Pig Nge Ngongolen E Sothuw E Go’ Ba Kireb

Baadag Satan ni nguun rin’ e pi n’em nguun pig. Boch e girdi’ e ma pi’ e maligach ngak e thagith ara ngak boch e kan ni fan e nge yoror rorad ko riya’. Fan ni yad ma rin’ ni aray rogon e yad be rus nga gelngin e kan. Yad ma tay e luwaw fa bachal nga pa’rad ni aram e matnag rorad. Yad ma thiy ko “falay” maku yad ma unum boch ya ke michan’rad ngay ni ba’ gelngin. Boch e kar ted nga tabinaw rorad ma boch e kan dareg u but’ maku yima k’eyag boch nga bang nib mith ni fan e ke riyul’ u wan’rad ni bay gelngin nra yoror rorad. Ma boch e girdi’ e ma fanay e “falay” ni kan pig ngay ya ke riyul’ u wan’ nra fel’ rogon e maruwel rok ara skul rok fa nge mabgol.

Bin th’abi fel’ nra yororiyem ko riya’ u puluwon Satan e nge par Jehovah ni fager rom. Jehovah nge pi engel rok e kab gel gelngirad ngak Satan nge pi moonyan’ rok. (James 2:19; Revelation 12:9) Rib m’agan’ Jehovah ngay ni nge dag gelngin ni fan ko pi fager rok—ni piin ri yad ba yul’yul’ ngak.​—2 Kronicles 16:9.

Thin Rok Got e be gaar: “Yug dab un rin’ e ngongol ko pig.” De m’agan’ Jehovah nga ngongolen e pig nge sothuw ya aram e pi ngongol ni ma tay be’ riy nga tang gelngin Satan ni fare Moonyan’.​—Levitikus 19:26.