdien e pi nam ni ba liyegrad. Ra fol piyu Israel ko fare Motochiyel u fithik’ e yul’yul’, nib muun ngay urngin e thin ni ke yog Jehovah ni ngara rin’ed ni fan ni ngara pared nib biech u owchen Jehovah, ma aram bay rogorad ni ngar pigpiggad ku Got rorad ma ra flaabnagrad. Murung’agen e re n’en ney, i yog Jehovah ngak fare nam ni gaar: “Faan gimed ra fol rog ngam ayuweged e m’ag rog, ma gimed ra par ni kam manged e girdi’ rog. Fayleng ni polo’ e ban’en rog, machane bay mpired ni gimed e girdi’ ni kug mel’egmed ni ngam manged girdieg. Bay mu pired ni gimed girdien ba nam ni gimed be pigpig ngog ni kam manged pi prist, ma ke mus ni gag e ke milsuwmed ngog.”​—Exodus 19:5, 6; Deuteronomy 26:19.

8. Mang fan ni piin Kristiano ko ngiyal’ ney e thingara tedan’rad ko n’en be yog fare Motochiyel u murung’agen e klin?

⁸ Bochan ni ke ta’ Jehovah e pi n’en ney nge mang bang ko fare Motochiyel ni fan ni nge fil ngak piyu Israel rogon ni ngara pared nib biech, ma yad ba thothup, mi yad fel’ u wan’, gathi ba puluw ni piin Kristiano ko ngiyal’ ney e ngara lemnaged nib fel’ rogon ngar nanged ko uw ga’ngin e kara folgad riy? Yugu aram rogon ni piin Kristiano e gathi yad be par u tan fare Motochiyel, thingar dabra pagedtalin ni, rogon ni weliy Paul ni apostal ni, urngin ban’en ni bay ko fare Motochiyel e “aram e tagalul’ ko pi n’en ni ka ba’ nga m’on ni bay fini m’ug; ma bin ni ir riy e Kristus.” (Kolose 2:17; Hebrews 10:1) Faanra Jehovah Got, e ir e en ni yog ni gaar, “Dab gu thil,” e be lemnag ni ngan par nib biech ma dab ni alit e aram e n’en ni baga’ fan ko bin riyul’ e liyor ko ngiyal’ nem, gadad e ngiyal’ ney e thingarda lemnaged u fithik’ e yul’yul’ ni gadra par nib biech ni dowef rodad, nge gafarig, nge tirok Got nfaanra gad baadag ni gad ra fel’ u wan’ ma ra flaabnagdad.​—Malaki 3:6; Roma 15:4; 1 Korinth 10:11, 31.

Gadra Par nib Biech e Dowef Rodad Ma Be Yog ko Gadad Mini’

9, 10. (a) Mang fan ni baga’ fan ni nge par e Kristiano nib klin downgin? (b) Mang e baga’ ni yima yog u murung’agen e Pi Mich rok Jehovah u nap’an e pi convention rorad?

⁹ Ngan par nib biech e dowef ma ka be par ni kab ga’ fan ni fan ko bin riyul’ e liyor fa? Yugu aram rogon ni dabiyog rok be’ ni nge mang bin riyul’ e tapigpig rok Got ni kemus ni be par nib klin e dowef rok, ere rib puluw ni bin riyul e tapigpig e nge par nib biech e dowef rok nrogon ni rayog rok. Rib ga’ ni aram rogon e ngiyal’ ney, boor e girdi’ ni gathi ri yad ma ayuweg e dowef rorad ni nge par nib biech, nge mad rorad, ara pi n’en ni bay u toobrad, ma piin ni yad ma biechnag urngin ban’en e ma guyrad e girdi’ ni bay u toobrad. Ra yib angin nib fel’, ni bod rogon ni yog Paul ngak fapi Kristiano u Korinth ni gaar: “Dubmad ni nge pirieg be’ ban’en nib kireb ko maruwel romad, ere gamad be guy rogon ndab gu ninged e kanawo’ rok be’. Machane urngin ban’en ni gamad be rin’ e gamad be dag riy ni gamad bogi tapigpig rok Got.”​—2 Korinth 6:3, 4.

