Ke Felfelan’nag Jehovah nge Chitamangin

Ga be guy e chi buliyel ni baaray ko re sasing ney?​— Chi buliyel ney e fak be’ nib pumoon ni ka nog Jefthah ngak. Der yog e Bible fithingan e chi buliyel ney, machane gad manang ni ke felfelan’nag Jehovah nge chitamangin. Chiney e ngad weliyed boch ban’en u murung’agrow Jefthah ni chitamangin.

Jefthah e ir be’ nib manigil ma ma fil murung’agen Jehovah ko chi pin ney ni fak. Ku ir reb e pumoon nib gel gelngin mab fel’ rogon ni ma pow’iy e girdi’ rok. Ere, yog piyu Israel ngak ni nge ayuwegrad ni ngar chamgad ko toogor rorad.

I meybil Jefthah ngak Jehovah ni nge ayuweg. Me micheg ngak ni faanra ayuweg nge gel ko mahl, ma nap’an nra sul nga tafen, ma cha’ nsom’on nra yib ni ngar mada’gow e ra pi’ ni nge pigpig ngak Jehovah u tabernacle u n’umngin nap’an e yafas rok. Tabernacle e aram e gin ni ma yan e girdi’ ngay kakrom ni ngar liyorgad ngak Got. Ere, gel Jefthah ko mahl. Ma nap’an ni sul nga tafen, ma ga manang ko mini’ e som’on ni yib ni ngar mada’gow?​—

Arrogon, fachi pin ni fak Jefthah! Kari mus e bitir rok aram, ma thingari pi’ ngak Got. Kari kireban’ Jefthah ko re n’ey. Machane, bay ban’en faram ni ke micheg. Ere, yog fachi pin ni fak ngak ni gaar: ‘Chitamag, faanra kam micheg ban’en ngak Jehovah, ma thingar mu rin’.’

Ku arrogon fachi pin ni fak Jefthah ni ki kireban’. Ya faanra nge pigpig u tabernacle, ma dabiyog ni nge un ko mabgol maku dabiyog ni nge fakay e bitir. Machane, ri baadag ni nge rin’ e n’en ni ke micheg e chitamangin, me felfelan’nag Jehovah. Kab ga’ fan e re n’ey u wan’ ko bin ni nge un ko mabgol ara nge fakay e bitir. Ere, chuw u tabinaw rok nge yan i par nga tabernacle u n’umngin nap’an e yafas rok.

Ga be lemnag ma ke felfelan’ Jehovah nge chitamangin fachi pin ko n’en ni ke rin’?​— Arrogon, kar felfelan’gow! Ere, faanra um fol me t’uf Jehovah rom, ma rayog ni ngam bod fachi pin ni fak Jefthah. Rayog ni ngam felfelan’nag e gallabthir rom nge Jehovah.