Pi Tafager Ku Got E Bayi Par U Paradis

Paradis e dabi bod e re fayleng ney ni gad be par riy e chiney. Got e de adag ni nge par e re but’ ney ni ke sugnag e kireban’ nge wagey nge amith nge gafgow. Ra yan i boch ngaram ma ra fl’eg Got e re but’ ney nge paradis. Ra uw rogon yaan e paradis? Ngad guyed ko mang e be yog e Bible:

Girdi’ nib manigil. Paradis e ra mang tafen e pi fager rok Got. Ra bagayad ma be rin’ e tin ba fel’ ngak bagayad. Rogon e par rorad e yad ra fol u kanawoen Got nib mat’aw.​—Proverbs 2:21.

Ba yoor e ggan. U Paradis e dariy be’ nra yib e bilig ngak. Be gaar e Bible: “Ra yoor e ggan ni grain u fayleng.”​—Psalm 72:16.

Naun ni felel’ nge maruwel ni be falfalan’uy Ngay. U paradis u fayleng ma urngin e tabinaw ni bay e naun rorad nib mil fan ngorad. Gubin e girid’ ni be maruwel e ma yib e falfalan’ ngorad.​—Isaiah 65:21-23.

Ba gapas e fayleng ni ga’ngin. Dabki cham e girdi’ ma dabku unim’ ko mahl. Thin Rok Got e yog ni gaar: “Ra taleg Got e mahl.”​—Psalm 46:8, 9.

Fel’ fithik’ i dowey. Ke micheg e Bible: “Dariy be’ ni be par u [Paradis] nra gaar: ‘Gub m’ar.’” (Isaiah 33:24) Maku dakuriy be’ nib mugutgut ara ba milmit ara biling ara dabiyog ni nge non.​—Isaiah 35:5, 6.

Ra m’ay e amith nge kireban’ nge yam’. Ke gaar e Thin Rok Got: “Dab kun nim’, ma dab kun kireban’, ma dab kun yor, ma dab kun amith. Ya tin kakrom ban’en e ke chuw.”​—Revelation 21:4.

Ra chuw e girdi’ nib kireb. Ke micheg Jehovah: “Piin ba kireb e yira thirifrad u but’; nge piin ba sasalap u fayleng e yira tulufrad riy.”​—Proverbs 2:22.

Girdi’ e ra ur t’ufeged yad u fithik’ e ta’ fan. Dabki n’uw nap’an ma dakuriy e ngongol nde mat’aw nge togopuluw nge chogow nge fanenikay. Bayi par e girdi’ ni kar taarebgad u taabang ko kanawoen Got nib mat’aw.​—Isaiah 26:9.