Nap’an Nra Digey Be’ nib T’uf Rom Jehovah

1. Mang e ra lemnag be’ u nap’an ni yira tharbog reb i girdien e tabinaw rok?

BAY be’ nib t’uf rom ni kan tharbog ko ulung, fa? Re n’ey e rayog ni ngari kirebnag lanin’uy! I yog Hilda nreb e walag nib pin ni gaar: “Nap’an ni yim’ e pumoon rog u tomuren 41 e duw ni kug mabgolgow, mug lemnag ni aram e n’en ke buch rog nth’abi gel e kireban’ riy.b Machane nap’an nni tharbog ba pagel ni fakag miki n’ag leengin nge gal fak, ma ri kub gel boch e kireban’ nug tay.”

2-3. Uw rogon u wan’ Jehovah ni faanra tal be’ ko pigpig ni be tay ngak nrogon ni bay ko Psalm 78:40, 41?

² Am lemnag gelngin e kireban’ ni tay Jehovah u nap’an ni togopuluw boch e engel rok ngak! (Jude 6) Kum lemnag gelngin e kireban’ ni tay u nap’an ni guy piyu Israel ni girdi’ rok ni ur togopuluwgad ngak ni boor yay. (Mu beeg e Psalm 78:40, 41.) Ere ku rayog ni nge pagan’um ngay ni ku ma kireban’ e Chitamangidad ni bay u tharmiy u nap’an nra chuw be’ nib t’uf rom ko ulung. Manang gelngin e kireban’ ni ga be tay. Ere ra pi’ e athamgil nga lanin’um me ayuwegem.

³ U lan e re article ney e gad ra weliy riy rogon nrayog ni nge ayuwegdad Jehovah u nap’an ni ke tal be’ nib t’uf rodad ko pigpig ni be tay ngak. Ku gad ra weliy rogon nrayog ni ngad ayuweged boch e walag u lan e ulung ni ke buch e re n’ey rorad. Machane som’on e ngad weliyed murung’agen reb e lem nde puluw nthingar da siyeged.

DAB MON’ E KIREB NGA DAKENAM

4. Mang e ma lemnag boor e gallabthir u nap’an nra digey reb i fakrad Jehovah?

⁴ Nap’an nra digey be’ Jehovah, mab ga’ nra lemnag e gallabthir rok nrayog ni bay ban’en nsusun e ngar rin’ew ni ngar ayuwegew ni nge ulul ko pigpig ni be tay ngak Jehovah ma dar rin’ew. Tomuren nni tharbog ba pagel ni fak reb e walag ni pumoon ni ka nog Luke ngak, me yog ni gaar: “Gu lemnag ni gag e kireb rog. Ug lik’aynag boch ban’en nib kireb ni bochan e re n’ey. Ma yu ngiyal’ e gu ma yor ma ri be amith lanin’ug.” Elizabeth nreb e walag nib pin ni kun tharbog ba pagel ni fak ko ulung e ba ga’ ni ma gaar u wan’: “Mang e de yag ni nggu rin’? Gu lemnag nde fel’ rogon nug fil ngak fakag ni nge t’uf Jehovah rok.”

5. Mini’ e kireb rok ni faanra digey be’ Jehovah?

⁵ Dab da paged talin ni gad gubin ni ke pi’ Jehovah e puf rogon ngodad. Re n’ey e be yip’ fan nrayog ni ngad mel’eged ko ngad folgad rok fa danga’. Bay boch e girdi’ nda i pigpig e gallabthir rorad ngak Jehovah, machane kar dugliyed ni ngar pigpiggad ngak mar pared ni yad ba yul’yul’ ngak. Ma boch e girdi’ e ri athamgil e gallabthir rorad ni ngar filed ngorad ni nge t’uf Jehovah rorad, machane me yan i boch nga tomuren mi yad digey Jehovah. Ra bagadad ma thingari dugliy ko ra pigpig ngak Jehovah fa danga’. (Josh. 24:15) Ere gimed e piin gallabthir ni ke kireban’med ni bochan e ke digey reb i fakmed Jehovah e dab mu lemnaged nre n’ey e gimed e kireb romed!

