Bay e Marchaal Rom ni Dabi Yim’?

BAY e yafos u tomren e yam’? Re deer ney e ke athukuy laniyan’ e girdi’ ni ke yan bokum biyu’ e duw. U lan e pi duw nem ni ke yan, ma girdi’ u gubin mit e ulung e kar pared ni yad be lemnag fan e re thin ney nib thilthil rogon ma kar sunmiyed boor raba’ e taliw.

U gaangin yang u fayleng, nib muun ngay e pi nam ni bay u Polynesia, Melanesia, nge Micronesia, boor e girdi’ e ba mich u wan’rad ni “marchaal” e ma par nib fos u nap’an nra yim’ be’. Riyul’ ni bay ban’en u fithik’ i downgin e girdi’ ni ma chuw u tomren ni ke yim’ be’ ma ka be par nib fos? Be mang fare marchaal ni bay u fithik’ be ni kab fos? Mang e ma buch riy u nap’an ni gad ra yim’? Thin rok Got ni kan thagthagnag, ni fare Bible, e ke pi’ e fulweg ko pi deer ney nib riyul’ mab tamilang.

Be Mang fare Marchaal?

U lan e Bible, ma fare thin ni kan pilieg ni “spirit” e rib tamilang ni be yip’ fan e “pogofan.” Machane re n’ey e be yog boor ban’en ma gathi kemus ni ngan pogofan. Bod rogon ni yog, James ni ir e tayol ko Bible, ni gaar: “Dowef ndariy e pogofan riy e ba yam’.” (James 2:26) Ere, spirit e aram e n’en ni ma pi’ e yafos ko fare dowef.

Re gelngin e yafas ney e dabiyog ni kari mus ni yigoo pogofan, ara nifeng, ni ma yan nga fithik’ e wurrum. Mang fan ndabiyog? Ya tomren ni ke tal e pogofan, ma ka bay e marchaal u downgiy—“nge yan in e minit,” nrogon ni be yog e The World Book Encyclopedia. Aram fan ni yima yog ni rayog ni ki sul be’ nge fos biyay, maku rayog ni ngan fek yu yang u dow ngan tay ngak yugu be’. Machane nap’an nra m’ay gelngin e yafas u fithik’ ma dabkiyog ni ngan sulweg e yafos ngak. Urngin e nifeng ni yibe pogofan riy u roy u fayleng e dabiyog ni nge faseg taab cell. Ere, fare spirit e aram gelngin e yafos ni dabni guy—ni aram e marchaal—ni ma tay e pi cell nib fos. Re pogofan ney e ma ayuweg gelngin e yafos.—Job 34:14, 15.

Re gelngin e yafas nem e yigoo girdi’ e rayog ni nge marwel u fithik’rad? Bible e ra ayuwegdad nge yog nda pirieged e fulweg ko re deer ney. I yoloy King Solomon ni gaar: “Mini’ e bay u wur ni manang fan e pi marchaal ko pi fak e girdi’, ko be yan nga lang; nge marchaal ko pi gamanman, ko be yan nga fithik’ e but u fayleng?” (Eklesiastes 3:21, New World Translation) Ere gamanman nge girdi’ e kan weliy morngaagrow ni bay e marchaal rorow. Uw rogon e re n’ey?

Fare spirit, ara gelngin e yafos, e rayog ni ngan taareb rogon nag ko gelngin e gamig ni ma yan u fithik’ e masin ara pi n’en ni ma fanay e gamig ni nge marwel. Fare gamig ni dabni guy e rayog ni ngan fanay nga boor mit ban’en, ni be yan u rogon e mit i talin e maruwel nge gelngin. Ni bod e stof nrayog ni nge pi’ gelngin e gowal, ma computer ni rayog ni nge pi’ boch e llowan’ nge matheeg, ma television e rayog ni nge pi’ e sasing nge lingan ban’en. Machane, fare gamig e darma fek rarogon fa yaan fare equipment ni be cheleg. Ke par ni ke mus ni goo ba gelngin. Taareb rogon ko fare gelngin e yafos ni darma fek e ngongol ko fare girdi’ ara gamanman ni be mithmitheg. Dariy e ngongol riy, maku darma yog ni nge lem. Girdi’ nge gamanman e “ba taareb rogon e pogofan rorow.” (Eklesiastes 3:19) Ere, ra yim’ be, ma gelngin e yafas rok e dabi chuw nge yan i par nga biyang ni bod e kan ni ma par u giyow.

Ere, mang, e ma buch ko pi yam’? Ma mang e ra buch ko fare gelngin e yafas u nap’an nra yim’ be’?

“Bay Kum Ngal ni But’ Biyay’ ”

Bin som’mon e girdi’, i Adam, e nap’an ni togopluw ko motochiyel rok Got, me yog Jehovah ngak ni gaar: “Ya thingari yib e athuw u dakenam ma ga marwel nib gel nge yog ni pi’ e but’ e ggan ngom, nge yan i mada’ ko ngiyal’ ni ngam sul riy ko but’ ni ir e ni ngongilyem ngay. Ni ngongilyem ko but’, ere bay kum sul ko but’ biyay.” (Genesis 3:19) U m’on ni sunmeg Got Adam ko but’ ma uw e gin ni immoy riy? Mang fan, ya dariy biyang ni immoy riy! Dariy ba ngiyal’ ni immoy. Ere nap’an ni yog Jehovah Got ni Adam e ra “sul ko but’ ”, ma n’en ni be yog e ra yim’ Adam. Dabi yan Adam nga giyow ko kan ni bay u biyang u tharmiy. U nap’an nra yim’ ma ra sul biyay nge m’ay e yafos rok, dabki par. Gechig rok e aram e yam’—ke chuw u fithik’ e yafos—ma gathi nge yan nga biyang u tharmiy.—Roma 6:23.

