Rogon ni Ngaud Ngongolgad ngak Be’ ni Kan Tharbog ko Ulung

Rib gel e kireban’ ni gad ma tay u nap’an ni yira tharbog reb e girdi’ rodad ara fager rodad ko ulung ni bochan e de kalngan’ ko kireb ni ke rin’. Rogon ni gad ra fol ko n’en ni be yog e Bible u murung’agen e re n’ey e rayog ni nge dag gelngin e t’ufeg rodad ngak Got nge yul’yul’ rodad ko yaram rok.a Mu lemnag boch e deer ni ke sum u murung’agen e piin ni kan tharbograd.

Susun ni nge uw rogon e ngongol rodad ngak be’ ni kan tharbog ko ulung? Be gaar e Bible: “Dab um chaggad ngak be’ ni be yog ni ir reb i walagey ni girdien Kristus machane be ngongliy e ngongol ko darngal, ara ba chogow, ara ma ta’ fan ma ma meybil ngak e liyos ni ma meybil boch e girdi’ ngay, ara ma t’ar e thin nga daken e girdi’, ara be’ nib tamuun rrum, ara ma th’ab e motochiyel. Mus ni ngam par nga but’ ngam un ngak e mit i girdi’ nem ko abich ma dab mu rin’.” (1 Korinth 5:11) Ku be weliy e Bible murung’agen e piin ndar ‘pared ni yad ba yul’yul’ ko tin ni yib i fil Kristus ngodad’ ni gaar: “Dab mu pininged nga tabinaw romed; ni mus ni nge lungumed ngak, ‘Nge yib e gapas ngom,’ ma dab mogned ngak. Ya en nra yog e re bugithin ney ngak e yow ra mang nga bayang nguur rin’ew e kireb ni be rin’ faanem.” (2 John 9-11) Dab ud chaggad, ara ud nonad, fa ud weliyed murung’agen e machib ngak e piin ni kan tharbograd ko ulung. Fare Wulyang ko Damit ko September 15, 1981, ko page 25, ni thin ni Meriken e be gaar: “Kemus ni ngam fingichiy ma aram e ke mab e kanawo’ ni ngam sabethingow me fel’ e thin romew. Gad baadag ni ngad rin’ed e re n’ey ngak be’ ni kan tharbog?”

Gur, rib ga’ fan ndab un non ma dab un chag ngak e piin ni kan tharbograd? Arrogon, ya baaray boch i fan. Bin som’on, e faanra dab kud nonad ara da chaggad ngorad ma aram e be m’ug ni gad ba yul’yul’ ngak Got nge Thin rok. Gathi kemus ni ngad folgad rok Jehovah ko tin nib mom ban’en, ya ku thingar da folgad ko tin nib mo’maw’ ban’en. T’ufeg rodad ngak Got e ir e ra k’aringdad ni ngad folgad ko pi motochiyel rok, ya gad manang ni gubin ban’en ni ma rin’ e ba mat’aw, ma gad ba t’uf rok, ma pi motochiyel ni ke tay e faan gad ra fol riy, ma ra yib angin ngodad. (Isaiah 48:17; 1 John 5:3) Bin l’agruw, e faanra dab kud nonad ara da chaggad ngorad ma ra ayuwegdad nge tin ka bay e girdi’ u lan e ulung ndabi kireb e tha’ u thildad Got miki par e ulung nib fel’ murung’agen. (1 Korinth 5:6, 7) Bin dalip, e faan gad ra fol ko pi kenggin e motochiyel u Bible maku rayog ni nge ayuweg faen ni kan tharbog. Gad ra fol ko re n’ey ni ke dugliy e piin piilal ma facha’ ni kan tharbog ni bochan e de fol e rayog ni nge kalngan’ ko kireb ni ke rin’. Ma faanra dab kud nonad ngak, ma rayog ni nge “sulan’” ngak Jehovah.​—Luke 15:17.

Uw rogon ni faanra reb e girdi’ rom e kan tharbog? Re n’ey e rayog ni nge skengnag e yul’yul’ rodad ngak Jehovah. Susun ni nge uw rogon e ngongol rodad ngak reb e girdi’ rodad ni kan tharbog? Dabiyog ni ngad weliyed ni gubin, machane ngad weliyed l’agruw ban’en nib ga’ ni ma buch.

Yu ngiyal’ e yira tharbog be’ ma ka be par u tabinaw. Yugu aram rogon ni kan tharbog maku ir reb i chon fare tabinaw, ere ku ra i un i rin’ e pi n’en ni ma rin’ e tabinaw. Machane, dakuriy e tha’ u thilrad ko tirok Got ban’en. Ere, dabiyog ni nge un ko pi n’en ni ma rin’ e tabinaw ni fan ko liyor rorad ngak Got. Bod ni faanra bay facha’ ni kan tharbog u tabinaw, ma ra pig ni nge tay chon e tabinaw e fol Bible ni tabinaw u taabang ma dabi un ngay. Machane faanra facha’ e kab bitir, ma aram e kab milfan ko gallabthir rok ni ngar llowan’nagew. Ere, rayog ni nge fil fa gal labthir e Bible ngak.b​—Proverbs 6:20-22; 29:17.

Bay boch e girdi’ ni yima tharbograd ko ulung ma dakurur pared u tabinaw. Yugu aram rogon ni bay yu ngiyal’ nib t’uf ni nge mada’ e tabinaw ni ngar puruy’naged ban’en nib ga’ fan, machane thingar ni gonopiy rogon ni ngan rin’. Chon e tabinaw ni Kristiano ni yad ba yul’yul’ e darur taweygad nga boch ban’en ya nge yag nra nonad reb i chon e tabinaw rorad ni kan tharbog ni dakir par u tabinaw. Ya yul’yul’ rorad ngak Jehovah nge ulung rok e ra k’aringrad ni ngar folgad ko re yaram ney. Yad ra par ni yad ba mudugil ni bochan e ba t’uf Jehovah rorad, ma ra ayuweg facha’ ni kan tharbog ni nge yib angin e gechig ni kan tay ngak.c​—Hebrews 12:11.