Mang e Ra Yibnag e Felfelan’ nga Lan e Tabinaw?

N’EN BE YOG E BIBLE

“Ri kab felan’ e piin ni kar rung’aged e thin rok Got ma kar pired ni yad be fol riy!”​—Luke 11:28.

PI N’EN NRAYOG NGOM NFAANRA MICH U WAN’UM E RE N’EY

Yira pirieg e bin riyul’ e t’ufeg.​—Efesus 5:28, 29.

Bay e tayfan u thilin e girdi’.​—Efesus 5:33.

Bay e pagan’.​—Mark 10:6-9.

RAYOG NI NGE MICH U WAN’DAD E N’EN NI BE YOG E BIBLE?

Arrogon, ya bay l’agruw i fan:

• Got e ir e ke sunmiy e tabinaw. Be yog e Bible ni “bin riyul’ i fithingan urngin e tabinaw” e yib rok Jehovah Got. (Efesus 3:14, 15) Ere, bay e tabinaw ni bochan ni Jehovah e ir e ke sunmiy. Mang nib ga’ fan e re n’ey?

  Am lemnag: Faanra kam kay ba mit e ggan nrib fel’ lamen ma ga baadag ni ngam nang ko uw rogon ni kan fal’eg, ma mini’ e ga ra fith? Dabisiy ni ga ra fith e en ni ke ngongliy.

  Ere, ku er rogon e tabinaw rodad ni faanra gad baadag ni nge yib e felfelan’ nga langgin, ma thingar da folgad rok Jehovah ni ir e ke Sunmiy e tabinaw.​—Genesis 2:18-24.

• Ma lemnagem Got. Ba fel’ ni nge fol chon e tabinaw ko pi fonow rok Jehovah ni bay ko Thin rok. Mang fan? ‘Ya be lemnag rogodad.’ (1 Peter 5:6, 7) Baadag Jehovah e tin nib fel’ ni fan ngodad ma gubin ngiyal’ ni ma yib angin e fonow rok!​—Proverbs 3:5, 6; Isaiah 48:17, 18.