Rogon nib Puluw ni Ngan Lemnag e Oloboch

Kari felfelan’ Don nge Margareta ni ke yib fakrow nib pin nge tabinaw rok ni ngar guyed yow. Ere, nap’an nra ted bochi abich u taabang u m’on ni nge sul e re ppin ni fakrow nem nge tabinaw rok, ma aram me ngongliy Margaret rogon e macaroni and cheese ni ngar ked ni aram e re miti ggan nth’abi adag gal tungirow ni yow ma kay. Cha’nem i Margaret e ir reb i girdien e lum nrib salap ko lum ni ke taw nga nap’an ni nge tal ko maruwel.

Nap’an nra bad ra sabolgad ko tebel, ma aram me fek Margaret e ggan ni ke lith ni ngan kay ngeb i tay nga lukngun e tebel. Nap’an ni pug e upong riy, me guy ni kemus ni yigoo sauce nib gowel ni bay e cheese riy e ir e bay u lan fare plet, ya ke pagtalin ni nge athukuy e macaroni ko re sauce nem!b

Demtrug yangardad ara urngin ban’en ni gad manang, ma gad gubin ni gad ma oloboch. Rayog ni ngad olobochgad ni aram e nga dogned ban’en ndad lemgad u m’on riy ara da rin’ed ban’en u ba ngiyal’ nde puluw ni ngad rin’ed, fa reb e dad tedan’dad nga ban’en, ara ke lath u wan’dad. Mang fan ni yima oloboch? Ma mang e ngad rin’ed u nap’an ni kad olobochgad ara ke oloboch be’? Ma gur, rayog ni nge lich e oloboch ni gad ma tay? Ra puluw rogon ni ud lemnaged e oloboch ni gad ma tay nge oloboch ni ma tay yugu boch e girdi’, ma aram e rayog ni ngad nanged e fulweg ko pi deer ney.

ROGON NI GAD MA LEMNAG E OLOBOCH NGE ROGON NI MA LEMNAG GOT

Nap’an ni gad ra rin’ ban’en nib fel’, ma gad ma felfelan’ u nap’an ni yira n’ufdad riy ara ni weliy murung’agen e tin nib fel’ ni kad rin’ed. Machane, nap’an ni gad ra oloboch ni yugu aram rogon ni gathi lem rodad ara dariy be’ ni manang, ma gathi susun e ba puluw ni nga dogned e oloboch ni kad rin’ed? Faanra nge yag rok be’ ni nge rin’ e re n’ey, ma thingari sobut’nag e lem rok.

Faanra ud lemnaged rarogodad nib pag rogon, ma aram e rayog ni ngad guyed rogon ni nge yan i aw nde ga’ e oloboch ni kad rin’ed, ara don’ed e kireb riy nga daken be’, ara da guyed rogon ni ngad mithaged. Mit ney e ngongol e ba ga’ ni ma yib wenegan nib kireb. Ya n’en nra buch e aram e rayog ni nge par fare magawon ndabi puf, mi non’ e kireb riy nga daken yugu boch e girdi’ ndariy ban’en ni kar bucheged. Mus ni faanra ke yag ni ngad siyeged wenegan e oloboch rodad e chiney, machane dab da paged talin nra tomur riy ma “ra bagadad ma nge weliy ngak Got e n’en ni i rin’.”​—Roma 14:12.

Ba puluw rogon ni ma lemnag Got e oloboch ni ma rin’ e girdi’. Fare babyor ni Psalms e be yog ni Got e ir be’ ni “ma runguy e girdi’ ma ma par nib t’uf e girdi’ rok” maku “der ma par ni yugub puwan’” ara i par ni yugu be sap nga thibngin ban’en, maku “der ma par nib damumuw ni dariy n’umngin nap’an.” Manang ndawori flont e girdi’ ni bay boch ban’en ni yad ba meewar riy, ma “manang ni gadad e fiyath.”​—Psalm 103:8, 9, 14.

