Rogon I Poy E Bin Nib Mat’aw E Ta Mol’og

“Kug gagiyegnag . . . nge riyul’ e thin nra yiiynag e tapigpig rog, ma kug gagiyegnag nge lebug e n’en ni yog e mol’og rog.”​—ISAIAH 44:25, 26, New World Translation.

1. Uw rogon ni ma tamilangnag Jehovah ko mini’ e tin nib mat’aw e ta mol’og, ma uw rogon ni ma tamilangnag e tin googsur?

JEHOVAH GOT e ir fa En ni ma tamilangnag ko mini’ e tin riyul’ e mol’og rok. Ma tamilangnagrad ya ma n’igin nge riyul’ e thin ni yog u l’ugunrad. Jehovah e ku ir e En ni ma tamilangnag ko mini’ e mol’og ni googsur. Uw rogon ni ma tamilangnag? Ma n’igin ndabi lebug e pi pow rorad nge tin ni kan yiiynag. Aram rogon ni ma dag ni yad e kar dugliyed yad ni profet, ma thin rorad e sum ko lem rorad​—arrogon, lem rorad nib manan’ mab siin!

2. Mang boch e thin ni yog e pi ta mol’og nib math keru’ reb nga reb u nap’an yu Israel?

² Isaiah nge Ezekiel e u rognew ni yow e mol’og rok Jehovah Got. Rriyul’ ni arrogon? Ngad guyed. I yiiynag Isaiah boch ban’en u Jerusalem ko duw ni 778 B.C.E. nge mada’ ko ngiyal’ ntomren e duw ni 732 B.C.E. Kan kalbusnag Ezekiel u Babylon ko duw ni 617 B.C.E. I yiiynag boch ban’en ngak e pi walag ni Jew ni yad bay u rom. Yog e gali profet ney ni ran thang yu Jerusalem. Ma yugu boch e profet e ur rogned ni dabi pag Got ni nge buch e re n’em. Mini’ e ke micheg ni ir e bin nib mat’aw e ta mol’og?

I Tamilangnag Jehovah e Pi Profet ni Googsur

3, 4. (a) Mang l’agruw e thin nib math keru’ reb nga reb e kan nog ngak piyu Israel u Babylon, ma uw rogon ni tamilangnag Jehovah e bin googsur e mol’og? (b) Mang e yog Jehovah ni ra buch ko pi profet ni googsur?

³ Nap’an ni immoy Ezekiel u Babylon, me pig e changar rok nge guy e n’en ni be buch u lan e tempel u Jerusalem. U lan e garog ni bay ko ngek ma immoy 25 e pumoon. Ma l’agruw i yad e Jaazaniah nge Pelatiah ni yow pi fak e pilung. Uw rogorad u wan’ Jehovah? Be weliy Ezekiel 11:2, 3 ni gaar: “Fak e girdi’, ereray e pi pumoon ni yad be makathnag e tin nib kireb ban’en ma yad be pi’ e fonow nib togopuluw ko re mach ney; mi yad gaar, ‘Ke chugur ko ngiyal’ ni ngan toy e pi naun fa?’” Pi mol’og ney e be yog ni ‘Dariy e riya’ nra yib nga Jerusalem. Ya ke chugur ko ngiyal’ ni gad ra toy e naun ni boor u roy!’ Ere ke yog Got ngak Ezekiel ni nge yiiynag e thin nib togopuluw ko pi profet ney ni be l’ifith l’iginrad. Be yog Nan Ezekiel ko verse 13 ko guruy ni 11 e n’en ni buch ngak boch i yad ni gaar: “Chi ngiyal’ nem ni kug yiiynag ban’en me yim’ Pelatiah ni fak Benaiah.” Dabi siy ni ke buch e re n’ey ya Pelatiah e th’abi lingagil ma th’abi tolang ko piin pi fak e pilung ma ku be liyor ko liyos nib elmirin. Rogon ni ke yim’ nib tomgin e be micheg ni ir reb e profet ni googsur!

