“Mabgol e Urngin e Girdi’ ni Nge Ta’ Fan”

1, 2. Mang boch e deer ni gad ra weliy, ma mang fan?

KAM un ko mabgol, fa? Faanra arrogon, ma gab felfelan’, fa ga be pirieg e magawon? Be palog i yan thilmew e en mabgol rom, fa? Gur, ga be gay rogon ni nge dabi dar e mabgol rom, machane damur pirieg e felfelan’ riy? Faanra arrogon, ma sana ke kireban’um ya daki chugur thilmew e en mabgol rom ni bod kafram. Bochan ni gur reb e Kristiano ma dabisiy ni ga baadag ni nge par nib fel’ e mabgol rom, ya nga nog e sorok riy ngak Jehovah ni fare Got nib t’uf rom. Ere, dabisiy ni aram fan ni be magawon lanin’um ko magawon ni be yib ngom e chiney. Machane, dabi mulan’um ngam lemnag ni dabki puf e magawon rom.

² Ngiyal’ ney e bay boch e Kristiano ni immoy e magawon ko mabgol rorad kafram. Yugu aram rogon, ma kar pirieged rogon ni ngar gelnaged e tha’ u thilrad bayay. Ku arrogom ni rayog ni nge felfelan’um ko mabgol rom. Uw rogon?

NGAM CHUGUR NGAK GOT NGE EN MABGOL ROM

3, 4. Mang fan nra chugur thilin e piin mabgol ni faan yad ra gay rogon ni nge chugur e tha’ u thilrad Got? Mu weliy rogon.

³ Rayog ni nge chugur thilmew e en mabgol rom ni faanra chugur e tha’ u thilmew Got. Mang fan? Am lemnag bburey nib achig nga p’ebugul nib sak’iy be’ nib moon nge be’ nib pin u enggin nra bagayow ma bay u barba’. Yow l’agruw ni nga ranow nga p’ebugul. Nap’an ni ka yow bay u enggin, ma yow ba palog. Machane, nap’an ni yow be forthog i yan nga lang ma yow be chugur nga taabang. Ere, kam nang e n’en ni yira fil ko re fanathin ney?

⁴ Gelngin e athamgil ni ga be tay ni ngam pigpig ngak Jehovah nib mus rogom riy e rayog ni ngan taarebrogonnag nga rogon ni ga be forthog i yan ngam taw nga p’ebugul fare burey. Bochan nib t’uf Jehovah rom ma aram fan ni ga be gay rogon ni nge chugur thilmew e en mabgol rom. Machane faanra be kireb thilmew, ma bod nra bigimew ma bay u barba’ e re burey nem ni be forthog i yan nga p’ebugul. Ere, mang e ra buch ni faanra um forthoggow i yan nga lang? Som’on e ba palog thilmew e en mabgol rom, machane faan gimew ra athamgil ni nge chugur e tha’ u thilmed Got ni bod ni gimew be forthog i yan nga p’ebugul fare burey, ma ra munmun me chugur thilmew. Ere, rogon me chugur thilmew e en mabgol rom e nge chugur e tha’ u thilmew Got. Machane, uw rogon ni ngam rin’ e re n’ey?

5. (a) Mang reb e kanawo’ nrayog ni nge chugur e tha’ u thilin be’ nge Jehovah nge en mabgol rok? (b) Uw rogon e mabgol u wan’ Jehovah?

⁵ Reb e kanawo’ nib ga’ fan nrayog ni ngam chugurgow e en mabgol rom ngak Got e ngam folgow ko fonow nu Bible ni fan ko piin mabgol. (Psalm 25:4; Isaiah 48:17, 18) Mu lemnag reb e fonow ni pi’ apostal Paul ni gaar: “Mabgol e urngin e girdi’ ni nge ta’ fan.” (Hebrews 13:4) Mang e be yip’ fan e re n’ey? Fare bugithin ni “ta’ fan” e be yip’ fan ban’en nrib ga’ fan. Ma aram rogon e mabgol u wan’ Jehovah. Ma tay ni aram ban’en nrib ga’ fan.

