Nge Par e Mabgol Rom nib Fel’ ma Bay e Felfelan’ Riy

1-3. Mang boch e magawon ni ma mada’nag e piin mabgol? (Mu guy e sasing ni bay u tabolngin e re article ney.)

I YOG reb e pumoon ni ke gaman 38 e duw ni ke mabgol ni gaar: “Faan ga ra athamgil ma ga dag ni ga baadag ni nge fel’ e mabgol rom, ma ra tow’athnagem Jehovah.” Arrogon, rayog ni nga i par e piin figirngiy nge piin leengiy u taabang ni yad ba felfelan’, maku rayog ni ngaur ayuweged yad u nap’an ni kar mada’naged boch e magawon nib ga’.​—Prov. 18:22.

² Ba ga’ ni piin mabgol e yad ma mada’nag e “gafgow ni be pirieg e piin ni mabgol ni gubin e rran.” (1 Kor. 7:28) Mang fan? Pi magawon ni ma mada’nag e piin mabgol u reb e rran ngu reb e rayog ni nge magawonnag e mabgol rorad. Bochan ndawori flont fa wu’ i mabgol, ma rayog ni nge yog bagayow ban’en nra kirebnag laniyan’ bagayow, ara de yag nra weliyew ban’en nib fel’ rogon me sum boch e magawon nga tomuren. (Jas. 3:2, 5, 8) Ku boor e mabgol ni yad ma guy nib mo’maw’ ni ngar ayuweged pi fakrad, ma ka yad be un nga boch e maruwel nib mo’maw’ ara boor e tayim nthingar ni tay ni fan ngay. Bayi n’en ma yugu yad be par ni yad be mochuch ara ke aw parowrad ndabkiyog ni ngar ted e tayim ni ngar ayuweged e mabgol rorad ni nge par nib fel’ rogon. Magawon ko salpiy, ara m’ar, nge ku boch e magawon e rayog ni nge warnag e t’ufeg nge tayfan ni bay u thilin e piin mabgol. Maku reb e, mus ni faanra immoy e mabgol rok l’agruw ni’ nrib fel’ ko som’on, ma rayog ni nge kireb ni bochan e “tin nib kireb ni yima ar’arnag,” ni bod rogon e ngongol ndarngal, nge ngongol ni puwlag, nge tathil ni ma tay e girdi’, nge cham, nge awan’, nge damumuw, nge ngan athamgiliy ban’en ni fan e gur faanem e nga nog e sorok ngom.​—Gal. 5:19-21.

³ Ma kki gel boch e kireb riy ni bochan e ngiyal’ ney ko “tin tomren e rran” e ke garer e lem ni fel’ ngak nge boch e lem nib kireb. Ma mit ney e lem e rayog ni nge kirebnag ba wu’ e mabgol. (2 Tim. 3:1-4) Maku reb e, ku bay be’ ni be guy rogon ni nga i kirebnag e mabgol ko girdi’. I yog apostal Peter ni gaar: “Moonyan’ ni ir e toogor romed e yugu be yan ni bod ba layon ni be tolul, ni be gayiy be’ ni nge longuy.”​—1 Pet. 5:8; Rev. 12:12.

4. Uw rogon nrayog ni nge par e mabgol rok l’agruw ni’ nib fel’ rogon ma bay e felfelan’ riy?

⁴ I yog be’ ni figirngiy ni ma par u Sapan ni gaar: “Ba gel e mochuch ni ug tay ni bochan e magawon ko salpiy. Maku bayi n’en mi i par e ppin rog ni be mochuch ni bochan e da gur weliy ban’en ngak nib fel’ rogon. Maku reb e ki m’ar. Ere, bay yu ngiyal’ ni gamow ma cham nib gel ni bochan e mochuch ni gamow be tay.” Bay boch e magawon ni ma sum u lan e mabgol nib ga’, machane re n’ey e der yip’ fan ndabiyog ni ngan pithig e pi magawon ney. Rayog ni nge ayuweg Jehovah l’agruw ni’ ni nge par e mabgol rorow nib fel’ rogon ma bay e felfelan’ riy. (Mu beeg e Psalm 127:1.) Chiney e ngad weliyed lal ban’en nrayog ni nge rin’ ba wu’ e mabgol me par e mabgol rorow nib fel’ rogon ma dabi kireb. Ngemu’ mu kud weliyed rogon nrayog ni nge ayuweg e t’ufeg e mabgol rok l’agruw ni’ ni nge par nib fel’ rogon.

