Rogon Ni Ma Maruwel E Piin Ni Ma Lekag E Ulung Ni Yad E Pi Tapigpig Nib Yul’yul’

“Ra be’ ma taw’ath rok ni ke pi’ Got ngak ni nge gagiyegnag e thingari maruwel ngay ni ir e tapigpig nib fel’ nge yib fan ngak boch e girdi’.”​—1 PETER 4:10.

1, 2. (a) Mang fan fare thin ni “tapigpig”? (b) Mini’ e yad e tapigpig rok Got?

MA fanay Jehovah urngin e pi Kristiano nib yul’yul’ ni ngar manged e pi tapigpig rok. Yima dugliy e tapigpig ni nge tay morngaagen e tabinaw. Maku ma tay morngaagen e business ko masta rok. (Luke 16:1-3; Galatia 4:1, 2) I pining Jesus e piin ni kan dugliyrad u fayleng ni yad “fare tapigpig nib yul’yul’.” Ke tay nib mil fan ngak e re tapigpig ney “urngin e tirok ban’en,” nib muun ngay e pi n’en nib l’ag ko machib ko Gil’ilungun Got.​—Luke 12:42-44; Matthew 24:14, 45.

² Yog apostal Peter ni urngin e Kristiano e yad e tapigpig rok Got ere mil fan ngorad ni ngar daged e runguy rok Got u boch e kanawo’. Ra reb e Kristiano e bay tagil’ ni nge par riy nib yul’yul’ ngay. (1 Peter 4:10) Pi Kristiano ni kan dugliyrad ni yad e piilal ko ulung nge ku piin ni ma lekag e ulung e yad e pi tapigpig. (Titus 1:7) Ere susun uw rogon u wan’uy e piin piilal ni ma lekag e ulung? Mang boch felngirad ma mang e susun ni ngar nameged? Ma uw rogon nrayog ni ngar rin’ed e tin th’abi fel’ ban’en?

Yibe Pining e Magar ko Pigpig ni Yad ma Tay

3. Mang fan ni yima pining ko piin ni ma lekag e ulung ni yad e “pi tapigpig nib ffel’”?

³ Ba wu’ i mabgol ni Kristiano e ur yoloyew e babyor ngak reb e piilal ni ma lekag e ulung nge leengin ni gaar: “Gamow be pining e magar ngomew ya kam tiyan’mew ngomad ma kam dagew e t’ufeg ngomad. Ke yib angin nga tabinaw romad ya kam pi’ew e athamgil nga lanin’mad. Ma goo gamad manang ni thingar gu mon’oggad iyan ko tirok Got ban’en, ma ke mom ni ngan rin’ ni bochan e ayuw rok Jehovah nge ayuw ni ma pi’ boch e walag ni pumoon nge ppin ni bod gimew.” Aram rogon ni ma yog boor e girdi’ ya piin ni ma lekag e ulung e yad ma tiyan’rad ko pi walag, ni bod rogon e tapigpig ni ma ayuweg e tin nib t’uf ko tabinaw. Boch iyad e rib cheg ko welthin. Ma yugu boch e rib salap ko machib, ma boch i yad e ba lingagil ni bochan ni ri yad ba gol ma yad ma runguy e girdi’. Piin ni ma lekag e ulung e ma maruweliy e pi felngin ney ni taw’ath rorad ni fan ngak boch e girdi’ me ere bay rogorad ni ngan nograd ni yad e “pi tapigpig nib fel’.”

4. Mang deer e gad ra weliy?

⁴ Yoloy apostal Paul ni: “Re n’en ni ir e th’abi ga’ fan ni nge rin’ e cha’ ni ir e mmil fan e pi n’ey ngak e nge par nib yul’yul’ ngak e masta rok.” (1 Korinth 4:2) Ngan pigpig ngak e pi Kristiano u reb e ulung nge reb ngu reb e wik nge reb e aram ba maruwel nib lingagil ma bay e falfalan’ riy. Ma ku aram ban’en nib tomal. Ere uw rogon nrayog ko piin ni ma lekag e ulung ni ngar rin’ed e maruwel rorad u fithik’ e yul’yul’ ma ra fel’ rogon riy?

Rogon ni Ngar Rin’ed e N’en nib Mil Fan Ngorad Ma Bay Angin Riy

5, 6. Mang fan ni ri baga’ fan ko en ni ma lekag e ulung ni nge taga’ nga daken Jehovah u fithik’ e meybil?