T’UFEG ROM NGAK JEHOVAH E RA AYUWEGEM

6. Mang e be tamilangnag fare fonow ni pi’ Paul u murung’agen e mabgol? Mang nib ga’ fan ni ngad nanged e n’en nib thil u thilin e gali n’ey?

⁶ Faanra gimew ma pigpig e en mabgol rom ngak Got, ma dabisiy ni gimew manang ni mabgol e ban’en nib ga’ fan mab thothup. Jehovah e ir e sunmiy e mabgol. (Mu beeg e Matthew 19:4-6.) Machane faanra be magawon e mabgol rom ma de gaman ni kemus ni ngaum lemnag ni mabgol e ban’en ni ngaun ta’ fan, ya dabi ayuwegmew ni ngaum t’ufegew gimew ma gimew be tay famew. Ere, mang e ra k’aringmew ni ngam rin’ew e re n’ey? Mu tay fanam i yan u rogon ni weliy Paul murung’agen e ta’ fan. De yog ni “mabgol e ba ga’ fan” ya rogon ni yog e “mabgol e urngin e girdi’ ma nge ta’ fan.” Re n’ey e gathi kemus ni ban’en ni yugu be yog Paul; ya ban’en ni be pi’ e athamgil nga laniyan’ e girdi’ ni ngar rin’ed.a Ere, faan ga ra nang e n’en nib thil u thilin e gali n’ey ma ra ayuwegem ni ngam gay rogon ni nge chugur thilmew e en mabgol rom bayay. Mang fan ni aram rogon?

7. (a) Mang e motochiyel u Bible ni gad ma fol riy ni gubin ngiyal’, ma mang fan? (b) Mang angin e fol?

⁷ Am lemnag feni ga’ fan u wan’um boch ban’en ni kan tay chilen u Bible ni ngan rin’, ni bod fare thin ni kan tay chilen ni ngan ayuweg boch e girdi’ ngar manged pi gachalpen Jesus ara fare fonow ndab ni pag e muulung. (Matthew 28:19; Hebrews 10:24, 25) Yu ngiyal’ e ba mo’maw’ ni ngam fol riy ni bochan e bay boch e girdi’ ni dubrad e machib. Ma yu ngiyal’ e maruwel ni ga be un ngay e ma mo’maw’nag ngom ni ngam un ko muulung. Machane yugu aram rogon, ma ka ga be ulul ni ngam un ko machib nge muulung. Dariy be’ nrayog ni nge talegem ni ki mada’ ngak Satan! Mang fan? Bochan e rib t’uf Jehovah rom. (1 John 5:3) Ere, mang angin nib fel’ ni ke yib ngom? Bochan ni ga ma un ko machib nge muulung ni gubin ngiyal’, ma ke gapas lanin’um ma gab felfelan’ ni bochan e ga be rin’ e tin nib m’agan’ Got ngay. Ma pi n’em e ma pi’ gelngim. (Nehemiah 8:10) Mang e gad ra fil ko re n’ey?

8, 9. (a) Mang e ra k’aringdad ni ngad folgad ko fare fonow ni ngan ta’ fan e mabgol? (b) Mang l’agruw ban’en ni ngad weliyed e chiney?

⁸ T’ufeg rom ngak Jehovah e rayog ni nge k’aringem ni ngam fol ko fare fonow nu Bible ni be yog ni “mabgol e urngin e girdi’ ni nge ta’ fan”, ni bod rogon ni ga ma fol ko fare thin nu Bible ni ngan machib min un ko muulung. (Hebrews 13:4; Psalm 18:29; Eklesiastes 5:4) Maku reb e faanra mu gay rogon ni ngaum ta’ fan e mabgol rom, ma ra tow’athnagem Jehovah ni bod rogon nra tow’athnagem ni faanra um athamgil ni ngam un ko machib nge muulung ni gubin ngiyal’.​—1 Thessalonika 1:3; Hebrews 6:10.

⁹ Ere, uw rogon ni ngam ta’ fan e mabgol rom? Thingar mu siyeg boch e ngongol nra kirebnag thilmew e en mabgol rom. Maku reb e, thingar mu rin’ boch ban’en nrayog ni nge gelnag e tha’ u thilmew e en mabgol rom.

