I Pining Paul e “Magar ngak Got ni Bochrad” ma Aram me Yib e Athamgil Nga Laniyan’

Nap’an ni rung’ag e ulung nu Roma ni bayi yan Paul ngaram, ma boch e walag ni pumoon e ranod ni sogonap’an 40 e mayel (64 km) ni ngar mada’gad Paul. Ere bochan nra paged farad ngar daged e t’ufeg ngak Paul, ma gur, uw rogon ni yib angin ngak? “Faani guyrad Paul, me pining e magar ngak Got ni bochrad, ma aram me athamgil laniyan’.” (Ac 28:15) Yugu aram rogon ni yimanang ni Paul e ir be’ ni ma pi’ e athamgil nga laniyan’ e pi walag ko fapi ulung ni i lekag, machane ngiyal’ nem ni kan kalbusnag e ke mang fapi walag nu Roma e yad e kar pied e athamgil nga laniyan’.​—2Ko 13:10.

Ngiyal’ ney e ma yan e piin ni yad ma lekag e ulung ko pi ulung i yan ya nge yag ni ngar pied e athamgil nga laniyan’ e walag ko pi ulung ney. Ma pi walag ney ni yad ma lekag e ulung e yu ngiyal’ e ma aw parowrad, maku ma magafan’rad, maku ma mulan’rad. Ere yay ni migid nra yib faen ni ma lekag e ulung nge ppin rok ko birom e ulung, ma mang e rayog ni ngam rin’ ya nge yag ni ngam pi’ e athamgil nga lanin’row, ya nge yag ni ‘fel’ rogorow ko michan’ rom me fel’ rogom ko michan’ rorow’?​—Ro 1:11, 12.

• 

  Ngam un ko muulung ni fan ko machib. Faen ni ma lekag e ulung e ma yib e athamgil nga laniyan’ u nap’an nra guy ni be gay pi walag rogon nra yib angin ngorad e pi n’en ni yira rin’ u lan e re wik nem ni be lekag e ulung rorad. (1Th 1:2, 3; 2:20) Rayog ni ngam lemnag rogon ni ngam un ko machib ni ayuw u nap’an e re pul nem. Gur, rayog ni ngam ognagem ni ngam un ngorow e ppin rok ko machib, ara nge un bagayow ngom ko Bible study rom? Ri yow ra felfelan’ ni ngar unew ngak e pi walag, nib muun ngay e piin ni yad ba beech ara piin ni gathi ri yad ba salap ko machib.

• 

  Ngam gol. Gur, rayog ni ngam pi’ e ayuw ko gin ni ngar parew riy nge ggan ni ngar kew? Ireray reb e kanawo’ ni ga ra dag e t’ufeg riy ngorow. Darur lemnagew ni ngari fel’ rogon gubin ban’en ni ngan rin’ ni fan ngorow.​—Lu 10:38-42.

• 

  Mmotoyil mag fol ko fonow rok nge rogon ni be pow’iyey. Faen ni ma lekag e ulung e ma ayuwegdad u fithik’ e t’ufeg ya nge yag ni nge mon’og e pigpig rodad ngak Jehovah. Ma yu ngiyal’ e ba t’uf ni ngan fonownagdad nib gel. (1Ko 5:1-5) Machane ma felfelan’ ni faan gad ra sobut’nag lanin’dad ngad folgad rok.​—Heb 13:17.

• 

  Mu Pining e Magar. Mog ngak e en be lekag e ulung nge ppin rok rogon e athamgil ni yow be tay ni ke yib angin ngom. Rayog ni nga mog ngorow ara mu yoloy bang e babyor ara card ngam pi’ ngorow.​—Kol 3:15.