Susun Uw Rogon e Meybil Rodad ku Got?

NAP’AN ni fith reb i gachalpen Jesus ngak ni nge fil rogon e meybil, ma de yog Jesus ndabi fil ngak. Rogon ni bay ko Luke 11:2-4 e fulweg ni gaar: “Baaray rogon ni ngam meybilgad ni nge lungumed: “Chitamangimad, ngan tay fan fithingam nib thothup. Nge yib Gil’ilungum. Mpi’ ngomad u reb e rran ngu reb e rran e ggan ni nge yog ngomad. Ma ga n’ag fan u wan’um e denen romad, ya kug n’iged fan u wun’mad e kireb ni ke ngongliy urngin e piin ni kar ngongliyed e kireb ngomad. Ma dab mfekmad ko skeng nib mo’maw.” (Catholic Douay Version) Yima yog Meybil rok Somol ko re thin nem. Ma ri boor ban’en nrayog ni ngan fil riy.

Bin som’on e thin e ma tamilangnag ngodad ko mini’ e susun ni ngad meybilgad ngak​—ni Chitamangidad. De yog Jesus ni rayog ni ngan meybil ngak yugu be’ fa ngak ba liyos fa ngak e “saint” fa ngan meybil ngak. Ya ke gaar Got: “Dab gu pag e pi liyos nga nog e sorok ngorad ni aram e kan unegrad ngog.” (Isaiah 42:8, Dy) Ere Chitamangidad nu tharmiy e dabi motoyil ko meybil ni yibe tay ngak yugu be’, ndemtrug ko uw fene yul’yul’ e en ni be meybil. U lan e Bible ma kari mus ni Jehovah Got e kan pining ni “fa En ni ma Rung’ag e meybil.”​—Psalm 65:2.

Boch e girdi’ e ma yog ni pi “saint” e kari mus ni yad e maaf u thilrad Got. Machane ke yog Jesus ni gaar: “I gag e kanawo’, me gag e tin riyul’, me gag e yafos; dariy be’ nrayog ni nge yan ngak e en ni Chitamangiy ya ke mus ni gag e ra yan rog ngak. Ma gu ra rin’ e pi n’en ni gimed ra ning nga fithingag; ya ngan ta’ fan e en ni Chitamangiy u daken e en ni Fak.” (John 14:6, 13) Ere de yog Jesus nrayog ni ngan tay boch e girdi’ ni saint nga lon ngar afuweged e thin. Maku mu lemnag e n’en ni yog apostal Paul u morngaagen Kristus: “Gathi ke mus ni yim’ ni fan ngodad, ya ku ni faseg ko yam’ ke yan i par nga ba’ ni mat’aw rok Got ma be wenignagdad ngak Got.” “Rayog rok ni nge thapeg ngak Got e piin ni yad ra yib ngak Got u daken, ni bochan e bay i par nib fos ni dariy n’umngin nap’an, ngi i wenignagrad ngak Got.”​—Roma 8:34; Hebrews 7:25, Catholic Jerusalem Bible.

Fare Ngochol ni Thingarni Tay Fan nib Thothup

Bin migid e n’en ni yog Jesus ko meybil rok e gaar: “Ngan tay fan fithingam nib thothup.” Uw rogon ni ngan tay fan fa ngan thothupnag fa ngan fal nga bang e ngochol rok Got ni faanra dan nang ma danir yog? Ke pag 6,000 yay u lan e “Bin Kakrom e M’ag” ni bay fithingan Got ni Jehovah.

