Nga Un Par Ni Ngan Fol Ko Fare Motochiyel Rok Kristus

“Nge bigimed me ayuweg bigimed nge un i fek gilban faanem, ereray rogon ni gimed ra rin’ ma aram e kam folgad ko fare motochiyel ni pi’ Kristus.”​—GALATIA 6:2.

1. Mang fan ni rayog ni ngan nog fare motochiyel rok Kristus ri aram gelngin ban’en nib fel’ ko ngiyal’ ney?

U Rwanda, ke par e Pi Mich Rok Jehovah ni yad piyu Hutu nge piyu Tutsi u fithik’ e riya’ ya ra bagayad ma ke athamgil ni nge ayuweg e pogofan’ rok bagayad ko magawon ni immoy u rom ni ganong rok bagayow e ke guy rogon ni nge thang e ganong rok bagayow. Maku kari gel e kireban’ ko Pi Mich Rok Jehovah u Kobe, Sapan, ya ke yim’ girdien e tabinaw rorad ko fare durru’ ni rib gel u rom. Machane, kar maruwelgad nib pay ni ngar ayuweged yugu boch e girdi’. Arrogon, pi n’en ni be buch u fayleng iyan e be dag ni be maruwel fare motochiyel rok Kristus e ngiyal’ ney. Ri aram gelngin ban’en nib fel’.

2. Uw rogon ni ke balyang owchen Kristendom nga kenggin fare motochiyel ni pi’ Kristus, ma uw rogon ni kad folgad ko fare motochiyel ni pi’ Kristus?

² Maku u taab ngiyal’, be lebug e pi thin ko Bible u morngaagen e “tin tomren e rran” ney ni ba mo’maw’ e par riy. Boor e girdi’ e “ur dake yad be liyor ngak Got,” machane ‘bay ra pied keru’rad nga gelngin.’ (2 Timothy 3:1, 5) Ri aram rogon Kristendom, ya teliw e be dake ir be rin’ ban’en, machane de l’ag gum’ercha’en ngay. Aram rogon ya kaygi mo’maw’ ni ngan fol ko fare motochiyel rok Kristus? Danga’. Ya dabi pi’ Jesus e motochiyel ngodad ndabkiyog ni ngan fol riy. Ke balyang owchen Kristendom nga kenggin fare motochiyel ni pi’ Kristus. Ya de fol ko pi thin ney ni ke thagthagnag Got ni be gaar: “Nge bigimed nge un i fek gilban faanem, ereray rogon ni gimed ra rin’ ma aram e kam folgad ko fare motochiyel ni pi’ Kristus.” (Galatia 6:2) Ra kad “folgad ko fare motochiyel ni pi’ Kristus” ma aram ra bagadad ma ra fek gilban bagadad, ni dab ni folwok rok e pi Farise ni uneg e tin nib tomal nga gilban pi walagdad ni yad be fek.

3. (a) Mang boch e motochiyel ni ba l’ag ko fare motochiyel rok Kristus? (b) Mang fan nde mat’aw ni ngan lemnag ni ke mus e pi n’en ni i tay Jesus chilen e aram e pi motochiyel ko ulung rok Kristus?

³ Fare motochiyel rok Kristus e ba l’ag ngay urngin e n’en ni i tay Jesus chilen​—ndemtrug e n’en nib m’ag ko machib, ngan siyeg e chogow, ngan maruweliy e gapas u thilin e girdi’, ara ngan chuweg e tin nde klin ko ulung. (Matthew 5:27-30; 18:15-17; 28:19, 20; Revelation 2:14-16) Dabi siy ni be sor fan ngak e pi Kristiano ni ngar folgad ko urngin e motochiyel nu Bible ni tin bpuluw ko pi gachalpen Kristus. Ma ka bay boch ni bpuluw ngorad. Ya ulung rok Jehovah nge ra reb e congregation e ba t’uf ni nge dugliy boch e motochiyel ni fan ni nge par nib yaram. (1 Korinth 14:33, 40) Faan manga dabni dugliy e tayim ko gin’en, nge rogon ni ngan fl’eg e pi muulung ma dabi siy ndabkiyog ni nge muulung e pi Kristiano u taabang! (Hebrews 10:24, 25) Ere ngan fol ko pi n’en ni ke dugliy e piin ni kan pi’ mat’awun ngorad ni nga rogned e thin u lan e ulung e ku bang ko fare motochiyel rok Kristus.​—Hebrews 13:17.

