Yira Pirieg E Falfalan’ U Fithik’ E Ngongol Rok Jehovah Nib Mat’aw

“En be guy rogon ni nge yog ngak e ngongol nib mat’aw nge t’ufeg nib yul’yul’ e ra pirieg e yafas, nge ngongol nib mat’aw nge falfalan’.”​—PROVERBS 21:21, NW.

1. Mang kanawoen e girdi’ e chiney ni ke pow’iyrad ko gafgow nib gel?

“BAY e kanawo’ ni ba mat’aw u owchen e girdi’, machane tomur riy e yam’.” (Proverbs 16:25) Re thin nu Bible ney e rib puluw nga rogon kanawoen boor e girdi’ ko ngiyal’ ney! Baga’ ni girdi’ e kemus ni yad baadag ni ngara rin’ed e tin ni be m’ug ni ba mat’aw u owchrad, ma yad be dariyfannag e tin nib t’uf rok yugu boch e girdi’. (Proverbs 21:2) Yad ma yog ni yad be tay fan fapi motochiyel ko nam, machane be th’ab ma ra gayed e kanawo’ ni nge dabni kolrad. Ma wenegan, e ke yoor raba’ e girdi’, ke balyangan’rad, ma be maruwaran’rad.​—2 Timothy 3:1-5.

2. Mang e rib gur ni nge t’uf ko girdi’ me fel’ rogorad?

² Rogon ni ra fel’ rogodad​—ma ra par ni bay e gapas nge pagan’ ko girdi’ ni urngin—​e rib t’uf e motochiyel ara kenggin e motochiyel nib yal’uw mab mat’aw, ni aram e motochiyel nib m’agan’ urngin e girdi’ ngay ma nga ur folgad riy. Ba tamilang, ndariy e motochiyel ara kenggin e motochiyel ni kemus ni girdi’ e ke sunmiy ndemtrug feni llowan’ nge feni yul’yul’ ni ra yog ni nge pi’ e re n’en ney. (Jeremiah 10:23; Roma 3:10, 23) Faanra bay e motochiyel ni aram rogon, ma u uw e rayog ni ngan pirieg riy ma bod e mang? Ma sana ireray fare deer ni rib ga’ fan ni, Faanra bay e motochiyel ni aram rogon, ra fel’ u wan’um ni ngam fol riy?

Kan Pirieg fare Motochiyel nib Mat’aw

3. Mini’ e ri bay rogon ni nge pi’ e motochiyel nib fel’ u wan’ e girdi’ ma ra fel’ rogorad riy, ma mang fan?

³ Ba t’uf ni ngada chuchugurgad ngak be’ ni gathi kemus ni be lemnag ramaen dowey, nge yalen, nge politics ma dariy e magawon rok ni bod e magawon ko girdi’ ndabiyog ni nge nang e n’en nra buch boch nga m’on ma ba war. Dariy e maruwar riy, ni kari mus ni en Tasunmiy ni gubin ma rayog rok, i Jehovah Got e bay rogon, me yog ni gaar: “Rogon feni tolang lan e lang u puluwon e fayleng nga lang, e aram feni thil e tirog e kanawo’ nge lem rog ko tiromed.” (Isaiah 55:9) Maku, be weliy e Bible murung’agen Jehovah nib “Got nib yul’yul’, mab mat’aw urngin ban’en ni ma rin’; mab yal’uw.” (Deuteronomy 32:4) U lan fare Bible ni polo’, ma gad ra pirieg fare bugithin ni “Jehovah e mmat’aw.” (Exodus 9:27; 2 Chronicles 12:6; Psalm 11:7; 129:4; Lamentations 1:18; Revelation 19:2, footnote) Arrogon, rayog ni ngada sapgad ngak Jehovah ni nge pi’ ngodad e motochiyel nth’abi fel’ ya bochan ni ir e en nib yul’yul’, ma ba yal’uw, mab mat’aw.