6. Mang e rayog ni nge buch rok reb e bitir u nap’an nra digey bagayow e gallabthir rok Got?

⁶ Yu ngiyal’ e reb e matam ara reb e matin e ra digey e tin riyul’ nge tabinaw rok. (Ps. 27:10) Re n’ey e rayog ni nge kirebnag laniyan’ e bitir ko fare tabinaw ni yad ma tayfan e gallabthir rorad. Esther ni kan tharbog e chitamangin e yog ni gaar: “Ba ga’ nug ma yor ni bochan e kug nang ni gathi kemus ni ke malog ko tin riyul’, ya ku ir rok e ke mel’eg ni nge digey Jehovah. Ba t’uf e chitamag rog, ere nap’an nni tharbog ma yugu ma magafan’ug ngak. Ku bay yu ngiyal’ ni ma yib e marus ngog nib pag rogon.”

7. Uw rogon u wan’ Jehovah reb e bitir ni kan tharbog bagayow e gallabthir rok ko ulung?

⁷ Gimed e piin bitir e faanra bay bagayow e gallabthir romed ni kan tharbog ko ulung, ma ri be kireban’mad ko re n’ey ni ke buch romed! Ku arrogon Jehovah ni manang gelngin e kireban’ ni kam ted. Gimed ba t’uf rok mab ga’ fan u wan’ e yul’yul’ ni gimed be tay, maku arrogomad e pi walag. Ku dab mu paged talin ni n’en ni ke dugliy e gallabthir romed e gathi gimed e kireb romed. Kad weliyed faram nra bagadad ma ir rok e nge dugliy ko ra pigpig ngak Jehovah fa danga’. Ma gubin e piin kar uned ko taufe e ra bagayad “ma ba’ gilban ni be fek.”​—Gal. 6:5.

8. Mang e rayog ni nge rin’ chon e tabinaw u nap’an ni yad be sonnag be’ nib t’uf rorad ni nge sul ngak Jehovah? (Kum guy fare kahol ni “Mu Sul Ngak Jehovah.”)

⁸ Nap’an nra digey be’ nib t’uf rom Jehovah, mab puluw ni ngaum athapeg ni nge ba ngiyal’ me sul ngak. Ere mang e rayog ni ngam rin’ u nap’an ni ga be son ni nge sul ngak Jehovah? Mu rin’ urngin e tin rayog rom ya nge yag ni par e michan’ rom nib gel. Ga ra rin’ e re n’ey, ma aram e ga be dag e kanawo’ nib manigil ngak e girdi’ u lan e tabinaw rom nsana kub muun faen ni kan tharbog ngay. Ku ra yib gelngim ni ngam athamgil u fithik’ e kireban’ rom. Ere chiney e ngad weliyed boch ban’en nrayog ni ngam rin’.

N’EN NRAYOG NI NGAM RIN’ YA NGE YAG NI PAR E MICHAN’ ROM NIB GEL

9. Mang boch e kanawo’ nrayog ni nge pi’ Jehovah gelngim riy? (Kum guy fare kahol ni “Boch e Thin nu Bible Nra Fal’eg Lanin’um ni Faanra Bay Be’ nib T’uf Rom ni Ke Digey Jehovah.”)

⁹ Mu rin’ urngin e tin rayog rom ya nge yag ni par e michan’ rom nib gel. Ba t’uf ni ngam ulul ngam gelnag e michan’ romed girdien e tabinaw rom. Uw rogon ni ngam rin’ e re n’ey? Um beeg e Thin rok Got ni gubin ngiyal’ ma ga be fal’eg i lemnag ma kag be un ko muulung, ya nge yag ni pi’ Jehovah gelngim. Joanna ni ke digey e chitamangin nge reb e ppin ni walagen e tin riyul’ e yog ni gaar: “Nap’an nug ra beeg murung’agen boch e girdi’ u Bible ni bod Abigail, nge Esther, nge Job, nge Josef, nge Jesus ma ri ma gapas lanin’ug. N’en ni ur rin’ed e ma pi’ e athamgil nga lanin’ug me ayuwegeg ni nggu sap nga fel’ngin ban’en. Ku bay boch e tang rodad ni ma pi’ e athamgil nga lanin’ug.”

