Uw Rogon ni Nge Felfelan’ e Tabinaw Rom?

1. Ra nge yog e felfelan’ nga lan e tabinaw rok l’agruw ni’, ma mang fan nib t’uf ni ngar mabgolgow nrogon nib puluw ko motochiyel?

Bible e aram e gin ni bay “fare thin nib fel’ riy ni yib rok fare Got nib felfelan’.” (1 Timothy 1:11, NW) Fare Got nib felfelan’ e baadag ni ngki felfelan’ chon e tabinaw. Ir e sunmiy e mabgol. Ere, faanra nge yog e felfelan’ nga lan e tabinaw rok l’agruw ni’, ma thingar ra mabgolgow ni rogon nib puluw ko motochiyel ya nge yog nra chuguliyew e bitir rorow nib fel’ rogon.

Uw rogon e mabgol u wan’ Got? Faanra ke mabgol l’agruw ni’, ma baadag Got ni ngar parew u taabang ndab ra dargow. Piin Kristiano e thingar ra ted fan e motochiyel ko nam u murung’agen e mabgol. (Luke 2:1, 4, 5) Baadag Jehovah ni nge par e piin mabgol ni yad ba yul’yul’ ngorad. (Hebrews 13:4) Dabun e mabgol ni ma wer. (Malaki 2:16) Machane, faanra ke un figirngin ara leengin reb e Kristiano ngak be’ ni gathi mabgol rok, ma de kireb u wan’ Got ni nge chuw fare Kristiano ko mabgol rok ngki mabgol bayay.​—Mu beeg e Matthew 19:3-6, 9.

2. Uw rogon ni nge ngongol e en figirngiy nge en leengiy ngorow?

Ke sunmiy Jehovah e pumoon nge ppin ni ngar ayuwegew yow. (Genesis 2:18) Bochan ni en figirngiy e ir lolugen e tabinaw, ma thingari pi’ e tin nib t’uf ko tabinaw rok, ma ngki fil murung’agen Got ngorad. Susun ni nge pag fan ir u rogon ni be t’ufeg leengin. Piin figirngiy nge piin leengiy e thingar ra t’ufeg yad ma yad be tay farad. Bochan ni dawori flont e piin figirngiy nge piin leengiy, ma ba ga’ fan ni ngar nanged rogon ni ngaur n’aged fan e oloboch rorad ya nge yog e felfelan’ nga lan e tabinaw rorad.​—Mu beeg e Efesus 4:31, 32; 5:22-25, 33; 1 Peter 3:7.

3. Faanra damur pirieg e felfelan’ u lan e mabgol rom, ma aram e ngam chuw, fa?

Faanra gimew be pirieg e en mabgol rom e magawon u lan e mabgol romew, ma susun e ngam guyew rogon ni ngaum t’ufegew gimew. (1 Korinth 13:4, 5) Der yog e Thin rok Got ni faanra der yog rok l’agruw ni’ ni ngar pithigew e magawon ko mabgol rorow, ma aram e rayog ni nge bagayow me par rok.​—Mu beeg e 1 Korinth 7:10-13.

4. Gimed e piin bitir, mang e baadag Got ni fan ngomed?

Baadag Jehovah ni ngam felfelan’gad. Ke pi’ e bin th’abi fel’ e kanawo’ u rogon ni ngam felfelan’gad u nap’an ni kab fel’ yangarmed. Baadag ni nge fel’ rogomed ko gonop ko gallabthir romed, mu kum filed ban’en ko pi n’en ni i buch rorad. (Kolose 3:20) Ku baadag Jehovah ni ir e En Tasunmiy ni ngam felfelan’gad u nap’an ni gimed be rin’ boch ban’en ni fan ngorow Fak.​—Mu beeg e Eklesiastes 11:9–12:1; Matthew 19:13-15; 21:15, 16.

5. Piin gallabthir, uw rogon ni nge felfelan’ e bitir romed?

Thingar mu maruwelgad nib gel ngam yognaged e ggan, nge naun, nge mad ni fan ko bitir romed. (1 Timothy 5:8) Machane, faanra nge felfelan’ e bitir romed mab t’uf ni ngam filed ngorad rogon ni nge t’uf Got rorad, mu ur folwokgad rok. (Efesus 6:4) Rogon ni gimed be dag nib t’uf Got romed e rayog ni nge ayuweg pi fakmed ni nge t’uf Jehovah rorad. Faan gimed ra fonownagrad ni gimed be fanay e Thin nu Bible, ma rayog ni ngam ayuweged yad nge puluw e lem rorad ko tin nib m’agan’ Got ngay.​—Mu beeg e Deuteronomy 6:4-7; Proverbs 22:6.

Faanra um pied e athamgil nga laniyan’ e bitir romed mi gimed be pining e magar ngorad ko pi n’en nib fel’ ni kar rin’ed, ma ra yib angin ngorad. Kub t’uf ni ngaun yal’uwegrad ma yibe fonownagrad. Re n’ey e ra ayuwegrad ni nge dab ra rin’ed boch ban’en nra k’aring e kireban’ ngorad. (Proverbs 22:15) Machane, susun e ngan yal’uwegrad u fithik’ e t’ufeg.​—Mu beeg e Kolose 3:21.

Pi Mich Rok Jehovah e kar fal’eged boch e babyor nrayog ni nge ayuweg e pi gallabthir nge bitir. Pi babyor ney e ba puluw e thin riy ko Bible.​—Mu beeg e Psalm 19:7, 11.