4. Fare bugithin nib “mat’aw” e be yip’ fan e mang?

⁴ Riyul’ ni fare bugithin ni “mmat’aw” e gathi ban’en ni ri kab gilbuguwan ko ngiyal’ ney. Ba chuchugur ni nge urngin e girdi’ e kar dabuyed e re n’en ney, ma ke achig fan, ma yad be lemnag ni aram e n’en ni ke mus ni ba dake ba thothup, ara ba dake ba yul’yul’ ko tirok Got. Machane, rogon ni yog reb e dictionary, fare bugithin ni “mat’aw” e be yip’ fan be’ ni “ba yal’uw, ma ba mat’aw, nge fel’ daken; ma de rin’ e tin nib kireb, de denen; be fol ko kenggin e motochiyel rok Got ara be fol ko motochiyel u murung’agen e gafarig; mab mat’aw mab yal’uw u rogon ni ma rin’ ban’en.” Gur gathi ga ma falfalan’ ko fare motochiyel ni aram rogon nib fel’?

5. Mu weliy fan fare ngongol nib mat’aw rogon ni be yog fare Bible.

⁵ Murung’agen felngin fare ngongol nib mat’aw, ma fare Encyclopaedia Judaica e be yog ni gaar: “Tin mat’aw ban’en e gathi ke mus ni yibe sananag machane ba l’ag ko ngan rin’ ban’en nib yal’uw mab mat’aw ni fan ko urngin ban’en.” Ni bod rogon ni, Got e ba mat’aw, e gathi ban’en ni ke mus ni bay u fithik’ ara ngongol ni bay rok, ni bod ni ba thothup mab machalbog. Gathi aram rogon, ya be dag e ngongol rok ko pi kanawo’ nib mat’aw mab yal’uw. Rayog ni nga nog ni bochan Jehovah e ba thothup mab machalbog ma aram e urngin ban’en ni ma rin’ ma urngin ban’en ni ma yib rok e ba mat’aw. Rogon ni yog e Bible ni, “Jehovah e ba mmat’aw u urngin e tin ni ma rin’, mab yul’yul’ ko urngin e maruwel rok.”​—Psalm 145:17, NW.

6. Mang e ke yog Paul u murung’agen boch e girdi’ ni piyu Jew nde michan’rad ko ngiyal’ rok nem, ma mang fan?

⁶ Kari weliy Paul ni apostal e re n’en ney u lan e babyor rok ni fan ko piin Kristiano u Roma. Murung’agen piyu Jew ni de michan’rad, ke yoloy ni gaar: “Bochan ndar nanged kanawoen Got nib mat’aw machane yad be fol ko birorad e kanawo’, ma aram fan ni dar folgad u rogon ni ma dag Got e ngongol ni ba mat’aw.” (Roma 10:3) Mang fan ni yog Paul murung’agen e pi cha’ nem ni “dar nanged kanawoen Got nib mat’aw”? Gathi kan skulnagrad ko fare Motochiyel, ni aram e kanawo’ rok Got nib mat’aw? Riyul’ ni kan skulnagrad. Machane, ba chuchugur ni yad urngin e kara lemnaged ni fare ngongol nib mat’aw e kemus ni ngongol ni ra yog ngak be’ ni be athamgil ni nge fol ko motochiyel ko teliw rok nib sasaf’og, ma dar lemnaged ni aram e kanawo’ ni ra pow’iyrad u rogon ni ngara rin’ed ban’en ngak yugu boch e girdi’. Taarebrogon ko fapi tayugang u nap’an Jesus, ni dar nanged fan e kanawo’ nib yal’uw mab mat’aw.​—Matthew 23:23-28.

7. Uw rogon ni kan dag ni Jehovah e ba mat’aw?

⁷ N’en nrib thil riy, kanawoen Jehovah nib mat’aw e kan dag ma rayog ni ngan guy nib tamilang ko urngin ban’en ni ke rin’. Yugu aram rogon ni kanawoen nib mat’aw e der yip fan ni nge dariyfan u wan’ e kireb ni ma rin’ e piin tadenen, e de mang reb e Got ni dariy e runguy rok ma rib gel e thin rok, ni ngan rus ngak min palog rok ni dabni chuchugur ngak. Ma bathil, ya ngongol rok nib mat’aw e ke bing e kanawo’ ngak e girdi’ ni ngar chuchugurgad ngak ma rayog ni ngan ayuwegrad ko gafgow nbochan ni kar denengad. Ere rib puluw ni kan weliy ni Jehovah e ir e “Got nib mat’aw ma ma Ayuweg e yafas.”​—Isaiah 45:21, NW.

Ngongol nib Mat’aw nge Yafas

8, 9. Mang boch e kanawo’ ni be dag ko fare Motochiyel ni Got e ba mat’aw?

