DEER 5

Uw Rogon ni Faanra Yibe Gafgownageg u Skul?

FAN NIB GA’ FAN

N’en ni ga ra rin’ e rayog ni nge taleg e n’en ni be buch fa reb e gelnag e kireb riy.

MANG E GA RA RIN’?

Mu susunnag e re n’ey: Ke dabuy Thomas ni nge yan nga skul. Fa dalip i pul ni ke yan me tabab boch e bitir u skul i wereg boch ban’en nib kireb u murung’agen. Ngemu’, mu ur pininged boch e ngachal ngak nib kireb. Yu ngiyal’ e bayi n’en ma yigi yib be’ i toy e babyor u pa’ Thomas nge thay nga but’, me n’igin ni nge m’ug ni gowa gathi lem rok ni nge rin’ e re n’em. Fa reb e yugu ra yib ba ulung i bitir u keru’ mi yad thuruy, ma nap’an nra chel nge sap nga tomur ma dabi nang ko mini’ rorad e ke thuruy. Ma fowap e ni yoloy boch e thin ngan pi’ ngak ko Internet ni nge k’aring e marus ngak . . .

Faanra gur Thomas, ma mang e ga ra rin’?

MU TAL NGAM LEM!

Re n’ey e gathi be yip’ fan ndariy ban’en nrayog ni ngam rin’! Bin riyul’ riy e, rayog ni ngam cham ngak be’ ni be gafgownagem ndab mu fanay paam. Uw rogon?

DARIY BAN’EN NI NGAM RIN’. Be gaar e Bible: “Girdi’ nib manan’ e der ma mithag e damumuw rok, ma girdi’ nib sul laniyan’ ngak e yad ma k’adan’ ngar pired nga daken e damumuw rorad.” (Proverbs 29:11, BT) Faan ga ra guy rogon ni ngam par ni gab gapas, ma aram e piin ni yad be gafgownagem e rayog ni ngar talgad.
DAB MU SULWEG TABAN E KIREB NI KAN RIN’ NGOM. Be gaar e Bible: “Faanra rin’ be’ ban’en nib kireb ngomed, ma dab mu sulweged taban ngak nib kireb.” (Roma 12:17) Faan ga ra sulweg taban e kireb ni kan rin’ ngom, ma aram e ra ga’ boch fare magawon.
DAB MMAN KO GIN BAY E KIREB RIY. Be gaar e Bible: “Be’ nib gonop e ra guy e oloboch ni be yib me pilo’ riy.” (Proverbs 22:3) Mu guy rogon ni ngam palog ko piin nrayog ni ngar magawonnaged gur, mu kum palog ko gin nrayog ni ngan gafgownagem riy.
MU RIN’ BAN’EN NDANIR LEMNAG NI GA RA RIN’. Be gaar e Bible: “Lungun be’ nni fulweg nib sumunguy e ma chuweg e damumuw.” (Proverbs 15:1) Rayog ni nga mog ban’en nib mak’ak’ar. Bod ni faanra yog reb e pi girdi’ ney ngom ni kaygi pag ga’ngim, ma aram e rayog ni ngam gaar, “Gu be lemnag nsana rayog ni ngki mul in e pawn rog!”
MMAN NGAM CHUW. I yog Nora ni 19 e duw rok ni gaar: “Ga ra par ndab mu non, ma aram e be m’ug riy ni ke ilal e lem rom, ma ka gab gel ko en be gafgownagem. Re n’ey e be m’ug riy ni ga be t’ar lanin’um. Ireray reb e ban’en ndabiyog ni nge rin’ facha’ ni be gafgownagem.”—2 Timothy 2:24.
NGE PAGAN’UM NGOM. Piin yad ma gafgownag e girdi’ e yad manang e piin yad ma lemnag boch ban’en nde puluw u murung’agrad nge piin ndabi cham ngorad. Machane boor e piin yad ma gafgownag e girdi’ ni yad ma tal ni faanra kar guyed ndabiyog ni ngar rin’ed ban’en ngom.
MOG NGAK BE’. Bay be’ ni i sensey kafram ni gaar: “Gu ma pi’ e athamgil nga laniyan’ e bitir ni yibe gafgownagrad ni nga rogned murung’agen e re n’em ngak be’. Ireray e n’en nib mat’aw ni ngan rin’, maku rayog ni nge taleg e gafgow ni yibe tay ngak be’.”

