Ra Yib e Bitir Ma Ra Thil Boch Ban’en u Lan e Mabgol

Ba gel e felfelan’ nra tay ba wu’ e mabgol u nap’an ni yow ra fakay e bitir, machane ku rayog ni nge aw parowrow. Chiney ni ka fin mu fakay e bitir e rayog ni ngam guy ni yooren e tayim rom e ga be fanay ko famchew. Ra dab i gaman e mol rom ara um par ni ba ngiyal’ e gab felfelan’ ma ba ngiyal’ e gab damumuw, ma rayog ni nge magawonnag e tha’ u thilmew e en mabgol rom. Ere, ba t’uf ni ngam rin’ew e en mabgol rom boch ban’en nra ayuwegmew u rogon ni ngam chuguliyew e bitir romew mu kum ayuwegew e mabgol romew. Uw rogon nrayog ni nge ayuwegmew e pi fonow nu Bible ni ngam pithigew e pi magawon ney?

1 NGAM NANGEW ROGON NRA THILYEG FARE TIR E PAR ROMEW

N’EN NI BE YOG E BIBLE: “En nib t’uf Got rok nge girdi’ e ba gum’an’ ma ba gol.” Maku reb e, en nib t’uf Got rok nge girdi’ e gathi “ke mus ni ir e ma lemnag ir, ara ba papey e damumuw ngak.” (1 Korinth 13:4, 5) Faanra gur fare matin, mab mudugil ni yooren e ngiyal’ e ga ra par ni fare tir e ir e ga be tiyan’um ngak. Ma rayog ni nge lemnag figirngim ni dakumur lemnag. Ere, dab mu pagtalin ni kub t’uf ni ngaum tay e tayim ni fan ngak figirngim. Faan ga ra ngongol u fithik’ e gum’an’ nge sumunguy, ma aram e ra nang ni kub t’uf ni nge un i ayuweg fare tir romew.

“Ku er rogomed e piin ni pumoon ni nguum pired e pi leengimed ma thingar um nanged ni yad mmeewar ko pumoon.” (1 Peter 3:7) Ngam nang ni en leengim e boor ban’en ni be rin’ ni fan ko fare tir romew. Ere, rayog ni nga i mochuch, ara i par ni ke aw parwon, ara i kireban’ yu ngiyal’. Ku bay yu ngiyal’ nrayog ni nga i damumuw ngom, machane ngam k’adan’um, ya “kab fel’ ni ngam gum’an’ ko bin ngam maangach.” (Proverbs 16:32, BT) Ngam ngongol u fithik’ e gonop, mag ayuweg ko tin nib t’uf ni ngam ayuweg riy.​—Proverbs 14:29.

N’EN NRAYOG NI NGAM RIN’:

• Pi Matam: Mu un ngak leengim ngam ayuwegew e bitir romew. Kum ayuweg u nap’an ni ke od fare tir u lukngun e nep’. Mu lichnag e tayim ni ga be fanay ni fan nga yugu boch ban’en ya nge yag nim ayuweg leengim nge fare tir romew

• Pi Matin: Nap’an nra yog figirngim ngom ni nge ayuwegem, mag pag nge ayuwegem. Mus ni faanra der rin’ fare maruwel nrib fel’ rogon, ma dab mu gathibthibnag, ya ngam dag ngak u fithik’ e sumunguy rogon ni nge rin’

2 MU CHUGURNAGEW E THA’ U THILMEW

N’EN NI BE YOG E BIBLE: “Kar taab girdi’gow.” (Genesis 2:24) Yugu aram rogon ni kam fakayew e bitir, machane thingar dab mu pagtalin ni ki gimew ‘taab girdi’’ e en mabgol rom. Ere, mu guy rogon ni nga i par nib chugur e tha’ u thilmew.

