N’en Be Yog e Bible u Murung’agen e Mabgol ni Be Dar nge Ra Be’ Ma Be Par u Bang

Baadag Jehovah ni piin mabgol e ngar pared ni yad ba yul’yul’ ko n’en ni kar micheged u nap’an nra uned ko mabgol. Nap’an ni m’agpa’ e bin som’on e pumoon nge ppin, me yog ni gaar: “Be’ nib moon e . . . nge yan i chag ngak e ppin rok, ngar pirew ni kar taab girdi’gow.” Boch nga tomuren me sul Jesus Kristus u daken e re thin ney ni gaar: “Thingari dabi dareg e girdi’ e gali cha’ ni Got e ke chagiyrow.” (Genesis 2:24; Matthew 19:3-6) Ere, rogon ni ma sap Jehovah nge Jesus ko mabgol, e dariy e ngiyal’ ni nge dar nge taw ko ngiyal’ ni ke yim’ bagayow. (1 Korinth 7:39) Bochan nib thothup e mabgol, ma aram fan ndab ni darifannag. Bin riyul’ riy e, Jehovah e ri ma fanenikay e mabgol ni ma dar nde puluw fan ko thin nu Bible.​—Malaki 2:15, 16.

Ra uw rogon ma aram e rayog ni nge dar e mabgol nib puluw ko Bible? Ri ma fanenikan Jehovah e ngongol ndarngal ara nge par be’ nge be’ ni gathi mabgol rok. (Genesis 39:9; 2 Samuel 11:26, 27; Psalm 51:4) Bochan nri ma fanenikan e ngongol ndarngal, ma aram fan nrayog ni nge dar e mabgol ni bochan. (Mu guy e Guruy ni 9 ko paragraph 7 ni be weliy murung’agen e ngongol ndarngal.) Faanra ke buch e re n’ey u lan e mabgol ma faen nde kireb e rok e ir e nge dugliy ko nge par ko mabgol rok fa ngar dargow. (Matthew 19:9) Machane, faanra ke turguy faen nde kireb e rok ni ngar dargow e en mabgol rok, ma de kireb u wan’ Jehovah e n’en ni ke rin’. Ulung ni Kristiano e der pi’ e athamgil nga laniyan’ be’ ni ngar dargow e en mabgol rok. Bin riyul’ riy, e bay yu ngiyal’ ni ma turguy faen nde kireb e rok ni nge par ko mabgol rok nib ga’ ni faanra ke kal faanem ngan’. Machane, ir e nge dugliy ko mang e nge rin’, ma demtrug ko mang e ra buch ma ir e ke milfan ngak.​—Galatia 6:5.

Machane, bay boch e magawon ni ma sum ni bay boch e Kristiano ni ma turguy ni nge bagayow e en mabgol rok me par u bang ara ra dargow ni yugu aram rogon ndariy bagayow ni ke un ko ngongol ndarngal. Faanra buch ni aray rogon, ma be yog e Bible ni faen ni ke chuw ko en mabgol rok e ‘dabki un ko mabgol fa reb e nge sul’ ko en mabgol rok. (1 Korinth 7:11) Reb e Kristiano ni aray rogon e dabkiyog ni ngki mabgol bayay. (Matthew 5:32) Baaray boch ban’en ni ma buch nrayog ni nge k’aring l’agruw ni’ ni nge bagayow me par rok.

Der pi’ be’ e tin nib t’uf ko tabinaw rok. Rayog ni nge gafgow e tabinaw ni faanra der pi’ e en figirngiy e tin nib t’uf ko tabinaw ni yugu aram rogon nrayog rok. Be gaar e Bible: “Faanra dabi ayuweg be’ . . . girdien e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Timothy 5:8) Faanra dabi thilyeg reb e pumoon ni aray rogon e ngongol rok, ma be lemnag leengin nib t’uf ni nge ayuweg ir nge bitir rok, ma rayog ni nge bagayow me par rok. Riyul’ ni piin piilal ni Kristiano e susun ni ngari fel’ i lemnag rorad e n’en ni ke yog be’, nder pi’ be’ ni Kristiano e tin nib t’uf ko tabinaw rok. Faanra dabi pi’ be’ e tin nib t’uf ko tabinaw rok ma rayog ni ngan tharbog ko ulung.

Be’ ni be gafgownag e en mabgol rok. Rayog ni nge li’ be’ e en mabgol rok nge pag rogon me tay e yafos rok nga thatharen e riya’. Faanra faen ni be li’ e en mabgol rok e ir reb e Kristiano, ma thingari gay e piin piilal murung’agen ngar nanged ko riyul’ fa danga’. Damumuw nge cham e aram boch e ngongol nrayog ni ngan tharbog be’ riy.​—Galatia 5:19-21.

Be’ ni be taleg e en mabgol rok ndabi pigpig ngak Jehovah. Rayog ni nga i guy be’ rogon ni nge dab ki un e en mabgol rok ko bin riyul’ e liyor fa reb e towasariy ni nge th’ab e motochiyel rok Got u boch ban’en. Faanra buch ban’en ni aray rogon, ma faen ni yibe gafgownag e nge dugliy, ya faanra be lemnag ni kemus ni rogon ma rayog ni nge ‘fol rok Got ko bin ni nge fol rok e girdi’’ e aram e nge bagayow me par rok, ma aram e ke milfan ngak.​—Acts 5:29.

Demtrug rogon e magawon ni ke sum, ma susun ndariy be’ ni nge towasariy be’ ni nge chuw ko en mabgol rok ara nge par rok. Yugu aram rogon nrayog ni nge pi’ e pi tafager rok ni kar ilalgad ko tirok Got ban’en nge piin piilal e fonow u Bible, machane dabiyog ni ngar nanged gubin ban’en ni be buch u thilin ba wu’ e mabgol. Kemus ni Jehovah e rayog ni nge guy. Riyul’ nder tay reb e ppin ni Kristiano fan Got ara fare yaram ni fan ko piin mabgol ni faanra weliy e magawon rok nge pag rogon ni bochan e be guy rogon ni nge chuw ko pumoon rok, maku er rogon e en figirngiy. Dariy ban’en nrayog ni ngad mithaged rok Jehovah. Ya “urngin ban’en ni ke m’ay i sunumeg rok e be par u p’eowchen ndariy e upong u daken; mi ir e ri gadad ra weliy e pi n’en ni ud rin’ed ngak.” (Hebrews 4:13) Machane, faanra ke n’uw nap’an ni be buch e pi n’ey rok reb e Kristiano, ma ra ke dugliy ni nge bagayow e en mabgol rok me par rok, ma susun ndariy be’ ni nge gathibthibnagrow. Ya ra tomur riy ma ra “bagadad ma nge weliy ngak Got e n’en ni i rin’.”​—Roma 14:10-12.