Bay e Athap ko Piin ni Kar M’ad, Fa?

Rayog ni Nge Fas e Piin ni Kar M’ad, Fa?

FULWEG RIY NI BAY U BIBLE: “Ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman [Jesus], mi yad yib u lan e low rorad nga wuru’.”​—John 5:28, 29.

I yiiynag Jesus murung’agen ba ngiyal’ nra taw ngay u nap’an ni be gagiyeg Gil’ilungun, ma aram e yira faseg e piin ni yad bay u lan e fayleng ko yam’ ara Low ko Yam’. Fernando ni faan kan weliy murung’agen ko fare article ni ke yan e yog ni gaar: “Th’abi som’on ni gu beeg e John 5:28, 29, mug gin ko n’en ni be yog. Ke pi’ e l’agan’ ngog, ma ke ayuwegeg ni nggu athapeg boch ban’en ni ka bay nga m’on.”

Job ni ir be’ ni immoy nib yul’yul’ kakrom e manang nnap’an nra yim’, ma bay n’umngin nap’an nra son u m’on ni nga fini faseg Got ko yam’. I fith Job ni gaar: “Faanra yim’ be’, ma gur ku rayog ni ngki fos bayay?” Ngemu’, me fulweg ni gaar: “Bay gu sonnag e ngiyal’ nib fel’, nggu son nge chuw e ngiyal’ ney [ngiyal’ ni bay u lan e Low ko Yam’] nib gafgow. Ma aram e bay mu pong, mu gu fulweg.”​—Job 14:14, 15, BT.

Mus ngak Martha ni walagen Lazarus mab mich e fas ko yam’ u wan’. Tomuren ni yim’ Lazarus, me gaar Jesus ngak: “Bay ni faseg walagem ko yam’.” Me fulweg Martha ni gaar: “Gu manang ni bay ni faseg ko yam’ ko chirofen ni ir e tomur ko rran.” Ma aram me gaar Jesus ngak: “I gag owchen e fos ko yam’ nge yafos. Yigu ra ke yim’ be’ ni gub mich u wan’ ma ra fos.” (John 11:23-25) De n’uw nap’an nga tomuren, me faseg Jesus Lazarus ko yam’! Re n’ey ni buch e be dag ngodad rarogon e pi n’en ni kab fel’ ni ka bay nga m’on. Am susunnag ni kam guy ni kan faseg e girdi’ ni kar m’ad u gubin yang!

Yira faseg boch e girdi’ nga ranod nga tharmiy, fa?

FULWEG RIY NI BAY U BIBLE: Be tamilangnag e Thin rok Got nib thil e fas ko yam’ ni tay Jesus ko fa meruk nem e fas ko yam’ ni bay murung’agen u lan e Bible. Re meruk i girdi’ nem nni fasegrad ko yam’ e ra pared u roy u fayleng. Machane, be weliy e Bible murung’agen e fas ko yam’ ni tay Jesus ni be gaar: “Jesus Kristus . . . e ke yan nga tharmiy ke yan i par nga ba’ ni mat’aw rok Got.” (1 Peter 3:21, 22) Ere gur, kemus ni yigoo Jesus e yira faseg ko yam’ me yan nga tharmiy? I yog Jesus ngak e pi apostal rok u m’on riy ni gaar: “Nap’an ni gu ra yan gu ngongliy tagil’med, ma bay gu sul nggu fekmed, ni aram e bay um pired ko gin ni gu ba’ riy.”​—John 14:3.

I yan Kristus nga tharmiy nge yan i fal’eg tagil’ boch i gachalpen. Pi gachalpen ni yad ra un ngak nga tharmiy e yad 144,000 u gubin. (Revelation 14:1, 3) Machane, mang e ra rin’ pi gachalpen Jesus u rom?

Boor ban’en ni yad ra rin’! Be gaar e Bible: “Piin ni yad ra un ko fos ko yay nsom’on nra ni faseg e girdi’ ko yam’ e yad ra felfelan’ ma ri ba ga’ e fel’ rogon ni yad ra tay. Ya yay ni migid e yam’ nra yib e dariy ban’en nra ki yog ni nge rin’ ngorad; ya bay ra manged pi prist rok Got nge Kristus, ma bay ra uned ngak ko gagiyeg u lan bbiyu’ e duw.” (Revelation 20:6) Piin ni yira fasegrad ko yam’ mi yad yan nga tharmiy e yad ra un ngak Kristus i gagiyegnag e fayleng ni yad boch e pilung nge prist.

Chon mini’ e tomur ni yira fasegrad?

FULWEG RIY NI BAY U BIBLE: Be weliy e Bible murung’agen ba welthin ni tay apostal Paul ni gaar: “Taareb rogon e l’agan’ ni gu be tay ngak Got ko l’agan’ ni be tay e pi cha’ ney ngak, ni aram e be l’agan’mad ngak Got ni bayi faseg urngin e girdi’ ko yam’, ni tin nib fel’ [“piin nib mat’aw,” NW] nge tin nib kireb [“piin nde mat’aw,” NW].”​—Acts 24:15.

Mini’ e ba muun ko “piin nib mat’aw” ni faani weliy Paul murung’agrad? Am lemnag bagayad e pi cha’ ney. Baaray e n’en nnog ngak Daniel ni ir be’ nib yul’yul’ u nap’an ni taw nga tungun e yafas rok: “Bay mum’, machane bayi taw ko tungun ma ga fos ko yam’ mi ni pi’ puluwom ngom.” (Daniel 12:13) Uw e yira faseg Daniel me par riy? “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalm 37:29) Arrogon, yira faseg Daniel nge ku boch e pumoon nge ppin ni yad ba yul’yul’ mar pared u fayleng ndariy n’umngin nap’an.

Ere, mini’ e yad ba muun ngak e “piin nde mat’aw”? Bokum bilyon e girdi’ ni kar m’ad, ma boor i yad e de yag ni nge tamilang e tin riyul’ nu Bible u wan’rad mi yad fol riy u m’on ni ngar m’ad. Machane, tomuren ni yira faseg e pi girdi’ ney, ma yad ra fil murung’agen Jehovaha nge Jesus. (John 17:3) Urngin e piin ni yad ra mel’eg ni ngar pigpiggad ngak Got e yad ra par u n’umngin nap’an nra par Jehovah nib fas, ni aram e dariy n’umngin nap’an.

Ra uw rogon e par u fayleng e ngiyal’ nem?

FULWEG RIY NI BAY U BIBLE: “Bayi n’ag [Got] urngin e lu’ u owcherad. Ma aram e dab ku unim’, ma dab ki i kireban’uy, ma dab ku un yor, ma dab ku un amith.” (Revelation 21:4) “Girdi’ e bay ra toyed e naun mi yad par u lan, ma gathi yugu be’ e bay yib i par ngay. Bay ra yunged e woldug ni grapes me fel’ rogorad u logowen, ma gathi yugu boch e girdi’ e bay ur unumed.”​—Isaiah 65:21.

Am susunnag ni gimed be par e piin ni yad ba t’uf rom ni kan fasegrad ko yam’ u bang ni aray rogon! Machane, reb e deer ni ka bay e aram e, Uw rogon ni ngari mich u wan’um nriyul’ ni yira faseg e piin ni kar m’ad?