⁵ Ra nge yib angin e maruwel ni be tay e piin ni ma lekag e ulung ma thingara taga’gad nga daken Jehovah u fithik’ e meybil. Boor ban’en nib mil fan ngorad, me ere yu ngiyal’ ma ma tomal lanin’rad. (Mu taarebnag ko 2 Korinth 5:4.) Ere ba t’uf ni ngar folgad ko n’en ni yin’ David ko tang ni gaar: “Mon’ e tin be tomal rom nga daken Jehovah, ya ir e ra baudegem. Dabi pag e en nib mat’aw nge yoyowol.” (Psalm 55:22) Kub fel’ e pi thin rok David ney ni gaar: “Ngan n’uf Jehovah, ya gubin e rran ma be un i fek gilbadad.”​—Psalm 68:19.

⁶ Uw e yib gelngin Paul riy ni nge yog ni nge rin’ e tin nib mil fan ngak ko tirok Got ban’en? Ke yoloy ni gaar: “Demtrug e mit i n’en ni gu ra mada’nag ma ba’ gelngig ni ke pi’ Kristus nrayog ni gu par riy.” (Filippi 4:13) Arrogon, Jehovah Got e ir Tapgin gelngin Paul. Ku aram rogon ni yog Peter ni gaar: “Cha’ ni be pigpig e thingari pigpig u gelngin ni ke pi’ Got ngak, ni fan e urngin ban’en ni be rin’ ma nga nog e sorok ngak Got riy u daken Jesus Kristus.” (1 Peter 4:11) Reb e walag ni ke lekag e ulung u lan in e duw e ke ga’nag fan ni ngan taga’ nga daken Got me gaar: “Gubin ngiyal’ ma ngam sap ku Jehovah ni nge pithig e magawon, ma ga sap ko ulung rok ni nge pow’iyem.”

7. Uw rogon ni nge thabthabel e maruwel ko piin ni ma lekag e ulung?

⁷ En ni ma lekag e ulung e ba t’uf ni nge par nib thabthabel. Bod rogon yugu boch e Kristiano ni ma guy rogon ni nge “mel’eg e tin ni ir e ba th’abi ga’ fan.” (Filippi 1:10)a Nap’an ni bay e deer ko piin piilal u morngaagen ban’en, ma bay e gonop riy ni ngar ninged e ayuw ko circuit overseer. (Proverbs 11:14; 15:22) Ma dabi siy ni ra weliy e thin nib thabthabel ma bay ko Bible ma aram e ra ayuweg e piin piilal ni ngar pithiged fare magawon nib fel’ rogon nge ni mus u tomren ni ke yan. Aram rogon ni yog Paul ku Timothy ni gaar: “Mfek fapi thin ni mu rung’ag ni gu machibnag u p’eowchen e girdi’ ni yoor ni yad e mich riy, ngam pi’ ngak e piin ni pumoon ni ke pagan’um ngorad, ni piin ni pumoon ni ku rayog ni ngar machibnaged boch e girdi’.”​—2 Timothy 2:2.

8. Mang fan ni baga’ fan ni nga un fil e Bible, min fl’eg i gay boch ban’en riy, min fl’eg i lemnag?

⁸ N’en ni ba t’uf min pi’ e fonow nib puluw ngay e ngan fil e Bible, ma ngan fl’eg i gayiy ban’en, ma ngan fl’eg i lemnag. (Proverbs 15:28) Gaar reb e district overseer: “Nap’an ni ug puruynaged e piin piilal ban’en, ma susun dab gu tinna’gad ni nggogned ngorad ni dagu nanged e fulweg u reb e deer.” Ran athamgil nge yog “laniyan’ Kristus” ni ngan pithig e magawon, ma aram e rayog ni ngan pi’ e fonow ni bay ko Bible ni ra ayuweg e yugu girdi’ ngar rin’ed e tin nib m’agan’ Got ngay. (1 Korinth 2:16) Yu ngiyal’ ma ba t’uf ko en ni be lekag e ulung ni nge yoloy e babyor ngak fare Watch Tower Society ni ngar pow’iyed yad. Ma yug demtrug ma michan’ ku Jehovah nge t’ufeg ko tin riyul’ e kab baga’ fan ko n’en nra susunnag e girdi’ morngaagem nge rogon fanam cheg. De machib Paul u Korinth ni be machib “u fithik’ e fel’ nifingin l’ungun ni ma yib ko gonop ko girdi’” ya ke yib ngorad nib “meewar ma be da’da’ nreb ko marus.” Aram e dariy angin ni yib riy fa? Danga’ ya kan ayuweg piyu Korinth ni michan’ rorad e “gathi kar ted nga daken e gonop rok e girdi’, ya daken gelngin Got.”​—1 Korinth 2:1-5.

