GURUY NI 5
Rogon ni Nga i Par ni Bay e Gapas u Thilmed Chon e Tabinaw Romew
“Runguy, nge gol, nge sobut’an’, nge sumunguy, nge gum’an’ e thingar mon’ed nga dakenmed nge mang mad romed.”—Kolose 3:12
Nap’an ni ga ra un ko mabgol ma aram e ke yag reb e tabinaw ngom nib beech. Yugu aram rogon ni ga ma t’ufeg e gallabthir rom ma ga ma tay farow, machane nap’an ni ga ra un ko mabgol, ma en mabgol rom e ir e ke m’on u wan’um. Rayog ni bay boch e girdi’ romew nde m’agan’rad ko re n’ey. Machane, pi kenggin e motochiyel u Bible e rayog ni nge ayuwegmew u rogon ni nga i par ni bay e gapas u thilmed chon e tabinaw romew, ma ki gimew be guy rogon ni ngam fal’egew e tha’ u thilmew.
1 KU RA UM LEMNAG E GIRDI’ U TABINAW ROM
N’EN NI BE YOG E BIBLE: “Mu liyor ko chitamam nge chitinam.” (Efesus 6:2) Demtrug yangarem, ma gubin ngiyal’ ni thingar um tayfan e gallabthir rom. Ku dab mu pagtalin ni kub t’uf ko en mabgol rom ni ngki ayuweg e gallabthir rok. “En nib t’uf Got rok nge girdi’ e der ma awan’,” ere dab mu lemnag ndaki ga’ fam u wan’ e en mabgol rom ni bochan e tha’ ni bay u thilrad chon e tabinaw rok.—1 Korinth 13:4; Galatia 5:26.
N’EN NRAYOG NI NGAM RIN’:
Mu guy rogon ni dab u mog boch e thin ni bod ni nge lungum, “Tabinaw rom e gubin ngiyal’ ni yad ma darifannageg” ara “Dariy ban’en ni gu ra rin’ ni baadag e nina’ rom”
Mu lemnag boch ban’en nrogon ni ma lemnag e en mabgol rom
2 NGAM PAR NI GAB MUDUGIL KO NGIYAL’ NI KE T’UF
N’EN NI BE YOG E BIBLE: “Be’ nib moon e ma pag e chitamangin nge chitiningin nge yan i chag ngak e ppin rok, ngar pirew ni kar taab girdi’gow.” (Genesis 2:24) Nap’an ni ga ra un ko mabgol, ma rayog ni nge lemnag e gallabthir rom ni kab milfam ngorow. Ere, sana yow baadag ni ngar unew i tay murung’agen boch ban’en u lan e mabgol rom ndariy rogon ngorow.
Ere, ba milfan ngomew e en mabgol rom ni ngam dugliyew u taabang e gin ni nge mus e gallabthir romew riy, ngemu’ mi gimew yog ngorad. Rayog ni nga mognew e thin nib tamilang ngorad, machane, ngam guyew rogon ndab mognew ban’en nra kirebnag lanin’rad. (Proverbs 15:1) Sobut’an’, sumunguy, nge gum’an’ e ra ayuwegmew ni nge par nib fel’ thilmed girdien e tabinaw romew me “bigimed mi i ayuweg bigimed ko meewar rok u fithik’ e runguy.”—Efesus 4:2.
N’EN NRAYOG NI NGAM RIN’:
Faanra ga be guy ni kaygi yoor ban’en u rarogon e par romew e en mabgol rom ni be un e girdi’ romew i tay murung’agen, mag weliy ngak ko ngiyal’ ni ga be guy nib fel’ ni ngam weliyew
Mu dugliyew u taabang rogon ni gimew ra pithig e pi magawon ney