Ma uw rogon yugu boch e girdi’ ni kar m’ad? Rarogon e pi yam’ e kan weliy nib fel’ rogon u Eklesiastes 9:5, 10, gad ra bieg riy ni gaar: “Pi yam’ e dariy e chi n’en ni ka yad manang . . . Dariy e marwel, dariy e lem, dariy e nangan’ ara llowan’, u lan e low ko yam’.” (Moffatt) Yam’, e aram e da kun moy. Facha’ ni yoloy e psalm e yol ni gaar faanra yim’ be’, “me chuw e marchaal rok’, me sul ko but; ma ka chi ngiyal’ i n’em me tal e lem rok’.”—Psalm 146:4, NW.

Ere rib tamilang, ni pi yam’ e dakuriy e thamtham rorad, dariy gelngirad. Darnanged ban’en. Dabiyog ni guy, ara rungaag, ara ra nonad ngom. Dabiyog ni ngar ayuwegned gur ara ra gafgow naged gur. Ere de t’uf ni ngan rus ko piin ni kar m’ad. Machane uw rogon ni “ma chuw” fare marchaal ko fare girdi’ ko ngiyal’ nra yim’?

Fare Marchaal e “Ma Sul Ngak e Bin Riyul’ e Got”

Yog e Bible ni ra yim’ be, ma “fare gelngin e yafas e ra sul ngak Got.” (Eklesiastes 12:7, NW) Re n’ey, be yip fan ni bay ba kan ni gad ra guy ni be yan nga lang nge taw ko gin ni bay Got riy? Ri danga! Rogon ni be fanay e Bible fare thin ni “sul” e dagathi ba t’uf ni thangri mithmith nge chuw u bang nge yan nga bang. Ni bod, e n’en ni ka nog ngak piyu Isreal ni gaar: “ ‘Mu sulod ngog, mu gu sul ngomed,’ ara’ rogon ni be yog Somol ni Gubin ma Rayog Rok.” (Malaki 3:7) Re n’em ni nge ‘sul’ piyu Israel ngak Jehovah e be yip’ fan ni ngar pied keru’rad ko kireb mi yad sul ko kanawo’ rok Got nib mat’aw. Ma fare n’en ni nge ‘sul’ Jehovah ngak piyu Israel e be yip’ fan ni ra tayan’ me pi e ayuw rok ngorad biyay. U lan e gali n’ey ni ke buch ma fare thin ni “sul” e aram e ba l’ag ko ngongol, ma gathi aram e ngan chuw u biyang ngan yan nga biyang.

Tareb rogon, u nap’an e yam’ ma dariy ban’en ni gad ra guy nra yan u roy u fayleng nge yan nga tharmiy u nap’an nra “sul” fare gelngin e yafas ngak Got. Dab mu pagtalin, ni fare marchaal e aram gelngin e yafos. Nap’an nra chuw e re gelngin nem ku be’, ma kari mus ni yigo Got e bay mat’awun ni nge fulweg ngak. Ere fare gelngin e yafas e ra “sul ngak e bin riyul’ e Got” ni aram e faanra bay e athap ku be’ ni nge fos biyay ma ran tay nge par u pa’ Got.

Am lemnag, ni bod e biney, rogon ni yog e Scripture u morngaagen e yam’ ni tay Jesus. Luke ni ku ir reb e tayol ko Bible e gaar: “Me non Jesus nri baga’ laman ni gaar, ‘Chitamag! Kug ta’ nga paam gelngin e yafas rog!’ I yog e re bugithin ney me aw e fan rok. (Luke 23:46) Ere nap’an ni aw e fan rok Jesus, ma gathi riyul’ ni yan nga tharmiy. Dan faseg Jesus ko yam’ nge mada’ ko bin dalip e rran. Ma ka immoy 40 e rran u m’on ni nge yan nga tharmiy. (Acts 1:3, 9) U nap’an e ngiyal’ ni yim’, ma rib tamilang ni i pagan’ Jesus ni nge ta’ gelngin e yafas rok nga lan pa’ e Chitamangin, nrib polo’ e pagan’ rok ni Jehovah e rayog ni nge sulweg e yafos rok ngak.

Arrogon, yigo Got e rayog ni nge sulweg e yafos ku be’. (Psalm 104:30) Uw fane ga’ e athap ni ke mab e re ke kanawo ney!

Athap Nrib Mudugil

I gaar e Bible: “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni manangrad e bayi rungaag laman [Jesus] mi yad yib u lan e low rorad nga wuru’.” (John 5:28, 29, NW) Arrogon, yog Jesus Kristus ni urngin e piin ni bay u laniyan’ Jehovah e ran fasegrad, ara ngan sulwegrad ko yafos. Re ngiyal’ nem ma gad ra falfalan’ ni ngad rungaaged morngaagen e girdi’ ni kan faseg rad ko yam’, ko bin ngad rungaaged morngaagen e girdi’ ni kar m’ad. Rib gel e felfelan’ riy ni ngad guyed e piin nib t’uf rodad ni kar bad u low ko yam’!

Ga baadag ni ngam nang boor boch u morngaagen rogon ni rayog ni nge fel’ rogom ko re athap ney ni ke pi Got? Yibe piningem ni ngam yol ko reb e pi address ney ni bay u but’ ngan pi’ reb e copy ko fare brochure ngom ni Rayog ni Ngam Mang Fager Rok Got!