Yugu Boch Felngin nib Baga’ Fan

9. Mang fan ni ba t’uf ko piin ni ma lekag e ulung ni ngar athamgilgad ni ngar nanged fan salpen e yugu girdi’?

⁹ Ra yib angin e maruwel ni ma tay e piin ma lekag e ulung nfaanra yad ra nang fan e yug girdi’. Yog Peter ko urngin e Kristiano ni nge ‘taareb rogon e lem rorad,’ ara ngar daged e “runguy” ngak e girdi’. (1 Peter 3:8, footnote) Yog reb e circuit overseer ni baga’ fan ni ngan ‘lemnag urngin e girdi’ u lan e ulung ma ngan tiyan’uy ngorad.’ Ku arrogon ni yog Paul ni gaar: “Mu uned ko falfalan’ ngak e piin ni kar falfalan’gad, mi gimed un ko meyor ngak e piin ni yad be yor.” (Roma 12:15) Faanra aram rogon e piin ni ma lekag e ulung ma yad ra athamgil ni ngar nanged fan e pi magawon nge rarogon e pi walag. Ma aram ma rayog ni ngar pied e fonow ni ra ubingrad ma bay ko Bible ma ra yib angin ngorad nfaanra yad ra fol riy. Reb e circuit overseer e ri ma runguy e girdi’ me ere ke yoloy e ulung nu Turin, Italy e babyor ngak ni begaar: “Faanra ga ba adag ni ngan tiyan’uy ngom, ma ga tiyan’um ngak e yugu girdi’; ma faanra ga ba adag ni ngam felan’nag e girdi’ ma ga par nib falfalan’; ma faanra ga ba adag ni nga un t’ufegnem, ma ngam dag e t’ufeg ko ngongol rom; faanra ga ba adag ni ngan ayuwegnem, ma ga tay talpem ni ngam pi’ e ayuw ko yugu girdi’. Ereram e n’en ni kug filed rom!”

10. Mang e yog boch e circuit nge district overseer u morngaagen e sobut’an’uy ma mang kanawo’ ni ke tay Jesus ni ngan fol riy?

¹⁰ Sobutan’ nge sumunguy e ra ayuweg e piin ni ma lekag e ulung nge fel’ rogon e tin ni yad be rin’. Gaar reb e circuit overseer: “Rib baga’ fan ni ngan par nib sobutan’uy.” Ma ra yog ko piin ka fin ra manged e piin ma lekag e ulung ni gaar: “Dab mpaged e pi walag nib fel’ rogorad ngar suweyed lanin’med ni bochan e tin ni yad ma rin’ ngomed, ara ngam chaggad ngak boch e walag, ya ngam athamgilgad nga um ngongolgad ni taareb rogon ngak e yugu girdi’ ma dab um laniyan’gad.” (2 Kronicles 19:6, 7) En ni ma lekag e ulung ni riyul’ nib sobut’an’ e dabi lemnag nib sorok ma baga’ fan ni bochan ni ir owchen fare Society. Yog reb e district overseer ni gaar: “Mu par nib sobut’an’um ma ga motoyil ko pi walag. Ma ngam par ni gubin ngiyal’ ma ra yog ni yira chuchugur ngom ni dabn rus.” Jesus Kristus e ir e en th’abi ga’ ni immoy u fayleng, ma bay rogon ni nge rus e girdi’ ngak, machane bochan ni rib sobut’an’ mab sumunguy ma mus ko piin bitir mar adaged ni ngar chaggad ngak. (Matthew 18:5; Mark 10:13-16) Piin ni ma lekag e ulung e yad ba adag ni nge urngin e girdi’ u lan e ulung ni​—piin bitir nge fel’ yangaren, nge piin pillibthir​—ni ngar bad ngorad nib pagan’rad.

