KENGGIN E RE KE BABYOR NEY | GUR, RA YIM’ BE’ MA RAYOG NI NGKI FAS BAYAY?

Mang e Ma Buch rok Be’ u Tomuren ni Ke Yim’?

“Gu ma lemnag ni dalip yang nrayog ni nge yan be’ ngay u tomuren ni ke yim’: reb e nge yan nga tharmiy, ma reb e nge yan nga fithik’ e nifiy, ma reb e nge yan nga purgatoryo. Gu manang nda gu fel’ ni nggu wan nga tharmiy, maku de gel e kireb rog ni ngan pieg nggu wan nga fithik’ e nifiy. Machane, gathi ri gu manang ko mang e yima rin’ ko girdi’ u purgatoryo. Ma pi n’ey e dariy reb ni kug beeg murung’agen u Bible. Kemus ni bogi ban’en ni gu ma rung’ag ni ma yog e girdi’.”—Lionel.

“Kan fil ngog ni gubin e girdi’ nra yim’ ma ra yan nga tharmiy, machane de mich e re machib ney u wan’ug. Gu ma lemnag nap’an nra yim’ be’ ma kemus aram, ya dakuriy e athap rok nga bang.”—Fernando.

Ka am lemnag e pi deer ni baaray ni be gaar: ‘Mang e ma buch rok be’ u nap’an nra yim’? Gur, bay e piin ni yad ba t’uf rodad u bang ni yad be gafgow? Rayog ni ngkud guyed yad bayay, fa? Uw rogon nrayog ni nge mich e re n’ey u wan’dad?’ Wenig ngom mu guy e n’en ni be yog e Bible. Machane, som’on e ngad guyed ko mang e be yog e Bible u murung’agen e piin ni kar m’ad. Ngemu’, ma gad weliy murung’agen e athap rorad ni be weliy e Thin rok Got murung’agen, ni aram e Bible.

Uw rarogon e piin ni kar m’ad?

FULWEG RIY NI BAY U BIBLE: “Piin nib fos e yad manang ni bay ra m’ad, machane piin nib yam’ e dariy ban’en ni yad manang. Yad e dakuriy e tow’ath rorad; ya kan pag talinrad. Demtrug ko mang e ga be rin’ ma ngam rin’ ni kari mus rogom riy, ni bochan e dakuriy ban’en ni ngan rin’, ma dariy e tafinay, ma dariy e llowan’, ma dariy e gonop u lan e fayleng ko yam’ [“Low ko Yam’,” NW]—ni aram e gin ni ngam man ngay.”a—Eklesiastes 9:5, 10, BT.

Fare fayleng ko yam’ ara fare Low ko Yam’ ni kan weliy murung’agen u roy e be yip’ fan e gin ni ma yan e girdi’ ngay u nap’an ni kar m’ad. Re n’em e ba fanathin ni be yip’ fan rarogon e piin ni kar m’ad ndakuriy ban’en ni yad manang maku dakuriy ban’en nrayog ni ngar rin’ed. Ere, uw rogon u wan’ Job e re Low ko Yam’ nem ara re gi n’em ni bay e piin ni kar m’ad riy? I mul urngin e flaab rok Job u pa’ miki yim’ pi fak u lan taa borran, ngemu’ me yib ba mit e malad ngak nrib gel e amith riy. Ere, wenig ngak Got ni gaar: “Gu be athapeg ni yigum mithageg u lan e fayleng ko yam’ [“fithik’ e nifiy,” Catholic Douay Version]; nggu par ni gu be mith.” (Job 1:13-19; 2:7; 14:13, BT) Ba tamilang nde lemnag Job ni fare fayleng ko yam’ ara fare Low ko Yam’ nra yan ngay e be yip’ fan fithik’ e nifiy, ara bangi ban’en nra yan ngay ni ngan gelnag boch e gafgow rok. Ya rogon u wan’ e aram e gin nrayog ni nge pirieg e toffan riy.

Ku bay reb e kanawo’ nrayog ni ngad filed murung’agen rarogon e piin ni kar m’ad riy. Rayog ni ngad fal’eged i yaliy boch e thin nu Bible ni be weliy murung’agen meruk e girdi’ nra m’ad ngemu’, mu kun fasegrad ko yam’.—Mu guy fare thin ni kenggin e “Meruk e Fas ko Yam’ ni Bay Murung’agen u Bible.”

