Ngan Ayuweg E Girdi’ Ngar Nanged Ko Mang E Ba T’uf Ni Ngad Rin’ed Ku Got

“Bbugithin ni ke yog Got ngog ni nggu rin’. Faan mang e da gu machibnag ngak e girdi’ e thin nib fel’ ma ri gu ra gafgow!”​—1 KORINTH 9:16.

1, 2. (a) Mang maruwel ni bay l’agruw guruy riy ni ba t’uf ku Jehovah ni ngad rin’ed? (b) Mang e thingari nang e piin nib yul’yul’ ni rayog ni ngar uned ko Gil’ilungun Got?

BAY e thin nib fel’ rok Jehovah ni fan ko girdi’. Ya bay Gil’ilungun ma ba adag ni nge rung’ag urngin e girdi’ u morngaagen! Ma nap’an ni kad filed e re thin nib fel’ ney, ma ba t’uf ku Got ni ngad wereged ngak yugu boch e girdi’. Ma bay l’agruw guruy ko re maruwel ney. Som’on ma thingarda wereged fare thin nib fel’ ko Gil’ilungun Got. Faani yiiynag Jesus u morngaagen e “ngiyal’ ntomren e re m’ag ney” me gaar: “Ma re thin rok Got ney nib fel’ ni morngaagen gil’ilungun Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.”​—Matthew 24:3, 14.

² Ma fa bin l’agruw guruy ko re maruwel ney e ngan fil ban’en ngak e piin ni ba adag ni nge rung’ag u morngaagen Gil’ilungun Got. Tomren ni fas Jesus ko yam’ me gaar ngak ba ulung i gachalpen: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare kan ni thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu ba’ romed, nge yan i mada’ nga tomren e fayleng.” (Matthew 28:19, 20) Fapi ‘n’en ni yog Kristus ngorad ni nguur rin’ed’ e de sum rok; ya ke fil ngak e girdi’ ni ngar folgad ko pi motochiyel rok Got. (John 14:23, 24; 15:10) Ere ra ngan fil ngak yugu girdi’ rogon ni ngar ‘folgad u gubin e tin ni yog Kristus ngorad’ e ba muun ngay ni ngan ayuwegrad ngar nanged e tin nib t’uf ku Got ni ngad rin’ed. Tin nib yul’yul’ e girdi’ e thingara rin’ed e tin nib t’uf ku Got ni fan ni ngar manged e girdi’ u tan pa’ Gil’ilungun.

3. Be mang Gil’ilungun Got, ma mang e ra lebuguy ni aram e thin nib fel’ ko Gil’ilungun Got?

³ Ma be mang Gil’ilungun Got? Ma mang e ra lebuguy ni aram e thin nib fel’ ko Gil’ilungun Got? Gil’ilungun Got e am nu tharmiy. Ri ba adag Jehovah e re am nem ya aram rogon nran thothupnag fa ngan biechnag e ngochol rok, min nog e sorok ngak. U daken Gil’ilungun ma ra rin’ Jehovah e tin nib m’agan’ ngay u fayleng ni bod ni yibe rin’ u tharmiy. Ar fan ni fil Jesus ngodad ni ngad yibilayed ni nge yib Gil’ilungun Got me piningdad ngad mon’eged ko yafas rodad. (Matthew 6:9, 10, 33) Ere ga manang ko mang fan ni rib ga’ fan u wan’ Jehovah ni ngad filed ngak e yugu girdi’ u morngaagen Gil’ilungun?

Yira Athamgiliy Machane De Tomal

4. Mang thin ni be tamilangnag ni de tomal fare motochiyel ni kan tay chilen ngodad ni ngad machibnaged fare thin nib fel’?

⁴ Ngan machibnag fare thin nib fel’ e aram ba gilab nib tomal fa? Ri danga’! Susun: Mmil fan ngak e matam ni nge ayuweg e tabinaw rok ko tin nib t’uf rorad. Faanra dabi rin’ ma bod ni ke togopuluw ko Kristiano. Yoloy apostal Paul ni gaar: “Ma faanra dabi ayuweg be’ e girdi’ rok, ni ba ga’ ni girdien e tabinaw rok, ma aram e ke n’ag rogon nib mich Got u wan’, ma kab gel e kireb rok ngak be’ ndawori mich Got u wan’.” (1 Timothy 5:8) Ma aram reb e maruwel ni bod gilban e Kristiano nib tomal ngak be’ ni pumoon fa? Danga’ ya ma t’ufeg e tabinaw rok, me ere ba adag ni nge ayuwegrad.

