GURUY NI 6
Da i Rus David
Mang e ga ma rin’ u nap’an ni kam rus?— Sana ga ma yan ko nina’ rom nge papa’ rom ni ngar ayuwegew gur. Machane, bay be’ ni ku rayog ni nge ayuwegem. Cha’nem e rib gel gelngin, ndariy be ni taareb rogorow. Ga manang ko mini’ e cha’nem?— Arrogon, cha’nem e aram Jehovah. Chiney e ngad weliyed murung’agen reb e pagel u Bible ni ka nog David ngak. David e ir be’ nder ma rus ni bochan e manang ni gubin ngiyal’ ni ma ayuweg Jehovah.
Nap’an ni kab achichig David, me fil e gallabthir rok ngak ni nga i t’ufeg Jehovah. Ireray e n’en ni ayuweg David ni nge dabi rus ni yugu aram rogon ni i buch boch ban’en rok nrayog ni nge k’aring be’ ni nge rus. Manang ni Jehovah e Fager rok, ma Ra ayuweg. Immoy bayay u nap’an ni be ayuweg David e saf rok, me yib ba layon nib ga’ i k’ad reb fapi saf nge milnag. Ga manang ko mang e rin’ David? I lol’og fare layon me li’ nge yim’. Maku nap’an ni yib reb e bear ni nge k’ad e saf rok, miki li’ nge yim’. Mini’ e ga be lemnag ni ke ayuweg David?— Arrogon, Jehovah.
Ku immoy bayay ni ki dag David nder rus. Ngiyal’ nem e be cham piyu Israel nge girdi’ nu Filistia. Ma bay reb fapi salthaw nu Filistia nib n’uw nib n’uw ni ka nog Goliath ngak. I par e re pumoon nem nga i moningnag e pi salthaw nu Israel nge Jehovah. Ma aram me yog ngorad ni ngar chamgad ngak. Machane, be rus piyu Israel ni ngar chamgad ngak. Ere, nap’an ni rung’ag David murung’agen e re n’ey, me yog ngak Goliath ni gaar: ‘Gu ra cham ngom! Ma ra ayuwegeg Jehovah ni nggu gel ngom!’ Ga be lemnag nde rus David?— Arrogon. Ga manang ko mang e buch?
I fek David e gawul rok nge lal e malang, ma aram me yan ni nge cham ngak Goliath. Nap’an ni guy Goliath feni rib bitir David, me tabab ni nge moningnag. Machane, me yog David ngak ni gaar: ‘Ka mub ngog ni kam fek e sayden, machane gag e ku gub ngom u fithingan Jehovah!’ Ma aram me fek reb fapi malang nge tay ko fare gawul, me mil i yan ngak Goliath, me pag ngak. Me aw fare malang nga peri’ Goliath, me thig nga but’ ni ke yim’! Kari rus piyu Filistia ma aram mi yad mil. Uw rogon ni ke yag rok bochi pagel ni bod rogon David ni nge gel ngak be’ ni aram feni ga’?— Ke ayuweg Jehovah, ma kab gel gelngin Jehovah ngak Goliath!
Da i rus David ya manang nra ayuweg Jehovah
Mang e gad ra fil ko n’en ni buch rok David?— Dariy be’ ni taareb gelngirow Jehovah. Ma ir e Fager rom. Ere, nap’an ni ga ra rus, ma dab mu pagtalin nrayog ni nge ayuwegem Jehovah!
MU BEEG KO BIBLE ROM E
Psalm 56:3, 4
1 Samuel 17:20-54