4. Mang fare n’en ni be k’aring e liyor nib machalbog?

⁴ Yugu demtrug, dabi pag e tin riyul’ e Kristiano ni nge mang e liyor rorad ba ulung i motochiyel ndariy fan. Dabi pigpig ku Jehovah ni bochan ni ke yog be’ ara ke yog e ulung ni nge rin’. Ya, fare n’en ni be k’aring ni nge liyor ngak Got e ra yib ko t’ufeg. Ke yol Paul ni gaar: “Gelngin fanmad t’uf rok Kristus e ir e be gagiyegnagmad.” (2 Korinth 5:14, footnote) I tay Jesus chilen ngak pi gachalpen ni ra bagayad me t’uf bagayad. (John 15:12, 13) T’ufeg ni yima pag fay riy e aram kenggin fare motochiyel rok Kristus, ya ma k’aring e tin nriyul’ e Kristiano u gubin yang, ni tin ni bay ko tabinaw nge tin ni bay ko congregation. Ngad guyed rogon ni yibe rin’.

U Tabinaw

5. (a) Uw rogon ni be fol e gallabthir ko fare motochiyel rok Kristus u tabinaw rorad? (b) Mang e ba t’uf ko bitir rok e gallabthir, ma mang boch ban’en nthingari gel e gallabthir ngay ni nge pi’ ngak?

⁵ Ke yol apostal Paul ni gaar: “Piin ni pumoon, ngari t’uf e piin nleengimed romed ni bod rogon feni t’uf girdien e galesiya rok Kristus me pi’ e pogofan rok ni fan ngorad.” (Efesus 5:25) Faan ra folwok e en ni figirngiy ni Kristiano me ngongliy e t’ufeg nge nang ni fan ngak e ppin rok, ma aram e be fol ko fare motochiyel rok Kristus. Maku, i dag Jesus ngodad rogon ni ngad daged e runguy ko bitir, ye fekrad me tay pa’ nga dakenrad, me flaabnagrad. (Mark 10:16) Piin ni gallabthir ni yad be fol ko fare motochiyel rok Kristus e ku yad ma dag e runguy ngak e pi bitir rorad. Rriyul’ ni bay boch e gallabthir ni ma lemnag ni ba mo’maw’ ni ngar folwokgad rok Kristus ko re n’ey. Ya dan sunmeg boch i yad ni aram rogorad. Piin ni gallabthir, dabmu paged e re lem ney ni nge gagiyegnagmed ndabmu daged e t’ufeg romed ngak e pi bitir romed! De gaman ni ga manang ni ba t’uf e pi bitir rom. Ya ku thingar ra nanged. Maku dabra nanged ni aram rogom nfaanra dabmu gay e kanawo’ ni ngam dag e t’ufeg rom ngorad.​—Mu taarebnag ko Mark 1:11.

6. (a) Ba t’uf rok e bitir boch e motochiyel nra tay e gallabthir fa danga’, ma mang fan e fulweg rom? (b) Mang e thingari tamilang u wan’ e bitir ni fan ni ngar folgad ko pi motochiyel nem? (c) Faanra fol e tabinaw ko fare motochiyel rok Kristus ma mang ngongol ni yira siyeg?