5. Yugu aram rogon ni fare maruwel ni ngan machibnag e girdi’ min pingegrad ngar manged pi gachalpen Jesus e aram ban’en ni thingarda rin’ed, machane mang fan nsusun ni ngad falfalan’gad ngad uned ngay?

⁵ Ku arrogon fare maruwel ko machib ni ngan ayuweg e girdi’ ngar manged pi gachalpen Jesus e aram ban’en nib t’uf ni ngad rin’ed ma yafas rodad e ma tor nga daken. Gaar Paul: “Bbugithin ni ke yog Got ngog ni nggu rin’. Faan mang e da gu machibnag ngak e girdi’ e thin nib fel’ ma ri gu ra gafgow!” (1 Korinth 9:16; mu taarebnag ko Ezekiel 33:7-9.) Machane gad ma un ko machib ni bochan nib t’uf e girdi’ rodad ma gathi bochan ni aram ban’en ni kan tay chilen ngodad. Som’on ma ba t’uf Got rodad, maku gad ma t’ufeg e piin buguli yoror rodad, ma gad manang fene ga fan’ ni ngar rung’aged fare thin nib fel’. (Matthew 22:37-39) Ya aram e athap ko gabul nge langleth. Dabki n’uw nap’an ma Gil’ilungun Got e ra yal’uweg e tin nde mat’aw, ma ra chuweg urngin e gafgow, ma ra sulweg e gapas nga fayleng me taareb lanin’uy​—ra yib urngin e pi flaab ney ni fan ko piin ni ma tay tanggin e gagiyeg rok Got nib mat’aw. Gathi gad ba falfalan’ ni rayog ni ngad wereged e re thin ney nib fel’ ngak yugu boch e girdi’?​—Psalm 110:3.

6. Mang fan ni fare maruwel ni ngan machibnag e girdi’ min pingegrad ngar manged pi gachalpen Jesus e gathi ban’en nib mom ni ngan rin’?

⁶ Maku gathi ba mom e re maruwel ney ni ngan machibnag e girdi’ min pingegrad ngar manged pi gachalpen Jesus. Ya ba thil thil e girdi’. De taareb rogon e tin ni yad ba adag nge rarogorad. Boch e girdi’ e boor ban’en ni yad manang, ma yugu boch e girdi’ e ba sobut’ e skul rorad. Ma kafram ma ri ba adag e girdi’ e poy babyor ma chiney ma yibe lemnag ni aram e maruwel nib tomal. Reb e magawon ni be gel iyan ni mus u lan e pi nam nib tolang e skul rorad e ka nog e aliteracy ngay ma fan e re n’em e “yima nang fan e yol machane kan dabuy ni ngan poy e babyor.” Ere uw rogon nrayog ni ngad ayuweged e girdi’ ni yad ba thilthil makub thilthil e pi n’en ni yad ba adag ni ngar nanged e n’en nib t’uf ni ngan rin’ ku Got?​—Mu taarebnag ko 1 Korinth 9:20-23.

Ke Bung Rogon ni Ngan Ayuweg e Yugu Girdi’

7. Uw rogon ni ke ayuwegdad “fare tapigpig nib yul’yul’ mab gonop” nge bung rogodad nrayog ni ngad ayuweged e yugu girdi’ ngar nanged e tin nib t’uf ni ngan rin’ ku Got?

⁷ Ra mom boch e maruwel nib mo’maw ni faanra bay talin e maruwel rom nib puluw ngay. Ma reb e talin e maruwel nib puluw ko reb e maruwel ko ngiyal’ ney e ku rayog ni ngan thiliyeg ban’en riy fa ngan fl’eg yugu reb ni kab fel’ ngay ni bochan ni be thil iyan e tin nib t’uf. Ku aram rogon e maruwel rodad ni ngad wereged fare thin u morngaagen Gil’ilungun Got. U lan e pi duw ni ke yan ma “fare tapigpig nib yul’yul’ mab gonop” e kar pied ngodad e talin e maruwel nib t’uf rodad nib puluw, ni aram e pi babyor ni ma ayuwegdad ngad filed e Bible ngak e girdi’. (Matthew 24:45) Ere ke bung rogodad nrayog ni ngad ayuweged e girdi’ u “gubin e nam nge ganong, nge . . . gubin e thin” ngar filed e tin nib t’uf ni ngad rin’ed ku Got. (Revelation 7:9) Munmun ma yima pi’ boch e talin e maruwel nib biech ngodad ni fan ni nge taarebnag rogon e tin nib t’uf ko girdi’ u gangin e fayleng. Ngad weliyed boch rogon e pi n’ey ni yibe rin’.