Reb e footnote ko Exodus 6:3 ko ba ken e Bible ni Catholic Douay Version e be weliy ni gaar: “Boch e girdi’ ko ngiyal’ ney e ur tunguyed fare ngochol ni Jehovah . . . ya dakun nang nri rogon ni ngan nog e ngochol [rok Got], ni bay u lan e Bible ko thin ni Hebrew, ya ba n’uw n’umngin nap’an ni dan fanay ere kan pag talin.” Ere fare Bible ni Catholic New Jerusalem Bible e ma yog Yahweh. Boch e pi llowan’ e ba adag e re ngochol nem machane “Jehovah” e aram rogon ni ngan nog fare ngochol nib thothup ko thin ni English. Boch e nam e ba thil rogon ni yad ma yog fare ngochol nib thothup. N’en nib baga’ fan riy e ngad fanayed e re ngochol nem ni fan ni ngad ted nib thothup. Kam fil ko teliw rom ni ngam fanay fare ngochol ni Jehovah ko meybil rom fa?

Pi N’en nib Puluw ni Ngan Yibilay

Bin migid me fil Jesus ngak pi gachalpen ni ngar yibilayed ni gaar: “Nge yib Gil’ilungum.” Fare thin ko Gospel ku Matthew e ku be yog e pi thin ney ni gaar: “Min rin’ e tin nib m’agan’um ngay u roy u but’ ni bod rogon ni yibe rin’ u tharmiy.” (Matthew 6:10, Dy) Gil’ilungun Got e aram e am ni bay u tan pa’ Jesus Kristus. (Isaiah 9:6, 7) Rogon ni yog e thin ko profet u lan e Bible ma dabki n’uw nap’an ma re am nem e ra yan nga lon urngin e pi am nu fayleng ma ra yibnag e gapas u gangin e fayleng. (Psalm 72:1-7; Daniel 2:44; Revelation 21:3-5) Ere tin riyul’ e Kristiano e ma tay ni kenggin e meybil rorad e aram Gil’ilungun Got ni bay yib. Kam fil ni aram rogon ko teliw rom fa?

Miki dag Jesus ni rayog ni ngad yibilayed boch ban’en ni fan ngodad. Ke gaar: “Mpi’ ngomad u reb e rran ngu reb e ggan ni nge yog ngomad. Ma ga n’ag fan u wan’um e denen romad, ya kug n’iged fan u wan’mad e kireb ni ke ngongliy urngin e piin ni kar ngongliyed e kireb ngomad. Ma dab mfekmad ko skeng nib mo’maw.” (Luke 11:3, 4, Dy) N’en ni yog Jesus e ma tamilangnag ni rayog ni gad gay rogon ngad rin’ed e tin m’agan’ Got ngay ko pi n’en ni gad ma rin’ u gubin e rran, ma rayog ni ngad yibilayed ku Got e pi n’en ni be magafan’dad ngay fa be wageynag lanin’dad ndemtrug ko mang. Faanra gad ra ning e ayuw ku Got u gubin ngiyal’ ma aram e gad ra taga’ nga daken. Ma aram e ra tamilangan’dad ni ir e be suwey e yafas rodad. Ma bay angin riy ni ngan wenig ku Got ni nge n’ag fan e denen rodad u gubin e rran. Ya aram e ra tamilang u wan’dad e tin ni gad meewar riy​—ma gad ra t’ar lanin’dad u puluwon yugu boch e girdi’. Maku ba puluw ni ngad rin’ed nrogon ni yog Jesus ni ngan yibilay ni dabda awgad ko pi n’en ni ma wawliydad, ya be kireb iyan e ngongol ko re fayleng ney. Ma gad ra ngongol nib puluw ko re meybil nem ma gad palog ko urngin ban’en ni rayog ni nge k’aringdad ngad uned ko ngongol nib kireb.

Dariy e maruwar riy ni fare Meybil rok Somol e boor ban’en ni be fil ngodad u morngaagen e meybil nra felan’ Got ngay. Machane i lemnag Jesus ni gad ra sul nga daken e re meybil ney min nog gubin ngiyal’ fa?