⁴ Ma nap’an ni thang Jehovah e fan rok Pelatiah ma de tal e tin ni ka bay e profet ni googsur ya kuur lifithed l’iginrad u daken fithingan Got. Pi girdi’ ney ni ma sabanban e ur rogned boch ban’en nib togopuluw ko tin nib m’agan’ Got ngay. Ere yog Jehovah Got ngak Ezekiel ni: “Ra gafgow e pi profet nib manan’rad, ni yad be yan nga tabon lanin’rad, ma dariy ban’en ni ur guyed!” Bod rogon Pelatiah, ma yad ra “m’ay nga bayang” ya kar togopuluwgad mar yiiynaged boch ban’en nra buch ku Jerusalem ni “ra yib e gapas, ma dariy e gapas.”​—Ezekiel 13:3, 15, 16.

5, 6. Yugu demtrug e n’en ni yog e pi ta mol’og ni googsur, machane uw rogon ni kan tamilangnag ni Isaiah e ir e bin riyul’ e profet?

⁵ Ma urngin e thin ni yiiynag Isaiah u morngaagen Jerusalem e ke riyul’. Nap’an e summer ko duw ni 607 B.C.E., me thang yu Babylon e re mach nem mar feked boch piyu Jew nga ranod nga Babylon ni yad e kalbus. (2 Kronicles 36:15-21; Ezekiel 22:28; Daniel 9:2) Ma pi n’en ney nib kireb ni ke buch e ke taleg e pi profet ni googsur ndab kur rogned boch e thin nib m’ay fan ko girdi’ rok Got fa? Danga’ ya pi mol’og nem ni yad be lifith l’iginrad e ka yad be ulul ngay!

⁶ Ma gathi ke mus e re n’em ya piyu Israel ni yad e kalbus u Babylon e ur pared u fithik’ e pi taman bey, nge sothuw, nge piin in ma bon ko t’uf. Machane ke micheg Jehovah ni urngin e pi mol’og ney ni googsur e yad e tin nib manan’ e girdi’, yab math keru’ e n’en ni ur yiiynaged ko n’en ni buch. Munmun me dag ni Ezekiel e bin riyul’ e mol’og rok, ni bod Isaiah. I lebuguy Jehovah urngin e thin ni ke yog u dakenrow, rogon ni ke micheg ni gaar: “Gu gagiyegnag e pi taman bey ngar nonod nga bang, ma kug gagiyegnag e piin ni ma bon ko t’uf ke ngochngochan’rad. Kug gagiyegnag e thin ni ke yog e girdi’ nib gongop ke thil ke m’ug ni gonop rorad e ke yan i aw ni bayang. Kug gagiyegnag nge riyul’ e thin nra yiiynag e tapigpig rog, ma kug gagiyegnag nge lebug e n’en ni yog e mol’og rog.”​—Isaiah 44:25, 26.

Boch e Thin u Morngaagen Babylon nge Jerusalem ni Yira Gin Ngay

7, 8. Mang thin ni kan thagthagnag nga laniyan’ Isaiah ni fan ko Babylon, ma mang fan e pi thin nem?

⁷ Ra par fare binaw nu Judah nge Jerusalem ndariy be’ riy u lan 70 e duw. Machane i yog Jehovah u daken Isaiah nge Ezekiel ni yira ubing e re mach nem ma ra par e girdi’ ko re binaw nem ko ngiyal’ ni kan nog! Aram ban’en ni kan nog nib mo’maw ni nge michan’uy ngay. Ko mang fan? Ya yu Babylon e ba gilbuguwan ya dar ma pag e piin kalbus ngar ranod. (Isaiah 14:4, 15-17) Ere mini’ e ra pithig e pi kalbus nem? Ere mini’ e rayog ni nge gel ngak yu Babylon, ya baga’ e yoror rorad mab mo’maw ni ngan th’ab e lul’ riy? Rayog rok Jehovah ni Th’abi Ga’! Ma ke yog nra rin’ ni gaar: “Bbugithin e gog me melik’ e rigur. Ke lungug ngak Cyrus, ‘Gur e bay mu gagiyeg ni paag, bay mu rin’ e n’en ni gub adag ni ngam rin’, bay mog ni ngan fulweg yu Jerusalem nga rogon min ubung e def ko tempel.’”​—Isaiah 44:25, 27, 28.