⁶ Ma u taab ngiyal’, ba t’uf rok e bitir boch e motochiyel ni nge yororiy, ere rayog ni nge dugliy e gallabthir boch ban’en me gechignagrad nfaanra ra paged e pi motochiyel nem. (Hebrews 12:7, 9, 11) Thingar ni ayuweg e bitir ni nge nang fan e pi motochiyel ni fan e: yad ba t’uf rok e gallabthir rorad. Ma thingari tamilang u wan’rad ni t’ufeg e aram fan nth’abi fel’ ni ngar folgad rok e gallabthir rorad. (Efesus 6:1; Kolose 3:20; 1 John 5:3) Ra nameg e gallabthir nib gonop ni ngar filed ngak e pi bitir ngar maruweliyed ngar filed rogon ni nge munguyan’rad ni fan ni ngar ilalgad ngar dugliyed ban’en nrogon. (Roma 12:1; mu taarebnag ko 1 Korinth 13:11.) Machane, susun ni dab ni fl’eg ni kaygi yoor e motochiyel ara kaygi gel e gechig riy. Yog Paul ni gaar: “Gimed e pi gallabthir e yu dabi pag rogon e puwan’ ngak pi fakmed ngam k’aringed e damumuw ngorad, ya ri mulan’rad.” (Kolose 3:21; Efesus 6:4) Faanra fol e tabinaw ko fare motochiyel rok Kristus, ma dariy rogon ni ngan gechignag e bitir u fithik’ e yargel ara damumuw nib pag rogon ara ngan nog e thin nra k’aring e damumuw. U lan e tabinaw ni aram rogon, ra par e bitir ndariy e marus rorad ma yad be par ni kan ubungrad, ngathi ba tomal gilbarad ara ke mulan’rad.​—Mu taarebnag ko Psalm 36:7.

7. Uw rogon e pi tabinaw ni Bethel e be dag rogon nib fel’ ni ngan fl’eg e pi motochiyel ni fan ko tabinaw?

⁷ Girdi’ ni kar ranod ngar guyed e pi tabinaw u fayleng iyan ni kan nog e Bethel ngay e yad ma yog ni pi tabinaw nem e ma dag rogon nib fel’ ni ngan fl’eg e pi motochiyel ni fan ko tabinaw. Yugu aram rogon ni ma par e piin ni ke ilal ko pi tabinaw nem, yad ma maruwel ni bod e tabinaw.a Boor e maruwel ni bay u Bethel ere ba t’uf boor boch e motochiyel riy​—ni kab boor ko yugu reb e tabinaw. Machane, piin ni piilal ni yad ma yog e thin u tabinaw ni Bethel, nge ofis, nge factory e yad ma athamgil ni ngar folgad ko fare motochiyel rok Kristus. Gathi ke mus ni yad ma lemnag ni maruwel rorad e ngar yarmiyed e maruwel rok Got machane ku ngar mon’ognaged e tirok Got ban’en mar mon’ognaged e “falfalan’ ni ma pi’ Jehovah” ngak e pi tamaruwel. (Nehemiah 8:10) Ere, yad ma athamgil ni ngar rin’ed ban’en u rogon ni bpuluw laniyan’rad ma ra pied e athamgil nga laniyan’uy ma ra athamgilgad ni ngar pired ni yad be fil munguyan’rad ngay. (Efesus 4:31, 32) Arfan ni yima yog ni ba falfalan’ e pi tabinaw ko Bethel!

U Congregation

8. (a) Susun mang e ngad nameged u congregation u gubin ngiyal’? (b) Mang boch ban’en ni kan fith e motochiyel u morngaagen ara kan guy rogon ni ngan motochiyelnag?