¹⁰ Boor yay ni girdien e am e kara pininged e magar ngak e Pi Mich rok Jehovah nbochan e yad ba klin, ma yad ba yaram, ma bay e tayfan ni ma m’ug ko ngongol rorad, ni ri ma gagiyel u nap’an e pi convention rorad nib ga’. Ni bod, murung’agen reb e convention ni kan ta’ u reb e binaw nu Savona, Italy, ma fare shimbung ni La Stampa e ke yog ni gaar: “N’en ni rayog ni nge guy be’ nib papey u nap’an ni nge yan i guy boch ban’en riy e aram e chugum nib biech ma girdi’ ni yad ma fanay e pi n’en ney e yad ba yaram.” Tomren reb e convention ko Pi Mich u reb e stadium u São Paulo, Brazil, ma reb e ga’ ko fare stadium e ke yog ngak e supervisor ko girdien e klin ni gaar: “Ka chiney i yan ngaram e gamad baadag ni ngan klinnag fare stadium ni bod rogon ni ke klinnag e Pi Mich rok Jehovah.” Yugu reb e ga’ ko re stadium nem e ki yog ni gaar: “Ngiyal’ ni baadag e Pi Mich rok Jehovah ni ngara muulunggad ko fare stadium, e ke mus ni fare rran ni ngar ted e convention rorad e gamad baadag ni nggu nanged. Dakuriy ban’en ni ra magafan’mad ngay.”

11, 12. (a) Mang kenggin e motochiyel nu Bible e ba t’uf ni ngada lemnaged nib l’ag ko par nib klin? (b) Mang boch e deer e rayog ni ngan fith u murung’agen e wo’ ni gad ma rin’ ban’en ko yafas rodad?

¹¹ Faanra bbiech mab yaram tagil’ e muulung ni gad ma liyor riy ma yira pining e sorok ngak Got ma aram kub mudugil ni ku baga’fan ni ngada daged e pi felngin ney ko yafas rodad. Machane u lan e tabinaw rodad, e sana gad ra lemnag ni bay mat’awdad ni dabda tedan’dad ngay ko klin ma kemus ni ngada rin’ed ni faanra gad baadag. Ma murung’agen e mad rodad nge rogon ni ngada fal’eged yaadad, e ba mudugil ni ba puf rogodad ni gad ra mel’eg e tin ni gad be lemnag nib fel’ nga dowdad mab fel’ ngodad! Machane, baga’ ni, urngin e re puf rogon ney e bay gin ni nge mus riy. Dab mu pagtalin ni nap’an ni be weliy Paul murung’agen mat’awuy ni ngan mel’eg e ggan ni ngan kay, me ginang Paul e piin Kristiano ni gaar: “ Mu par ni ga be kol ayuwngin mat’awum nge dabni magawonnag e piin ni kab meewar. Ngemu’ me weliy murung’agen kenggin e motochiyel nib ga’ fan ni gaar: “Urngin ban’en e ba puluw ko motochiyel; machane gathi urngin ban’en e ba’ angin. Urngin ban’en e ba puluw ko motochiyel machane gathi urngin ban’en ma ra gelnagey.” (1 Korinth 8:9; 10:23, NW) Uw rogon nib m’ag e fonow ni ke pi’ Paul ngodad u rogon ni ngan par nib biech?