⁸ Mu lemnag e re n’em! Fare lul’ ni Euphrates e ba dibchey u kanawo’ ko girdi’, ma u wan’ Jehovah e bod ba waangchol ni aw nga daken ban’en nib gawel. Ra chuw e n’en ni be dibchey u kanawo’ nib tomgin! Ra war yu Babylon. 150 e duw u m’on ni kan gargelnag Cyrus u Persa, me yiiynag Jehovah u daken Isaiah ni ra gel e re pilung nem ngak yu Babylon ma ra pithig e girdi’ ni Jew ni yad be par u rom nib kalbus ma ra yog ni ngar sulod nga Jerusalem mar toyed e tempel biyay.

9. Ke pining Jehovah fithingan mini’ ni ir e ra gechignag yu Babylon?

⁹ Bay e thin ko profet u Isaiah 45:1-3 (NW) ni begaar: “Cyrus e fare pilung ni Jehovah e dugliy! I Jehovah e turguy ni nge gel ngak e pi nam ko mahl, . . . ni nge bing e mab ni aram e dabi man e garog, I Jehovah e ke gaar ngak Cyrus: ‘I gag e bay gu fal’eg rogon e kanawo’ rom, bay gu pacheg e pi burey nge yungi ted. Mab ko pi garog ni wasey ni bronze e bay gu t’ar, mu gu th’ab e yu ley i wasey ni ba’ riy. Bay gu pi’ ngom e pi n’en nib fel’ nib mith u singgil ndariy e tamilang riy; ma aram e bay mu nang ni gag Jehovah, mi gag fare Got nu Israel e gu be pining fithingam.’”

10. Uw rogon ma “kan dugliy” Cyrus, ma uw rogon ni ke non Jehovah ngak ni raay e duw u m’on ni kan gargelnag?

¹⁰ Mu tiyan’um ngay ni be non Jehovah ku Cyrus ni gowa ba fas ko ngiyal’ nem. Re n’ey e bpuluw ko n’en ni yog Paul ni Jehovah e “ma pining e pi n’en ndariy ni gowa bay.” (Roma 4:17) Ku ma yog Got ni Cyrus e ir e “en ni ke dugliy.” Mang fan? Prist nib tolang rok Jehovah e de liyef Cyrus ko gapgep nib thothup. Rriyul’ machane kan dugliy nga ban’en nib l’ag ko thin ko profet. Ma be yip’ fan ni ra rin’ ban’en nib baga’ fan. Ere u m’on riy ma ke weliy Got ni ran dugliy Cyrus ni nge rin’ ban’en ma gowa kan liyef ko gapgep.​—Mu taarebnag ko 1 Kings 19:15-17; 2 Kings 8:13.

Ma Lebuguy Got e Thin ni Ma Yog e Pi Tamol’og Rok

11. Mang fan ni ke lemnag piyu Babylon ndariy ban’en nra buch ngorad?

¹¹ Nap’an ni ke togopuluw Cyrus ngak yu Babylon, ma ur lemnaged ni dariy ban’en nra buch ngorad. Immoy ba lul’ ni moat ni be longobiy e mach rorad, ni yib ko lul’ ni Euphrates. Gin ni yan fare lul’ riy u lan e mach e immoy e dock ni be yan ko ba’ ni ngek ko fare lul’. Ma ra nge par nib dar ko fare mach me toy Nebukadnezzar ban’en ni ke yog ni aram “ba yoror nib baga’, ni bod ba burey ndabiyog ni ngan mithmitheg . . . Ma ke fl’eg nib taareb tolngin ko burey.”a Re yoror ney e immoy boch e garog riy nib baga’ e mab ma kan fl’eg ko wasey ni copper. Ma nge yib be’ nga lan e garog ma thingari yib u marichlen e lul’. Aram fan ni lemnag e piin kalbus u Babylon ni dabiyog ni ngar chuwgad u kalbus!

12, 13. Uw rogon ni ke riyul’ e thin ni yog Jehovah u daken Isaiah ni mol’og rok u nap’an ni ke gel Cyrus ngak yu Babylon?