8. (a) Uw rogon ni kan ayuweg min fil e Bible ngak e girdi’ u daken fare ke babyor ni “Let God Be True”? (b) Mang talin e maruwel e kan pi’ ko duw ni 1968 ni fan ni ngan fil e Bible ngak e girdi’, ma mang felngin? (c) Uw rogon ma ke ayuweg fare babyor ni Tin Riyul’ e maruwel ni ngan pingeg e girdi’ ngar manged pi gachalpen Jesus?

⁸ Napan e 1946 nge mada’ ko 1968, ma kan fil fare ke babyor ni “Let God Be True” ngak e girdi’, ma sogonapan 19,250,000 ken e pi babyor nem ni kan fl’eg ko 54 mit e thin. Ma nap’an e 1968 ma kan fl’eg fare ke babyor ni Tin Riyul’ ni ma Pow’iy Iyan ko Yafas ni Manemus ma u lan in e duw ni kan fanay e re ke babyor nem ni ngan fil e Bible riy ngak e girdi’. U m’on riy ma baga’ ni ra fil e girdi’ e Bible u taabang ko Pi Mich Rok Jehovah u lan in e duw ma dabra uned ko taufe. Machane re ke babyor nem e kan fl’eg ni ngan ayuweg e girdi’ ngar mon’oggad iyan, min fol ko n’en ni be fil. Ere mang wenegan riy? Fare babyor ni Jehovah’s Witnesses​—Proclaimers of God’s Kingdom e begaar: “U lan dalip e duw ni ka nap’an e September 1, 1968, nge yan i mada’ ko August 31, 1971, ma 434,906 e girdi’ e kar uned ko taufe​—ni aram e ke mun l’agruw yay oren e piin ni kar uned ko taufe ko fa dalip e duw u m’on riy!” Ma ka nap’an e ngiyal’ ni kan fl’eg ma kari garer fare babyor ni Tin Riyul’​—ya ke pag 107,000,000 ken ni kan wereg ko 117 mit e thin.

9. Mang felngin fare ke babyor ni Par ni Gab Fas ma mang angin ni yib riy ko piin ni ma wereg e thin ko Gil’ilungun Got?

⁹ Nap’an e 1982 ma kan fanay fare ke babyor ni Rayog ni Ngam Par ni Gab Fas u Paradis u Fayleng ni ngan fil e Bible ko girdi’. Re talin e maruwel ney e bay boor ko 150 e sasing riy, ma ra reb ma bay boch e thin ni be tamilangnag e n’en ni yibe fil ko pi sasing nem. Fare babyor ni Machib Rodad ni fan ko Gil’ilungun Got ko October 1982 e begaar: “U lan 20 e duw ni kan fanay fare ke babyor ni ‘Let God Be True’ (ka nap’an e 1946 nge mada’ ko 1960 iyan) ma boor ko 1,000,000 e girdi’ ni kar manged e piin ni ma wereg e thin ko Gil’ilungun Got. Miki un 1,000,000 e girdi’ ko publisher u nap’an ni kan fanay fare ke babyor ni Tin Riyul’ ni ma Pow’iy Iyan ko Yafas ni Manemus u tomren ni kan fl’eg ko duw ni 1968. Ma chiney ma bay e babyor nib biech rodad ni Rayog ni Ngam Par ni Gab Fas u Paradis u Fayleng, me ere ku ra yoor e piin ni be un ko publisher ko Gil’ilungun Got fa? Ri arrogon, nfaanra m’agan’ Jehovah ngay!” Ma riyul’ ni ke m’agan’ Jehovah ngay ya nap’an e duw ni 1982 nge mada’ ko 1995, ma boor ko 2,700,000 e girdi’ e kar uned i wereg e thin ko Gil’ilungun Got!

10. Mang talin e maruwel nib biech ni kan fl’eg ko duw ni 1995, ma mang fan ni susun ni nge ayuweg e girdi’ ni be fil e Bible ngar mon’oggad iyan nib pay boch ko tirok Got ban’en?