⁸ Ku aram rogon u lan e congregation ni gad baadag ni ra bagadad ma ra ubung bagadad ko t’ufeg. (1 Thessalonika 5:11) Ere gubin e Kristiano e susun ni ngar ayuwgad ni dabra uneged e tin nib tomal nga gilban yugu boch e girdi’ ni ngar ted e lem rorad nga ban’en nib mil fan ngak yugu be’ ni nge turguy. Yu ngiyal’ ma ke yoloy boch e girdi’ e babyor ngak e Watch Tower Society ma yad ma fith morngaagen boch e motochiyel ko kachido, babyor, nge mus ko titiy ya yad baadag ni ngar nanged rogon e motochiyel ko pi n’ey. Machane, de sor mat’awun ngak e Society ni nge yaliy me turguy. Baga’ ni pi n’en ni yima fith u morngaagen e be mil fan ngak e girdi’ ara ngak lolugen e tabinaw ni nge turguy nga rogon ni ba t’uf e motochiyel nu Bible riy. Yugu boch e girdi’ e ma piliyeg e thin ni ke yoloy e Society nge mang e motochiyel. Ya amu lemnag, u lan e Watchtower, ko March 15, 1996, immoy e thin nib fel’ ni ke pi’ e athamgil nga laniyan’ e piin ni piilal ni nguur guyed girdien e congregation u gubin e pul mar ubunged yad ko tirok Got ban’en. Fan e re thin nem e nge motochiyelnag fa? Danga’. Yugu aram rogon ni ma fel’ rogon e girdi’ ni ke fol riy, bay boch e piin ni piilal ni bay e magawon rorad ma dabiyog ni ngar yodoromgad. Maku, fare thin ni “Deer ko Girdi’ ni Ma Bieg e Babyor” ni immoy u lan e Watchtower ko April 1, 1995, e ke ginang ni dabni pag ni ngan dariy fannag e taufe ni nge pag rogon ni ngan fl’eg e party ara madenom nib wagey. Boch e girdi’ e kar paged rogon fan e re thin nib fel’ nem mar motochiyelnaged ni ba kireb ni ngan pi’ e babyor ngak faanem ni kan taufenag!

9. Mang ni baga’ fan ni ngad siyeged ndabda turguyed e kireb nga daken yugu be’?

⁹ Maku amu lemnag ni faanra bay “fare motochiyel nrib yal’uw ni ir e ma pithig e girdi’ ko kireb” u fithik’dad, ma thingar da nanged nde taareb e nangan’ rok gubin e Kristiano. (James 1:25) Susun ni ngad damumuwgad ni faanra turguy e girdi’ ban’en nde togopuluw ko kenggin e motochiyel nu Bible fa? Danga’. Ya faan gad ra rin’ ma aram e gad be tay ni ngad yoor raba’gad. (1 Korinth 1:10) I ginangdad Paul ni dabda turguyed e kireb rok yugu boch e Kristiano ni i gaar: “ I gur mini’ ni ngam turguy e kireb nga daken e tapigpig rok be’ ya masta rok e ir e bayi turguy ko yog rok fa de yog rok e tin ni nge rin’. Ma mmudugil nrayog rok, yi Jehovah e rayog rok ni nge ayuweg faanem nge yog rok e tin ni nge rin’.” (Roma 14:4) Gad ra kirebnagan’ Got nfaanra gad ra yog e kireb nga nga daken yugu be’ ko pi n’en ni susun nib mil fan ngak ni nge dugliy ko nangan’ rok.​—James 4:10-12.

10. Mini’ e kan pi’ e maruwel ngorad ngar ayuweged e congregation, ma uw rogon ni ngad ted tanggirad?

¹⁰ Maku dabda paged talin ni kan pi’ e maruwel ngak e piin ni piilal ni ngar ayuweged fare ran’ i saf rok Got. (Acts 20:28) Bay e piin ni piilal ni fan ko ayuw. Susun ndabda tamdaggad ni ngad ninged e ayuw rorad, ya yad e girdi’ ni yad ma fil e Bible ma yad manang e pi n’en ni kan weliy u lan e pi babyor ni ke ngongliy e Watch Tower Society. Faan ra guy e piin ni piilal e ngongol nra sor nge togopuluw ko kenggin e motochiyel nu Bible, dabra tamdaggad ni ngar pied e fonow nib t’uf riy. (Galatia 6:1) Girdien e congregation e ra maruweliy fare motochiyel rok Kristus ko ngiyal’ ni ngar folgad ko pi tachugol e saf ney ni yad be pow’iyrad.​—Hebrews 13:7.