¹² Machane gathi aram rogon piyu Jew ni ke mich Jehovah u wan’rad! Bay e athap rorad. U daken e pi profet rok me yiiynag Got ni ra pithigrad mar chuwgad u rom. Uw rogon ni ke lebuguy Got e re n’em? I tay Cyrus chilen ko pi salthaw rok ni ngar thiliyeged ba pa’ fare lul ni Euphrates ni in e mayal u leluch ko Babylon. Ere fare n’en ni be pagan’ fare mach nga daken e ke milik. Ma reb e nep’ ma be un yu Babylon ko mur me par nib mab e pi garog ni bay ko gin ni bay fare lul’ ni Euphrates riy. De kirebnag Jehovah e pi garog ni copper me tet’ar; maku de th’ab e pi wasey ni iron ni aram e lok riy, machane rogon ni ke n’igin nge par fare garog nib mab ma dan loknag e taareb rogon. Ke aw nib m’ay fan e yoror nu Babylon. De t’uf ko pi salthaw rok Cyrus ni ngar ranod nga lang ko re yoror nem ni ngar ranod nga langgin fare mach. I m’on Jehovah rok Cyrus, ni be “pacheg e pi burey nge yungi ted,” arrogon, urngin ban’en ni be dibchey u kanawo’ rorad. I micheg Isaiah ni ir e bin riyul’ e mol’og rok Got.

¹³ Nap’an ni ke gel Cyrus ko fare mach, ma urngin e machaf riy e ke yib nga tan pa’, nib muun ngay e pi n’en ni kan mithag u lan e pi singgil nib talumor. Mang fan ni yodornag Jehovah Got e re n’ey ni fan ku Cyrus? Ya nge nang ni Jehovah ni ir ‘fa En ni be pining fithingan,’ e ir fare Got ni be yog e thin u l’igin e profet nib riyul’ ma ir Somol ni Th’abi Ga’ ko palpal th’ib. Ma ra nang ni Got e ke tay ni nge mang pilung ni fan ni nge pithig e gird’ rok ni piyu Israel u Babylon.

14, 15. Uw rogon ni gad manang ni ke gel Cyrus ngak yu Babylon ni bochan Jehovah e ke pi’ gelngin?

¹⁴ Mmotoyil ko n’en ni yog Jehovah ngak Cyrus: “Kug dugliyem ni ngam ayuweg e tapigpig rog i Jakob nge piyu Israel ni gag e kug mel’egrad. Kug pining fithingam; ma kug gagiyegnagem yibe tay fam, ni yugu ara’ rogon nda mu nangeg. I gag Jehovah, dakuriy yugu reb e Got nga bang. Gelngim ndabi siy ni nge yog ngom e bay gu pi’ ngom, ni yugu ara’ rogon nda mu nangeg. Nggu rin’ ni fan e nge urngin e girdi’ u baraba’ e fayleng nge yan i mada’ nga baraba’ e ngar nanged ni gag Jehovah, ma dakuriy yugu reb e Got nga bang. I gag e gu sunumiy e tamilang nge talumor; gu ma fek e fel’ rogon [ni fan ko girdi’ rok] nge gafgow [ni fan ko piyu Babylon] i yib. I gag Jehovah e gu be rin’ urngin e pi n’ey.”​—Isaiah 45:4-7, NW.

¹⁵ Susun ni nge pining Cyrus e sorok ku Jehovah ya ir e ke pi’ gelngin ni nge gel ko re mach nib kireb nem me rin’ e tin nib m’agan’ ngay me pithig e girdi’ rok u kalbus. Ma rogon ni ke yodoro Got e ke pining e pi n’en u tharmiy nge pi’ e tin nib mat’aw ban’en nga but’. Me pining e but’ nge pi’ e tin nib mat’aw ban’en ngay me thapeg e girdi’ rok ngak. Ma pi n’en ni be yip’ fan e tharmiy nge but’ e ur folgad rok. (Isaiah 45:8) Boor ko raay e duw nga tomren ni ke yim’ Isaiah ma kan micheg ni ir e bin riyul’ e mol’og rok Jehovah!