MU UNEG JEHOVAH NGA LAN E MABGOL ROM

5, 6. Uw rogon nrayog ni nge uneg ba wu’ e mabgol Jehovah nga lan e mabgol rorow?

⁵ Faanra i par ba wu’ e mabgol ni yow ba yul’yul’ ngorow ma yow be fol rok Jehovah, ma aram e rayog ni nge par e mabgol rorow nib fel’ rogon. (Mu beeg e Eklesiastes 4:12.) Faanra i fol ba wu’ e mabgol u rogon ni be pow’iyrow Jehovah, ma aram e yow be uneg Jehovah nga lan e mabgol rorow. Be weliy e Bible murung’agen e girdi’ rok Got kakrom ni gaar: “Faan gimed ra yan nga wuru’ e wo’ ko ba’ ni mat’aw ara ba’ ni gilay’, ma gimed ra rung’ag lungun nga fiti keru’med ni be gaar, ‘Baaray e wo’. Mu leked.’” (Isa. 30:20, 21, BT) Ngiyal’ ney e rayog ni nge “rung’ag” e piin mabgol lungun Jehovah u daken e Thin rok ni yad ma beeg u taabang. (Ps. 1:1-3) Ku rayog ni ngari chugur e tha’ u thilrad u daken e Fol Bible ni Tabinaw ni yad ma tay ni yad ma felfelan’ ngay ma ma gelnagrad ko tirok Got ban’en. Meybil ni yad ma tay u taabang ni gubin e rran e ku rayog ni nge ayuweg e mabgol rorad ni nge par nib fel’ ni yugu aram rogon ni boor e kanawo’ ni be guy e re fayleng rok Satan ney rogon ni nge kirebnag.

⁶ I yog Gerhard ni ma par u Chiyamen ni gaar: “Nap’an nra war e felfelan’ romow ni bochan e magawon, nge boch ban’en nder fel’ i weliy romow u taabang, ma ma ayuwegmow e Thin rok Got ni ngaug gum’an’gow u puluwmow ma gamow be n’ag fan e kireb romow. Pi fel’ngin ney e ra ayuweg e mabgol rok l’agruw ni’ ni nge par nib fel’.” Faanra athamgil ba wu’ e mabgol ni nge par Got u lan e mabgol rorow, ni aram e ngaur rin’ew boch ban’en ni fan ko tirok Got ban’en, ma aram e yow be par ni yow ba chugur ngak Got, ma kub chugur e tha’ u thilrow.

PIIN FIGIRNGIY​—MMARUWELGAD NGA MAT’AWMED U FITHIK’ E T’UFEG

7. Uw rogon ni susun e nge maruwel e piin figirngiy nga mat’awrad ni yad lolugen e piin leengirad?

⁷ Rogon ni ma maruwel reb i figirngiy nga mat’awun ni ir lolugen leengin e rayog ni nge ayuweg e mabgol rok ni nge par nib gel ma bay e felfelan’ riy. Be gaar e Bible: “Kristus e ir e lolugen urngin e pumoon, ma pumoon e ir lolugen leengin, mi Got e lolugen Kristus.” (1 Kor. 11:3) Pi thin ni bay nga tomuren e re thin nu Bible ney e be weliy rogon ni nga i maruwel e piin figirngiy nga mat’awrad ni yad lolugen e piin leengirad. Thingar rin’ed ni bod rogon ni ma maruwel Kristus nga mat’awun ni ir lolugen e piin pumoon. Jesus e gathi ir be’ nib gel e thin rok, ya gubin ngiyal’ ni ma ngongol u fithik’ e t’ufeg, nge gol, nge sumunguy, nge sobut’an’.​—Matt. 11:28-30.

8. Mang e ra rin’ e en figirngiy me mom rok leengin ni nga i t’ufeg ma be tayfan?

⁸ Piin figirngiy ni Kristiano e de t’uf ni nga rogned ngak pi leengirad nthingar un tay farad. Ya yad ‘manang’ rarogon e piin leengirad. Ma yad ma ‘tay farad’ ni bochan e yad manang ni yad ba meewar ko pumoon. (1 Pet. 3:7) Gubin ngiyal’ nthingar i dag e piin figirngiy ko thin nge ngongol rorad nib ga’ fan pi leengirad u wan’rad ndemtrug ko yad bay u fithik’ e girdi’ ara u bang ni yigoo yad. (Prov. 31:28) Faanra i t’ufeg e en figirngiy leengin, ma aram e ku ra i dag leengin e t’ufeg nge tayfan ngak, ma aram e ra tow’athnag Got e mabgol rorow.

