Rogon ni Garer I Yan E Fundamentalism
FUNDAMENTALISM—dawori n’uw nap’an faram, ma ke mus ni Protestant e ke nameg e re n’ey. Machane kari gel rogon ni ke thil! Ya Bruce B. Lawrence ni ir e en ni ma weliy e thin u morngaagen e teliw ni 30 e duw faram e yoloy ni de lemnag boch e girdi’ nra mang e fundamentalisma kenggin e maluag thin ni baga’ fan ko news nge university u tungun e bin 20 e chibog.
Machane, er rogon ni buch. Pi n’en ni ma weliy e simbung u morngaagen ni bod e cham u kanawo’, li’ be’ ngem’, togopuluw ko ngan li’ e bitir u meyal, yu ulung e teliw ni ma un ko politics ni fan ko togopuluw, nge pi babyor ni yima urfeg u taabang ya yima lemnag ni be n’ag fan Got e aram e pi n’en ni be puguran ngodad e maruwel rok e piin ni fundamentalist. Fare babyor ko salpiy ni yima fl’eg u gubin e wik u Italy ni Mondo Economico fithingan’ e ke yog ni baga’ ni fundamentalism e “be fanay e teliw fithingan Got ni nge togopuluw ko politics.”
Baga’ ni yima weliy ni piin ni fundamentalist e yad e girdi’ ni ma pag rogon ni yad ma k’aring e togopuluw ma yad ma maruweliy e maruwel ko terrorist. Be tamdag e girdi’ ngay ni ke yoor nib pay e girdi’ ko pi ulung ko Comunione e Liberazione ko galesiya ko Katolic nu Roma, Gush Emunim ko Judaism, nge fare ulung ni kan nog e Christian Coalition in North American Protestantism ngay. Mang fan ni fundamentalism e be garer iyan? Mang e be pi’ gelngin? Sana “be fulweg Got taban” ni bod rogon ni yog e sociologist nu France ni Gilles Kepel fithingan u lan e babyor rok?
[Boch e Thin nra Tamilangnag Murung’agen]
a Be’ ni fundamentalist e ir e en ni dabi pag e tin som’on e machib nib yalen ko teliw. Fan fare bugithin ni “fundamentalism” e yira weliy ko bin migid e article.
[Credit Line]
Nina Berman/Sipa Press