⁸ Mu tiyan’um ko fare Motochiyel ni kan pi’ ngak fare nam nu Israel u daken Moses, ma ga nang fan e tha’ u thilin e ngongol rok Got nib mat’aw nge rogon ni ma ayuweg e yafas u fithik’ e runguy. Dariy e maruwar riy ni fare Motochiyel e ba mat’aw. Me puguran Moses ngak piyu Israel ko bin tomur e thin ni ke yog ngorad ni gaar: “Ya dariy reb e nam u bang nib sorok ni bay e motochiyel rok ni bod feni yal’uw e tiney e motochiyel ni kug fil ngomed e daba’?” (Deuteronomy 4:8) Boor e chibog ni ke yan nga tomren, me yog David ni Pilung ni gaar: “Urngin e tin ni ma turguy Jehovah e ba riyul’; ya urngin e m’ug nib mat’aw.”​—Psalm 19:9, NW.

⁹ U daken fare Motochiyel, me tamilangnag Jehovah e wo’ rok nib yal’uw u murung’agen e tin mat’aw nge tin de mat’aw. Fare Motochiyel e be weliy nrib tamilang rogon ni nge ngongol piyu Israel ni gathi kemus ni ban’en nib l’ag ko teliw rorad machane kub n’en nib l’ag ko folchuway, nge tha’ u thilin ba wu’ i mabgol, nge abich nge rogon ni ngan par nib biech, nge rogon ni ngan pufthinnag e girdi’. Maku ba’ ko fare Motochiyel rogon e gechig nib gel ni fan ko girdi’ nib kireb, kub muun ngay ni ngan’ li’ be’ ngem’ nbochan e kireb ni ke rin’.a Machane tin ni baadag Got ni ngan rin’ nib mat’aw, nrogon ni yog fare Motochiyel, e ma gafgownag be’ mab tomal ngak e girdi’, ma be magawonnag mat’awrad nge falfalan’ rorad, nrogon ni be yog boor e girdi’ e chiney?

10. Uw rogon e motochiyel u wan’ e piin nib t’uf Jehovah rorad?

¹⁰ Piin nib t’uf Jehovah rorad e kar falfalan’gad ko motochiyel rok nge boch ban’en ni ke yog ni ngan rin’. Ni bod, David ni Pilung, e gathi kemus ni i lemnag nrogon ni ma turguy Jehovah ban’en e ba riyul’ mab mat’aw, nrogon ni kada guyed, ya ku kari falfalan’ me pining e magar. Murung’agen fare motochiyel nge rogon ni ma turguy Jehovah ban’en, me yoloy ni gaar: “Ya motochiyel rok e kab fel’ u wun’ug ko gol, ni mus ko tin th’abi fel’ e gol; kab athibthib nga t’ay e ngul nib athib, ni mus nga t’ay e ngul nib athib ndawor ni athkuy ban’en ngay. Ma tamilangnigeg, i gag e tapigpig rom; fol ni gu be tay riy e be yib puluwon ngog.”​—Psalm 19:7, 10, 11.

11. Uw rogon ni be m’ug ni fare Motochiyel e ke mang “sensey nge yan i mada’ ko ngiyal’ ni yib Kristus riy”?

¹¹ Ke yan boch e chibog nga tomren, miki weliy Paul feni ga’ fan fare Motochiyel. U lan fare babyor ni ke pi’ ngak piyu Galatia, e i yoloy ni gaar: “Re Motochiyel nem e ir e i gagiyegnagdad, me ir e mang sensey ngodad nge yan i mada’ ko ngiyal’ ni yib Kristus riy, ni aram e rayog ni ngad mat’awgad ngak Got u daken e michan’ rodad ngak Kristus.” (Galatia 3:24) U nap’an Paul, ma fare sensey (pedagogue, Kingdom Interlinear) e ir reb e tapigpig ara sib ko tabinaw nib ga’. Ma maruwel rok e nga i ayuweg e pi bitir me un ngorad nga ranod nga skul. Taab rogon ko fare Motochiyel ni ma ayuweg piyu Israel ngar paloggad ko ngongol nib kireb nge tin ma rin’ e pi yuraba’ i teliw ni ba liyegrad. (Deuteronomy 18:9-13; Galatia 3:23) Maku reb, bochan fare Motochiyel me naab piyu Israel ngay ni yad e tadenen mab t’uf ni ngan n’agfan rorad ma ngar thapgad ngak Got. (Galatia 3:19) Fapi yaram ni fan ko maligach e be yip’ fan nib t’uf reb e maligach me dag ban’en ni ngan nang fare Messiah riy. (Hebrews 10:1, 11, 12) Arfan ni, yugu aram rogon ni ke dag Jehovah ni ir e ba mat’aw u daken fare Motochiyel, me rin’ e re n’em ni be lemnag e tin nib fel’ ni fan ko girdi’ nge yafas ni manemus ni fan ngorad.