PIIN LEENGIY​—MU DAGED E SOBUT’AN’ MU UM FOLGAD

9. Uw rogon nrayog ni nga i dag e en leengiy ni be fol rok figirngin?

⁹ T’ufeg rodad ngak Jehovah ni be gagiyegnag e pi kenggin e motochiyel rok e ir e ra ayuwegdad ni ngaud sobut’niged lanin’dad u tan pa’. (1 Pet. 5:6) Reb e kanawo’ ni nga i tay e en leengiy fan mat’awun Jehovah riy e aram e nga i fol rok figirngin. Be gaar e Bible: “Piin ni ppin, mu folgad ko thin rok pi figirngimed, ya ereray e n’en ni ngam rin’ed nrogon ni ma rin’ girdien Kristus.” (Kol. 3:18) Riyul’ ni gathi urngin ban’en ni ma dugliy e en figirngiy nib m’agan’ leengin ngay. Machane, faanra der togopuluw e n’en ni ke dugliy ko pi motochiyel rok Got, ma thingari fol leengin riy.​—1 Pet. 3:1.

10. Mang nib ga’ fan ni ngaun fol u fithik’ e t’ufeg?

¹⁰ En leengiy e ir e en ‘chagilen’ figirngin. Ma re liw rok ney e ba liw nib ga’ fan. (Mal. 2:14) Ma weliy rogon laniyan’ u boch ban’en nib t’uf ni ngan weliy, ma ma rin’ u fithik’ e tayfan, machane der ma thum’ nga wuru’ mat’awun ni kan pi’. Faanra ba gonop e en figirngiy, ma ra motoyil ko n’en ni be yog leengin ngak. (Prov. 31:10-31) Faanra un fol ma aram e rayog ni ngaun par ni bay e felfelan’, nge gapas, nge taareban’ u lan e tabinaw. Ma angin nra yib riy e ra felfelan’ fa wu’ i mabgol ni bochan e yow manang ni yow be rin’ e tin nib m’agan’ Got ngay.​—Efe. 5:22.

NGAUN N’AG FAN E KIREB

11. Mang nib ga’ fan ni ngaun n’ag fan e kireb?

¹¹ Faanra nge par e mabgol rok l’agruw ni’ nib fel’, ma thingar ra filew rogon ni ngaur n’agew fan e kireb rorow. Ra par e m’ag ko mabgol rorow nib gel ni faanra ur ‘n’igew fan u wun’row e n’en ni manga ke kirebnag bagayow u laniyan’ bagayow ko re ngiyal’ i n’en ni ba’ ban’en ni ke dabuy bagayow ni ke rin’ bagayow ngak.’ (Kol. 3:13) Dabiyog ni nge par e mabgol rok l’agruw ni’ nib fel’ ni faanra dab ur n’agew fan e kireb ni ke rin’ bagayow ni ke thumur, ara ur sulow ngaur weliyew murung’agen e pi kireb nem u nap’an ni kar damumuwgow. Ra tar e cemen u reb e naun me war e def ko fare naun. Ere, ku arrogon ni faanra i par bagayow fa wu’ i mabgol ma be kirebnag laniyan’ bagayow ara ur damumuwgow ngorow, ma rayog ni nge mo’maw’ ko fa wu’ i mabgol ni ngaur n’agew fan e kireb rorow mar maruwelgow u taabang. Machane, faanra i n’ag ba wu’ e mabgol fan e kireb rorow ni bod rogon ni ma n’ag Jehovah fan e kireb rorow, ma aram e rayog ni nge par e m’ag ko mabgol rorow nib gel.​—Mik. 7:18, 19.

12. Uw rogon ni “rogon nib t’uf be’ rok be’ e ra upunguy boor e denen”?

¹² En nib t’uf Got rok nge girdi’ e “der ma aw nga laniyan’ e n’en nib kireb ni kan rin’ ngak.” Bin riyul’ riy, e “rogon nib t’uf be’ rok be’ e ra upunguy boor e denen.” (1 Kor. 13:4, 5; mu beeg e 1 Peter 4:8.) Faanra ba t’uf e girdi’ rodad, ma demtrug urngin yay nra ud n’aged fan e kireb. Nap’an ni fith apostal Peter ko uw urngin yay nsusun e nge n’ag fan e kireb rok be’, me fulweg Jesus ngak ni gaar: “Medlip yay e medlip i ragag.” (Matt. 18:21, 22) N’en ni yog Jesus e be yip’ fan ndemtrug urngin yay nsusun e nge n’ag reb e Kristiano fan e kireb rok boch e girdi’.​—Prov. 10:12.a