10. Uw rogon nra ayuwegdad e Psalm 32:6-8 ni ngad athamgilgad u fithik’ e kireban’ rodad?

¹⁰ Mu weliy gubin e magafan’ rom ngak Jehovah. Nap’an nra kireban’um ma dab mu tal ko meybil. Mu wenig ngak Got ni nge ayuwegem ni ngam lemnag e n’en ke buch ni bod rogon ni be lemnag, me “fil ngom e kanawo’ ni ir e ngam man riy.” (Mu beeg e Psalm 32:6-8.) Riyul’ nsana ra mo’maw’ ni ngam weliy gubin ban’en ni bay u lanin’um ngak Jehovah. Machane ri manang gelngin e amith ni be tay lanin’um. Ri gab t’uf rok ma baadag ni ngam weliy lanin’um ngak.​—Ex. 34:6; Ps. 62:7, 8.

11. Mang fan nsusun e nge pagan’dad nga rogon ni ma yal’uwegey Jehovah nrogon ni bay ko Hebrews 12:11? (Kum guy fare kahol ni “Be M’ug e T’ufeg rok Jehovah ko Fare Yaram ni Ngan Tharbog Be’.”)

¹¹ Nge m’agan’um ko n’en ke dugliy e piin piilal. Re n’ey ni ngan tharbog be’ ko ulung e bang ko yaram rok Jehovah. Ireray e bin th’abi fel’ e kanawo’ ni ngan ayuweg be’ riy ndakir pigpig ngak Jehovah, maku ra yib angin ngak urngin e girdi’. (Mu beeg e Hebrews 12:11.) Sana bay boch e girdi’ u lan e ulung ni yad ra yog nde puluw e n’en ke dugliy e piin piilal ni aram e ngan tharbog facha’, machane dab mu pagtalin ni pi girdi’ ney e ba ga’ ndubrad ni nga rogned boch ban’en u rarogon facha’ nra m’ug riy nib kireb e rok. Dad nanged gubin ban’en u rarogon fare magawon. Ere ba fel’ ni nge pagan’dad ni fapi piilal ni kar dugliyed ni ngan tharbog facha’ e kar folgad ko n’en be yog e Bible, ma kar dugliyed e n’en ni ngan rin’ nrogon nib m’agan’ Jehovah ngay.​—2 Kron. 19:6.

12. Mang angin ni ke yib ngak boch e walag ni bochan e kar folgad ko yaram rok Jehovah u rogon ni ma yal’uwegey?

¹² Ra m’agan’um ko n’en ke dugliy e piin piilal ni aram e ngan tharbog be’ nib t’uf rom ko ulung mag fol riy, ma aram e rayog ni ngam ayuweg ni nge sul ngak Jehovah. Elizabeth ni faan kan weliy murung’agen e yog ni gaar: “Rib mo’maw’ ngomow ni nge dab kug nonow ngak ba pagel ni fakmow. Machane tomuren ni sul ngak Jehovah, me yog nib puluw e n’en kan dugliy u nap’an ni kan tharbog. Boch nga tomuren me yog ni boor ban’en ni ke fil ko n’en ke buch rok. Ere gu fil riy ni gubin ngiyal’ nib puluw rogon ni ma yal’uwegdad Jehovah.” Ki yog Mark ni figirngin ni gaar: “Boch nga tomuren me yog e re pagel ni fakmow nem ngog nreb i fan ni adag ni nge sul ko ulung e bochan nda ug chaggow ngak. Kug felfelan’ ni ke ayuwegmow Jehovah ni nggu folgow.”

13. Mang e rayog ni ngam rin’ u nap’an ni ke kireban’um?

¹³ Mu non ko pi fager rom ni yad manang rogon lanin’um. Um chag ko pi walag ni kar ilalgad ko tirok Got ban’en nrayog ni ngar ayuweged gur ndabi mulan’um. (Prov. 12:25; 17:17) Joanna ni faan kan weliy murung’agen e yog ni gaar: “Gu lemnag ndariy be’ ni be lemnageg. Machane ba ga’ e ayuw ni pi’ e pi fager rog ni be pagan’ug ngorad u nap’an nug weliy lanin’ug ngorad.” Machane mang e rayog ni ngam rin’ ni faanra bay boch e girdi’ u lan e ulung ni yad ra yog boch ban’en ngom nra gelnag e kireban’ rom?