Piin ni Piilal ni Ma Fol ko Fare Motochiyel Rok Kristus

11. Uw rogon ni ma maruweliy e piin ni piilal fare motochiyel rok Kristus u lan e congregation?

¹¹ Baadag e piin ni piilal ni ngar maruweliyed fare motochiyel rok Kristus ko ulung rorad. Yad ma pow’iy fare maruwel ni ngan machibnag fare thin nib fel’, ma yad ma machibnag e thin nu Bible u rogon ni nge taw nga gum’ercha’en e girdi’ ma yad ma yog e thin nra ubung e “piin ni yad meewar,” ya yad e pi tachugol saf ni ba gol ma bay e t’ufeg rorad.” (1 Thessalonika 5:14) Yad ma siyeg e lem nib togopuluw ngak e Kristiano ni bay u boor e teliw ko Kristendom. Rriyul’, re fayleng ney e be kireb iyan nib pay, ma bod e apostal Paul, ma be magafan’ e piin ni piilal ko fare ran’ i saf ko ulung rorad; machane yad ma par nib thebthebal ni ngar ayuweged girdien e ulung rorad.​—2 Korinth 11:28.

12. Faan ra yib e Kristiano ni nge guy e piilal, uw rogon nsusun ni nge fulweg e piilal?

¹² Amu lemnag reb e Kristiano ni baadag ni nge non ngak e piilal u morngaagen ban’en ni baga’fan ndariy e fonow nu Bible riy ara ba t’uf rok ni nge tafinaynag boch e motochiyel nu Bible me turguy ban’en. Sana kan nog ngak nrayog ni nge mang e ga’ u tabon e maruwel ma ra yoor e salpiy riy machane kab boor e maruwel nra mil fan ngak. Ara chitamangin reb e pagal ni Kristiano nde mich Jehovah u wan’ e ra dugliy ban’en nra n’igin fak ni nge dabi un ko machib u gubin ngiyal’. Faanra aram rogon ma dabi yog e piilal e lem rok. Ya ra pithig e Bible ma ra ayuweg faanem ni nge lemnag kenggin e motochiyel nu Bible. Rayog ni nge fanay e Watch Tower Publication Index, ni faanra bay rok ni fan ni nge gay e thin ni ke weliy “fare tapigpig nib yul’yul’ mab gonop” ni morngaagen ni bay u lan e Watchtower nge yugu boch e babyor. (Matthew 24:45) Faan mang e ra turguy e Kristiano ban’en ni dariy e gonop riy u wan’ e piilal? Faanra dabi togopuluw ko kenggin e motochiyel nu Bible, ma ra tamilang u wan’ e Kristiano ni manang e piilal ni be mil fan ngak e Kristiano ni nge turguy, ya “ra be’ ma bay gilban ni be fek.” Machane, susun ni nge dabi pag e Kristiano talin ni “ra be’ ma mit i n’en ni yung e ir e ra t’ar wom’engin.”​—Galatia 6:5, 7.

13. Dabi yog e piin piilal e n’en nra rin’ be’ ko reb e magawon rok ara dabi yog e lem rok, ere mang fan ni ma ayuweg e piin ni piilal ni nge tafinaynag e girdi’ e magawon rok?