13. Uw rogon ni ngad nanged rogon ni ngaud n’aged fan e kireb?

¹³ I yog Annette ni gaar: “Faanra dabun ba wu’ e mabgol ni ngaur n’agew fan e kireb rorow, ma aram e ra i gel e damumuw u thilrow ma dab ki i pagan’row ngorow, ma re n’ey e rayog ni nge kirebnag e mabgol. Faanra i n’ag ba wu’ e mabgol fan e kireb rorow, ma rayog ni ngari gel e chugur ko tha’ u thilrow.” Mu fil rogon ni ngaum pining e magar ma ga be dag nib ga’ fan ban’en u wan’um, ya nge yag ni nge mom ngom ni ngaum n’ag fan e kireb. Mu guy rogon ni nge mecham ngom ni nga u mog ko en mabgol rom boch ban’en nib fel’ ni ke rin’. (Kol. 3:15) Faan ga ra rin’ ni aray rogon ma aram e rayog ni ngaum parew nib gapas lanin’mew, ma gimew ba taareb, ma ra tow’athnagmew Got.​—Rom. 14:19.

MU FOL KO FARE MOTOCHIYEL NI MURUNG’AGEN ROGON NI NGAUD NGONGOLGAD KO GIRDI’

14, 15. Mang fare motochiyel ni murung’agen rogon e ngongol ni ngaud daged ko girdi’? Uw rogon nra yib angin e re n’ey nga lan e mabgol rok l’agruw ni’?

¹⁴ Dariy e maruwar riy ni ga baadag ni ngaun tayfam. Ku dabisiy ni ga baadag ni ngaun motoyil ngom ma yibe lemnag rogon lanin’um. Machane, bay bayay ni kam rung’ag ni ke gaar be’, “Nggu fulweg puluwon ngak e n’en ni ke rin’ ngog nib kireb?” Bay yu ngiyal’ ni gad manang fan ni ma yog boch e girdi’ e re n’ey. Machane, be gaar e Bible: “Dab mu gaar, ‘Bay gu rin’ ngak ni bod ni ke rin’ ngog! Rug ra sulweg taban ngak!’” (Prov. 24:29, BT) Bin riyul’ riy e, ki fil Jesus e bin th’abi fel’ e kanawo’ u rogon ni ngaun pithig boch e magawon nib ga’. Re thin nem ni yog Jesus e ba ga’ ni yima yog ni aram fare motochiyel u murung’agen rogon e ngongol ni ngaud daged ko girdi’. Baaray rogon e re motochiyel nem: “Mu rin’ed ngak boch e girdi’ e tin ni ir e gimed ba adag ni ngar rin’ed ngomed.” (Luke 6:31) Re thin nem ni yog Jesus e be yip’ fan ni susun e ngaud ngongolgad ko girdi’ ni bod rogon ni gad baadag ni ngaun ngongol ngodad ma dab ud fulweged taban e kireb ni ke rin’ boch e girdi’ ngodad. Ma re n’ey e ku be yip’ fan ni ngad athamgilgad ni ngad daged e ngongol ni gad baadag ni ngaun dag ngodad u lan e mabgol rodad.

¹⁵ Faanra ma lemnag ba wu’ e mabgol rogon laniyan’ bagayow, ma aram e rayog ni ngari chugur e tha’ u thilrow. I yog reb i figirngiy ni ma par u South Africa ni gaar: “Gamow ma athamgil ni nge bagamow me rin’ ngak bagamow e n’en ni baadag ni ngan rin’ ngak. Riyul’ ni bay yu ngiyal’ ni gamow ma damumuw ngomow, machane gamow ma athamgil ni ngaug tew famow, ya ra bagamow ma aram rogon e miti ngongol ni baadag ni ngaun dag ngak.”

16. Mang boch ban’en nsusun e dabi rin’ e piin mabgol?

¹⁶ Dab um weliy murung’agen e pi meewar ko en mabgol rom ngak boch e girdi’ ara um weliy boch ban’en u rarogon ni dabum. Ku dab um weliy e pi n’ey u fithik’ e thin ni gosgos ni bochan e ngaun minmin ngay. Mabgol e gathi ngan guy riy ko mini’ e ba gel, ara ba ga’ laman, ara manang e miti thin ni nge yog nra kun ngak be’. Riyul’ ni gad gubin ni bay e meewar rodad, ma bay yu ngiyal’ ni gad ma rin’ boch ban’en ni ma k’aring e damumuw ngak boch e girdi’. Machane, de fel’ ni nga i yog e en figirngiy ara en leengiy boch e thin ngak bagayow nra k’aring e tamra’ ngak fa kirebnag laniyan’. Maku reb e, ku thingar dabi chel bagayow nge li’ bagayow.​—Mu beeg e Proverbs 17:27; 31:26.