14. Mang fan nib t’uf ni ‘nge bagadad mi i ayuweg bagadad ko meewar rok u fithik’ e runguy, mu ud n’iged fan u wun’dad e n’en ni manga ke kirebnag bagadad u laniyan’ bagadad’?

¹⁴ Mu gum’an’nagem u puluwon pi walagem. Dabiyog ni ngad lemnaged ni gubin e girdi’ nib puluw e n’en yad ma yog ni gubin ngiyal’. (Jas. 3:2) Gad gubin ndawor da flontgad, ere dab mu gin ni faanra bay boch e girdi’ ndar nanged e n’en ni nga rogned ngom fa reb e rogned ban’en nra kirebnag lanin’um ni gathi lem rorad. Dab mu pagtalin e fonow ni pi’ apostal Paul ni gaar: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wun’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak.” (Kol. 3:13) Reb e walag nib pin ni kan tharbog reb e girdi’ rok e gaar: “Ke ayuwegeg Jehovah ni nggu n’ag fan e n’en ke rin’ boch e walag ni yad be guy rogon ni ngar pied e athamgil ngog, machane ma rogned ban’en ni ke kirebnag lanin’ug.” Ere mang e rayog ni nge rin’ e pi walag u lan e ulung ni ngar ayuweged girdien e tabinaw rok be’ ni kan tharbog ko ulung ni ka yad be par ni yad ba yul’yul’?

RAYOG NI NGE PI’ E ULUNG E AYUW

15. Uw rogon nrayog ni ngad ayuweged girdien e tabinaw rok be’ ni ka fin tharbog ko ulung?

¹⁵ Mu gol ngak girdien e tabinaw rok facha’ ni ka yad be par ni yad ba yul’yul’. Bay reb e walag nib pin ni ka nog Miriam ngak ni yog ni i magagawon ni nge yan ko muulung u tomuren ni kan tharbog be’ ni pumoon ni walagen. I gaar: “Ug magar ko n’en nra yog e girdi’, machane boor e walag ni ki kireban’rad ko n’en ni buch rok walageg, ma da u rogned ban’en nib kireb u murung’agen. Gu be pining e magar ngorad ko ayuw nra pied ngog u nap’an ni be kireban’ug.” Ku bay reb e walag nib pin ni yog ni gaar: “Tomuren nni tharbog ba pagel ni fakmow me yib e pi fager romow ra fal’eged lanin’mow. Bay boch i yad ni yog ndar nanged e n’en ni nga rogned. Boch i yad e ug yorgad u taabang, ma boch i yad e yoloy e babyor nge pi’ ngog ni nge pi’ e athamgil nga lanin’ug. Rib ga’ e ayuw nra pied ngog!”

16. Uw rogon nrayog ni nge ulul e pi walag u lan e ulung ni ngar ayuweged e piin kan tharbog reb e girdi’ rorad?

¹⁶ Mu ulul ni ngam pi’ e ayuw ngak girdien e tabinaw rok facha’ ni ka yad be par ni yad ba yul’yul’. Ireray e ngiyal’ nib t’uf ni ngam t’ufegrad mag pi’ e athamgil nga lanin’rad. (Heb. 10:24, 25) Yu ngiyal’ e bay boch e girdi’ u lan e ulung ni yad ma tal ndab kur nonad ngak girdien e tabinaw rok be’ ni kan tharbog ni gowa yad e kun tharbograd. Dab mu pag ni nge buch e re n’ey! Ba ga’ ni piin bitir ni kan tharbog e gallabthir rorad e ba t’uf ni nga unog ngorad e tin nib fel’ ni yad be rin’ ma yibe pi’ e athamgil nga lanin’rad. Maria ni kan tharbog e pumoon rok ma kki n’ag e tabinaw rok e yog ni gaar: “Bay boch e fager rog nra bad nga tabinaw rog ngar lumgad mar ayuweged gag ni nggu fil e Bible ko bitir rog. Yad manang gelngin e kireban’ ni kug tay, mu ug yorgad u taabang. U rogned e tin riyul’ u nap’an nra yog e girdi’ boch ban’en nde riyul’ u murung’ageg. Rib gel e athamgil nra pied nga lanin’ug!”​—Rom. 12:13, 15.

