Piilal Ni Ma Lekag E Ulung​—Yad E Taw’ath

“Faani yan nga lang ko gin nth’abi tolang ma boor e girdi’ ni fekrad ngar uned ngak ni bod rogon e girdi’ nni kol ko mahl; ma aram me pi’ boch e pumoon ni yad e taw’ath.”​—EFESUS 4:8.

1. Mang maruwel nib biech ni kan weliy morngaagen u lan e re ke babyor ney ko duw ni 1894?

REB e chibog faram ma kan weliy ban’en nib biech u lan fare babyor ni Wulyang Ntagil’ e Damit. Kenggin e re thin nem e “Reb e Maruwel nib Biech ko Machib.” Uw rogon e re maruwel ney nib biech? Aram e kan tababnag e maruwel ko piin piilal ni ma lekag e ulung. Kan weliy ko re ke babyor ney ko September 1, 1894 ni ran pi’ boch e walag ni pumoon ngar lekaged e pi ulung ko Bible Students ‘ni fan ni ngan ubingrad ko thin riyul’.’

2. Mang e mil fan ngak e piin ni circuit nge district overseer?

² U nap’an e bin som’on e chibog C.E., ma boch e piilal ni bod Paul nge Barnabas e ur lekaged e ulung. Pi pumoon ney ni yad ba yul’yul’ e ur nameged ni ngar ‘ubunged’ e pi ulung. (2 Korinth 10:8) Ngiyal’ ney e gad ba taw’ath ya bay bokum biyu’ e pumoon ni yad be un ko re maruwel ney. Ke dugliy fare Governing Body ko Pi Mich Rok Jehovah e pi pumoon nem ni yad e circuit nge district overseer. Be’ ni ir e circuit overseer e ma lekag 20 e ulung ni ra reb ma reb e wik ni l’agruw yay u lan reb e duw, ma ma yaliy e babyor ko ulung, ma ma pi’ boch e welthin, me un ko pi publisher ngar ranod ko machib u mit e tabinaw iyan. Fa en ni ir e district overseer e ir e baga’ lungun ko pi muulung ni circuit assembly u lan e pi circuit ma yima tay taab yay reb e duw, maku ma un ko ulung ko machib u mit e tabinaw iyan, ma ma pi’ boch e welthin ni ma sor fan ko Bible.

Yad ma Pag Farad

3. Mang fan ni ba t’uf ko piin ni ma lekag e ulung ni ngar paged farad?

³ Piin ni ma lekag e ulung e gubin ngiyal’ ma goo yad be milekag. Ri yad ma pag farad ko re n’ey. Mo’maw ni ngan milekag iyan nga reb e ulung nge reb, machane pi pumoon ney nge pi ppin rorad e yad ma rin’ u fithik’ e falfalan’. Gaar reb e circuit overseer: “An leengig e ma ayuwegeg ma der ma gun’gun’. . . Bay rogon ni ngan nog e sorok ngak ya ri ma pag fan.” Boch e piin ni ma lekag e ulung e yad ma milekag iyan ko pi ulung nib pag 600 e mayal palongin thilin e pi ulung. Boor i yad e ma milekag ko karro, ma boch e ma un ko bus, fa rat, fa os, fa yad ma yan u but’. Reb e circuit overseer u Africa e thingari th’ab e lul’ ma ma ta’ e ppin rok nga daken pon ni fan ni nge taw nga reb e ulung. Nap’an ni be un apostal Paul ko missionary ma ke athamgil u fithik’ e gawel nge ulum, ma kem’ ko bilig nge belel, ma boch e nep’ e dariy e mol, ma bay e riya’, nge togopuluw nib gel. Ma der “paslegan’ ni bochan e be lemnag urngin e galesiya iyan”​—aram rogon e pi piilal ni ma lekag e ulung ko ngiyal’ ney.​—2 Korinth 11:23-29.

