I Par Samuel ni Be Rin’ e Tin nib Fel’

Nap’an ni kab bitir Samuel, me yan i par nga tabernacle ko gin ni ma yan e girdi’ ngay ni ngar liyorgad ngak Jehovah nga i pigpig u rom. Ga manang ko mang e rin’ me yan i par Samuel nga tabernacle? Som’on e ngad filed murung’agen Hannah ni chitiningin Samuel.

Ba n’uw nap’an ni i par Hannah ndabiyog ni nge fakay e bitir. Ri baadag ni nge fakay e bitir. Ere, meybil ngak Jehovah me wenig ngak ni nge ayuweg. Me micheg ngak ni faanra fakay bochi tir nib pagel, ma ra pi’ ni nge par u tabernacle nga i pigpig u rom. I fulweg Jehovah taban e meybil rok, ma aram me fakay bochi pagel, me tunguy fithingan ni Samuel. Ere, nap’an ni gaman dalip ara aningeg e duw rok Samuel me rin’ Hannah e n’en ni ke micheg ni aram e fek Samuel nge yan i tay nga tabernacle ni nge pigpig ngak Got u rom.

Eli e ir e ba ga’ ko prist u tabernacle. Maku bay l’agruw i pagel ni fak ni yow ma pigpig u rom. Dab mu pagtalin faram ni tabernacle e aram e gin ni yima yan ngay ni ngan liyor ngak Got, ma girdi’ ni ma yan e ngaram e susun ni ngaur rin’ed e tin nib fel’. Machane, fa gal pagel ni fak Eli e ur rin’ew boch ban’en nrib kireb. I guy Samuel e pi n’em ni ur rin’ew. I rin’ Samuel boch ban’en nib kireb ni bod fa gal pagel ni fak Eli, fa?​— Danga’, ya i par ni be rin’ e tin nib fel’, ni bod rogon ni ke fil e gallabthir rok ngak.

Ga be lemnag ma mang e susun ni nge rin’ Eli ko fa gal pagel ni fak?​— Susun ni nge gechignagrow. Ma susun ni ku dabki pagrow ni ngar pigpiggow u tabernacle. Machane, de rin’ Eli ni aram rogon, ma aram mi ri damumuw Jehovah ngak nge fa gal pagel ni fak. Ma aram me dugliy Jehovah ni nge gechignagrad.

Me yan i reb e nep’ u nap’an ni be mol Samuel me rung’ag laman be’ ni be pining. Be gaar e cha’nem: ‘Samuel!’ Me mil Samuel i yan ngak Eli, machane me gaar Eli ngak: ‘Dawor gu piningem.’ Dalip yay ni buch e re n’ey. Ma yay ni dalip ngay, me yog Eli ngak Samuel ni faanra ke rung’ag laman e cha’nem ni ke pining bayay, ma susun ni nge gaar: ‘Wenig ngom Jehovah, mu non ya gu be motoyil.’ Ere, aram e n’en ni rin’ Samuel. Ma aram me yog Jehovah ngak ni gaar: ‘Mog ngak Eli ni bay gu gechignag e tabinaw rok ni bochan e kar rin’ed boch ban’en nib kireb.’ Ga be lemnag nib mom rok Samuel ni nge yog e pi thin ney ngak Eli?​— Danga’, de mom. Machane, yugu aram rogon ni be rus Samuel ma ke rin’ e n’en ni ke yog Jehovah ngak. Ke riyul’ e n’en ni ke yog Jehovah. Kan li’ fa gal pagel ni fak Eli kar m’ow, miki yim’ Eli nga tomuren.

Ba fel’ ni ngad boded Samuel. I par ni be rin’ e tin nib fel’ ni yugu aram rogon ni i guy boch e girdi’ ni ur rin’ed e tin nib kireb. Me gur, mang e ga ra rin’? Ga ra bod Samuel ni i par ni be rin’ e tin nib fel’, fa? Faan ga ra rin’ ni aray rogon, ma ga ra felfelan’nag Jehovah nge gallabthir rom.