Piin Ke Matheeg Got Ngorad ni Yad Ba Mat’aw

12. Mang e susun ni nge yog ngak piyu Israel nfaan kara folgad ko fare Motochiyel nib sasaf’og?

¹² Bochan fare Motochiyel ni pi’ Jehovah ngak piyu Israel e ba mat’aw u urngin e kanawo’, ma aram e ra fel’ thilrad Got ni faanra nguur ra folgad riy. I puguran Moses ngak piyu Israel u nap’an ni ke chuchugur ni nga ranod nga lan fare Binaw ni kan Micheg ni gaar: “Ma ra aw ni gamad e piin nib mat’aw, ni faanra nggu rin’ed e tin ni ke tay chilen ngomad u p’eochen Jehovah ni Got rodad, nrogon ni ke yog ngomad ni nggu rin’ed.” (Deuteronomy 6:25, NW) Maku, i micheg Jehovah ni gaar: “Thingar mu folgad ko motochiyel rog nge tin kug turguy ni ngan rin’, nfaanra i rin’ be’, maku ra fas u daken e pi n’em. I gag Jehovah.”​—Leviticus 18:5; Roma 10:5.

13. Gur de yal’uw Jehovah u nap’an ni tay chilen ngak e girdi’ rok ni ngara folgad ko fare Motochiyel nib mat’aw? Mu weliy.

¹³ Bay e kireban’ riy, ya piyu Israel ni taab nam e de yog rorad ni ngar “rin’ed e pi motochiyel nem u p’eowchen Jehovah” ma arfan ni de yog rorad ni ngar fanayed e pi flaab ni kan micheg. De yog rorad ni ngara folgad ko tin ni ke yog Got ngorad ni ngara rin’ed ya bochan e Motochiyel rok Got e ba flont ma yad e danga’. Be yip’ fan e re n’em ni Got e de yal’uw ara de mat’aw? Ri danga’. I yoloy Paul ni gaar: “Ere mang e nga dogned? Nge lungudad e de mat’aw Got? Ri danga’!” (Roma 9:14) Tin riyul’ riy, piin ni ur moyed u m’on ni kan pi’ fare motochiyel nge piin ni ur moyed u tomur riy, e kan matheeg ngorad ni yad ba mat’aw nyugu aram rogon ni dawora flontgad ma yad e tadenen. Girdi’ ni kan tay fithingrad nga babyor ni bay madgun Got u wan’rad ni ba muun ngay fapi cha’ ni chon Noah, Abraham, Job, Rahab, nge Daniel. (Genesis 7:1; 15:6; Job 1:1; Ezekiel 14:14; James 2:25) Ere deer ni bay e: Bochan e mang ni pi girdi’ nem e ke matheeg Got ngorad ni yad ba mat’aw?

14. Mang e be yip’ fan e thin nu Bible ko ngiyal’ ni be weliy murung’agen e girdi’ nib “mat’aw”?

¹⁴ Nap’an ni be yog e Bible murung’agen e girdi’ nib “mat’aw,” ma de yip’ fan ndariy e denen rok ara ir be’ nib flont. Danga’, biney e be yip’ fan ni nge lebuguy be’ e maruwel rok u p’eowchen Got nge girdi’. Ni bod, Noah ni “be’ nib mat’aw” ma “dariy thibngin u fithik’ yugu boch e girdi’” ya bochan e i “par ni be rin’ urngin ban’en ni ke tay Got chilen ngak. I rin’ ni bod rogon e n’en ni ka nog ngak ni nge rin’.” (Genesis 6:9, 22; Malaki 3:18) Zekariah nge Elizabeth, ni yow e gallabthir rok John ni Tataufe, ni “yow l’agruw ma ur pirew nib fel’ e ngongol rorow u p’eowchen Got, ma yow be fol ko tin ni ke yog Somol nge pi motochiyel.” (Luke 1:6) Ma faanem ni gathi be’ nu Israel, ni reb e ga’ ko salthaw ni be’ nu Italy ni Kornelius fithingan, e ka nog ni “be’ nib mat’aw ma bay madgun Got u wan’.”​—Acts 10:22.