MU PALOG KO THIN NGE NGONGOL NRA KIREBNAG E MABGOL

10, 11. (a) Mang ngongol e ma darifannag e mabgol? (b) Mang deer e ngad fithed ngak e en mabgol rodad?

¹⁰ Boch kafram me yog reb e ppin ni Kristiano ni gaar: “Kug meybil ngak Jehovah ni nge ayuwegeg ngaug k’adan’ug.” Ko mang? I ulul ngay ni gaar: “Pumoon rog e ma lieg ko thin. Gubin ngiyal’ ni ma gaar ngog ‘Ga be magawonnageg!’ ma ‘Darifam!’ Pi thin ney e der ma bech dowag riy, machane ma par u lanin’ug ni bod bangi fath ndabi chuw.” Thin nib kireb e aram reb e magawon ni ma sum u lan e mabgol.

¹¹ Rib gel e kireban’ riy ni faanra buch ban’en ni aray rogon u lan e tabinaw ko Kristiano nra amithnag laniyan’ be’ nib mo’maw’ ni nge chuw! Ba tamilang ni faanra u nog e thin nib kireb u lan e mabgol ni gubin ngiyal’ ma aram e danir ta’ fan e mabgol. Ere, uw rogon e mabgol rom? Reb e kanawo’ ni ngam nang ko ga ma gafgownag laniyan’ e en mabgol rom e ngam fith ni nge lungum, “Uw rogon u wan’um e thin ni gu ma yog ngom?” Thingar mu gay rogon ni ngam thilyeg e ngongol rom ni faanra ga ma amithnag laniyan’ e en mabgol rom ko thin ni ga ma yog ngak.​—Galatia 5:15; mu beeg e Efesus 4:31.

12. Uw rogon nra yan i aw nib m’ay fan e pigpig ni ma tay be’ u mit Got?

¹² Dab mu pagtalin ni rogon ni ga ma non ngak e en mabgol rom e bay rogon ko tha’ u thilmew Jehovah. Be yog e Bible ni gaar: “Ra be finey be’ ni be liyor ngak Got ma faanra der yog rok ni nge gagiyegnag bolowthen nge siy ki yog e tin nib kireb, ma liyor ni be tay ngak Got e mm’ay fan, ma aram e ir e be bannag ir.” (James 1:26) Thin ni ga ma yog e bay rogon ko liyor ni ga ma tay. Der yog e Bible ni faanra ma pigpig be’ ngak Got, ma aram e yugu demtrug e n’en ni nga i rin’ u lan e tabinaw rok. Ere, dab mu bannagem ya ireray ban’en nrib ga’ fan ni ngan fal’eg i lemnag. (Mu beeg e 1 Peter 3:7.) Rayog ni gab pasig ko pigpig ni ga be tay, machane faanra gubin ngiyal’ ni ga ma yog e thin nib kireb ko en mabgol rom, ma aram e ga be darifannag e mabgol ma pigpig ni ga be tay e ra yan i aw nib m’ay fan u mit Got.

13. Uw rogon nra amithnag be’ laniyan’ e en mabgol rok?

¹³ Piin kar mabgolgad e ngkur kol ayuwgad ndab ra amithnaged laniyan’ e piin mabgol rorad u yugu boch e kanawo’. Am lemnag l’agruw ban’en nrayog ni nge buch: Reb e matin nib muchugbil e yugu ma callnag reb e walag ni pumoon nib mabgol nga i fith boch ban’en ngak mab n’uw nap’an ni yow ma non; ma reb e walag ni pumoon nib muchugbil e yugu yow ma yan reb e ppin nib mabgol ko machib u taabang. Rayog ni nge lemnag fagali cha’ ni yow ba mabgol ndariy ban’en nib kireb ko re n’ey, machane, uw rogon u wan’ e en mabgol rorow? Immoy reb e ppin ni buch ban’en rok ni aray rogon ni gaar: “Gu ra guy e pumoon rog ni yugu yow ma sabethin reb e walag nib pin u lan e ulung, ma ma amithnag lanin’ug. Gu ma lemnag ni gowa dariy fag.”

