DEER 4
Uw Rogon ni Nggu Yal’uweg e Oloboch Rog?
MANG E GA RA RIN’?
Mu susunnag e re n’ey: Be fafel Tim nge boch e fager rok, me yon’ e bat’ nge yan i aw ko winda ko naun rok e buguli yoror rok nge pil.
Faanra gur Tim, ma mang e ga ra rin’?
MU TAL NGAM LEM!
DALIP BAN’EN NRAYOG NI NGAM RIN’:
Ngam mil.
Nga mon’ e kireb riy nga daken be’.
Nga mog ko buguli yoror rom e n’en ke buch, ma gog ngak ni bay mu pi’ puluwon e n’en ni kam kirebnag.
Sana ga ra adag ni ngam mel’eg e n’en ni bay ko A. Machane bay boch i fan nde fel’ ni ngam mithag e oloboch ni kam rin’, ndemtrug ko fare winda ni kam kirebnag ara yugu ban’en.
DALIP I FAN NDAB UM MITHAG E OLOBOCH ROM
Aram e n’en nib fel’ ni ngam rin’.
Be gaar e Bible: “Thingar ra daged ni gubin ngiyal’ ma yad ba fel’ ma yad ba yul’yul’ u fithik’ urngin e tin ni yad be rin’.”—Titus 2:10.
Ba mom ni nge n’ag e girdi’ fan e kireb rok e piin ndarur mithaged e oloboch rorad.
Be gaar e Bible: “Dabi fel’ rogon e yafos rom ni faanra ga be guy rogon ni ngam mithag e pi denen rom. Mu puwofaynag ma ga pithig paam riy; me wurngan’ Got ngom.”—Proverbs 28:13, BT.
Bin th’abi ga’ fan riy e ga ra felfelan’nag Got.
Be gaar e Bible: “Somol e ba fanenikan e girdi’ ni ma rin’ e kireb [“girdi’ nib sasalap,” NW], machane ma fek e girdi’ nib mat’aw ngar manged tafager rok.”—Proverbs 3:32, BT.
Karina ni 20 e duw rok e be yan u karrow ni kaygi papey, min ticketnag me mithag ko chitamangin. Machane de yag ni nge mithag nib n’uw nap’an. I gaar Karina: “Sogonap’an reb e duw nga tomuren, ma aram me nang e chitamag murung’agen e re ticket nem, mi ri damumuw!”
Mang e fil Karina ko re n’ey? I gaar: “Faan ga ra mithag e oloboch rom, ma aram e ga be gelnag e ubchiya’ ko kireb ni kam rin’. Ra tomur riy me gur e ga ra gafgow!”
ROGON NI NGAM FIL BAN’EN KO OLOBOCH ROM
Be gaar e Bible: “Gadad gubin ni ba ga’ ni gadad ma oloboch.” (James 3:2) Kad filed faram ni faan ga ra gur nga mog e oloboch ni kam rin’, ma aram e pow riy ni gur be’ ni gab sobut’an’ ma ke ilal e lem rom.
Bin migid e ngam fil ban’en ko oloboch rom. I yog bochi pin ni Vera fithingan ni gaar: “Gubin ngiyal’ ni gu ra oloboch, ma gu ma guy rogon ni nggu sap ngay ni aram reb e ban’en ni ke buch ni nggu fil ban’en riy, mu kug guy rogon ni nggu pag e re n’em ni nge ayuwegeg nggu mang be’ nib manigil mug guy rogon ni nggu thilyeg e n’en ni gu ra rin’ ko yay ni migid ni ke buch ban’en ni aram rogon.” Ngad weliyed rogon nrayog ni ngam rin’ e re n’ey.
Kam ning e rat rok reb e pagel ni walagem nib ilal ngom, kam man riy kam kirebnag. Ere mang e ga ra rin’?
Dariy ban’en ni nga mog ngak, mag guy rogon ndabi nang.
Mog ngak e n’en ke buch.
Mog ngak e n’en ke buch, machane mag yon’ e kireb riy nga daken be’.
Kam fek e skeng ma de yag ni ngam pass ni bochan e dam study. Ere mang e ga ra rin’?
Nga mog nib kireb rogon fare skeng ni kan pi’.
Nga mog ni gur e kireb rom ndam pass.
Nga mog ni fare sensey e dabun dakenam.
Faanra um par ni ga be lemnag e oloboch ni kam rin’ ni ke thumur, ma taareb rogom ngak be’ ni be yan u karrow ma be yaliy e pi n’en ni bay u tomur ni be m’ug ko therek
Mu sul ngam lemnag e tin kad weliyed, mag susunnag ni gur fare (1) pagel ni walagem nge (2) fare sensey. Mang e yow ra lemnag ni faanra mog ni gur e ba kireb e rom? Mang e yow ra lemnag ni faan ga ra mithag e oloboch rom?
Mu lemnag reb e oloboch ni kam rin’ u lan fare duw ni ke yan, mag pi’ e fulweg ko pi deer ni baaray.
Mang e re oloboch nem? Mang e mu rin’ u nap’an ni buch e re n’em?
Kug mithag.
Ku gon’ e kireb riy nga daken be’.
Ku gog e kireb rog.
Uw rogon e lem rom ni faanra de yag ni nga mog e oloboch rom?
Kug felfelan’, ya de yag ni ngan nang!
Kug kalngan’ug, ya faan gomanga gog e tin riyul’ mab fel’.
Mang e ga be lemnag ni faan gomanga mu rin’ mab fel’?
Mang e kam fil ko oloboch rom?
MANG E GA BE LEMNAG?
Mang fan ni bay boch e girdi’ ni yad ma mithag e oloboch rorad?
Mang e ra lemnag e girdi’ ni faanra gubin ngiyal’ ni ga ma mithag e oloboch rom? Mang e yad ra lemnag ni faanra gur be’ nda mur ma mithag e oloboch rom?—Luke 16:10.