Ku Boch e Fonow u Morngaagen e Meybil

Ki weliy Jesus boch ban’en u morngaagen e meybil. Matthew 6:5, 6 e begaar: “Ma faan gimed ra meybil, ma dab mu boded e piin ni yad ma madag girdi’, ni yad ba adag ni ngar sak’iygad ngar meybilgad u lan e pi tafen e muulung nge yungi n’en ni madardar ko kanawo’ ni bochan e nge gubin e girdi’ me guyrad . . . Machane faan ga ra meybil, ma ga yan nga singgil rom ngam ning e mab, ma ga meybil ko Chitamam ni be’ ndanir guy. Ma Chitamam ni be guy e n’en ni kam rin’ nde nang e girdi’ e bay pi’ puluwon ngom.” Pi thin ney e be fil ngodad ni dabda meybilgad ni fan ni ngad ufgad ngay fa nge guydad e girdi’. Ga ma weliy e n’en ni bay u gumerchaem ngak Jehovah ni goo gur, ni bod ni be yog e Bible fa?​—Psalm 62:8.

I ginang Jesus ni gaar: “Faanra mmeybilgad ma dab um sulod u daken taab bugithin ni pire’ yay ni bod ni ma rin’ e piin ni yad ma meybil ngak yugu boch e kan, ni yad be finey ni yira rung’ag e tin ni yad be yog ni bochan e ba n’uw e meybil ni yad be pi’.” (Matthew 6:7, JB) Ere ba tamilang ni de fel’ u wan’ Jesus ni ngan sul nga daken taab bugithin ni ke mit​—maku de fel’ u wan’ ni ngan poy e meybil ko babyor. Ma n’en ni yog e be tamilangnag ni dabni fanay e rosario.

Reb e babyor ko misa ko Katolik e begaar: “Bin th’abi fel’ e meybil ni gad ra tay e aram e tin ni gad ra yog ni fini yib ngan’dad u nap’an ni gad be meybil ni gad be pining e magar ngak fa gad be ning e ayuw rok, fa ngiyal’ ni ke kireban’dad, fa nap’an e meybil ni yima tay u gubin e rran.” Rogon ni meybil Jesus e ke weliy e tin ni be lemnag ma de sul nga daken taab bugithin. Amu poy e meybil rok Jesus u John guruy ni 17. Wod rogon fare Meybil rok Somol, ni be tamilangnag Jesus ni ba adag ni ngan n’uf fithingan Jehovah. Ma yigi meybil Jesus ko ngiyal’ ba adag ma ke weliy e n’en ni bay u gumerchaen.

Rogon e Meybil ni ma Rung’ag Got

Faanra kan skulnagem ni ngam mog e meybil ni ke mit ngom, fa ngam meybil ko “pi saint” fa liyos, fa yugu boch ban’en ni bod fare rosario, ma sana ga ra dabuy ni ngam meybil ni bod ni yog Jesus ni ngan rin’. Machane n’en nra ayuwegem e ngam nang ko mini’ Got​—nge fithingan, nge tin nib m’agan’ ngay, nge pangin. Ma rayog ni ngam fil mornaagen u lan e Bible. (John 17:3) Ba adag e Pi Mich Rok Jehovah ni ngar ayuweged gur ko re n’ey. Kar ayuweged bokum milyon e girdi’ u gangin e fayleng ni ngar “pagedan’rad ngak Jehovah, ma yad pirieg fene manigil”! (Psalm 34:8) Rogon ni be yoor iyan e tin ni ga manang u morngaagen Got ma ra gel iyan rogon ni ga ba adag ni ngam n’uf u fithik’ e meybil. Ma rogon ni ga be chugur iyan ngak Jehovah u fithik’ e meybil ma ra fel’ iyan thilmew.

Yibe pining urngin e piin ma liyor ku Got ni “ngar meybilgad u gubin ngiyal’.” (1 Thessalonika 5:17) Mu guy rogon ni ba puluw ko Bible e meybil ni ga ma tay, ma nge taareb rogon ko n’en ni fil Jesus Kristus. Aram rogon ma rayog ni nge pagan’um ni ra felan’ Got ko meybil rom.

[Sasing ko page 7]

Rogon ni be yoor iyan e tin ni gad be fil u mornagaagen Jehovah ma aram e ra k’aringdad ni ngad meybilgad ngak u fithik’ gumerchadad