17. Mang e rayog ni nge rin’ e piin piilal ni ngar fal’eged laniyan’ e piin ke kireban’rad?

¹⁷ Gimed e piin piilal e ngam athamgilgad u rogon nrayog romed ni ngam pied e athamgil ngak girdien e tabinaw rok e piin kan tharbograd ni ka yad be par ni yad ba yul’yul’. Ba milfan ngomed ni ngam fal’eged laniyan’ e piin bay be’ nib t’uf rorad ni ke digey Jehovah. (1 Thess. 5:14) Mu pied e athamgil nga lanin’rad u m’on ngu tomuren e muulung. Mmarod mu guyed yad nga taferad ngaum meybilgad u taabang. Mmarod ko machib u taabang, ara mu pininged yad ngar uned ko fol Bible ni gimed ma tay chon e tabinaw romed. Ba t’uf ni nge ayuweg e piin piilal e piin ke kireban’rad mar daged e runguy nge t’ufeg ngorad.​—1 Thess. 2:7, 8.

DABI MULAN’UM MA NGE PAGAN’UM NGAK JEHOVAH

18. Mang e baadag Got ni nge rin’ e piin dakurur pigpiggad ngak nrogon ni bay ko 2 Peter 3:9?

¹⁸ Dabun Jehovah “ni nge n’ag be’, ya ba adag ni nge urngin e girdi’ mi yad pi’ keru’rad ko urngin e denen ni yad be rin’.” (Mu beeg e 2 Peter 3:9.) Yugu aram rogon ni ke rin’ be’ reb e denen nib ubchiya’, machane kab ga’ fan e yafos rok u wan’ Got. Dab mu pagtalin ni ke pi’ Jehovah e yafos rok Fak nrib t’uf rok ni fan ngodad ni gad gubin. Ma guy rogon ni nge ayuweg e piin kar digeyed ya nge yag nra sulod ngak. Be athapeg ni yad ra dugliy ni ngar rin’ed e re n’ey ni bod rogon e n’en ni weliy Jesus ko fare fanathin rok ni murung’agen fare pagel ni malog. (Luke 15:11-32) Boor e girdi’ ni kar digeyed e tin riyul’ me yan i boch nga tomuren mar sulod ngak e Chitamangirad ni bay u tharmiy. Ma ri ma felfelan’ e pi walag ngay ni kar sulod ko ulung. Elizabeth ni faan kan weliy murung’agen e rib gel e felfelan’ ni tay u nap’an ni sul fare pagel ni fak ko ulung. I gaar, “Gu be felfelan’ ngay ni boor e walag nra pied e athamgil ngomow ndabi mulan’mow.”

19. Mang fan nrayog ni nge pagan’dad ngak Jehovah?

¹⁹ Gubin ngiyal’ nrayog ni nge pagan’dad ngak Jehovah. Pi fonow rok e gubin ngiyal’ nra ayuwegdad. Ir reb e Matam nib gol ma ma runguyey nrib t’uf rok e piin yad be t’ufeg ma yad be liyor ngak. Nge pagan’um ngay ndabi digeyem Jehovah ko ngiyal’ ni ke kireban’um. (Heb. 13:5, 6) Mark ni faan kan weliy murung’agen e yog ni gaar: “Dariy ba ngiyal’ ni pagmow Jehovah. Gubin ngiyal’ nra ayuwegdad u fithik’ e magawon rodad.” Ra ulul ni nge pi’ gelngin ngom “ni ir e ba th’abi gel.” (2 Kor. 4:7) Arrogon, rayog ni ngam par ni gab yul’yul’ ma dabi mulan’um ngki mada’ ko ngiyal’ ni ke tal be’ nib t’uf rom ko pigpig ngak Jehovah.