¹⁰ Begaar Jesus: “Woldug ni ngan kunuy ngan tay nga naun e baga’ ni baga’ yang, machane piin ni ngar maruweliyed nge thap nga naun e ba lich.” (Matthew 9:37) Rriyul’ ni baga’ yang e maruwel ko mokun girdi’. Ka bay boor e maruwel ni ngan rin’. U lan boch e binaw ma thingari tay fithingan e girdi’ nga reb e babyor ni ngar sonnaged e ngiyal’ ni rayog ni ngan fil e Bible ngorad. Ere ke fl’eg “fare tapigpig nib yul’yul’ mab gonop” e talin e maruwel nib biech ko duw ni 1995 ni fan ni ngan wereg fare tamilangan’ rok Got nib pay boch ni aram fare ke babyor ni bay 192 e page riy ma kenggin e Tamilangan’ ni Ma Pow’iy Iyan ko Yafas ni Manemus. Re talin e maruwel ney nib baga’ fan e dariy e thin riy ni boor u morngaagen e machib ni googsur. Ya ma weliy e tin riyul’ ko Bible nib mudugil rogon. Yibe athapeg ni ra ayuweg e piin ni ma fil e Bible ni ngar mon’oggad iyan ko tirok Got ban’en nib pay. Kan wereg 45,500,000 ken fapi babyor ni Tamilangan’ u gangin e fayleng ko 125 mit e thin ma chiney ma yibe piliyeg e thin riy ko 21 nga yugu boch e thin.

11. Mang talin e maruwel ni kan pi’ ni ngan ayuweg e piin ni de nang e yol fa gathi ri yad ma nang fan e poy babyor, ma uw rogon ni kan ayuweg e machib ni gad be tay u gangin e fayleng?

¹¹ Yu ngiyal’ ma ma fl’eg ‘fare tapigpig nib yul’yul’’ e talin e maruwel ni fan nga taa ban’en fa boch e girdi’. Susun, nge diin e piin ni ba t’uf e ayuw ni bochan e yalen rorad fa teliw rorad? Uw rogon nrayog ni ngad ayuweged yad ngar nanged e tin nib t’uf ku Got ni ngan rin’? Nap’an e duw ni 1982 ma kan pi’ ngodad e n’en nib t’uf​—fare ke brochure ni 32 e page riy ni Mu Falfalan’ ni Ngam Par u Fayleng ni Manemus! Re ke babyor ney e boor e sasing riy ma ke ayuweg e girdi’ ni dar nanged e yol fa gathi ri yad manang rogon i bieg e babyor. Ya be weliy rogon nib mom ni ngan nang fan e thin ko Bible. Ka nap’an e ngiyal’ ni kan fl’eg iyib ngaray ma pi babyor nem ni Par u Fayleng e ke ayuweg e maruwel rodad ko machib u gangin e fayleng. Ke pag 105,100,000 ken e re ke babyor nem ni kan fl’eg ko 239 mit e thin, ma aram e babyor ni th’abi yoor ni ke fl’eg fare Watch Tower Society min piliyeg e thin riy ke mada’ ko chiney!

12, 13. (a) Ka nap’an e 1990, ma mang ban’en nib biech ni ke fl’eg ‘fare tapigpig nib yul’yul’’ ni ngan machibnag e girdi’ ni boor ngay? (b) Uw rogon nrayog ni ngad fanayed e pi video ko Society ko machib u mit e tabinaw iyan? (c) Mang reb e talin e maruwel ni kan fl’eg ni nge ayuwegdad ngad pingeged e girdi’ ngar manged pi gachalpen Jesus?