14. (a) Mang e kan tamilangnag u Genesis 2:24 nib milfan ko piin mabgol? (b) Mang e ngad fithed gadad riy?

¹⁴ Riyul’ ni faanra rin’ be’ ban’en ni aray rogon ngak e en mabgol rok ma ra kirebnag laniyan’, ya der fol ko fare thin ni yog Got ni gaar: “Be’ nib moon e ma pag e chitamangin nge chitiningin nge yan i chag ngak e ppin rok, ngar pirew ni kar taab girdi’gow.” (Genesis 2:24) Riyul’ ni piin ni kar uned ko mabgol e ku yad ma tayfan e gallabthir rorad. Machane rogon ni ke yarmiy Got e faanra ke mabgol be’ ma thingari m’on e en mabgol rok u wan’. Yugu aram rogon ni kub t’uf e pi walag ni Kristiano rok, machane thingari m’oneg e en mabgol rok u gubin ban’en. Aram fan ni faanra pag rogon ni i chag reb e Kristiano nib mabgol ngak be’ ni gathi mabgol rok, ma rayog ni nge kirebnag e m’ag u thilrow e en mabgol rok. Gur, gathi aram fan ni be magawon e mabgol rom? Am fithem ni nge lungum, ‘Gu ma t’ufeg, ma gu ma ayuweg, ma gu ma tay ba ngiyal’ ni fan ko en mabgol rog, fa?’

15. Mang fan ni nge kol ayuw e piin Kristiano ni yad ba mabgol ndabi pag rogon ni ngaur chaggad ngak be’ ni gathi mabgol rorad nrogon ni bay u Matthew 5:28?

¹⁵ Maku reb e, faanra yigi pag rogon ni i chag reb e Kristiano nib mabgol ngak be’ ni gathi mabgol rok ma rayog ni nge sum e magawon riy. Machane, bin riyul’ riy e bay boch e Kristiano ni yad ba mabgol ni kar adaged be’ ni gathi mabgol rorad ni bochan e kaygi pag rogon ni yad ma chag ngorad. (Matthew 5:28) Ere, n’en ni ma buch e yad ma un nga boch e ngongol ni ma kirebnag e mabgol. Mu lemnag e n’en ni yog apostal Paul u murung’agen e re n’ey.

“MABGOL E THINGARI BAGAYAD MI I PAR NIB YUL’YUL’ NGAK BAGAYAD”

16. Mang e ke tay Paul chilen ni fan ngak e piin mabgol?

¹⁶ Tomuren ni yog Paul ni “mabgol e urngin e girdi’ ni nge ta’ fan,” miki fonownigey ni gaar: “Pumoon nge ppin ni kar uned ko mabgol e thingari bagayad mi i par nib yul’yul’ ngak bagayad. Ya ra gechignag Got e pi arorad ni be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 13:4) Par ko pumoon nge ppin e goo piin mabgol e fan ngorad. Aram fan ni nge fol e piin Kristiano ko fare thin ni gaar: “Nge . . . par e felfelan’ rom ko re pin ni kam leay.”​—Proverbs 5:18, BT.

17. (a) Mang fan ndabi lem e piin Kristiano ni bod e girdi’ nu fayleng ni yad ma lemnag nde kireb ni nge par be’ nge be’ ni gathi mabgol rok? (b) Uw rogon ni ngad folwokgad rok Job?