Thin nib Fel’ ni Yog e Mol’og ni Fan ko Zion!

16. Mang thin nib fel’ e kan wereg u Jerusalem u nap’an ni ke war yu Babylon?

¹⁶ Ma ka bay boch ban’en. Be weliy Isaiah 52:7 boch e thin nib fel’ ni fan ko Jerusalem: “Ri ban’en nib manigil ni nga ni guy be’ ni kan tay e thin nga l’ugun ke milekag u daken e pi burey ke yib, ni ke fek e thin nib fel’ i yib, ni morngaagen e gapas! Ke yib i yog ni ke gel Somol, me gaar ngak Zion: ‘Got rom e ir e pilung!’” Mu lemnag rib gel fene fel’ ni ngan guy ba mol’og ni be yib ko pi burey nga Jerusalem! Dabi siy ni bay boch e thin ni ra weliy. Be mang e pi thin nem? Aram boch e thin nib fel’ ni fan nga Zion. Thin u morngaagen e gapas, arrogon, morngaagen e flaab rok Got. Yira ubing Jerusalem nge fare tempel biyay! Ma fare mol’og e ma yog u fithik’ e falfalan’ ni gaar: “Got rom e ir e pilung!”

17, 18. Uw rogon ni ke gilbuguwan fithingan Jehovah u nap’an ni ke gel Cyrus ngak yu Babylon?

¹⁷ Nap’an ni pag Jehovah yu Babylon ngar gelgad ko tagil’ e pilung ni yib ko ganong rok David ma sana kan lemnag ni daki par ni ir e Pilung. Ya kan lemnag ni Marduk, ni got nth’abi ga’ u Babylon e ir e pilung. Machane nap’an ni gel e Got nu Zion ngak yu Babylon, me dag ni ir e ani ga’ u palpal th’ib​—me ir e Pilung nth’abi ga’. Ma kan tamilangnag e re n’ey ya kan nog ni ran sulweg Jerusalem nga rogon nge fare tempel, ni ir “fare mach rok fare Pilung ni ga’.” (Matthew 5:35) Ma facha’ ni ir e mol’og ni ke fek i yib fare thin nib fel’ e yugu demtrug rogon ni ke alit ay ko fiyath, ma ke bech machane rib fel’ yaan u p’eowchen e piin ni ba t’uf Zion rorad nge fare Got ko re mach nem!

¹⁸ Rogon nib sor fan ko thin ko profet e ngiyal’ ni ke war Babylon e be yip’ fan ni kan dugliy Gil’ilungun Got ma fa en ni be fek i yib fare thin nib fel’ e be wereg e re thin nem. Maku re mol’og ney ni ke kakrom ni yiiynag Isaiah morngaagen e be yip’ fan reb e mol’og ni kab fel’ e thin ni be fek i yib​—kab fel’ ya kenggin e thin rok e Gil’ilungun Got, ma ma sor fan ko urngin e girdi’ ni ke michan’rad ngay.

19. Mang thin u morngaagen fare binaw nu Israel e ke yog Jehovah u daken Ezekiel?

¹⁹ Ku arrogon Ezekiel ni ke weliy boch e thin ko profet u morngaagen rogon ni ran sulweg ban’en nga rogon. Ke yiiynag ni gaar: “Jehovah ni Got e begaar, ‘. . . gu gagiyegnagmed ngam sulod ngam pired nga lan e pi binaw romed bayay mi gimed ngongliy rogon. Ma ra gaar e girdi: “Re binaw nem ni immoy ndariy ban’en ni be tugul riy e ke bod fare milay’ nu Eden.”’”​—Ezekiel 36:33, 35.