4. Mang boch e magawon ko m’ar ni ma yib ko pi leengirad nge piin ni ma lekag e ulung?

⁴ Bod rogon Timothy ni ir e en ni un ku Paul, ma piin ni ma lekag e ulung nge piin leengirad e yad ma m’ar yu ngiyal’. (1 Timothy 5:23) Re n’ey e ma magawonnag lanin’rad. Leengin reb e circuit overseer e ke gaar: “Nap’an ni gub m’ar ma ri gu ma athamgil ni nggu k’adan’ug ya gubin ngiyal’ ma gamow bay u fithik’ e pi walag. Nap’an ni kug puwelwol ma kari mo’maw e re n’ey. Mus ni nggu tay e chugum romow nga lan e suitcase u gubin e wik ma gamow milekag nga bayang ma aram e skeng rog ni rib gel. Boor yay ma thingar gu tal mu gu yibilay ku Jehovah ni nge pi’ gelngig nguug un ko yan.”

5. Yugu demtrug e pi magawon ni ma yib ngorad ma uw rogon e piin ni ma lekag e ulung nge pi leengiyrad?

⁵ Yugu demtrug ni yad ba magawon ko m’ar nge yugu boch ban’en machane piin ni ma lekag e ulung nge piin leengiyrad e yad ba falfalan’ ko pigpig ni yad be tay mi yad pag farad u fithik’ e t’ufeg. Boch iyad e ur paged fan e yafas rorad ni fan ni ngar ayuweged e girdi’ ko tirok Got ban’en ko ngiyal’ ni bay e togopuluw ara cham. Nap’an ni yad ma lekag e pi ulung, ma yad bod Paul faani yog ko pi Kristiano u Thessalonika ni gaar: “Nggu pired romed ni gamad mmunguy ni bod feni munguy ba matin ngak pi fak ni be ayuwegrad. Bochan e gimed ba t’uf romad ma gamad fal’eg rogomad ni gathi ke mus ni thin nib fel’ e nggu bad gu pied ngomed, machane ngkug pied gamad nga pa’med nggu ayuweged gimed. Ya ri gimed ba t’uf romad.”​—1 Thessalonika 2:7, 8.

6, 7. Uw rogon ni ma pi’ e piin ma lekag e ulung e athamgil nga laniyan’ yugu boch e girdi’ ni bochan e maruwel ni yad ma tay?

⁶ Bod rogon e piin piilal ko ulung ko Kristiano, ma piin ni ma lekag e ulung e yad ma athamgil ko “machib ni yad be tay nge thin rok Got ni yad be fil ngak e girdi’.” Piin piilal ni aram rogon e “bay rogorad ni nge bagayad min ta’ fan ni ke l’agruw yay.” (1 Timothy 5:17) Ra yib angin e kanawo’ ni yad ma tay nfaanra gad ra ‘tafinaynag rogon ni ur pired, ma gad folwok u rogon e michan’ rorad ni ur pired nib michan’rad ngak Got.’​—Hebrews 13:7.

⁷ Ma uw rogon ni ke ayuweg boch e piin ni ma lekag e ulung yugu boch e girdi’? Yoloy reb e Mich Rok Jehovah ni gaar: “Ba gel e athamgil ni pi’ Brother P​—HS-.3,— nga lanin’ug! Ya ir e en ni ma lekag e ulung u Mexico ka nap’an e duw ni 1960 iyib ngaray. Ma nap’an ni ku gub bitir, ma gu ma sonnag e ngiyal’ nra yib ma ri gub falfalan’ ngay. Nap’an ni ke ragag e duw rog ma ke gaar ngog, ‘Ku gur reb e ga ra mang reb e piilal ni ma lekag e ulung.’ Nap’an ni ba fel’ yangareg, ma ug sap ko cha’ nem ya gubin ngiyal’ ma bay e thin nib gonop nra yog ngog. N’en th’abi ga’ fan u wan’ e rogon ni nge ayuweg e yu ran’ i saf! Ma chiney e gag reb e piilal ni ma lekag e ulung ma gu ma athamgil ni nggu chaggad e piin fel’ yangarad mu gu pi’ e athamgil nga lanin’rad ngar mon’eged e tirok Got ban’en ni bod rogon ni ke rin’ e cha’ nem ngog. Mus ko ngiyal’ ni ke magawon e gumercha’ rok u tomren fapi duw ko yafas rok, machane gubin ngiyal’ ma ra athamgil Brother P—— ni nge yog e thin nra pi’ e athamgil nga lanin’uy. Reb e rran u m’on ni ke yim’ ko February 1995, me un ngog nggu warow ko special assembly day ma ke pi’ e athamgil nga laniyan’ reb e walag ni ir e architect. Chi ngiyal’ nem me pi’ e re walag nem e babyor ni be ognag ir ni nge un ko maruwel u Bethel.”