Maku reb e, bochan ni ir e chitamangidad ni ma runguydad, ma gadad pi fak, ma aram fan ni baadag ni ngaud lemnaged e oloboch ni bod rogon ni ma lemnag. (Psalm 130:3) Boor e fonow u lan e Thin rok ni bay e t’ufeg riy nra ayuwegdad ni ngad nanged e n’en ni ngad rin’ed u nap’an ni kad olobochgad ara ke oloboch yugu boch e girdi’.

N’EN NI NGAD RIN’ED U NAP’AN NI KAD OLOBOCHGAD

Ba ga’ nnap’an ni yira oloboch, ma n’en ni ma rin’ be’ e aram e ma adbey e tayim rok ara i par nga i lemnag ko mini’ e ba kireb e rok fa i par ma be lemnag fan ni ka nog ara kan rin’ fare n’em. Machane, faanra ka mog ban’en ni ke kirebnag laniyan’ be’, ma mang ndab mu wenig ngak, ara mu guy rogon ni ngam yal’uweg e oloboch ni kam rin’ me par e tha’ u thilmew nib fel’? Bay bayay ni kam rin’ reb e oloboch ara kam rin’ ban’en nde fel’ ni ke magawonnagem ara yugu be’, fa? Mang ndab mu athamgil u rogon nrayog rom ni ngam yal’uweg e magawon ni kam k’aring ko bin ni ngam damumuw ngom ara mon’ e kireb riy nga daken yugu boch e girdi’? Faanra mu tay ni yugu boch e girdi’ e yad tapgin fare oloboch ma aram e dabiyog ni nge puf e magawon ni ke sum u thilmed yugu boch e girdi’ miki k’aring fare magawon ni nge ga’. Ere, mu guy rogon ni ngam fil ban’en ko oloboch ni kam rin’, mag yal’uweg, mag guy rogon ndab kum rin’ bayay.

Machane faanra yugu be’ e ke rin’ e kireb, mab mom ngodad ni ngad daged ni dubdad e n’en ni ke rin’ facha’. Ere, kab fel’ ni ngad folgad ko fare fonow ni pi’ Jesus Kristus u nap’an ni gaar: “Ere mu rin’ed ngak e girdi’ e tin ni gimed ba adag ni ngar rin’ed ngomed.” (Matthew 7:12) Nap’an ni ga ra oloboch ni yugu aram rogon nde ga’ e oloboch ni kam rin’, ma dariy e maruwar riy ni ga baadag ni ngan runguyem ara nn’ag fan e kireb ni kam rin’ ndab kun lemnag. Ere, mang ndab mu guy rogon ni ngam rin’ e re n’ey ngak yugu boch e girdi’?​—Efesus 4:32.

BOCH I KENGGIN E MOTOCHIYEL NRA AYUWEGDAD NI NGE LICH E OLOBOCH NI GAD MA RIN’

Rogon ni ke yog ba ken e dictionary e ba ga’ ni yima oloboch ni faanra “de fel’ rogon nni gonopiy ban’en, ara dawori tamilangan’uy u ban’en, ara danir tiyan’uy.” Gad gubin nthingari m’agan’dad ngay ni gubin e girdi’ ni ke buch reb ara boch e pi n’ey rorad. Machane, bay boch i kenggin e motochiyel u Bible ni faan gad ra fal’eg i lemnag ma rayog ni nge ayuwegdad ni nge lich e oloboch ni gad ma rin’.

Reb e pi kenggin e motochiyel nem e bay ko Proverbs 18:13 (BT) ni be gaar: “Mmotoyil u m’on ni ngam non. Ya ra danga’ ma gur be’ ni ga ba pinat ma ga ra reg ku be’.” Arrogon, faan ga ra tay in e minit ni ngam motoyil ko n’en ni nge yog be’ mag fal’eg i lemnag e n’en ni nga mog, ma aram e rayog ni nge dab mog ara mu rin’ ban’en ndam lem u m’on riy. Faan gad ra fal’eg e motoyil ma aram e rayog ni nge dab da dugliyed boch ban’en nde puluw miki yag ni ngad siyeged e oloboch.

