Kar Yoloyed Murung’agen Jesus

Ga be guy e pi pumoon ni baaray ko re sasing ney?​— Ireray Matthew, Mark, Luke, John, Peter, James, Jude, nge Paul. Pi pumoon ney e ur moyed u nap’an Jesus, ma kur yoloyed murung’agen Jesus. Chiney e ngad filed boch ban’en u murung’agrad.

Dalip ko pi pumoon ney e yad e apostal rok Jesus. Ga manang ko mini’ e dalip i cha’ney?​— Aram Matthew, nge John, nge Peter. Matthew nge John ni apostal e ri yow manang Jesus nib fel’ rogon, ma kur yoloyew l’agruw e babyor u Bible ni murung’agen e yafas rok Jesus u fayleng. Apostal John e ir e yoloy reb e babyor u Bible ni ka nog e Revelation ngay nge dalip e babyor ni ka nog e Bin Taareb e John, nge Bin L’agruw e John, nge Bin Dalip e John ngay. Ki yoloy apostal Peter l’agruw e babyor ni bay u Bible. Fithingan e gal babyor ney e Bin Taareb nge Bin L’agruw e Peter. U lan e gin l’agruw e babyor ni yoloy Peter e weliy riy murung’agen e ngiyal’ ni non Jehovah u tharmiy ni be weliy murung’agen Jesus ni gaar: ‘Ireray fakag nrib t’uf rog ma kari felan’ug ngak.’

Tin baaray e pumoon ni ku yad bay ko re sasing ney e ku boor ban’en ni ur weliyed u murung’agen Jesus ko pi babyor nra yoloyed. Bagayad ko pi cha’ney e aram Mark. Dabisiy ni immoy Mark u nap’an nni kol Jesus me guy urngin ban’en ni buch. Maku bagayad e pi cha’ney e aram Luke. Luke e ir reb e togta ma sana ke mang reb e Kristiano u tomuren ni yim’ Jesus.

Ku bay l’agruw e pumoon ko re sasing ney ni kur yoloyew l’agruw e babyor ko Bible. Gali cha’nem e l’agruw i pumoon ni walagen Jesus ni yow ba bitir ngak. Ga manang fithingrow?​— Aram James nge Jude. Som’on e da i mich u wan’row e n’en ni i yog Jesus, mu ur lemnagew ni ke kireb lolugen. Machane, tomur riy me mich Jesus u wan’row, mar mangew l’agruw e Kristiano.

Bin tomur e pumoon ko re sasing ney ni ki yoloy boch e babyor ko Bible e aram Paul. U m’on ni mang reb e Kristiano, ma yima pining Saul ngak. Ma fanenikay e piin Kristiano ma i gafgownagrad. Ga manang ko mang fan ni adag Paul ni nge mang reb e Kristiano?​— Immoy reb e rran ni be yan u kanawo’ me rung’ag lungun be’ u tharmiy. Cha’nem e aram Jesus. I fith Jesus ni gaar: ‘Mang fan ni ga be gafgownag e piin ni kug mich u wan’rad?’ Tomuren e re n’em, ma aram me thil Paul nge mang reb e Kristiano. Ir e yoloy 14 e babyor ko Bible, ni aram e Roma nge yan i mada’ ko Hebrew.

Gubin e rran ni gad ma beeg e Bible, fa?​— Gad ra beeg e Bible ma boor ban’en ni gad ra fil riy u murung’agen Jesus. Ga baadag ni ngkum fil boch ban’en u murung’agen Jesus, fa?​—