¹³ Mang fan nra ngongliy e piilal e ngongol ni aram rogon? Ya l’agruw fan. Bin som’on, i yog apostal Paul ku reb e congregation ni gathi ir e nge ‘yog ngomed e n’en ni ir e thingari mich u wan’med.’ (2 Korinth 1:24) Faan ra ayuweg e piilal walagen ni nge tafinaynag e thin nu Bible ma ir e ra turguy e pi n’en ni bay u Bible, ma aram me folwok e piilal rok Paul. Ya manang ni dariy rogon ni nge turguy urngin ban’en ni bod rogon ni manang Jesus ni dariy mat’awun ni nge turguy gubin ban’en. (Luke 12:13, 14; Jude 9) Machane ku baadag e piin ni piilal ni ngar pied e ayuw ni mus ko fonow nu Bible ni ba gel ni faanra ba t’uf riy. Bin l’agruw, be fil e piilal rogon ngak e Kristiano. Yog apostal Paul ni gaar: “Ggan nib el e piilal e ngar ked, ya kar filed rogon ni ngar nanged e tin nib fel’ ko tin nib kireb.” (Hebrews 5:14) Ere ra ngad ilalgad ko tirok Got ban’en, ma ba t’uf ni ngad fanayed e tafinay rodad ni dabda sapgad ngak yugu be’ ni nge pi’ e fulweg ngodad ngad turguyed ban’en. Faan ra dag e piilal rogon ni nge tafinaynag e pi n’en ni bay u Bible, ma aram rogon ni be ayuweg faanem ni nge mon’og iyan.

14. Uw rogon nra dag e piilal ni be pagan’rad ku Jehovah?

¹⁴ Rayog ni ngad pired nib mich u wan’dad nra suruy Jehovah Got gum’ercha’en e tin nriyul’ e pi tapigpig rok u daken e kan ni thothup. Ere pi Kristiano nib ilal ko tirok Got ban’en e yad ma pug gum’ercha’en e pi walagrad ma yad ma ayuwegrad ni bod rogon ni i rin’ apostal Paul. (2 Korinth 8:8; 10:1; Filemon 8, 9) Manang Paul ni piin nde mat’aw ma gathi piin ni mat’aw e ba t’uf rorad boor e motochiyel ni fan ni nge ayuwegrad nguur ngongolgad nrogon. (1 Timothy 1:9) Da i yog Paul e thin ni be dag nde pagan’ ngak pi walagen machane i micheg ni ke pagan’ ngorad. Ya i yol ko reb e congregation ni gaar: “Ke pagan’mad ngak Somol nib mudugil ni gimed be rin’ e tin ni kug weliy ngomed ma bay um rin’ed iyan.” (2 Thessalonika 3:4) Dabi siy e pagan’ nge mudugilan’ ni i dag Paul ngorad e ke k’aring e pi Kristiano nem. Ku aram rogon e piin ni piilal nge pi piilal ni ma lekag e ulung e ngiyal’ ney. Uw fene fel’ ni ngad nanged ni bay e pi pumoon ni yul’yul’ ney ni yad be gafaliy fare ran’ i saf rok Got u fithik’ e t’ufeg!​—Isaiah 32:1, 2; 1 Peter 5:1-3.

Nga Un Maruweliy Fare Motochiyel Rok Kristus

15. Mang boch e deer nrayog ni ngad fithed ngodad ngad nanged ni faanra gad be maruweliy fare motochiyel rok Kristus u thilin e pi walagdad?

¹⁵ Gad gubin e thingar da yaliyed gadad u gubin ngiyal’ ni ngad nanged nfaanra gad be maruweliy ma ka gad be nameg fare motochiyel rok Kristus. (2 Korinth 13:5) Rriyul’ ni gad gubin e ra fel’ rogodad riy ni ngad fithed: ‘Gu ma ubung ara gu ma adawnag e girdi’? Gu ma rin’ ban’en u rogon nib thebthebal ara gu ma pag rogon? Gu ma lemnag yugu boch e girdi’ ara gu ma tay ni gub mat’aw?’ Dabi guy e Kristiano rogon ni nge gagiyegnag e n’en ni susun ni nge rin’ walagen ara susun ndabi rin’ ko pi n’en ni der weliy e Bible u morngaagen.​—Roma 12:1; 1 Korinth 4:6.

16. Uw rogon nrayog ni ngad ayuweged e girdi’ nde puluw rogon ni yad be lemnagrad ni fan ni ngad maruweliyed fare motochiyel rok Kristus?