¹² Ma nap’an e duw ni 1990 me tabab ‘fare tapigpig nib yul’yul’’ ni ngar ngongliyed boch ban’en nib biech nrayog ni ngan wereg e machib ngak gubin e girdi’​—ni aram e pi videocassette. Nap’an e pul ni October ko re duw nem ma kan fl’eg fare video ni 55 e menit n’umngin nap’an ni Jehovah’s Witnesses​—The Organization Behind the Name​—aram e bin som’on e video ni ke fl’eg fare Watch Tower Society. Kan fl’eg e re video nem ko 35 mit e thin mab fel’ yaan rogon ni be dag e ulung rok Jehovah u polo’ e fayleng ni yad be lebuguy fare thin ni tay Jesus chilen ngorad ni ngar wereged fare thin nib fel’ u gubin yang u fayleng. Kan fl’eg e re video nem ni nge ayuwegdad ngad pingeged e girdi’ ngar manged pi gachalpen Jesus. Piin ni publisher ko Gil’ilungun Got e kar fanayed e re talin e maruwel nem e chi ngiyal’ nem. Boch i yad e ur feked e re video nem u lan e kabang rorad ni aram e kar ted talperad nrayog ni ngar daged ko girdi’ fa ngar pied ko piin ni ba adag e machib. Ma de n’uw nap’an u tomren ni kan fl’eg e re video nem me yol reb e piilal ni ma lekag e ulung ni gaar: “Video e aram ban’en kari mon’og e girdi’ riy ni wod ni gad bay ko bin 21 e chibog ma aram rogon nrayog ni nge taw e machib nga laniyan’ ngu gumerchaen e girdi’ e chiney, me ere gamad be athapeg ni re video ney e ke mus ni aram e bin som’on e video ni ke fl’eg fare Society ni fan ni nge mon’og iyan e machib ni yibe tay u gangin e fayleng.” Ma rriyul’ ya kun fl’eg boch e video nib muun ngay e tin ni bay dalip guruy riy ni The Bible​—A Book of Fact and Prophecy nge Jehovah’s Witnesses Stand Firm Against Nazi Assault. Faanra bay fapi video ko Society ko thin rom, ma kam fanay ko machib fa dawor?a

¹³ Maku reb e talin e maruwel nib biech e fare babyor ni Mang e Ba T’uf ni Ngad Rin’ed ku Got?, ma kan fl’eg ni ngan ayuwegdad ngad pingeged e girdi’ ngar manged pi gachalpen Jesus. Mang fan ni kan fl’eg? Uw rogon nrayog ni ngan fanay?

Ngan Yaliy e Talin e Maruwel nib Biech

14, 15. Fare ke babyor ni Mang e Ba T’uf e kan fl’eg ni fan ko chon mini’, ma mang felngin?

¹⁴ Fare babyor nib biech ni Mang e Ba T’uf ni Ngad Rin’ed ku Got? e fan ko girdi’ ni ke mich Got u wan’rad ma yad ma tay fan e Bible. Piin ni ma lekag e ulung u lan boor e duw nge piin ni kar uned ko skul ni Gilead mar uned ko missionary u lan boor e duw u lan e pi binaw nib gafgow e kar weliyed boch e thin u rogon ni ngan fl’eg e re ke babyor ney. Ma bay riy boch e thin ni ma tamilangnag e machib ko Bible mab mom ni ngan nang fan. Thin riy e ba munguy mab tamilang mab puluw. Machane gathi kayigi mom e thin riy. Ya gathi ke mus ni “milk” e bay riy ya ku bay e “ggan nib el” riy ko Thin Rok Got ma kan weliy u reb e kanawo’ nra nang e girdi’ fan.​—Hebrews 5:12-14.

¹⁵ U lan in e duw ma ke ning e piin publisher ko Gil’ilungun Got u boch e binaw ni nga kun fl’eg e babyor ni aram rogon. Susun, bod ni ke yoloy fare ofis ko Watch Tower Society u Papua New Guinea ni gaar: “Kari maathuk’ laniyan’ e girdi’ ko machib ko pi yuraba’ i teliw ni ke math’ keru’ reb nga reb. Ba t’uf rorad ni ngan weliy e thin riyul’ nib tamilang, ma ngan nog e thin ko Bible nib puluw aram e rayog ni ngar pithiged mar yaliyed e Bible rorad. Ba t’uf rorad ni ngan weliy nib tamilang ko mang e ba t’uf ku Got ni nge rin’ e tin riyul’ e Kristiano nge tin ngan e yalen nge ngongol e de fel’ u wan’.” Re babyor ney ni Mang e Ba T’uf e aram e n’en nib t’uf ni ngan ayuweg e girdi’ ngay ngar nanged ko mang e ba t’uf ni ngan rin’ ku Got.

16. (a) Mini’ e ra yib angin ngak fa pi thin nib mom ni bay ko re ke babyor ney nib biech? (b) Uw rogon nrayog ni nge yib angin ko girdi’ u lan e binaw rom ko re ke babyor ney ni Mang e Ba T’uf?