Yibe Tay Farad

8. Mini’ e piin ni yad e “taw’ath” ni bay ko Efesus guruy ni 4, ma uw rogon ni yad ma ayuweg e ulung?

⁸ Piin ni ma lekag e ulung nge piin piilal ni ke flaabnagrad Got ko maruwel ko pigpig e kan piningrad ni “yad e taw’ath.” Jesus e ir e ani mit e thin rok Jehovah ma ir Lolugen e ulung, ma ke pi’ e pi pumoon ney ni fan ni ngan ubingdad ma gad ilal ko tirok Got ban’en. (Efesus 4:8-15) Ran pi’ e taw’ath ma bay rogon ni ngan pining e magar riy. Ri aram rogon ko reb e taw’ath ni ma gelnagdad nguuda pigpiggad ku Jehovah. Ere uw rogon nrayog ni ngad daged ni gad ma tay fan e maruwel ni be tay e piin ni ma lekag e ulung? Uw rogon nrayog ni ngad daged ni gad ma ‘tay fan e pi pumoon ney’?​—Filippi 2:29.

9. Uw rogon nrayog ni ngad daged ni gad ma tay fan e piin ni ma lekag e ulung?

⁹ Nap’an ni kan announcenag e ngiyal’ nra yib e circuit overseer, ma ngad tafinaynaged ni ngad uned ko pi n’en ni yira rin’ ko ulung ko re wik nem. Fel’ ni ngad lemnaged ni ngad uned ko machib ko ngiyal’ nem. Faanra rayog ma gad un ko pioneer ni ayuw ko re pul nem. Ma dabi siy ni gad ba adag ni ngad folgad ko n’en ni yog e circuit overseer ni ngad rin’ed ngad mon’oggad ko machib ni gad be tay. Ya aram rogon ma ra yib angin ngodad ma ra felan’ e circuit overseer ya de m’ay fan e wub rok. Piin ni ma lekag e ulung e yad ma yib ni ngan ubingdad, machane ku er rogorad e ba t’uf ni ngan ubingrad ko tirok Got ban’en. Bay yu ngiyal’ ni ba t’uf ni ngan pi’ e athamgil nga laniyan’ Paul, ma ke ning ko pi Kristiano ni ngar yibilayed. (Acts 28:15; Roma 15:30-32; 2 Korinth 1:11; Kolose 4:2, 3; 1 Thessalonika 5:25) Ku arrogon e piin ni ma lekag e ulung ko ngiyal’ ney e ba t’uf rorad ni ngad yibilayed yad ma ngad pied e athamgil nga lanin’rad.

10. Uw rogon nrayog ni ngad ayuweged nge falfalan’ e en ni ma lekag e ulung ko fare maruwel?

¹⁰ Kad dogned ngak fare circuit overseer nge an leengin ni ri gad ba adag e ngiyal’ ni yow ma yib? Gad ma pining e magar ngak ko fonow ni ma pi’ ngodad? Gad ma yog ngak ni ke gel e falfalan’ rodad ko machib ni gad be tay ya kad folgad ko thin ni yog ni ngad rin’ed? Faan gad ra yodor ma ra falfalan’ ko maruwel ni be tay. (Hebrews 13:17) Reb e circuit overseer u Spain e yog ni yow an leengin e yow ma chaariy e babyor ni ma pi’ girdien e ulung ngorow ni be pining e magar ngorow. Begaar: “Gamow ma chaariy e pi babyor nem ma nap’an ni ke mulan’mow u ban’en ma gamow ma poy. Ma ri ma yib e athamgil nga lanin’mow.”