15. Fare ngongol nib mat’aw e rib peth ko mang?

¹⁵ Maku, girdi’ nib mat’aw e ri bay rogon ko n’en ni bay u lan gum’irchaen​—nge michan’ rok nge falfalan’ nge t’ufeg rok ni fan ku Jehovah nge tin ni ke micheg—​ma gathi ke mus ni ngan rin’ e tin baadag Got ni ngan rin’. Be yog e Bible u murung’agen Abraham ni “be’ ni ke michan’ ku Jehovah; ma bochan e re n’em me matheeg ngak ni ba mat’aw.” (Genesis 15:6, NW) Gathi ke mus nib mich u wan’ Abraham ni bay Got machane ku ke michan’ ko tin ni ke micheg u murung’agen fare “owchen.” (Genesis 3:15; 12:2; 15:5; 22:18) Bochan e re michan’ nem nib chag e ngongol nib puluw ngay, me yog ni nge fel’ thilrow Jehovah me flaabnag Abraham nge yugu boch e girdi’ nib yul’yul’ nyugu aram rogon ni dawora flontgad.​—Psalm 36:10; Roma 4:20-22.

16. Michan’ ko fare biyul’ e mang angin?

¹⁶ Tomur riy, ma rogon ni ke mat’aw e girdi’ e be taga’ nga daken e michan’ ko maligach rok Jesus Kristus. Murung’agen e piin Kristiano ko fa bin som’mon e chibog, e yoloy Paul ni gaar: “Machane u daken e tow’ath rok [Got] ndariy puluwon ni bochan e runguy rok ngak e girdi’, e ir e ke mat’awnag urngin e girdi’ riy ngak u daken Kristus Jesus, ni ir e pithigrad rok e denen.” (Roma 3:24) Be weliy Paul u roy murung’agen e piin ni kan mel’egrad ni ngara uned ngak Kristus ngar manged bang ko Gil’ilungun u tharmiy. Machane fare maligach rok Jesus e ku ke bing e kanawo’ ni fan ko bokum million e girdi’ ni nge fel’ thilrad Got. I guy John ni apostal u nap’an ni kan piliyeg e changar rok fare “ulung ni pire’ ni pire’ - ndariy be’ nrayog ni nge theegrad! . . . Kar sak’iygad u p’eowchen tagil’ Got nge fare Fak e Saf ni ka ron’ed e mad nib wechwech.” Fare mad nib wechwech e be yip’ fan ni kar biechgad ma yad ba mat’aw u p’eowchen Got ya bochan ni “kar lukniged e mad rorad kar wechwechniged nga rachaen fare Fak e Saf.”​—Revelation 7:9, 14.

Ngan Felan’ ni Bochan e Ngongol Rok Jehovah nib Mat’aw

17. Ngan maruweliy e ngongol nib mat’aw ma mang boch ban’en e thingar ni rin’?

¹⁷ Yugu aram rogon ni ke pi’ Jehovah Fak, i Jesus Kristus u fithik’ e runguy, ni aram e kanawo’ ni fan ko girdi’ ni ngar fel’gad u p’eowchen, ma dabi yib angin nrib papey. Thingari mich u wan’ be’ fare biyul, nge puluwnag be’ e yafas rok ko tin nib m’agan’ Got ngay, nge ognag e yafas rok ngak Jehovah, nge dag e pow riy u daken e taufe. Ngemu’, ba t’uf ni nge par ni be fol ko kanawo’ nib mat’aw, nge yugu boch e felngin nib spiritual. Timothy, ni reb e Kristiano ni kan taufenag ni athap rok e ra yan nga tharmiy, me kari pi’ Paul e athamgil nga laniyan’ ni gaar: “Mu athamgiliy e tin nib mat’aw, nge tin nib fel’ u p’eowchen Got, ma ga par nib mich Got u wun’um, ma ba t’uf Got rom nge girdi’, mu um par ni gab k’adan’ ma gab sumunguy.” (1 Timothy 6:11; 2 Timothy 2:22) Maku kari weliy Jesus nib t’uf ni ngan par ni yibe athamgil ko ngiyal’ ni yog ni gaar: “Ere, mu par ni ga be m’oneg fare gil’ilulngun nge tin nib mat’aw ban’en ko yafas.” Sana ngada maruweliyed nib elmirin ni nge yog fapi flaab ko Gil’ilungun Got, machane ku gad be maruweliy nib elmirin ni ngada folgad u kanawo’ rok Jehovah nib mat’aw?​—Matthew 6:33.

