BIN 4

Ngan Fanay e Thin nu Bible nib Fel’ Rogon

Matthew 22:41-45

N’EN NI NGAN RIN’: U m’on ni ngam beeg reb e thin nu Bible, mag guy rogon ni piin be motoyil ngom e rayog ni ngar nanged feni ga’ fan e n’en ni ngam beeg.

ROGON NI NGAN RIN’:

Mu lemnag fan ni ga be beeg fare thin nu Bible. Mog reb e thin nu Bible u reb e kanawo’ nra k’aring e piin be motoyil ni ngar nanged e n’en ni ga be guy rogon ni ngam tamilangnag.

Mu yaliy e pi verse ni bay u m’on ngu tomuren fare verse. Faanra ka mog reb e thin nu Bible nge en ni yoloy, mag guy rogon ni n’en ni nga mog e ba puluw.
Mu puluwnag e n’en ni ga be yog ko Bible. Nap’an ni ga be non ko piin nib mich Got u wan’rad, mag fekrad nga lan e Bible ni aram e Thin rok Got. Faan ga ra rin’ ni aray rogon, ma aram e ga be dag ni aram e gin nth’abi fel’ ni yira pirieg e gonop riy.
Mu guy rogon ni ngar adaged ni ngar motoyilgad ko fare thin nu Bible. Mu fith reb e deer ni bay e fulweg riy ko fare thin nu Bible, ara mu weliy reb e magawon nrayog ni nge puf ni faan yira fol ko fare thin nu Bible, ara mog reb i kenggin e motochiyel nrayog ni nge ayuwegrad fare thin nu Bible ni ngar nanged fan.

Mu lemnag e tin ni manang e piin be motoyil ngom u murung’agen e n’en ni ngam weliy nge fare thin nu Bible. Mu weliy reb e thin nu Bible ni yad manang u reb e kanawo’ nra pug e tafinay rorad, miki ayuwegrad ni ngar lemnaged fan u yugu reb e kanawo’.