17. Uw rogon ni nga i fol e piin figirngiy ko fare motochiyel ni murung’agen rogon e ngongol ni ngaun dag ko girdi’?

¹⁷ U boch e nam e ma li’ ara ma gafgownag e piin pumoon pi leengirad ni bochan e ngar micheged ni yad ba gel. Machane, be gaar e Bible: “Kab fel’ ni ngam gum’an’ ko bin ngam maangach. Kab fel’ ni ngam nang rogon i gagiyegnagem ko bin ngam gagiyegnag e binaw ni polo’.” (Prov. 16:32, BT) Ra nge nang be’ rogon ni nga i k’adan’ ni bod rogon Jesus Kristus, ma thingari athamgil. Reb e pumoon ni yug ma yog e thin nib kireb ngak leengin ara ma li’, e ra kireb e tha’ u thilrow Jehovah. Be gaar e Bible: “Faanra mu damumuwgad, ma dab mpaged e damumuw romed nge fekmed nga fithik’ e denen.”​—Efe. 4:26.

“ROGON NIB T’UF GOT NGE GIRDI’ ROMED E NGAM PUTHUYED NGA URNGIN E PI N’EY”

18. Mang nib ga’ fan ni ngaun dag e t’ufeg ni gubin ngiyal’?

¹⁸ Mu beeg e 1 Korinth 13:4-7. T’ufeg e aram e re fel’ngin nth’abi ga’ fan u lan e mabgol. “Runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed. Nge rogon nib t’uf Got nge girdi’ romed e ngam puthuyed nga urngin e pi n’ey, ni ir e ma chugumiy urngin ban’en nga taabang nge par ni ke fel’ rogon.” (Kol. 3:12, 14) Ba t’uf ni nga i dag e piin mabgol e t’ufeg ndariy e lem ni fel’ ngak riy mu ur folwokgad rok Kristus, ni ir e m’agan’ ngay ni nge pi’ e yafas rok nib maligach ni fan ngak boch e girdi’. Faanra t’ufeg e ir e def u reb e mabgol, ma mus ni faanra ke sum boch e magawon u lan fare mabgol ni bod boch ban’en ni ma rin’ bagayow ndabun bagayow, ara ke m’ar bagayow, ara bay e magawon ko salpiy, ara magawon u thilin bagayow fa wu’ i mabgol nge gallabthir ara pi walagen e en mabgol rok, ma dabi puth fare mabgol.

19, 20. (a) Uw rogon ni nge par e mabgol rok l’agruw ni’ nib fel’ ma bay e felfelan’ riy? (b) Mang e gad ra weliy ko bin migid e article?

¹⁹ Riyul’ ni faanra nge par e mabgol rok l’agruw ni’ nib fel’, mab t’uf ni ngaur t’ufegew yow, ma yow be par ni yow ba yul’yul’ ngorow, ma yow be athamgil ni ngaur rin’ew e tin nib t’uf ni ngar rin’ew ni nge par e mabgol rorow nib fel’. Piin mabgol e susun ni ngaur guyed rogon ni ngaur pithiged e magawon u lan e mabgol rorad, gathi ngar guyed rogon ni ngar milgad riy. Piin mabgol ni Kristiano ni yad ma t’ufeged yad nge Jehovah e susun ni ngar guyed rogon ni ngaur pithiged e pi magawon ni ma sum u thilrad ni bochan ni “rogon ni gadad ba t’uf rok Got nge rogon nib t’uf Got rodad nge girdi’ e ban’en nra par ndariy n’umngin nap’an.”​—1 Kor. 13:8; Matt. 19:5, 6; Heb. 13:4.

²⁰ Kari “mo’maw’” e par e ngiyal’ ney, ere kari mo’maw’ ni nga i par e mabgol ko girdi’ nib fel’ rogon ma bay e felfelan’ riy. (2 Tim. 3:1) Machane, faanra ayuwegey Jehovah, ma rayog ni ngan rin’ e re n’ey. Maku reb e, ku thingari guy e piin mabgol rogon ni nge dab ra uned ko pi ngongol nib kireb ni yibe rin’ ko re fayleng ney ni bay rogon ko ngongol ndarngal. Bin migid e article e be weliy rogon nrayog ni nge dabi un e piin mabgol ko ngongol ndarngal.