¹² Bay fan ni nge lemnag e girdi’ ni en tapigpig rok Got e nge par nib biech mab yaram ko kanawoen e yafas rok. Aray fan, ni thingarda maruweliyed ni nge fel’ yaan e naun rodad nge boch ban’en ni bay u tooben ni nge dabi magawonnag fithingdad ni gadad e piin tapigpig ko Thin Rok Got. Mang e be micheg e naun rodad u murung’agdad nge teliw rodad? Be dag e re n’en ni ri gad baadag ni ngada pired ko fa bin nib biech e fayleng nib mat’aw mab biech mab yaram ni ri gad be weliy murung’agen ngak boch e girdi’? (2 Peter 3:13) Maku, yaadad​—ndemtrug ko ngiyal’ ni gad be un ko fafel ara gad be machib—​e rayog ni nge gelnag ara nge warnag gelngin e machib ni gad be wereg. Ni bod rogon fare thin ni yog fare reporter ko shimbung nu Mexico ni gaar: “Boor e fel’ yangaren ni yad e Pi Mich rok Jehovah ni n’en nib gagiyel rorad e rogon ni yima th’ab piyan lolugrad, nge rogon ni yad bbiech, nge rogon e munmad rorad.” Uw feni gel e falfalan’ rodad ni bay e piin ni ka yad ba pagal u fithik’dad ni aram rogorad!

13. Mang e gad ra rin’ me mudugilan’dad ni urngin yang ko yafas rodad e ra par nib klin mab yaram ni gubin e rran?

¹³ Riyul’, nib mom ni nga nog ma de mom ni ngad ayuweged e dowef rodad, nge chugum rodad, nge naun rodad nge par nib klin. Tin nib t’uf riy e gathi chugum ni boor ara talin e maruwel nib tolang puluwon, ya ffel’ ni ngan lemnag nib fel’ rogon ko uw rogon ni ngan rin’ mu un par ni yibe rin’. Thingarda ted ba ngiyal’ ni ngada biechnaged dowdad, nge mad rodad, nge naun rodad, nge karro rodad, nge yugu boch ban’en. Bochan nboor e maruwel rodad ko machib, ma gad ma un ko muulung, ma gad ma un ko fol babyor​—ma kub muun ngay yugu boch e maruwel ni gadad ma rin u gubin ngiyal’ ni fan ko yafas rodad—​e gathi nge mang tawey rodad ya thingarda pired ni gadad ba biech ma gad ra fel’ u p’eowchen Got nge girdi’. Fare kenggin e motochiyel ni “bay ngalan’ urngin ban’en” e kub puluw ni ngada fanayed ko re par rodad ney.​—Eklesiastes 3:1.

Ba Gum’ircha’ ni Dan Alitnag

14. Mang fan nrayog ni nga dogned nrogon ni ngan par nib klin e gafarig nge tin ni fan ku Got e ku baga’ fan ko par nib klin ko dowef?

¹⁴ Baga’ fan ni ngan tiyan’uy ngan par nib biech e dowef, ma ri kub ga’ fan ni ngan tiyan’uy nga rogon ni ngan par nib biech e gafarig nge klin ko tirok Got. Gad ra nang ni aram rogon nfaan gad ra lemnag ni ke n’ag Jehovah fare nam nu Israel, ni gathi bochan ni ba alit e dowef rorad, machane bochan ke kireb e gafarig nge tirok Got rorad. U daken Isaiah ni profet, me yog Jehovah ngorad nbochan ni yad “ba nam ni tadenen, ma girdi’ e ke sug ko kireb,” maligach rorad, nge madenom ni yad ma tay ni fan ko m’ug i pul nge rran ko toffan, arrogon, ni mus ko fapi meybil ni yad ma ta’ e ke tomalnag laniyan’. Mang e susun ni ngara rin’ed ma ra fel’gad u wan’ Got biyay? I yog Jehovah ni gaar: “Mmalukgad ngam biechgad. Mu taleged urngin e kireb ni gu be guymed ni gimed be rin’. Arrogon, mu talgad ndab kum ngongliyed e kireb.”​—Isaiah 1:4, 11-16.

15, 16. Mang e ke yog Jesus nra alitnag e girdi’, ma uw rogon nra fel’ rogodad ko thin ni yog Jesus?