11. Mang fan ni nga daged ko piin leengin e circuit nge district overseers ni yad ba t’uf rodad ma gad tay farad?

¹¹ Ma ffel’ ni ngan pining e magar ku fa an leengin e en ni ma lekag e ulung. Ya ke pag fan ni nge ayuweg figirngin ko re maruwel ney. Piin ni ppin e yad ba adag ni nge yog reb e tabinaw ngorad nge bitir ma pi walag ney ni ppin e kar paged fan e pi n’em. Fare ppin ni fak Jefthah e ir reb e tapigpig rok Jehovah ni ke pag fan ir ya de un ko mabgol ma de diyennag e bitir ni bochan ban’en ni ke micheg e chitamangin ku Got. (Judges 11:30-39) Aram e maligach rok ma uw rogon u wan’ e girdi’? Judges 11:40 e begaar: “Ri aningeg e rran u reb e duw nge reb ni ma yan e pi ppin nu Israel ni ngar guyed fare ppin ni fak Jefthah ngar fingichiyed mi yad falfalan’ u taabang u rom.” Ere rib fel’ ni ngad athamgilgad nga dogned ko pi leengin e circuit nge district overseer ni yad ba t’uf rodad ma gad pining e magar ngorad!

“Dab Mpaged Talin ni Ngam Ayuweged e Milekag ni Kar Bad nga Tabinaw Romed”

12, 13. (a) Mang thin ko Bible ni be dag ni bay rogon ngak e piin ni ma lekag e ulung nge pi leengiyrad ni ngan ayuwegrad min piningrad nga tabinaw rodad? (b) Mu weliy ko uw rogon ni ra yib angin ngak e milekag nge ngak e piin ni ma piningrad nga tabinaw rorad.

¹² Rayog ni ngad daged ni gad ma t’ufegrad ma gad ma tay fan e piin ni ma lekag e ulung nfaanra gad ra piningrad nga tabinaw rodad. (Hebrews 13:2) I pining apostal John e sorok ngak Gayus ya ke ayuweg e pi missionary ni ma lekag e ulung. Yoloy John ni gaar: “Fager rog ni gab t’uf rog, ri gab yul’yul’ ko maruwel ni ga be rin’ ni fan ngak e piin ni walagdow ni girdien Kristus, ni mus ngak e piin nda mu nang owcherad. Kar weliyed rogon farad t’uf rom ngak girdien e galesiya nu roy. Wenig ngom, mu ayuwegrad nge yog nranod ko milekag rorad nrogon nib m’agan’ Got ngay. Ya ra milekaggad ni yad be maruweliy e maruwel rok Kristus ndar paged e piin nde mich Kristus u wan’rad ni ngar ayuweged yad. Ere gadad e piin ni girdien Kristus e thingarda ayuweged e pi gird’ nem, ni aram e kad uned ko maruwel ni yad be ngongliy ni fan ko tin riyul’.” (3 John 5-8) Ngiyal’ ney ma rayog ni ngad mon’ognaged e machib ko Gil’ilungun Got nfaanra gad ra ayuweg e piin ni ma lekag e ulung nge piin leengiyrad. Ma rriyul’ ni piin piilal ko ulung e ngar guyed rogon nge fel’ rogon e gin ni nge par e milekag riy machane yog reb e district overseer ni gaar: “Rogon e ngongol romad ko pi walag e gathi nge fel’ boch ko piin yad ma rin’ ban’en ngomad. Dubmad ni ngan lemnag ni aram rogon. Thingari fel’ u wan’mad e ayuw ni ma pi’ e pi walag ndemtrug ko miti mang, ma demtrug ko ba fel’ rogorad fa yad ba gafgow.”

¹³ Ra ngan pining e girdi’ nga tabinaw rodad ma ra yib angin ngorad nge ngodad. Jorge e ir e circuit overseer kafaram ma be maruwel u Bethel e chiney e begaar: “Ba yalen ko tabinaw romad ni ngan pining e piin ni ma lekag e ulung ngar pared romad. Ma ke yib angin ngog ko re n’em. Ya nap’an ni kab fel’ yangareg ma gub magawon ko tirok Got ban’en. Ma ke maga’fan’ e nina rog machane de nang ko uw rogon ni nge ayuwegneg ere ke ning ko fare circuit overseer ni nge non ngog. Som’on ma kug siyeg e cha’ nem ya dabug ni ngan tamilangnag thibngig. Machane kari gol ngog me ere ke puf e thin u thilmow. Ke piningeg nggu warow nga bang ko abich reb e Monday ma aram mu gu weliy e thin nib puf rogon ngak ya gu manang ni ke nang fan. Ke motoyil ngog. Ma kug fol ko n’en ni yog ma ke yib angin ngog, ma kug mon’og iyan ko tirok Got ban’en.”