18. (a) WMang fan ni de mom ni ngan maruweliy e ngongol nib mat’aw? (b) Mang e kada filed ko tin ni ke rin’ Lot?

¹⁸ Riyul’, ni de mom ni ngan fol ko kanawo’ nib mat’aw. Aram rogon ya gad gubin e daworda flontgad ma baga’ ni dowef rodad e baadag e kanawo’ ni de mat’aw. (Isaiah 64:6) Maku, ba liyegdad e girdi’ ni dariyfan u wan’rad e kanawo’ rok Jehovah nib mat’aw. Par rodad e ri taareb rogon ko nap’an Lot, ni yad ma par ko mach nu Sodom ni rib kireb. I weliy Peter ni apostal ko mang fan ni i lemnag Jehovah nib puluw ni ngan ayuweg Lot ko magothgoth ni be yib. I yog Peter ni gaar: “Ya re moon nem nib fel’ ni i par u fithik’rad u reb e rran nge reb e i guy ma i rung’ag e pi n’em, ma be kireban’ ko ngongol rorad nib kireb.” (2 Peter 2:7, 8) Arfan ni, ra bagadad ma ffel’ ni nge fith fare deer ni: ‘U lan gum’irchaeg ma gu baadag e ngongol ko darngal ni gad ma guy u toobdad fa? Kemus ni dariyfan u wan’ug fare gosgos nib muun ngay e cham fa? Ara kug thamiy ni kan gafgownag lanin’ug ni bod ni kan gafgownag laniyan’ Lot nbochan e pi ngongol nib kireb ney?’

19. Mang boch e flaab nrayog ngodad nfaan gad ra pirieg e falfalan’ ko ngongol rok Got nib mat’aw?

¹⁹ Ngiyal’ ney ni aram e tayim ni bay e riya’ ma de mudugil, e yira felan’ ngak Jehovah nib mat’aw me ir kenggin e pagan’ nge ayuw. Reb e deer e gaar: “O Jehovah, mini’ e rayog ni nge par u lan e tento rom? Mini’ e ra par u daken fare burey nib thothup?” Me fulweg David ni gaar: “Cha’ ni be yan ndariy thibngin ma be rin’ e tin nib mat’aw.” (Psalm 15:1, 2) Gadra athamgil ni ngada folgad ko kanawo’ rok Got nib mat’aw ma gad ra pirieg e falfalan’ riy, ma aram e rayog ni nge par nib fel’ thildad Got ma ra par ni gadad ba fel’ u wan’ ma ra flaabnagdad. Arfan ni, gad be falfalan’ ko yafas rodad, ma gad be tayfadad, ma ba gapas lanin’dad. Thin rok e be yog ni gaar, “Cha’ ni be athamgil ni nge fol ko kanawo’ nib mat’aw nge t’ufeg nib yul’yul’ e ra pirieg e yafas, nge tin nib mat’aw nge falfalan’.” (Proverbs 21:21, NW) Maku reb, ri ngada guyed rogon ni ngada rin’ed e tin nib yal’uw mab mat’aw ni nge mus rogodad riy ni be yip’ fan nra fel’ thildad ma gad falfalan’ ma ra fel’ boch rarogon e yafas rodad​—nge gafarig nge tirok Got. I yog fare psalmist ni gaar: “Nge felan’ e piin ni ma dag e ngongol nib yal’uw, ma be rin’ e tin nib mat’aw ni gubin ngiyal’.”​—Psalm 106:3.

[Footnotes]

Rayog ni Ngam Weliy?

• Mang e ngongol nib mat’aw?

• Uw rogon ma yafas e ba peth ko ngongol rok Got nib mat’aw?

• Bochan e mang ma girdi’ e ke ma theeg Got ngorad ni yad ba mat’aw?

• Uw rogon ni nge felan’dad ko ngongol rok Jehovah nib mat’aw?

[Pictures on page 11]

David ni Pilung e i yog ni kari felan’ ko fapi motochiyel rok Got

[Pictures on page 12]

Fapi cha’ ni chon Noah, Abraham, Zekariah nge Elizabeth, nge Kornelius e ke ma theeg Got ngorad ni yad ba mat’aw. Ga manang ko mang fan?