¹⁵ Rayog ni nge tamilang boch u wan’uy feni ga’fan ni ngan par nib biech e gafarig nge tirok Got, mu lemnag ko mang e ke yog Jesus u nap’an ni piin Farise nge scribe e ka rogned ni fapiin gachalpen e de klin ya bochan ni dar lukniged pa’rad u m’on ni ngara abichgad. Me yal’uwegrad Jesus me yog ni gaar: “Gathi n’en nra yan nga l’ugun be’ e ir e ra alitnag faanem; ya n’en nra yib riy nga but’ e ir e ra alitnag faanem.” Ngemu’ me weliy Jesus ni gaar: “Ma pi n’en nra yib u lan l’uguney nga but’ e ma alitnag be’. Ya laniyan’ be’ e ma yib e lem nib kireb riy ni ir e ma pingeg faanem nge li’ be’ ngem’, fa ra pirew be’ ni gathi mabgol rok, ma be rin’ yugu boch ban’en ni aram e ngongol ko darngal; me moro’ro’ u fithik’ e yargel, me lifith l’ugun, me t’ar e thin nga daken e girdi’. Ereray e pi n’en ni ma alitnag be’. Machane ra mu abichgad nda mlukuyed pa’med nrogon ni ka rogned nthingar mu rin’ed - ma biney e der ma alitnag be’.”​—Matthew 15:11, 18-20.

¹⁶ Mang e kada filed ko thin rok Jesus? I weliy Jesus ni yima rin’ e tin kireb, nge ngongol ni de yalen, nge ngongol nib kireb nbochan e gum’ircha’ ni be par e tin kireb nge ngongol ni de yalen riy. Rogon ni yog James ni reb i gachalpen u murung’agen e gaar, “ra be’ ma tin ni be yim’ nbochan e ir e ra skengnag nge waliy nge fol ko tin kireb.” (James 1:14, 15, NW) Arfan ni, faanra dubdad ni ngada rin’ed reb e denen nib ubchiya’ nrogon ni ke yog Jesus, me e re thingarda chuweged lik’ngin ngad palognaged u gum’irchadad e pi n’em. Ma be yip’ fan ni thingarda koled ayuwngidad ko pi n’en ni gad ma bieg, nge tin ni gad ma yaliy, nge tin ni gad ma rung’ag. Ngiyal’ ney, ni ka nog ni daki mutrug e thin ni rayog ni nganog ma keb mat’awun e girdi’ ni ngara ngongolgad ni daki mutrug rogon, ma piin ni ma dag boch ban’en ni ra falfalan’ e girdi’ ngay ma ma weliy ban’en ngorad, e yad be rin’ boor mit e musik nge kachido ni ra pug e arar nib kireb. Susun ni nge mudugil lanin’dad ni dabda paged ni ngeb likngin nga lan gum’irchadad e lem ni aram rogon. N’en nib ga’ fan me par nib falfalan’ Got ngodad e ngad fel’gad u wan’, ma thingarda koled ayuwngidad ma rayog ni nge yog ngodad e gum’ircha’ nib biech.​—Proverbs 4:23.

Kan Klinnag ni Fan ko Maruwel nib Fel’

17. Mang fan ni ke ayuweg Jehovah e girdi’ rok ngar manged e girdi’ nib klin?

¹⁷ U daken e ayuw rok Jehovah, ma riyul’ ni reb e taw’ath nge reb e ayuw e tin ni baaray ni gadra par nib klin u p’eowchen. (2 Korinth 6:14-18) Yugu aram rogon, maku gad manang ni ke ayuweg Jehovah e girdi’ rok ni ngar pared nib klin nib mudugil fan. I yog Paul ngak Titus u murung’agen Kristus Jesus ni “ir e pi’ ir ni bochdad ni fan e nge lagdad u fithik’ urngin e kireb me ngongliydad ngad manged ba ulung i girdi’ ni kad machalboggad nib mil fadad ngak me pasigan’dad ni ngad rin’ed e tin nib fel’.” (Titus 2:14) Bochan ni gadad e girdi’ ni kan biechnagdad, mang maruwel e thingarda uned ngay u fithik’ e pasig?

