Ba Mich Jehovah u Wan’ Rahab

Ngad susunnaged ni gad bay u lan fare mach nu Jeriko. Re mach ney e bay ko binaw nu Kanaan, ma girdi’ riy e de mich Jehovah u wan’rad. Bay be’ nib pin ni Rahab fithingan ni ma par u roy.

Nap’an ni kab bitir Rahab, me rung’ag murung’agen e n’en ni rin’ Moses ni sey fare day ni Red Sea me pow’iy piyu Israel nga wuru’ fare binaw nu Egypt. Ki rung’ag murung’agen rogon ni i ayuweg Jehovah piyu Israel ni ngar gelgad ko mahl ni ur ted e pi toogor rorad. Ma chiney e be rung’ag thin piyu Israel ni kar bad ra pared nga bang nib chugur nga Jeriko!

Faani reb e nep’, me yan l’agruw e girdi’ nu Israel nga Jeriko ni ngar yaliyew e re mach nem. Ma aram mar bow ko tabinaw rok Rahab, me piningrow ni ngar parew u rom. Re nep’ i n’em me nang e pilung nu Jeriko ni ke yib e girdi’ ni ngar yaliyed e re binaw nem, ma yad bay u tafen Rahab. Ere, l’og fare pilung boch e pumoon ni nga ranod ra koled fa gal damit. I mithag Rahab fa gal damit u daken e chigiy ko naun rok, me yog ko fapi pumoon ni gaar: ‘Ke yib e gali cha’ nir u roy, machane ka ranow. Faan gimed ra yan e chiney, ma ki gimed ra mada’niged yow!’ Mang fan ni ke ayuweg Rahab fa gal damit?​— Bochan nib mich Jehovah u wan’, ma manang nra pi’ Jehovah fare binaw nu Kanaan ngak piyu Israel.

U m’on ni chuw fa gal pumoon u tafen Rahab, mar michegew ngak ni yira ayuwegrad chon e tabinaw rok u nap’an ni yira gothey fare mach nu Jeriko. Ere, mang e ka rognew ngak ni nge rin’?​— Ka rognew ngak ni lungurow: ‘Mu fek e re gaf ney nib rowrow ngam tay ko winda ko naun rom. Ga ra rin’ e re n’ey ma dariy ban’en nra buch ko girdi’ u tabinaw rom.’ I rin’ Rahab e n’en ni yog fa gal pumoon ngak. Ga manang ko mang e buch?​—

In e rran nga tomuren, ma aram me tabab piyu Israel ni ngar liyeged fare binaw ndariy lingrad. Ra liyeged fare mach u lan nel’ e rran, nra reb e rran ma taab yay. Machane, faani taw ko bin medlip e rran, mar liyeged fare mach ni medlip yay. Ngemu’ mi yad tolul nib ga’ lamrad. Ma aram me n’igin Jehovah e yoror ko fare binaw nge puth nga but’. Machane, dariy ban’en ni buch ko fare naun ni kan tay fare gaf nib rowrow ko winda riy. Ga be guy aray ko sasing?​— Dariy ban’en ni ke buch rok Rahab nge chon e tabinaw rok.

Mang e rayog ni ngam fil rok Rahab?​— Ba mich Jehovah u wan’ Rahab ni bochan e boor ban’en nib fel’ ni ke fil u murung’agen. Ku boor ban’en nib fel’ ni ga be fil u murung’agen Jehovah. Ba mich Jehovah u wan’um ni bod rogon Rahab?​— Gamad manang nib mich u wan’um.