Ku bay reb i kenggin e motochiyel ni be gaar: “Mu rin’ed urngin e tin nrayog romed ngam pired ni ba aw e gapas u thilmed nge urngin e girdi’.” (Roma 12:18) Mu athamgil ni ngaum rin’ed boch e girdi’ ban’en u fithik’ e gapas nge taareban’. Nap’an ni gimed be maruwel yugu boch e girdi’ u taabang, mag lemnag lanin’rad, mag dag e tayfan, mu um guy rogon ni nga u mog e tin nib fel’ ni kar rin’ed, ma ga be pi’ e athamgil nga lanin’rad. Faanra un ngongol ni aray rogon, ma aram e ra mom ni ngan n’ag fan min fek owchey ko kireb ni ke rin’ be’, miki mom rogon ni ngan pithig boch e magawon nib ga’ ni ke buch.

Mu guy rogon ni ngam fil ban’en nib fel’ ko oloboch ni kam rin’. Faanra kam oloboch mag gay rogon ni ngam guy boch e fel’ngin nib t’uf ni ngam athamgiliy ni nge m’ug rom, ko bin ni ngam gay e tawey rom ko n’en ni ka mog ara kam rin’. Gur, ba t’uf ni ngam dag e gum’an’, ara gol, ara t’ar laniyan’? Ma uw rogon e sobut’an’, nge gapas, nge t’ufeg? (Galatia 5:22, 23) Maku reb e, rayog ni ngam nang e n’en ndab kum rin’. Mu guy rogon ndab kum par ma yig ga be lemnag rogon e tafinay rom ko n’en ni ke buch ara rogon ni ke magawonnagem. Ba ga’ ni faanra buch reb e oloboch mi nog ban’en ni ngan minmin ngay, ma aram e rayog ni nge war e damumuw.

RA PULUW ROGON NI UD LEMNAGED E RE N’EY MA RA YIB ANGIN NGODAD

Ra puluw rogon ni ud lemnaged e oloboch, ma rayog ni nge ayuwegdad ni ngad nanged e n’en ni ngad rin’ed u nap’an ni kad olobochgad ara ke oloboch be’. Ku ra ayuwegdad ni nge gapas thildad yugu boch e girdi’ miki gapas lanin’dad. Faan gad ra athamgil ni ngad filed ban’en ko oloboch ni kad rin’ed, ma aram e rayog ni nge ga’ e gonop rodad miki adag e girdi’ dakendad. Ku ra ayuwegdad ni nge dabi kireban’dad nib pag rogon ko oloboch ni kad rin’ed ara da lemnaged boch ban’en nde puluw u rarogodad. Faanra ud pared ma gad manang ni gubin e girdi’ ni yad ma oloboch, ma aram e rayog ni nge fel’ e tha’ u thildad yugu boch e girdi’. Ma bin th’abi ga’ fan riy e, rayog ni ngad filed rogon ni ngad folwokgad u rogon ni ma dag Got e t’ufeg nge rogon ni ma n’ag fan e kireb, me yib angin ngodad.​—Kolose 3:13.

Ere gur, de yag ni nge felfelan’ chon e tabinaw rok Margaret ni bochan fare oloboch ni rin’ ni faan kad weliyed murung’agen? Danga’. I minmin Margaret ko n’en ni ke rin’ maku arrogon chon e tabinaw rok, ma aram mar abichgad u taabang ni yad ba felfelan’ nda kun tay e macaroni ko fare ggan ni ke fal’eg! Boor e duw nga tomuren, ma aram me weliy gal tungin e re n’ey ni buch ko bitir rorow nge pi n’en ni ur rin’ed e titaw nge tutuw rorow u taabang ndawor ra pagew talin. Ya bin riyul’ riy e re n’em ni buch e ban’en ni ka yugu ni oloboch riy!