18. Uw rogon ni ngada daged ni gadad ba pasig ko fapi maruwel nib fel’?

¹⁸ Som’mon, thingarda athamgilgad ni ngada wereged fare thin nib fel’ u murung’agen gil’ilungun Got. (Matthew 24:14) Ra ngada yodoromgad, ma aram e gad be weliy ngak e girdi’ u ga’ngin yang fare athap ni ngara pared nib fas ndariy n’umngin u reb e fayleng ni dakuriy ban’en ni ba alit riy. (2 Peter 3:13) Maruwel rodad nib fel’ e ku ba muun ngay ni ngada daged wom’engin e kan ni thothup ko yafas rodad ni gubin e rran, me e re gadad be pining e sorok ngak e Chitamangidad nu tharmiy. (Galatia 5:22, 23; 1 Peter 2:12) Ma dabda paged talin e piin ni dawora uned ko tin riyul’ ni keb e gafgow nib gel ngorad ni aram fare gafgow ni yigi sum ara gafgow ni girdi’ e ke sunmiy. Dabda paged talin e fonow ni ke pi’ Paul ni gaar: “Ere urngin ngiyal’ nra puf rogodad ma ngada ngongliyed e ngongol nib fel’ ngak urngin e girdi’, machane nge ga’ fadad ngak e piin ni kad manged girdien e tabinaw rok Got u fithik’ e mich u wun’uy ngak Kristus.” (Galatia 6:10) Urngin e re pigpig ney ni kan ta’ nbochan fare gum’ircha’ nib klin nge lem nib machalbog, e ri ba fel’ u wan’ Got.​—1 Timothy 1:5.

19. Mang fapi flaab ni be sonnagdad nfaan gadra par nrib klin ko​—dowef rodad, nge gafarig rodad, nge tin ni fan ku Got?

¹⁹ Bochan ni gadad e pi tapigpig ko en Th’abi Tolang, ma aram e ngad folgad ko thin rok Paul ni gaar: “Ere pi walageg, bochan e ri be runguydad Got, ma aram fan ni nggu wenig ngomed ni ngam pied gimed ngak Got, ngam manged maligach nib fos ngak, ni kam pied gimed ko maruwel rok ma gimed ba fel’ u wan’. Ereray e bin riyul’ e liyor ni susun e ngam pied ngak Got.” (Roma 12:1) Manga yugu uda ululgad nga i fel’ u wan’dad rogon ni ke klinnagdad Jehovah ngad pared ni gad be rin’ e tin th’abi fel’ nrayog rodad ni ngad pared ni gadad ba klin ko dowef, nge gafarig, nge tirok Got ban’en. Ra ngada yodoromgad ma ra yib angin ngodad ni gathi kemus ni ngada tedfadad miki falfalan’dad e chiney ya ku bay ban’en boch nga m’on ni gadad be sonnag ni ngada guyed “e tin kakrom ban’en”​—ni aram e piin kireb e chiney nge fare m’ag nib alit—​e ra chuw u nap’an ni yira ‘biechnag urngin ban’en.’​—Revelation 21:4, 5.

Ka Ga Manang?

• Mang fan ni kan pi’ ngak piyu Israel boor e motochiyel ko klin?

• Uw rogon ma gad ra par nib klin e dowef rodad ma ra ayuweg e machib ni gadad be wereg?

• Mang fan nrogon ni ngan par nib klin e gafarig nge tin ni fan ku Got e kab ga’ fan ko ngan par nib klin e dowef?

• Uw rogon ni ngada daged ni gadad e girdi’ ni gadad ba “pasig ko fapi maruwel nib fel’”?

[Pictures on page 17]

Gad ra par ni gadad ba biech ma ra ayuweg fare machib ni gad be wereg

[Picture on page 18]

I ginangey Jesus ko fare lem nib kireb e ra fekey i yan ko ngongol nib kireb

[Pictures on page 19]

Bochan ni Pi Mich Rok Jehovah e yad e girdi’ ni kar biechgad, ma aram fan ni yad ba pasig ko fapi maruwel nib fel’