14. Mang fan ni susun ni ngad pininged e magar ku piin ni ma lekag e ulung ma dabda thibthibnaged yad?

¹⁴ Be’ ni ma lekag e ulung e ma guy rogon ni nge ayuweg e piin fel’ yangaren nge piin nib ilal ni ngar mon’oggad ko tirok Got ban’en ntaareb rogon. Ere susun ni ngad daged ni gad ma tay fan e athamgil ni be tay. Machane faanra gad ra ku’nag ma gad sap ko tin ni ke meewar riy fa faanra gad ra taarebnag ko yugu boch e girdi’ ni kar lekaged e ulung faram, ma ra uw rogon? Dabi siy ni ra k’aring e kireban’ riy. De falfalan’ Paul ni nge rung’ag ni yibe thibthibnag. Boch e Kristiano nu Korinth e ur thibthibnaged u morngaagen yaan nge rogon ni ma welthin. Ke weliy e n’en ni un nog u morngaagen ni gaar: “Bay gaar be’, ‘Thin rok Paul u babyor e rib gel, machane ngiyal’ ni ba’ rodad e mmeewar ma thin rok e dariy rogon!” (2 Korinth 10:10) Machane bay e falfalan’ riy ya baga’ ni ma rung’ag e piin ni ma lekag e ulung e thin nib manigil ni ma yibnag e falfalan’ ngorad.

15, 16. Uw rogon u wan’ e piin ni ma lekag e ulung nge pi leengiyrad e pi walag ni ma dag e t’ufeg nge passig?

¹⁵ Reb e circuit overseer u Latin America e ma yan u but’ u polo’ reb e rran u daken e kanawo’ nib tabarbar ni fan ni nge guy e pi walag ni pumoon nge ppin ni be par u bang ni bay e guerrilla riy. Ke yoloy ni gaar: “Rib fel’ ni ngan guy e pi walag ni yad ma tay fan e wub ko piin ni ma lekag e ulung. Yugu aram rogon fene gel e athamgil ni gu ma tay ni nggu taw ngaram ni bay e riya’ nge gafgow riy, machane pi n’em e dariy fan ya ke yib angin ni bochan e t’ufeg nge passig ni ma dag e pi walag.”

¹⁶ Ma reb e circuit overseer u Africa e ke yol ni gaar: “Bochan e t’ufeg ni ke dag e pi walag ngomow, ma ka ri gu adagew e re binaw nem nu Tanzania! Pi walag e ri yad ba adag ni ngar folwokgad romow, ma ur falfalan’gad ni ngar pininged gamow nga tabinaw rorad.” Nap’an e bin som’on e chibog ma ku immoy e t’ufeg nge falfalan’ u thilin apostal Paul nge fa wu’ i mabgol ni Kristiano ni Aquila nge Priska. Me yog Paul u morngaagrow ni gaar: “Nge felan’ Got ngak Priska nge Aquila ni yow e ur unew ngog nguug pigpiggad ngak Kristus Jesus, nra pagew fan e pogofan rorow ni bochag. Kar magargow ni gathi ke mus ni gag e gu be pining e magar ngorow, ya ku er rogon urngin e galesiya rok e piin ni gathi yad piyu Israel.” (Roma 16:3, 4) Piin ni ma lekag e ulung nge piin leengirad e yad ma pining e magar ya bay boch e girdi’ ko ngiyal’ ney ni bod Aquila nge Priska ni yad ma pag farad ni ngar ayuweged yad ngar pininged yad nga tabinaw rorad ngar chaggad boch.