¹⁶ Ngiyal’ ney ni ba mo’maw’ e par riy ma baga’ fan ni ngad gayed rogon ni ra bagadad ma ra pi’ e athamgil nga laniyan’ bagadad. (Hebrews 10:24, 25; mu taarebnag ko Matthew 7:1-5.) Faan gad ra sap ko pi waladad ni pumoon nge ppin ma gathi kab fel’ felngirad ko tin nib meewar rorad? Ra bagayad e baga’fan u wan’ Jehovah. Machane gathi gubin e girdi’ e ma lemnag ni aram rogon, ya bay e girdi’ nde puluw rogon ni yad be lemnagrad. Boor e girdi’ e ke mus ni yad ma guy e tin nde flont rorad nge tin nib meewar rorad. Ra ngad pied e athamgil nga lanin’rad​—nge yugu boch e girdi’​—mang ni dabda nonad taareb ara l’agruw e girdi’ u nap’an ra reb e muulung, ma ngad daged ngorad ni baga’ farad ko ulung ma ngad weliyed e ayuw ni baga’fan ni yad ma pi’ ni fan ko ulung? Ra falfalan’dad ngay ni ngad ayuweged yad ko tin nib tomal rorad ni aray rogon ma aray rogon ni gad ra maruweliy fare motochiyel rok Kristus!​—Galatia 6:2.

Be Maruwel Fare Motochiyel Rok Kristus!

17. Mang e ga ma guy ko congregation rom ni be dag ni yibe maruweliy fare motochiyel rok Kristus?

¹⁷ Be maruwel fare motochiyel rok Kristus u lan e ulung rok Kristus. Gad ma guy ni be maruwel u gubin e rran​—ni aram e ngiyal’ ni be wereg e Pi Mich Rok Jehovah fare thin nib fel’, nge ngiyal’ ni ra bagayad ma ra fl’eg laniyan’ bagayad me pi’ e athamgil nga laniyan’, nge ngiyal’ ni yad ma gafgow u taabang ko ngiyal’ ni ngar pigpiggad ku Jehovah ni yugu aram rogon ni ba gel e magawon rorad, nge ngiyal’ nra athamgil e gallabthir ni ngar chugiliyed e bitir rorad ni ba t’uf Jehovah u gum’ercha’rad, nge ngiyal’ nra fil e piin ni piilal e Thin Rok Got u fithik’ e t’ufeg nge runguy, ni fan ni ngar ubunged fare ran’ i saf ni ngar pasiggad mar pigpiggad ku Jehovah ndariy n’umngin nap’an. (Matthew 28:19, 20; 1 Thessalonika 5:11, 14) Faan gad ra maruweliy e motochiyel rok Kristus ko par rodad, ma ra falfalan’ gum’ercha’en Jehovah ngay! (Proverbs 23:15) Baadag Jehovah ni nge par e girdi’ ni ba t’uf e pi motochiyel rok rorad ngar pired nib fas ndariy n’umngin nap’an. U lan e Paradis nra moy, gad ra guy ba ngiyal’ nra par e girdi’ ni yad ba flont, ba ngiyal’ ndariy e girdi’ ni ma togopuluw ko motochiyel, nge ba ngiyal’ ni gubin ban’en ni bay u gum’erch’en e ra par nib mudugil. Uw fene fel’ e tow’ath nra yib ngak e girdi’ nra maruweliy fare motochiyel rok Kristus!

[Boch e Thin nra Tamilangnag Murung’agen]

Uw Rogon u Wan’um?

◻ Mang fan ni ke balyang owchen Kristendom nga kenggin fare motochiyel ni pi’ Kristus?

◻ Uw rogon ni gad ra fol ko fare motochiyel rok Kristus u tabinaw rodad?

◻ Mang e thingar da siyeged, ma mang e thingar da rin’ed nfaanra gad ra fol ko fare motochiyel rok Kristus u lan e congregation?

◻ Uw rogon nra fol e piin ni piilal ko fare motochiyel rok Kristus u nap’an e ngiyal’ ni ngar ayuweged e congregation?