Ke yag ni nge gel reb e pagel ngak e en ni be gafgownag ni bochan e be pagan’ ngak — Faanra pagan’um ngom ma aram e rayog ni nge yib gelngim. Ireray reb e ban’en ndabiyog ni nge rin’ e en be gafgownagem

GA MANANG E RE N’EY, FA?

Ra ngan gafgownag be’ u skul ma gathi kemus ni ngan li’, ya kub muun ngay ni:

Nga nog e thin nib kireb ngak. “Dariy ba ngiyal’ ni gu ra pagtalin e ngachal ni un pining ngog ara thin ni unog ngog. Pi thin ney e k’aringeg ni nggu lemnag ndariy fag, ma dariy be’ ni baadag ni nge chag ngog, ma dariy ban’en ni gub fel’ ngay. Kab fel’ e bin ni nge tugu’ be’ owcheg nge bech.”—Celine, 20.
Ngaun palognagey rok. “Piin gamad nga skul e ra tababgad ni ngaur palognaged yad rog. Yad ma n’igin ni nge m’ug ni gowa dariy tagil’ig ko re tebel ni yad be par riy ya nge dab gu par u charrad. Re duw nem ni polo’ e ba dake gubin e rran riy ni gu ma yor ma gu be abich ni yigoo gag.”—Haley, 18.
Ngan yoloy boch e thin ngan pi’ ngak ko Internet ni nge k’aring e marus ngak. “Kemus ni in bug e thin ni ngam tay nga computer mag kirebnag thin be’ ara par rok. Re n’ey e gowa kaygi pag rogon ni kan weliy, machane ban’en ni ma buch!”—Daniel, 14.

**SKENG NI MURUNG’AGEN BE’ NI MA GAFGOWNAG E GIRDI’**
RIYUL’ FA DE RIYUL’	FULWEG RIY
1 Ke yan bokum biyu’ e duw ni yima gafgownag e girdi’.	1 Riyul’. Nap’an Noah ma immoy ba ulung i girdi’ ni yad ma gafgownag e girdi’. Be yog e Bible ni yad e “Girdi’ ni N’un’uw ma Tagiyet.”—Genesis 6:4.
2 Dariy ban’en nib kireb nra buch ni faanra un gafgownag be’, ya kemus ni yibe mak’arang. Re n’ey e gathi rib gel e kireb riy.	2 De Riyul’. Boor e fel’ yangaren ni kar lied yad kar m’ad ni bochan e yima gafgownagrad.
3 Bin th’abi fel’ e kanawo’ ni ngan taleg be’ ni ma gafgownag e girdi’ e aram e ngkun cham ngak.	3 De Riyul’. Pi girdi’ ney e ba ga’ nib gel gelngirad ko piin yad ma gafgownag, ere faan yira guy rogon ni ngan cham ngorad ma ra yan i aw nib m’ay fan.
4 Faanra mu guy be’ ni yibe gafgownag mab fel’ ni ngam fek owchem riy.	4 De riyul’. Faanra buch ban’en ni aray rogon, ma cha’ ni ke guy e dabiyog ni nge fek owchen riy me aw ni gathi ir e kireb rok. Faanra kam guy be’ ni yibe gafgownag ma dariy ban’en ni mog riy, ma aram e rayog ni ngam l’ag ko fare magawon ko bin ni ngam un i pithig.
5 Piin yad ma gafgownag e girdi’ e yad ma thin i ufanthin, machane bin riyul’ riy e der pagan’rad ngorad.	5 Riyul’. Yugu aram rogon ni bay boch e piin yad ma gafgownag e girdi’ nib tolangan’rad, machane boor i yad e der ma pagan’rad ngorad ma yad ma kirebnag laniyan’ e girdi’ ni bochan e nge fel’ lanin’rad.
6 Piin yad ma gafgownag e girdi’ e rayog ni ngar thilgad.	6 Riyul’. Faan yira ayuweg e piin yad ma gafgownag e girdi’, ma aram e rayog ni ngar thilyeged e lem nge ngongol rorad.