20. Mang thin nib falfalan’ ni ke yiiynag Isaiah ngak yu Jerusalem?

²⁰ Piyu Israel ni yad bay u kalbus u Babylon e ke kireban’rad ko Zion. (Psalm 137:1) Ma chiney e rayog ni ngar falfalan’gad. I yog Isaiah ni gaar: “Pi n’en ni ka ni buthug u Jerusalem, mu tolulniged e felfelan’, ya Jehovah e ke fal’eg laniyan’ e girdi’ rok; ke chuweg Jerusalem u pa’ e toogor rok. I Jehovah e ke maruwel nga gelngin pa’ nib thothup; ke chuweg e girdi’ rok u pa’ e toogor rorad; ma bay ni guy u fayleng i yan ni ke gel e Got rodad ke thapegdad ngak.”​—Isaiah 52:9, 10, NW.

21. Uw rogon ni ke lebug e pi thin ko Isaiah 52:9, 10 u tomren ni ke war yu Babylon?

²¹ Arrogon bay tapgin ni nge falfalan’ e girdi’ rok Jehovah ni ke mel’egrad. Ya yad ra sul ko binaw rorad mi yad ngongliy nge bod fare milay’ nu Eden. I pi’ Jehovah “gelngin pa’ nib thothup” ni fan ngorad. Ba dake ke tet’ar pa’ e mad rok nga lang, ni nge sulwegrad ko binaw rorad. Re n’ey e gathi ban’en ni yugu dariy fan, ndariy be’ ni manang morngaagen. Danga’ ya urngin e girdi’ nib fas ko ngiyal’ nem e ur guyed ‘gelngin pa’ Got’ ni be k’aring boch ban’en nge buch ni fan ni nge thapeg reb e nam ngak. Kan micheg ngak e pi nam ni Isaiah nge Ezekiel e rriyul’ ni yow e ta mol’og rok Jehovah. Dariy be’ ni ke maruwaran’ ni fare Got nu Zion e kari mus ni ir e bin riyul’ e Got ni be par nib fas u gangin e fayleng. Be yog u Isaiah 35:2 ni gaar: “Ra be’ ma bayi guy e flaab rok Jehovah nge fene sorok nge feni gel gelngin.” Piin ni ke michan’rad ni Jehovah e ir Got e kar liyorgad ngak.

22. (a) Mang fan ni gad be pining e magar riy ku Jehovah ko ngiyal’ ney? (b) Mang fan ni ri gad ma pining e magar riy ya ma tamilangnag Jehovah ko mini’ e ta mol’og ni googsur?

²² Ri gad ma pining e magar riy ye Jehovah e ma tamilangnag ko mini’ e tin riyul’ e ta mol’og rok! Rriyul’ ni Ir “fa En ni be lebuguy e thin ni yog e pi tapigpig rok, ma ir fa En ni be gagiyegnag nge riyul’ e tin ni ke yiiynag u l’ugun e pi ta mol’og rok.” (Isaiah 44:26) Pi thin ko profet ni ke pi’ ku Isaiah nge Ezekiel e ma tamilangnag rogon fene t’uf e girdi’ rok, nge rogon fene gol ma ma runguy e pi tapigpig rok. Dabi siy ni bay rogon Jehovah ni ngad pininged e sorok ngak ko re n’ey! Ma gad e piin ni be par ko ngiyal’ ney e susun ni nge gel e magar ni ngad pininged ngak ya ma tamilangnag ngodad ko mini’ e pi ta mol’og ni googsur. Aram rogon ya boor iyad u fayleng ko ngiyal ney. Pi thin rorad e der uneg e tin nib m’agan Jehovah ngay. Bin migid e thin e ra ayuwegdad ngad poyed ko mini’ e pi ta mol’og ni googsur.

[Boch e Thin nra Tamilangnag Murung’agen]

Rayog ni Ngam Weliy?

◻ Uw rogon ni ma tamilangnag Jehovah e tin riyul’ e ta mol’og rok?

◻ U daken Isaiah ma mini’ e ke yog Jehovah fithingan ni aram e en ni ke dugliy ni nge gel ngak yu Babylon?

◻ Uw rogon ni ke lebug e thin ni yiiynag Isaiah u morngaagen rogon nra war yu Babylon?

◻ Mang angin nib fel’ ni yib ko ngochol rok Jehovah ni bochan e kan gel ngak yu Babylon?

[Sasing ko page 17]

Pi nam u nap’an Ezekiel e ur lemnaged ni dabiyog ni ngan gel ngak yu Babylon