Dariy bagayad e re meruk i girdi’ nem ni yog ni ke yan nga bang nrib gel e felfelan’ riy ara bang ni yima gafgownag e girdi’ riy. Ya faan gomanga yan e pi girdi’ nem nga bang ni aram rogon u nap’an ni kar m’ad, mab mudugil ni yad ra weliy murung’agen ko girdi’. Ma faanra aram rogon, ma gathi yira tay murung’agen nga lan e Bible ni nge beeg urngin e girdi’? Machane, dariy bang u Bible ni be yog ban’en ni aray rogon. Ya ba tamilang ndariy ban’en ni weliy e re meruk i girdi’ nem u murung’agen e re n’ey. Mang fan? Ya dariy ban’en ni yad manang, ya bod ni yad be mol. Bin riyul’ riy e, bay yu ngiyal’ ni ma taarebrogonnag e Bible be’ ni ke yim’ ngak be’ ni ke mol. Bod nnap’an ni be weliy Jesus murung’agen Lazarus, me yog ni “ke mol” ni aram e be yip’ fan ni ke yim’.—John 11:11-13.

Ere, mang e athap rok e piin ni kar m’ad? Gur, rayog ni ngkur fasgad bayay?

a Fare bugithin ni “Low ko Yam’” ni kan tay nga lan fare ke Bible ni New World Translation of the Holy Scriptures e ke yib u bbugithin ni Hebrew ni “Sheol” nge bbugithin ni Greek ni “Hades.” Bay yu ken e Bible ni kan pilyeg e re bugithin ney riy ni “fithik’ e nifiy.” Machane biney e machib u murung’agen e piin ni kar m’ad ni nga ranod nga fithik’ e nifiy ni ngan gafgownagrad u rom e dariy u lan e Bible.

MERUK E FAS KO YAM’ NI BAY MURUNG’AGEN U BIBLEb

Fak be’ nib pin ni ke yim’ figirngin I faseg Elijah ni profet be’ nib pagel ni fak be’ nib pin ni ke yim’ figirngin ni ma par u Zarefath nreb e binaw ni bay nga lel’uch yu Israel.—1 Kings 17:17-24.

Be’ nib pagel nu Shunem Elisa ni profet ni ir e yan nga lon Elijah e faseg bochi pagel ni ma par u bbinaw ni ka nog yu Shunem ngay, me fek nge sulweg ko gallabthir rok.—2 Kings 4:32-37.

Be’ nib moon ni yim’ min yan nni garpey nga bangi ban’en ni yima gum’eyag riy Immoy be’ nib moon ni yim’ min yan nni garpey downgin nga lan e low ko yam’ ko gin nni chibgiliy Elisa ngay. Ma nap’an ni yigi math downgin ko yil rok Elisa ni profet, ma aram me fas fare moon bayay.—2 Kings 13:20, 21.

Be’ nib pagel ni fak be’ nib pin nu Nain ni ke yim’ figirngin I guy Jesus e girdi’ ni yad be sor i yan nga wuru’ e binaw nu Nain ni nga ranod ra k’eyaged bochi pagel, ma aram me yan i faseg fare pagel me sulweg ngak e chitiningin.—Luke 7:11-15.

Fachi pin ni fak Jairus I yan Jairus ni ir reb e tolang u tafen e muulung nge yan i wenig ngak Jesus ni nge ayuweg bochi pin ni fak ni ke m’ar. Ma de n’uw nap’an nga tomuren ni aw e fan rok fachi pin, ma aram me faseg Jesus ko yam’.—Luke 8:41, 42, 49-56.

Lazarus ni fager rok Jesus I faseg Jesus Lazarus u tomuren ni ke gaman aningeg e rran ni ke yim’, maku boor e girdi’ nra guyed e n’en ni buch.—John 11:38-44.

Dorkas I faseg apostal Peter e re ppin ney. Ma boor e girdi’ ni manang e re ppin nem ni bochan e ir be’ nib gol ko girdi’.—Acts 9:36-42.

Eutykus Re pagel ney ni ka nog Eutykus ngak e mul ko winda u ba naun nib tolang nge aw nga but’ nge yim’; ma aram me faseg apostal Paul ko yam’.—Acts 20:7-12.

b Bin th’abi ga’ fan e fas ko yam’ ni bay murung’agen u Bible e aram e fas ko yam’ ni tay Jesus. Re fas ko yam’ nem e rib gel e thil riy ko re meruk i fas ko yam’ ney. Ma ireray e n’en nra tamilangnag e bin migid e article.