GURUY NI 30
Rayog ni Ngki Fos Bayay e Piin nib T’uf Rom ni Kar M’ad!
Nap’an nra yim’ be’ ma rib gel e kireban’ ni gad ma tay. Aram fan ni be yog e Bible ni yam’ e aram reb e toogor. (1 Korinth 15:26) Kam fil ko Guruy ni 27 nra gel Jehovah ko re toogor ney. Machane mang e ra buch ko piin kar m’ad? Bay ban’en nrib manigil ni ke micheg Jehovah ni ka ga ra fil ko re guruy ney. Re n’em e aram e ra faseg bokum bilyon e girdi’ ni kar m’ad mar pared ndariy n’umngin nap’an. Gur, rayog ni ngari buch e re n’ey? Ma gur, nap’an ni yira fasegrad ma yad ra par u tharmiy fa yad ra par u fayleng?
1. Mang e baadag Jehovah ni nge rin’ ni fan ngak e piin nib t’uf rodad ni kar m’ad?
Ri baadag Jehovah ni nge faseg e piin kar m’ad. Immoy be’ nib mich Got u wan’ ni ka nog Job ngak nib pagan’ ngay nnap’an nra yim’ ma dabi pag Got talin. I gaar ngak Got: “Bay mu pong, mug fulweg [u lan e Low rog].”—Mu beeg e Job 14:13-15, BT.
2. Uw rogon ni kad nanged nrayog ni ngan faseg e piin kar m’ad?
Nap’an ni immoy Jesus u fayleng, me pi’ Got gelngin ni nge faseg e girdi’ ni ke yim’. I faseg Jesus bochi pin ni ke gaman 12 e duw rok, nge ba pagel ni fak be’ nib pin ni ke yim’ figirngin. (Mark 5:41, 42; Luke 7:12-15) Boch nga tomuren, me yim’ Lazarus ni fager rok Jesus. Yugu aram rogon ni ke gaman aningeg e rran ni ke yim’ kan k’eyag, machane ki faseg Jesus ko yam’. Tomuren ni meybil Jesus ngak Got, me pong nib ga’ laman ni gaar: “Lazarus, moy nga wen!” Ma aram “me yib fare yam’ nga wen” ni ke fos! (John 11:43, 44) Am lemnag gelngin e felfelan’ ni tay e pi fager rok nge chon e tabinaw rok!
3. Mang e athap ko piin nib t’uf rom ni kar m’ad?
Be micheg e Bible ni gaar: “Bayi faseg urngin e girdi’ ko yam’.” (Acts 24:15) Piin ni fasegrad Jesus u nap’an ni immoy u fayleng e da ranod nga tharmiy. (John 3:13) Yad ba felfelan’ ngay ni kan fasegrad ko yam’ u roy u fayleng. Ere ku arrogon ndab ki n’uw nap’an ma bayi faseg Jesus bokum bilyon e girdi’, mar pared u paradis u fayleng ndariy n’umngin nap’an. I yog ni “gubin e yam’ ni bay u lan e low” e goo yira fasegrad, ni kub muun ngay e piin nrayog ni kan pagtilrad machane ka yad bay u laniyan’ Got.—John 5:28, 29.
KUM FIL BOCH BAN’EN U MURUNG’AGEN
Mu guy e mich riy u Bible nrayog ni ngan faseg e piin kar m’ad, maku ban’en nra buch. Mu fil rogon nrayog ni nge fel’ lanin’um ni bochan e fos ko yam’ miki pi’ e athap ngom.
4. I micheg Jesus nrayog ni nge faseg e piin kar m’ad
Kum fil boch ban’en u murung’agen e n’en ni rin’ Jesus ni fan ngak Lazarus ni fager rok. Mu beegew e John 11:14, 38-44, mi gimew weliy e fulweg ko gal deer ni baaray:
Uw rogon ni kad nanged nriyul’ ni ke yim’ Lazarus?—Mu guy e verse 39.
Faanra ke yan Lazarus nga tharmiy, ma ga be lemnag nra faseg Jesus ko yam’ u roy u fayleng, fa?
5. Boor e girdi’ ni yira fasegrad ko yam’!
Mu beegew e Psalm 37:29, mi gimew weliy e fulweg ko re deer ni baaray:
Uw e ra par bokum bilyon e girdi’ ni yira fasegrad riy?
Gathi kemus ni yigoo piin ur liyorgad ngak Jehovah e ra fasegrad Jesus ko yam’, ya ku boor e girdi’ nra fasegrad. Mu beegew e Acts 24:15, mi gimew weliy e fulweg ko re deer ni baaray:
Mini’ e ga baadag ni ngam guy ni kan faseg ko yam’?
Am lemnag e re n’ey: Rib mom ni nge faseg Jesus be’ ko yam’ ni bod rogon ba matam ni be pug bbitir ni fak ni be mol
6. Fos ko yam’ e rayog ni nge fal’eg lanin’um miki pi’ e athap ngom
Fapi thin ni murung’agen fachi pin ni fak Jairus e boor e girdi’ ni ke yim’ be’ nib t’uf rorad ni ke fal’eg lanin’rad, ma ke pi’ e athamgil ngorad. Mu beegew murung’agen e re n’ey ko Luke 8:40-42, 49-56.
U m’on ni nge faseg Jesus fachi pin me gaar ngak Jairus ni chitamangin: “Dab mu rus; ke mus ni nge michan’um ngak Got.” (Mu guy e verse 50.) Uw rogon nrayog ni nge ayuwegem e athap ko fos ko yam’ . . .
u nap’an nra yim’ be’ nib t’uf rom?
u nap’an ni bay e yafos rom u thatharen e riya’?
Mu yaliyew e re VIDEO ney, mi gimew weliy e fulweg ko re deer ni baaray.
Uw rogon ni ke fel’ laniyan’ e gallabthir rok Phelicity miki yib e athamgil nga lanin’row ni bochan e athap ko fos ko yam’?
MA GAAR BOCH E GIRDI’: “Ba mo’maw’ ni nge mich u wan’ug nrayog ni ngan faseg e girdi’ mar pared u fayleng.”
Uw rogon e re n’ey u wan’um?
Mang thin nu Bible e rayog ni ngam fanay ni ngam dag ngak ni bay e fos ko yam’?
N’EN KAN FIL
Be micheg e Bible ni yira faseg bokum bilyon e girdi’ ko yam’. Baadag Jehovah ni ngar fosgad bayay ma ke pi’ gelngin Jesus ni nge fasegrad.
Ngan Sul u Daken
Uw rogon u wan’ Jehovah nge Jesus ni ngar fasegew e piin kar m’ad?
Uw e ra par bokum bilyon e girdi’ riy ni yira fasegrad ko yam’—u tharmiy ara u fayleng? Mang fan ni ka mog ni arrogon?
Mang e be micheg nga lanin’um nrayog ni ngki fos bayay e piin nib t’uf rom ni kar m’ad?
MU GAY MURUNG’AGEN
Mu beeg murung’agen boch ban’en nrayog ni ngam rin’ ya nge yag nim athamgil u fithik’ e kireban’ rom.
Rayog ni nge ayuweg e pi kenggin e motochiyel u Bible be’ ni ke kireban’, fa?
Uw rogon nrayog ni nge athamgil e piin bitir u nap’an ni ke yim’ be’ nib t’uf rorad?
Bay boch e girdi’ ni yira fasegrad ma ranod nga tharmiy, fa? Mini’ e piin ndabin fasegrad ko yam’?