¹⁷ Piin ni yad ma par e piin gathi mabgol rorad e yad be darifannag e motochiyel rok Got. Ngiyal’ ney e boor e girdi’ ni yad ma lemnag ndariy ban’en nib kireb riy. Demtrug rogon, ma piin Kristiano e thingar dab ur lemgad ni aram rogon. Ya yad manang ni Got e ra gechignag e piin ni yad “be ngongliy e ngongol ko darngal nge piin ni yad be par e girdi’ ni gathi mabgol rorad.” (Hebrews 10:31; 12:29) Ere, tin riyul’ e Kristiano e thingar ur lemgad ni bod Jehovah u murung’agen e re n’ey. (Mu beeg e Roma 12:9.) Mu lemnag e n’en ni yog Job ni gaar: “Ku gog ngog u wun’ug ndariy be’ ni ppin ni nggu changar ngak mu gu lemnag e tin nde machalbog.” (Job 31:1) Ere, tin riyul’ e Kristiano e ngar gagiyegniged lan owcherad ndab ur changargad ngak be’ ni gathi mabgol rorad mu ur lemnaged e tin nde machalbog, ya ireray reb e ban’en nra waliyey i yan ko ngongol darngal.​—Mu guy fare article ni bay ko Yugu Boch e Thin ni kenggin e “N’en Be Yog e Bible u Murung’agen e Mabgol ni Be Dar nge Ra Be’ Ma Be Par u Bang.”

18. (a) Uw feni kireb u mit Jehovah ni nge par be’ nge be’ ni gathi mabgol rok? (b) Mang e taareb rogon ko nge par be’ nge be’ ni gathi mabgol rok nge meybil ko liyos?

¹⁸ Uw feni kireb u mit Jehovah ni nge par be’ nge be’ ni gathi mabgol rok? Fapi Motochiyel nni pi’ ngak Moses e ra ayuwegdad ni ngad nanged rogon laniyan’ Jehovah ko re n’ey. Kakrom u Israel e faanra par be’ nge be’ ni gathi mabgol rok, ara un ko meybil ko liyos ma yira li’ nge yim’. (Levitikus 20:2, 10) Kam guy e n’en nib taareb rogon ko gali n’ey? Faanra meybil be’ nu Israel ko liyos ma aram e daki yul’yul’ ko n’en ni ke micheg ngak Jehovah. Maku taareb rogon ni faanra par be’ nu Israel nge be’ ni gathi mabgol rok ma aram e daki yul’yul’ ko n’en ni ke micheg ngak e en mabgol rok. Ere, yow l’agruw nda kur yul’yul’gow. (Exodus 19:5, 6; Deuteronomy 5:9; mu beeg e Malaki 2:14.) Ma kar rin’ew ban’en ni yira tamra’ ngay u p’eowchen Jehovah ni fare Got nib yul’yul’, ma ma pagan’uy ngak.​—Psalm 33:4.

19. Mang e ra pi’ e athamgil nga laniyan’ be’ ni nge siyeg ndab ra parew be’ ni gathi mabgol rok, ma mang fan?

¹⁹ Riyul’ ndaki moy e piin Kristiano u tan fapi Motochiyel Nni Pi’ Ngak Moses. Machane, faan yad ra nang ni kakrom u nap’an piyu Israel e faanra par be’ nge be’ ni gathi mabgol rok ma kar denengow, ma aram e rayog ni nge pi’ e athamgil nga lanin’rad ndab ra rin’ed e biney e ngongol. Mang fan? Am lemnag e re n’ey: Rayog ni ngam man nga lan reb e galesiya ngam ragbug nga p’eowchen reb e liyos ngam meybil ngay, fa? Dabisiy ni ga ra gaar, ‘Dab gu rin’!’ Ma faan yira pi’ e salpiy ngom ni boor, ma ga ra rin’, fa? Ku dabisiy ni ga ra gaar, ‘Dariy e n’en ni yira rin’ ngog mug rin’!’ Riyul’ ni tin riyul’ e Kristiano e dab ra digeyed Jehovah ni bochan e ngar uned ko meybil ko liyos. Taareb rogon ko ngar pared be’ ni gathi mabgol rorad nthingar ra fanenikayed ndemtrug rogon. (Psalm 51:1, 4; Kolose 3:5) Dubdad ni ngad rin’ed ban’en nra felfelan’nag Satan me darifannag Jehovah nge en mabgol rodad.