Ngan Gelnag e Pi Ulung

17. Mang fan nrayog ni ngan nog ni ba gonop fare yaram ko piin ni ma lekag e ulung, ma uw e yad ma fil e fonow riy?

¹⁷ Gaar Jesus: “Gonop rok Got e ke m’ug nib riyul’ ko tin kan guy ni ke yib riy.” (Matthew 11:19) Fare yaram ni ngan pi’ boch e girdi’ ngar lekaged e ulung e bay e gonop riy ya ma gelnag e pi ulung ko girdi’ rok Got. Nap’an e bin l’agruw yay ni un Paul ko milekag ko missionary ma yow Silas “mi yow yan u lan yu Syria ngu Cilicia, ni be pi’ Paul e athamgil nga laniyan’ girdien e pi galesiya ni ba’ riy.” Fare babyor ko Acts e begaar: “Ma nap’an nranod u lan fapi binaw mi yad weliy ngak e piin ni ke mich Jesus u wan’rad fapi motochiyel ni ke turguy e pi apostal nge piin ni piilal ko galesiya u Jerusalem, mi yad yog ngorad ni nguur folgad ko pi motochiyel nem. Ma aram mi i gel i yan e michan’ rok girdien e galesiya ma yad be yoor i yan ni gubin e rran.” (Acts 15:40, 41; 16:4, 5) Piin ni ma lekag e ulung ko ngiyal’ ney e yad ma fil e fonow u daken e thin ko Bible ngu daken e pi babyor ni fl’eg fare “tapigpig nib yul’yul’ mab gonop,” maku aram rogon urngin e tin ni ka bay e Kristiano.​—Matthew 24:45.

18. Uw rogon ni ma gelnag e piin ni ma lekag e ulung e pi ulung?

¹⁸ Arrogon, piin ni ma lekag e ulung e thingara kayed e ggan ko tebel rok Jehovah nib spiritual u gubin ngiyal’. Ya thingara nanged fan e yaram mar folwokgad ko fonow ko ulung rok Got. Ma aram e bod ni yad e taw’ath ko yugu boch e girdi’. Rayog ni ngar ayuweged e girdi’ ngar mon’oggad ko machib ko Kristiano nfaanra yad ra passig ko machib. Ma pi welthin ni yad ma pi’ e ma weliy e thin ko Bible ni ma ubing e piin ni ma motoyil ngay. Piin ni ma lekag e ulung e yad ma gelnag e pi ulung ya yad ma ayuweg e girdi’ ngar folgad ko fonow ni bay ko Thin Rok Got, ma yad ma un ko maruwel u taabang ko girdi’ rok Jehovah u gangin e fayleng, ma yad ma fanay e pi n’en ni ma fl’eg Got u daken fare ‘tapigpig nib yul’yul’.

19. Mang boch e deer ni ran weliy?

¹⁹ Raay e duw faram ma ulung rok Jehovah e ke tababnag fare maruwel ko piin ni ma lekag e ulung ko pi Bible Student ma kan weliy u lan e re ke babyor ney ni gaar: “Gad ra guy ko ra yib angin riy ma gad ra sap ku Somol ni ngki pow’iydad ko re n’ey.” Ma kari tamilang ni ke flaabnag Jehovah e re yaram ney. Ya bochan ni ke flaabnag e yad bay u tan pa’ fare Governing Body, ma aram ma be ga’ iyan e re maruwel ney u lan in e duw. Ma wenegan ni yib riy e pi ulung ko Pi Mich Rok Jehovah u gangin e fayleng e yibe gelnag e michan’ rorad ma yad be yoor iyan ni gubin e rran. Ba gagiyel ni be flaabnag Jehovah e pi pumoon ney ni yad e taw’ath ma yad ma pag farad. Machane uw rogon nrayog ko piin ni ma lekag e ulung ni ngar rin’ed e maruwel rorad ma ra yib angin riy? Ma mang e yad ma nameg? Ma uw rogon nrayog ni ngar pied e bin th’abi fel’ e ayuw nrayog rorad?

Uw Rogon ni Ngam Fulweg?

◻ Mang boch ban’en nib mil fan ngak e circuit nge district overseers?

◻ Mang fan nib t’uf ko piin ni ma lekag e ulung ni ngar paged farad?

◻ Uw rogon nrayog ni ngan pining e magar ngak e piin ni ma lekag e ulung nge pi leengiyrad?

◻ Mang e rayog ni nge rin’ e piin ni ma lekag e ulung ni ngar gelnaged e michan’ ko girdien e pi ulung?

[Sasing ko page 21]

Ba t’uf ni ngan pag fan ya ngan milekag u gubin ngiyal’

[Sasing ko page 24]

Kam pining e piin ni ma lekag e ulung nge pi leengiyrad nga tabinaw rom?