11. Ra ngan siro’ ko ngiyal’ nib t’uf riy ma mang angin nra yib riy?

¹¹ Machane “gadad gubin ni baga’ ni gadad ma oloboch,” ma dariy reb e piilal ni ma lekag e ulung ni der oloboch. (James 3:2) Nap’an ni yad ra oloboch ma yad ma wenig ma aram rogon ni kar daged ko piin piilal kanawoen e sobut’an’. Proverbs 22:4 e begaar: “Angin e sobut’an’ nge madgun Jehovah nge liyor ngak e aram e flaab nge yafas.” Ma gathi urngin e pi tapigpig rok Got mab t’uf ni nge ‘sobut’an’ nga ur ranod e Got rodad u taabang’? (Mikah 6:8, 1960 Edition) Kan fith ku reb e circuit overseer ko mang e fonow ni ma pi’ ngak be’ ni ka fini mang be’ ni ma lekag e ulung me gaar: “Mu tay fan urngin e pi walag, ma ga lemnag ni yad ba tolang ngom. Ma ra yoor ban’en ni ga ra fil ko pi walag. Mu par nib sobut’an’um. Dab kum ngongol ni yugu ba reb rogon. Dab mu uf.”​—Filippi 2:3.

12. Mang fan ni baga’ fan ni nga un passig ko machib ko Kristiano?

¹² Ra pasig e en ni ma lekag e ulung ko maruwel ko Kristiano ma aram e ra yib fan e thin rok. Ra passig e en ni ma lekag e ulung nge an leengin ko machib, ma aram e ra pi’ e athamgil nga laniyan’ e piin piilal nge piin leengirad nge girdi’ ko ulung ngar passiggad ko machib. Begaar reb e circuit overseer: “Mu pasig ko machib.” Miki gaar: “Kug pirieg ni rogon fene pasig e ulung ko machib ma aram me buch uw e magawon ko re ulung nem.” Ma yugu reb e circuit overseer e ke gaar: “Ke mich u wan’ug ni faanra ra un e piin piilal ngak e pi walag ni pumoon nge ppin ko machib mar ayuweged yad ngar falfalan’gad ko machib, ma wenegan ni ma yib riy e ra gapas lanin’uy ma ra felan’uy ko pigpig ku Jehovah.” Ke athamgil apostal Paul ‘ni nge weliy fare thin nib fel’ ngak piyu Thessalonika ni yugu ereram gelngin e togopuluw ni yibe tay ngak.’ Ar fan ni ke magay u lanin’rad e ngiyal’ ni ke yib ko machib ngaram ma kar adaged ni ngki sul biyay ngorad!​—1 Thessalonika 2:1, 2; 3:6.

13. Mang e thingari lemnag e en ni ma lekag e ulung u nap’an ni be un ko pi walag ni Kristiano ko machib?

¹³ Nap’an ni be maruwel e en ni ma lekag e ulung u taabang ko pi Kristiano ko machib ma thingari lemnag rarogorad nge salap rorad. Ma pi’ e fonow nib fel’ machane manang ni sana ke rus boch e girdi’ u nap’an ni yad ma un ko machib ni yow reb e piilal nib cheg. Ere kab fel’ ni nge pi’ e athamgil nga lanin’uy ko bin ni nge fonownagey. Ma boch e publisher nge pioneer e yad ba adag ni ir e nge conductnag e study u nap’an ni nge un ngorad ko Bible study. Aram rogon ma rayog ni ngar filed boch ban’en mar mon’oggad i fil e Bible ngak e girdi’.

14. Mang fan nrayog ni ngan nog ni piin ni ma lekag e ulung u fithik’ e passig e yad ma k’aring yugu boch e girdi’ ngar passiggad?

¹⁴ Piin ni ma lekag e ulung ni yad ba passig e yad ma k’aring yugu boch e girdi’ ngar passiggad. Bay reb e circuit overseer u Uganda ni ke yan u but’ u lan e loway ni reb e awa ni fan ni nge un ngak reb e walag nga ranow ngar filew e Bible ngak be’ ni ke mus ni boch uw e mon’og ni be tay. Ma nap’an ni yow be yan u kanawo’ me aw bangi n’uw nib ga’ mar tawgow ni kar monurgow. Ma nap’an ni kan nog ngak girdien fare tabinaw ni yad nel’ u gubin ni cha’ nem e reb e piilal ni ma lekag e ulung, ma kar gingad ngay. Ya goo yad manang ni pi tamachib ko galesiya rorad e darur lemnaged girdien e ulung rorad ni aram rogon. Ere bin migid e Madenom mar uned ko muulung ko yay nsom’on mar rogned ni yad ba adag ni ngar manged e Pi Mich Rok Jehovah.

