Ba Puluw Ma Ra Pagan’uy Ngay

Luke 1:3

N’EN NI NGAN RIN’: Mu fanay boch ban’en nra pagan’uy ngay ni nge ayuweg e piin be motoyil ni nge puluw e nang fan rorad.

ROGON NI NGAN RIN’:

• Mu fanay boch ban’en nrayog ni nge pagan’uy ngay. Mu puluwnag e n’en ni nga mog ko Thin rok Got. Mu beeg e thin nu Bible ko ngiyal’ nrayog. Faanra ngam weliy ban’en nib l’ag rogon ko science, ara ban’en ko news, ara ban’en ni ke buch rok be’, ara yugu boch ban’en, mag fal’eg i gay murung’agen u m’on riy ngari mich u wan’um nrayog ni ngan pagan’uy ngay ma ban’en ni ka fini buch ndawori n’uw nap’an.

• Mu fanay e Bible nge boch ban’en nib fel’ rogon. Nap’an ni ga be tamilangnag fan reb e thin nu Bible, ma ngam guy rogon ndabi togopuluw e n’en ni ga be yog ko pi verse u m’on ngu tomuren fare thin, nge rogon e machib u lan e Bible, nge pi babyor ni ke ngongliy “fare tapigpig nib yul’yul’ ma ba gonop.” (Matt. 24:45) Mu fanay boch ban’en ni gathi kan fek u Bible nrogon nib puluw, ma dab mu thilyeg fan, ara mog ban’en nib thil ko n’en ni ke yog e en ni ke yoloy fapi thin.

• Mu tamilangnag e n’en ni ga be micheg. Tomuren ni kam beeg reb e thin nu Bible ara kam weliy boch ban’en, mag fith boch e deer ara mog reb e fanathin ni ngam ayuweg e piin be motoyil ni ngar nanged fan e n’en ni ga be weliy.