¹⁶ Uw rogon ni ngam fanay e re talin e maruwel ney? Som’on ma rayog ni ngan fil ngak e piin nib mo’maw rorad ni ngar poyed e babyor ara gathi ri yad ba adag e poy babyor. Pi thin ko re ke babyor ney ni kan weliy nib tamilang e ra ayuweg e girdi’ ni aram rogon. U m’on ni kan wereg ko girdi’ ma kan pi’ yu ken e pi babyor ney ngak boch e ofis ko Watch Tower mar poyed mar gaargad: “Re ke babyor ney e ra ayuweg e girdi’ ko pi binaw ni gathi ri yad ma poy e babyor.” (Brazil) “Bay boor e girdi’ nu bang ndar nanged e yol ko thin rorad makub mo’maw ni ngar bieged e thin ni French. Rayog ni ngan fil e re ke babyor ney ngak e girdi’ ni aram rogon.” (France) Bay boch e girdi’ u lan e binaw rom ni ra ayuwegrad e re ke babyor ney ni Mang e Ba T’uf fa?

17. Uw rogon nrayog ni ngan fanay e re ke babyor ney nib biech u lan boor e binaw, ma mang fan?

¹⁷ Bin l’agruw, ma bay boor e binaw ni rayog ni ngan fanay e re ke babyor ney ni ngan tababnag e study ko girdi’ ni bay madgun Got u wan’rad ndemtrug ko uw rogon e skul rorad. Machane susun ni ngan guy rogon ni ngan fil fare babyor ni Tamilangan’ ni Ma Pow’iy Iyan ko Yafas ni Manemus ngak e girdi’. Machane yu ngiyal’ ma sana mom boch ni ngan tababnag e study ko fare brochure ni som’on. Me munmun ma rayog ni ngan thiliyeg e babyor min fil fare ke babyor ni Tamilangan’, ya aram e bin nib baga’ fan e babyor ni gad be fil ko girdi’. Yoloy e pi ofis ko Watch Tower u morngaagen e re ke babyor nem ni gaar: “Mo’maw ni ngan tababnag e Bible study, me ere ra mom boch nfaanra ra fanay e pi publisher fare ke brochure ko som’on.” (Germany) “Re ke babyor ney ni brochure e ra ayuwegdad ngad tababnaged e Bible study nge mu’ ma rayog ni ngan fil fare ke babyor ni Tamilangan’.” (Italy) “Piyu Sapan e ba tolang e skul rorad machane boor iyad e gathi ri yad manang e Bible ma dar nanged e machib riy. Re ke babyor ney ni brochure e ra ayuweg ni ngan fil fare ke babyor ni Tamilangan’ ngorad.”​—Japan.

18. Susun mang e dabda paged talin u morngaagen e tin nib t’uf ni ngad rin’ed ku Got?

¹⁸ Pi ofis ko Society u gangin e fayleng e kar ninged e re ke babyor ney ma kan pithig e thin riy ni ngan piliyeg ko 221 mit e thin. Gad be athapeg ni re ke babyor ney e ra ayuwegdad ngad ayuweged e yugu girdi’ ngar nanged e tin nib t’uf ni ngar rin’ed ku Jehovah Got. Ma dabda paged talin nrayog ni ngad daged ku Jehovah fene t’uf rodad nfaanra gad ra rin’ e tin nib t’uf nib muun ngay fare motochiyel ni ngan machibnag e girdi’ min pingegrad ngar manged pi gachalpen Jesus. Arrogon, de tomal e n’en nib t’uf ni ngad rin’ed ku Got. Ya aram e bin th’abi fel’ e par!​—Psalm 19:7-11.

[Boch e Thin nra Tamilangnag Murung’agen]

Rayog ni Mu Weliy?

◻ Mang l’agruw guruy e maruwel ni be tay Jehovah chilen ko pi tapigpig rok ni ngar uned ngay?

◻ Mang fan nde tomal e maruwel ni kan tay chilen ngodad ni ngad machibnaged e girdi’ ma gad pingegrad ngar manged pi gachalpen Jesus?

◻ Mang boch e talin e maruwel ni ke pi’ “fare tapigpig nib yul’yul’ mab gonop” ngodad ni ngad machibnaged e girdi’ ma gad pingegrad ngar manged pi gachalpen Jesus?

◻ Kan fl’eg fare ke babyor ni Mang e Ba T’uf ni fan ko mini’, ma uw rogon nrayog ni ngad fanayed e re ke babyor nem ko machib?