En leengiy, mu pining e magar ngak figirngim ko ayuw ni ma pi’ ngom. Ga ra pining e magar ngak ma bod ni ga be yog e thin ngak ni ma “golnagey.” (Proverbs 12:18, BT) En figirngiy, mog ngak leengim gelngin feni t’uf rom nge feni ga’ fan u wan’um. Mu pining e magar ngak u rogon ni ma ayuweg e tabinaw romew.​—Proverbs 31:10, 28.

“Ra be’ ma gathi goo ir e ngi i tafinaynag e tin nib fel’ ngak, ya ngki tafinaynag e tin nib fel’ ngak boch e girdi’.” (1 Korinth 10:24) Gubin ngiyal’ ni ngaum rin’ e tin nib fel’ ko en mabgol rom. Mu tew e tayim ni ngaum weliyew boch ban’en riy u taabang, mu u mognew ngomew e tin nib fel’ ni gimew ma rin’, mu um motoyilgow ngomew. Dab i tel bigimew ir rok bigimew. Ra bigimew mi i lemnag e n’en nib t’uf rok bigimew. Ya be gaar e Bible: “Ra ba wu’ e mabgol ma dabi tel bagayow ir rok bagayow, ke mus ni faanra ke taareban’row ngay ni ngar talgow u rogon n’umngin nap’an ni yow ba adag.” (1 Korinth 7:3-5) Ere, mu weliyew e re n’ey u taabang nib fel’ rogon. Ra um gum’an’nigew gimew ma gimew be guy rogon ni nge bigimew me nang rogon laniyan’ bigimew, ma rayog ni nga i par e tha’ u thilmew nib fel’.

N’EN NRAYOG NI NGAM RIN’:

• Dab mu pagtalin ni ngaum tay e tayim ni fan ngomew e en mabgol rom

• Mu rin’ nochi ban’en nra m’ug riy nib t’uf rom e en mabgol rom, ni bod rogon ni ngam yoloy boch yang i babyor ngam pi’ ngak ara mu pi’ bochi ban’en ngak nib tow’ath

3 MU SKULNAG E BITIR ROM

N’EN NI BE YOG E BIBLE: ‘Nap’an ni ka gab bitir ma ga manang e thin ni bay u lan fare babyor nib thothup, ni ir e rayog ni nge tamilangnigem u rogon ni yima thap ngak Got, ni ma yog u daken e michan’ ngak Kristus Jesus.’ (2 Timothy 3:15) Mu lemnag u m’on riy rogon ni ngam skulnag e bitir rom. Ya bitir e rib mom ni ma mit ban’en ngak, ni ki mada’ ko ngiyal’ ni ka bay u meyal. Nap’an ni ka bay e bitir rom u meyal, ma ma poy lungum, ma nap’an ni ga ra felfelan’, fa mu damumuw, fe kireban’um maku ma thamiy e pi n’ey. Um beeg e babyor ngak u nap’an ni kab madway. Yugu aram rogon nder nang fan e n’en ni ga be beeg ngak, machane rayog ni nge ayuweg ni nge adag e beeg babyor u nap’an nra ilal.

Yugu aram rogon ni kab achig e bitir rom, ma rayog ni ngam fil murung’agen Got ngak. Mu guy rogon ni nga i rung’ag lamam u nap’an ni ga be meybil ngak Jehovah. (Deuteronomy 11:19) Mus ko ngiyal’ ni gimew be fafel u taabang, mag weliy ngak murung’agen e pi n’en ni ke sunmiy Got. (Psalm 78:3, 4) Nap’an nra ilal e bitir rom, ma rayog ni nge guy nib t’uf Jehovah rom maku ra fil rogon ni ngki t’uf Jehovah rok.

N’EN NRAYOG NI NGAM RIN’:

• Mu yibilay e gonop ya nge yag nim skulnag e bitir rom

• Nap’an ni ga be fil ban’en ko bitir rom mu um sul u daken boch ban’en ni ga baadag ni nge nang, ya nge yag ni tabab ni nge mit boch ban’en ngak u nap’an ni kab achig