Rogon ni Ngan Pithig e Magawon

Nap’an ni ga ra un ko mabgol, ma boor e magawon nrayog ni nga i sum u thilmew e en mabgol rom. Rayog ni nge buch e re n’ey ni bochan nib thil rogon ni gimew ma lem nge rogon ni gimew ma rin’ boch ban’en. Ku rayog ni yugu boch e girdi’ ara boch ban’en e ir e be k’aring e magawon nga thilmew.

Sana bayi n’en ma gad guy rogon ni ngad milgad ko magawon, machane be yog e Bible ni thingar da guyed rogon ni ngad pithiged e magawon rodad. (Matthew 5:23, 24) Faan ga ra fol ko pi kenggin e motochiyel u Bible ma rayog ni ngam nang rogon ni ngam pithig e pi magawon rom.

1 MU WELIYEW E MAGAWON ROMEW U TAABANG

N’EN NI BE YOG E BIBLE: “[Bay] . . . ngal’an ni ngan welthin.” (Eklesiastes 3:1, 7) Mu guy rogon ni ngam tay e tayim ni ngam weliyew e en mabgol rom murung’agen fare magawon romew. Mu guy rogon ni nge nang e en mabgol rom rogon e lem rom u murung’agen fare magawon. Gubin ngiyal’ ni nga u mog e ‘tin riyul’’ ko en mabgol rom. (Efesus 4:25) Mus ni faanra kam damumuwgow ngomew, ma ngam guyew rogon ni dab mu chamgow. Numon u fithik’ e sumunguy e rayog ni nge ayuwegmew ni nge dabi sum e tugthin u thilmew.​​—Proverbs 15:4; 26:20.

Mus ni faanra der taareban’mew nga ban’en, ma ngam sumunguy ko en mabgol rom, mag dag e t’ufeg nge tayfan ngak. (Kolose 4:6) Mu guyew rogon ni ngam pithigew fare magawon nib papey, ma dab mu parew ndab kum nonow ngomew.​—Efesus 4:26.

N’EN NRAYOG NI NGAM RIN’:

• Mu dugliyew ba ngiyal’ ni ngam weliyew fare magawon romew

• Faanra be non e en mabgol rom, ma ngam motoyil. Dab mu th’ab e thin rok, ya bay e ngiyal’ ni gur e ngam non

2 MMOTOYIL YA NGAM NANG FAN

N’EN NI BE YOG E BIBLE: “Nge bigimed me t’uf bigimed rok nrogon e walag ni girdien Kristus, ma nge pasigan’med ngay ni nge bigimed mi i ta’ fan bigimed.” (Roma 12:10) Rib ga’ fan rogon ni ga ma motoyil. Mu guy rogon ni ngam nang fan rogon e lem ko en mabgol rom u fithik’ e ‘runguy . . . nge sobut’an.’ (1 Peter 3:8; James 1:19) Dab um dake ga be motoyil. Faanra rayog, mab fel’ ni ngam taleg e n’en ni ga be rin’ ngam motoyil ko n’en ni be yog e en mabgol rom, fa reb e ngam fith ngak ko rayog ni nga fini taaboch riy mi gimew weliy fa dabiyog. Faanra ga ma tay ni gimew ba taareb e en mabgol rom, ma gathi ir e toogor rom, ma rayog ni nge dabi papey ni ngam “damumuw.”​—Eklesiastes 7:9, BT.

N’EN NRAYOG NI NGAM RIN’:

• Mmotoyil, mag guy rogon ni ngam thilyeg lanin’um ni yugu aram rogon ni dabum e n’en ni ga be rung’ag

• Mu guy rogon ni ngam nang fan e n’en ni be yog. Mu fal’eg i yaliy rarogon e en mabgol rom u nap’an ni be non nge rogon lingan e thin rok

3 MU ATHAMGIL NI NGAM RIN’ E N’EN NI KAM WELIYEW

N’EN NI BE YOG E BIBLE: “Mu maruwel me bung rogon e par rom; ma faanra kemus ni sabethin e ga be tay ma ga ra gafgow.” (Proverbs 14:23, BT) Gathi kemus ni nge m’agan’mew nga rogon ni ngam pithigew fare magawon. Ya ba t’uf ni ngam rin’ew e n’en ni kam dugliyew. Rayog ni sana ba t’uf ni ngam maruwelgow nib gel ni ngam rin’ew e n’en ni kam dugliyew, machane ra yib angin. (Proverbs 10:4) Faan gimew ra maruwel u taabang, ma gimew ra guy ‘fel’ngin’ e maruwel ni kam tew.​—Eklesiastes 4:9.

N’EN NRAYOG NI NGAM RIN’:

• Mu dugliyew boch ban’en ni ngam rin’ew, ya nge yag ni ngam pithigew fare magawon

• Bayi n’en mi gimew sul ngam yaliyew rogon e mon’og ni gimew be tay