Mini’ Jesus Kristus?

1. Uw rogon ni tabab e yafas rok Jesus?

Ba thil Jesus ko girdi’ ya i par u tharmiy ni ir reb e engel u m’on ni ngan gargeleg nga fayleng. (John 8:23) Ir e som’on ni sunmiy Got, maku ir e ayuweg Got ngar sunumiyew urngin ban’en. Kari mus ni Jesus e yigoo Jehovah e sunmiy, ere aram fan ni yima yog ni ir Fak Got ni “kari maagirag rok.” (John 1:14) Jesus e ir e Mitethin rok Got, ere aram fan ni yima pining “fare Thin” ngak.​—Mu beeg e Proverbs 8:22, 23, 30; Kolose 1:15, 16.

2. Mang fan ni yib Jesus nga fayleng?

Ke pi’ Got Fak nge yib nga fayleng ni aram e ngal’uweg e yafas rok nga yin be’ nib ppin nib Jew ndawori nang e pumoon ni ka nog Maria ngak. Ere, dariy e chitamangin Jesus nib girdi’. (Luke 1:30-35) Ke yib Jesus nga fayleng ni (1) nge fil e tin riyul’ u murung’agen Got ko girdi’, (2) me dag e kanawo’ u rogon ni ngad rin’ed e tin nib m’agan’ Got ngay ni ki mada’ ko ngiyal’ ni kad mada’naged e magawon, (3) me pi’ e yafas rok nib flont ni nge “biyuliy boor e girdi’ ngay.”​—Mu beeg e Matthew 20:28.

3. Mang fan nib t’uf ni ngan biyuliydad?

Biyul e aram ban’en ni yima pi’ ni puluwon be’ ya nge dabin li’ nge yim’. (Exodus 21:29, 30) De m’agan’ Got ngay ni nga i pilibthir e girdi’ ma ur m’ad. Uw rogon ni kad nanged e re n’ey? I yog Got ko bin som’on e girdi’ ni aram Adam ni faanra “denen,” ma ra yim’. Ere, faan gomanga fol Adam ma dabi yim’. (Genesis 2:16, 17; 5:5) Be yog e Bible ni “af” e yam’ ngak urngin e girdi’ u daken Adam. Ere, aram fan nib t’uf e biyul ni nge pithigdad ko yam’ ni ke af rok Adam ngodad.​—Mu beeg e Roma 5:12; 6:23.

Mini’ e rayog rok ni nge biyuliydad me pithigdad ko yam’? Nap’an ni gad ra yim’ ma aram e kad pied puluwon e denen rodad. Dariy bagadad nib flont nrayog ni nge biyuliy yugu boch e girdi’.​—Mu beeg e Psalm 49:7-9.

4. Mang fan ni yim’ Jesus?

Jesus e ba thil ngodad ya ir be’ nib flont. Ma bochan ndariy e denen rok ma de t’uf ni nge biyuliy ir. Machane, ke yim’ ni fan ko denen rok yugu boch e girdi’. Bochan ni ke pi’ Got Fak ni nge yim’ ni fan ngodad, ma ke dag feni ri gad ba t’uf rok. Nap’an ni fol Jesus ko Chitamangin me pi’ e yafas rok ni fan ko denen rodad ma ke m’ug ni ku gad ba t’uf rok.​—Mu beeg e John 3:16; Roma 5:18, 19.

5. Mang e be rin’ Jesus e ngiyal’ ney?

Nap’an ni immoy Jesus u roy u fayleng, mi i golnag e m’ar, ma be faseg e yam’, ma be ayuweg e piin ni kar gafgowgad. Re n’ey e be dag e pi n’en nra rin’ ni fan ngak e piin ni yad ba yul’yul’ boch nga m’on. (Matthew 15:30, 31; John 5:28) Tomuren ni yim’ Jesus me faseg Got nga reb e dowef ni gathi downgin e girdi’. (1 Korinth 15:44) Me par nga ba’ ni mat’aw rok Got ni be sonnag e ngiyal’ ni ngan pi’ mat’awun ni nge mang Pilung ni nge gagiyegnag e fayleng ni ga’ngin. (Hebrews 10:12, 13) Chiney e be gagiyeg Jesus u tharmiy ni ke mang Pilung, ma pi gachalpen e yad be machibnag fare thin nib fel’ u ga’ngin yang e fayleng.​—Mu beeg e Daniel 7:13, 14; Matthew 24:14.

Dabki n’uw nap’an me fanay Jesus mat’awun nib Pilung ni nge chuweg urngin e gafgow nge piin ni yad be k’aring. Piin ni yad ra maruweliy e michan’ rorad ngak Jesus, ma yad fol rok e yad ra par u paradis u fayleng ni yad ba felfelan’.​—Mu beeg e Psalm 37:9-11.