GURUY NI 2
Ngaum Yul’yul’gow Ngomew
“Thingari dabi dareg e girdi’ e gali cha’ ni Got e ke chagiyrow.”—Mark 10:9
Baadag Jehovah ni ngaud ‘yul’yul’gad.’ (Psalm 18:25) Ba ga’ fan ni ngaum yul’yul’ ko en mabgol rom, ya faanra dariy e yul’yul’ ma aram e dariy e pagan’. Ma faanra bay e pagan’ ma aram e ra i gel e t’ufeg u thiliy.
Dakuriy e yul’yul’ u lan e mabgol e ngiyal’ ney. Ere, faanra nge par e mabgol rom nib fel’, ma bay l’agruw ban’en ni thingar mu rin’.
1 NGE GA’ FAN E MABGOL ROM U WAN’UM
N’EN NI BE YOG E BIBLE: “Ngam mel’eged e tin ni ir e th’abi ga’ fan.” (Filippi 1:10, NW) Mabgol ni kam un ngay e aram reb e ban’en nib ga’ fan u lan e yafos rom. Ere, ba t’uf ni nge ga’ fan u wan’um.
Baadag Jehovah ni ngaum lemnag e en mabgol rom mu um parew u taabang ni gimew ba ‘felfelan’.’ (Eklesiastes 9:9) Dabun ni ngaum darifannag e en mabgol rom, ya baadag ni ngam athamgilgow ngaum rin’ew boch ban’en ni gimew ra felfelan’ ngay. (1 Korinth 10:24) Mu dag ko en mabgol rom nib ga’ fan u wan’um.
N’EN NRAYOG NI NGAM RIN’:
Um lemnag e en mabgol rom, mag guy rogon ni ngaum rin’ew boch ban’en u taabang ni gubin ngiyal’
Gathi yigoo gur e ngaum lemnagem, ya ngaum lemnagmew ni gimew l’agruw
2 MU KOL AYUW U ROGON NI GA MA LEM
N’EN NI BE YOG E BIBLE: “En nra sap ngak be’ ni ppin me finey ni manga yugu ra pirew, e ke kireb e rok, ni fan e kar pirew u fithik’ i laniyan’.” (Matthew 5:28) Faanra i par be’ ni yug be lemnag e ngongol ndarngal, ma aram e dakir yul’yul’ ko en mabgol rok.
Ke yog Jehovah nib t’uf ni ngad ‘kol ayuwgad u rogon ni gad be lem.’ (Proverbs 4:23; Jeremiah 17:9) Ra ngam rin’ e re n’ey, ma thingar mu kol ayuw ko pi n’en ni ga ma yaliy. (Matthew 5:29, 30) Mu folwok ko n’en ni rin’ Job, ni dugliy u wan’ ndariy ba ngiyal’ ni nge sap ngak yugu reb e ppin me lemnag e tin nib kireb ban’en. (Job 31:1) Ngam dugliy u wan’um ndab um yaliy yaan e ngongol ni puwlag. Maku dab mu adag be’ nga wuru’ e mabgol rom.
N’EN NRAYOG NI NGAM RIN’:
Ngaum dag nib t’uf rom e en mabgol rom
Ngaum lemnag rogon laniyan’ e en mabgol rom, mag tal ndab ku um chagil ngak boch e girdi’ ndabun e en mabgol rom ni ngaum chagil ngorad