Reb e Am Nra Gagiyegnag e Fayleng ni Ga’ngin

Ga manang ko mang e re Am nem ni gad be weliy murung’agen?​— Arrogon, aram Gil’ilungun Got. Re Am ney e ra fal’eg e re fayleng ney nge mang paradis. Ga baadag ni ngkum fil boch murung’agen e re Am ney?​—

Gubin e am ni bay e pilung riy. Ma fare pilung e ma gagiyegnag e girdi’ rok. Ga manang ko mini’ e Pilung u Gil’ilungun Got ara Am rok Got?​— Aram Jesus Kristus. Ma par u tharmiy. Dabki n’uw nap’an me mang Pilung rok urngin e girdi’ u fayleng! Ga be lemnag ma gad ra felfelan’ u nap’an nra mang Jesus e Pilung?​—

Arrogon, ri gad ra felfelan’! U Paradis e dab ki cham e girdi’ ara ra uned ko mahl. Gubin e girdi’ ni yad ra t’ufeged yad. Dab kun m’ar ma dab ku unim’. Piin malmit e yad ra guy ban’en, ma piin biling e yad ra rung’ag ban’en, ma piin ndabiyog ni ngar uned ko yan e ra ur milgad ma yad be og nga lang. Boor e ggan ni nge kay gubin e girdi’. Ma ra par e girdi’ nge gamanman ni ke fel’ thilrad. Piin ni kar m’ad e yad ra fas bayay. Fapi cha’ ni kam fil murung’agrad ko re ke babyor ney ni bod rogon Rebekah, nge Rahab, nge David, nge Elijah e ku yira fasegrad ko yam’! Ga baadag ni ngam guy e pi girdi’ ney ni kan fasegrad ko yam’?​—

Gab t’uf rok Jehovah ma baadag ni ngam par ni gab felfelan’. Faanra um fil murung’agen Jehovah ma ga be fol rok, ma rayog ni ngam un ko par u paradis ndariy n’umngin nap’an! Ga baadag e re n’ey, fa?​—