15. Mang e rin’ reb e circuit overseer u Mexico?

¹⁵ Reb e circuit overseer u Oaxaca, ni reb e binaw u Mexico e ke athamgiliy ban’en ni da i lemnag ni ra buch. Ke par u kalbus aningeg e nep’ ni fan ni nge par ko medlip e pumoon ni yad e publisher ko Gil’ilungun Got. U lan in e rran me un ngorad mar machibnaged e girdi’ u rom mar filed e Bible ngorad. Ma boch e girdi’ e ri yad ba adag e machib me ere ur machibgad nge n’uw e nep’. Ke yoloy e re circuit overseer nib passig ney ni gaar: “U tomren e ngiyal’ ni kug pared ma kari falfalan’ e girdi’ u kalbus ma kari gu falfalan’ ya ra bagamad e ke pi’ e athamgil nga laniyan’ bagamad.

16. Mang fan ni ma yib angin riy ni nge pi’ e piin ni ma lekag e ulung nge pi leengiyrad e athamgil nga laniyan’ yugu boch e girdi’?

¹⁶ Piin ni ma lekag e ulung e yad ma guy rogon ni ngar pied e athamgil nga lanin’uy. Nap’an ni yan Paul nga Macedonia nge guy e pi ulung u rom me ‘pi’ e athamgil nga laniyan’ e girdi’ ni aram e boor e thin ni be weliy ngorad.’ (Acts 20:1, 2) Pi thin ni ma pi’ e athamgil nga lanin’uy e rayog ni nge ayuweg e piin fel’ yangaren nge piin nib ilal ni ngar nameged e tin nib spiritual ban’en. Kan deeriy e piin ni ma maruwel u reb e ofis nib ga’ ko Watch Tower Society, me tamilangnag ni 20 percent iyad e kar uned ko maruwel nib fulltime ni bochan ni ke pi’ e circuit overseer e athamgil nga lanin’rad. Maku piin leengin e piin ni ma lekag e ulung e ma dag rogon e maruwel nib fulltime ma aram rogon ni ma pi’ e athamgil nga lanin’uy.

17. Uw rogon u wan’ reb e circuit overseer e ayuw ni ma pi’ ko yugu girdi’?

¹⁷ Piin pillibthir nge piin ni ke mulan’rad e ba t’uf ni ngan pi’ e athamgil nga lanin’rad. Yoloy reb e circuit overseer ni ke pillibthir ni gaar: “N’en ni ri gu ba adag ko maruwel rog e rayog ni nggu ayuweg e girdi’ rok Got ni piin nib meewar ko tirok Got ban’en nge piin ke meewar fithik’ i dowrad. Pi thin ko Roma 1:11, 12 e baga’ fan ngog ya ri’ ma pi’ e athamgil nga lanin’ug u nap’an ni ‘gu ma pi’ e thin rok Got ngak e piin ni aram rogon nge gelnagrad.’”

Flaab ni ma Yib ko Maruwel ni Yad ma Tay u Fithik’ e Falfalan’

18. Mang e thingari nameg e piin ni ma lekag e ulung nib puluw ko Bible?

¹⁸ Piin ni ma lekag e ulung e ri yad ba adag ni ngar ayuweged e girdi’. Yad ba adag ni ngar gelnaged e pi ulung min gelnagrad ko tirok Got ban’en. (Acts 15:41) Reb e piin ni ma lekag e ulung e ma maruwel nib elmirin ni nge “pi’ e athamgil nga lanin’uy, ma ma pi’ e gapas nga lanin’uy, ma ma k’aring e girdi’ ngar adaged ni ngar uned ko machib mar pared ni yad be fol riy.” (3 John 3) Ma yugu reb e ma guy rogon ni nge ayuweg e pi walag ngar pared nib mudugil e michan’ rorad. (Kolose 2:6, 7) Fa en ni ma lekag e ulung e ku ir e “cha’ ni gadad ma ayuwegdad ko re gaf i maruwel ney,” ma gathi ir e nge suwey e michan ko yugu boch e girdi’. (Filippi 4:3; 2 Korinth 1:24) Wub rok e aram ba ngiyal’ ni ngan pi’ e athamgil nga lanin’uy min un ko boch ban’en, maku aram e ngiyal’ nra lemnag e piin piilal ko uw rogon e mon’og ni kan tay nge mang e ngar nameged ko ngiyal’ nga m’on. Thin rok nge ngongol rok e ra ubing e piin ni publisher, nge pi pioneer, nge pi ministerial servant, nge piin piilal mar passiggad ko maruwel nga m’on. (Mu taarebnag ko 1 Thessalonika 5:11.) Ere mu tay tanggin e wub ko fare circuit overseer ma ga fil ban’en ko pigpig ni ma tay e district overseer.