ROGON NI NGAM GELNAG E M’AG U THILMEW E EN MABGOL ROM

20. Mang e ma buch u boch e mabgol? Mu susunnag.

²⁰ Mang e ga ra rin’ me yag ni ngaum tayfan e en mabgol rom? Ra ngam fulweg e re deer ney, ma ngam lemnag e mabgol ni gowa ba naun. Ngemu’ mag taarebrogonnag e thin nge ngongol nib fel’ nge ku boch ban’en nib fel’ ni ma rin’ e piin mabgol ko nunuw ko fare naun. Ere, faanra chugur thilmew e en mabgol rom, ma mabgol romew e ra yan i par ni ke bod fare naun ni kan nunuwnag nga boch ban’en nrib fel’ yaan. Ma faanra war e t’ufeg romew ngomew, ma ra munmun me kireb e mabgol romew nge yan i par ni ke bod ba naun ndariy e nunuw riy. Machane, faanra ga baadag ni ngam fol ko n’en ni ke tay Got chilen ni “mabgol e urngin e girdi’ ni nge ta’ fan,” ma dabisiy ni ga ra gay rogon ni ngam pithig e magawon u lan e mabgol rom. Maku reb e, faanra ke kireb ban’en nrib ga’ fan u wan’um ni ga ma ta’ fan, ma ga ra gay rogon e n’en ra rin’ nge sul ngki fel’ bayay. Uw rogon ni ga ra rin’ e re n’ey? Be yog e Bible ni: “Tabinaw e ngan toy nga daken e def ni gonop nge tamilangan’. Ra bay e llowan’, ma pi singgil e bay e pi n’en nib t’uf ma ba tolang puluwon riy nge pi n’en nib fel’ yaan.” (Proverbs 24:3, 4) Am lemnag rogon ni yira fanay e pi thin ney nga lan e mabgol.

21. Uw rogon nra gel e m’ag u thilmew e en mabgol rom bayay? (Kum guy fare thin ni kenggin e “Uw Rogon ni Nge Fel’ e Mabgol Rog?”)

²¹ Boch ban’en ni kub muun ko pi n’en nib tolang puluwon ni yima suguy nga lan e tabinaw nib fel’ e aram e t’ufeg, nge madgun Got, nge michan’ nib mudugil. (Proverbs 15:16, 17; 1 Peter 1:7) Pi fel’ngin ney e ma gelnag e tha’ u thilin e piin mabgol. Machane, uw rogon ni kan suguy e singgil ko fare naun ko pi n’en nib tolang puluwon ni kan weliy murung’agen u proverbs? Kan suguy ko “tamilangan’.” Arrogon, tamilangan’ nu Bible e faan yira fol riy ma rayog ni nge thilyeg e lem ko girdi’ me gelnag e t’ufeg u thilrad. (Roma 12:2; Filippi 1:9) Maku reb e faan gimew ra par e en mabgol rom nga but’ ngam fal’egew i lemnag boch e thin nu Bible ni bod e pi thin nu Bible ni fan ko yu rran, fa reb e thin u lan Fare Wulyang ko Damit ma bod ni gimew be fal’eg i yaliy ban’en nib fel’ yaan ni nge mang nunuw ko naun romew. Ma faan gimew ra fol ko fonow ni kam filew ni fan ko piin mabgol ni bochan e ba t’uf Jehovah romew, ma bod ni kam nunuwnagew fare naun ke mada’ nga lan e singgil riy. Angin nra yib riy e ra sul e mabgol romew ngki fel’ bayay.

22. Faan gad ra gelnag e m’ag u thilin e mabgol rodad, ma mang angin nra yib riy?

²² Riyul’ ni faanra nge sul e mabgol rom ngki fel’ bayay, ma thingar mu athamgil ngam maruweliy. Maku dab mu lemnag nrayog ni ngam rin’ e re n’ey u taa bochi ngiyal’. Machane, faan ga ra rin’ e n’en nib milfan ngom ma ga ra felfelan’ ya ga manang ni ga be fol ko n’en ni kan tay chilen u Bible ni gaar: “Nge pasigan’med ngay ni nge bigimed mi i ta’ fan bigimed.” (Roma 12:10; Psalm 147:11) Ma bin th’abi ga’ fan riy e faanra um ta’ fan e mabgol rom, ma ra um par ni gab t’uf rok Got.