GURUY NI 1
Mu Pag Got ni Nge Ayuwegem Ngam Pirieg e Felfelan’ ko Mabgol Rom
“Som’on ko tabolngin e sunumiyrow e en ni Tasunumiy ni bagayow e be’ nib pumoon ma bagayow e be’ ni ppin.”—Matthew 19:4
Jehovaha Got e ir e m’agpa’ e gal nsom’on e girdi’. Be yog e Bible nsom’on e sunmiy fare pin, ngemu’ me fek i “yib ngak fare moon.” Kari felfelan’ Adam, me gaar: “Ka fini yog be’ ni taareb rogomow, ni yil rok e ni fek ko yil rog, ma ufin u dow e ni fek ko ufin u dowag.” (Genesis 2:22, 23) Ka baadag Jehovah ni nge felfelan’ e piin mabgol.
Nap’an ni ga ra un ko mabgol, ma sana ga ra lemnag ndab i sum e magawon u lan e mabgol rom. Machane, bin riyul’ riy e mus ngak l’agruw ni’ nri yow ma t’ufegew yow maku ra i sum e magawon u thilrow. (1 Korinth 7:28) Re ke babyor ney e bay e pi kenggin e motochiyel u Bible riy ni faan gimew ra fol e en mabgol rom riy, ma rayog ni ngam pirew ni gimew ba felfelan’, miki par e tabinaw romew nib felfelan’.—Psalm 19:8-11.
1 NGE M’AGAN’UM KO MARUWEL ROM NI KE PI’ JEHOVAH
N’EN NI BE YOG E BIBLE: En figirngiy e ir lolugen e tabinaw.—Efesus 5:23.
Faanra gur e en figirngiy, ma baadag Jehovah ni ngaum ayuweg leengim nib fel’ rogon. (1 Peter 3:7) Ke tay Got leengim ni nge mang taayuw rom, ere baadag ni ngaum tayfan ma ga be t’ufeg. (Genesis 2:18) Thingar mu t’ufeg leengim, mu um man nga laniyan’.—Efesus 5:25-29.
Faanra gur e en leengiy, ma baadag Jehovah ni ngar um tayfan figirngim mag ayuweg ya nge yag ni nge rin’ e maruwel rok nib fel’ rogon. (1 Korinth 11:3; Efesus 5:33) Ngaum fol rok, mu um tayfan ko pi n’en ni ma dugliy ni ngan rin’. (Kolose 3:18) Faan ga ra rin’ ni aray rogon, ma rayog ni ngam par ni gab fel’ u wan’ figirngim nge Jehovah.—1 Peter 3:1-6.
N’EN NRAYOG NI NGAM RIN’:
Mu fith e en mabgol rom ko mang e rayog ni ngam rin’ me fel’ boch e mabgol romew. Mmotoyil nib fel’ rogon, mag athamgil ni ngam mon’og ko pi n’en nib t’uf ni ngam mon’og riy
Mu gum’an’nigem. Dabiyog nu lan taa bangiyal’ mi gimew nang rogon ni ngaum felfelan’nigew gimew, ya ba t’uf e tayim
2 MU LEMNAG LANIYAN’ E EN MABGOL ROM
N’EN NI BE YOG E BIBLE: Ba t’uf ni ngaum lemnag rarogon e en mabgol rom. (Filippi 2:3, 4) Nge ga’ fan e en mabgol rom u wan’um. Ma dab mu pagtalin ni baadag Jehovah ni nga i sumunguy e pi tapigpig rok “ngak urngin e girdi’.” (2 Timothy 2:24) “Marog thin e rayog ni nge maad’ad nga laniyan’ be’ nib toar ni bod bangi sayden, machane thin nnog nib gonop e rayog ni golnagey.” Ere, ba ga’ fan ni ngaum kol ayuw ko thin ni ga ma yog. (Proverbs 12:18, BT) Ra ayuwegem gelngin Jehovah nib thothup ni ngaum non u fithik’ e sumunguy nge t’ufeg.—Galatia 5:22, 23; Kolose 4:6.
N’EN NRAYOG NI NGAM RIN’:
U m’on ni ngam weliyew e en mabgol rom ban’en u taabang, mag meybil ya nge ayuwegem Got ni nge dab mu damumuw, me yag ni ngam motoyil ko en mabgol rom
Mu fal’eg i lemnag e n’en ni nga mog nge rogon ni ga ra yog
3 UM LEMNAGEW BOCH BAN’EN U TAABANG
N’EN NI BE YOG E BIBLE: Nap’an ni ga ra un ko mabgol, ma aram e kam pirew e en mabgol rom ni kam “taab girdi’gow.” (Matthew 19:5) Machane, ku ra bigimew ma rogon e lem rok. Ere, ba t’uf ni ngam filew rogon ni nga i taareb lanin’mew. (Filippi 2:2) Ba t’uf ni nga i taareban’uy u nap’an ni ngan dugliy ban’en, ya be gaar e Bible: “Nge yog e fonow ngom nib fel’ me fel’ rogon e tin ga be nameg.” (Proverbs 20:18, BT) Mu pagew e pi kenggin e motochiyel nu Bible ni nge pow’iymew u nap’an ni gimew be dugliy boch ban’en nib ga’ fan u taabang.—Proverbs 8:32, 33.
N’EN NRAYOG NI NGAM RIN’:
Gathi kemus ni ngaum weliy murung’agen boch ban’en ara rogon ni ga be lemnag ban’en, ya ba t’uf ni ngaum weliy lanin’um ko en mabgol rom
U m’on ni ngam rin’ ban’en, mag fith e en mabgol rom
a Jehovah e fithingan Got nrogon ni bay u Bible.