19, 20. Uw rogon ni kan taw’athnag e piin ni ma lekag e ulung nge pi leengirad ni bochan e pigpig ni ur ted u lan in e duw?

¹⁹ Piin ni ma lekag e ulung nge piin leengiyrad e yad ba flaab ko taw’ath ko pigpig nib yul’yul’ ni yad ma tay, ma rayog ni nge mich u wan’rad ni ra flaabnagrad Jehovah ko tin nib fel’ ni yad ma rin’. (Proverbs 19:17; Efesus 6:8) Georg nge Magdalena e yow ba wu’ i mabgol ni kar pillibthirgow ma ke yoor e duw ni kar unew ko maruwel ni ma lekag e ulung. U reb e convention u Luxembourg, me yib i m’ug be’ ngak Magdalena ni ir be’ ni kar machibgow 20 e duw faram. Pi babyor ko Bible ni pi’ Magdalena ngak e ke pug e tafinay rok e re ppin ney ni be’ nu Jew, me munmun me un ko taufe. Ma reb e walag ni ppin e ke yib ngak Georg me weliy ngak u morngaagen e ngiyal’ ni ke yib nga tafen ni ke 40 e duw faram. Bochan ni ke weliy e thin nib fel’ u fithik’ e passig ma aram me ir nge pumoon rok e kar unew ko tin riyul’. Dariy e maruwar riy ni kari falfalan’ Georg nge Magdalena.

²⁰ Ke falfalan’ Paul ya ke yib angin e machib ni ke tay u Efesus ma kan k’aring ni nge yog fa pi thin rok Jesus ni gaar: “Ba gel e falfalan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Piin ni ma lekag e ulung e gubin ngiyal’ ma yad be pi’ ban’en, me ere yad ba falfalan’, ma baga’ ni aram rogon ko ngiyal’ ni kar nanged ni ke yib angin e maruwel ni ur ted. Bay reb e circuit overseer ni ke ayuweg reb e piilal ni ke mulan’ ma aram me yoloy e babyor ngak ni begaar: “Kam pi’ ‘gelngig’ ko tirok Got ban’en​—ni dam mu nang ko uw fene gel. . . . Dabiyog ni ngam nang ko uw fene gel e ayuw ni kam pi’ ngog e ngiyal’ nem ni kug bod Asaph ni ‘ke chugur ni nge dol’.’”​—Kolose 4:11; Psalm 73:2.

21. Uw rogon ni bpuluw e thin ko 1 Korinth 15:58 ko maruwel ko piin ni ma lekag e ulung?

²¹ Bay reb e Kristiano ni ke pillibthir ma ke lekag e ulung u lan in e duw ma ba adag e pi thin ni bay ko 1 Korinth 15:58, ni be yog Paul riy ni gaar: “Um pired ni gimed mmudugil. Gubin ngiyal’ ma nguum muruwliyed e maruwel romed ni fan ngak Somol, ya gimed manang ni pigpig ni gimed be tay ngak Somol e gathi ra yan i aw nib m’ay fan.” Boor e maruwel ni ma tay e piin ni ma lekag e ulung ni fan ngak Somol. Ma gad ma pining e magar ngorad ya yad ma pigpig u fithik’ e falfalan’ ma yad ba yul’yul’ u rogon ni yad ma dag e gol nge runguy ni bod rogon Jehovah!

[Boch e Thin nra Tamilangnag Murung’agen]

Uw Rogon ni Ga Ra Fulweg?

◻ Mang fan ni piin ni ma lekag e ulung e yad e “pi tapigpig nib ffel’”?

◻ Mang boch ban’en ni ma ayuweg e pi circuit nge district overseer nge yib angin e maruwel ni yad ma tay?

◻ Mang fan ni baga’ fan ko piin ni ma lekag e ulung ni ngar pared nib sobut’an’rad mi yad passig ko machib?

◻ Mang boch ban’en ni ma nameg e piin ni ma lekag e ulung?

[Sasing ko page 27]

Piin ni ma lekag e ulung e ma guy rogon ni ngar pied e athamgil nga laniyan’ e pi walag

[Sasing ko page 28]

Piin ni fel’ yangaren nge piin ni pillibthir e rayog ni nge yib angin ngorad mi yad chag ko piin ni ma lekag e ulung nge pi leengiyrad

[Sasing ko page 29]

Rogon fene passig e piin ni ma lekag e ulung e ma k’aring yugu girdi’ ngar passiggad