Pi Mol’og Ko Gapas Rok Got E Yad Ba Falfalan’

“Piin ni ke sulwegrad Jehovah nga rogorad e bay ra tawgad nga Zion ni yad be tolulnag e falfalan’; mi yad par nib falfalan’ ndariy n’umngin nap’an.”​—ISAIAH 35:10, New World Translation.

1. Mang e ba t’uf ko re fayleng ney?

NGIYAL’ ney ma ba t’uf ko girdi’ e mol’og ko thin nib fel’. Ba t’uf ni nge weliy be’ e thin riyu’ u morngaagen Got nge tin nib m’agan’ ngay, ma dabi rus ni nge ginang e piin nib kireb ni ra yib e magothgoth ma ran ayuweg e piin nib mat’aw gumercha’rad ni ngar pirieged e gapas rok Got.

2, 3. U rogon ni ke lebuguy Jehovah e n’en ni micheg ngak yu Israel ni bay ko Amos 3:7?

² Nap’an piyu Israel, me micheg Jehovah ni ra pi’ e pi mol’og ni aram rogon. U tungun fa bin mereb e chibog B.C.E., me yog Amos ni profet ni gaar: “I Jehovah ni Somol Nth’abi Ga’ e dariy ban’en ni ma rin’ nder ma weliy ngak e pi profet, ni aram e pi tapigpig rok, nge mu’ mfini rin’.” (Amos 3:7) Ma nap’an e pi chibog u tomren ni ke yog e re n’em, me ngongliy Jehovah boor ban’en nib gel. Ni bod nap’an e 607 B.C.E., me gechignag e girdi’ rok ya ur togopuluwgad ngak ma bay e racha’ u pa’rad. Miki gechignag e pi nam u charrad ya ur moningnaged yu Israel ni kar gafgowgad. (Jeremiah, guruy ni 46-49) Ma aram nap’an e 539 B.C.E., me n’igin Jehovah nge war yu Babylon ni aram e bin th’abi gel e nam, ma wenegan riy e ke sul boch e girdi’ nu Israel nga binaw rorad ko duw ni 537 B.C.E., mar toyed fare tempel biyay.​—2 Kronicles 36:22, 23.

³ Pi n’en ney e ri baga’ fan, ma rogon nib puluw ko thin rok Amos, me weliy Jehovah e pi n’en ni ra rin’ ngak e pi profet u m’on ni nge buch ban’en, mi yad e pi mol’og rok ni ngar ginanged yu Israel ko mang e ra buch. U lukngun e bin meruk e chibog B.C.E., me dugliy Isaiah. Ma lukngun e bin medlip e chibog B.C.E., me dugliy Jeremiah. Ma tungun e re chibog nem, ki dugliy Ezekiel. Pi girdi’ nem nge yugu boch e profet nib yul’yul’ e ur pied e mich u morngaagen e tin ke m’agan’ Jehovah ngay.

Ngan Poy e Pi Mol’og Rok Got ko Ngiyal’ Ney

4. Mang e ma dag nib t’uf ko girdi’ e piin ni ma wereg e thin ko gapas?

⁴ Ma uw rogon e ngiyal’ ney? Boor e girdi’ nu fayleng e be lemnag ni bay ban’en nib kireb nra buch nga m’on ya yad be guy ni be kireb iyan e par ko girdi’. Piin nib t’uf e tin mmat’aw ban’en rorad e ke kireban’rad u nap’an ni yad ma guy Kristendom ni ba ta dake modingnag ir ma rib kireb e ngongol rok. I yiiynag Jehovah u daken Ezekiel, ni yad be “gel’gel’ ma yad be fil e fan rorad ni bochan e pi n’en nib kireb ni yibe rin’.” (Ezekiel 9:4) Machane boor e girdi’ e dar nanged ko mang e tin nib m’agan’ Jehovah ngay. Ba t’uf ni ngan nog ngorad.

5. Uw rogon ni dag Jesus ni ra moy e pi ta mol’og ko ngiyal’ ney?

⁵ Bay be’ ko ngiyal’ ney ni der rus ni nge weliy ban’en ni bod Isaiah, nge Jeremiah, nge Ezekiel? Yog Jesus ni ra moy be’ ni aram rogon. Nap’an ni ke weliy ko mang e ra buch ko ngiyal’ ney me gaar: “Ma re thin ney nib fel’ ni morngaagen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Mini’ ko ngiyal’ ney e be lebuguy e re thin ko profet nem, ni yad e mol’og rok Got, ma yad be machibnag fare thin nib fel’? Boch ban’en nib taareb rogon ko ngiyal’ ney nge ngiyal’ ko yu Israel nkakrom e ra ayuwegdad ngad nanged e fulweg ko re deer nem.

6. (a) Mang boch ban’en ni buch rok “fare Israel rok Got” u nap’an e bin som’on e mahl ko fayleng? (b) Uw rogon ni ke lebug e thin ko Ezekiel 11:17 u daken yu Israel nkakrom?

⁶ Nap’an e World War I, ma girdi’ rok Jehovah ni yad e tin ni ka bay ko fare “Israel rok Got” ni kan dugliyrad e kan kalbusnagrad ni bod rogon ni buch ko yu Israel u Babylon. (Galatia 6:16) Ur gafgowgad ko tirok Got ban’en ma gowa ke kalbusnagrad e Babylon nib Gilbuguwan ni aram e pi yuraba’ i teliw ni googsur u fayleng, ma Kristendom e th’abi lingagil ma th’abi gel e kireb rok riy. Machane n’en ni yog Jehovah ngak Ezekiel e be dag ni gathi kan digeyrad. Ye gaar: “Gu ra fekmed u fithik’ e girdi’ nggu kunuymed u fithik’ e pi binaw ni kam wergad riy, ma gu ra pi’ ngomed e binaw nu Israel.” (Ezekiel 11:17) Ya nge lebuguy e re thin nem ni fan ko yu Israel me dugliy Jehovah Cyrus nu Persia ni nge gel ko yu Babylon min bing e kanawo’ ni nge sul e tin ni ka bay yu Israel nga binaw rorad. Ma uw rogon e ngiyal’ ney?

7. Mang e buch ko duw ni 1919 ni be dag ni ke togopuluw Jesus ngak Babylon nib Gilbuguwan? Mu weliy.

⁷ U tabolngin e re chibog ney ma kan micheg ni bay be’ ni ir e Bin Baga’ e Cyrus. Mini’ e cha’ nem? Jesus Kristus ni ke mang pilung u nap’an e 1914 u Gil’ilungun Got u tharmiy. Re Pilung ney nib baga’ e ke runguy pi walagen ni kan duguliyrad ni ka yad bay u fayleng ya nap’an e 1919 ma kan pithig e pi Kristiano ni kan dugliyrad u kalbus nib spiritual mar sulod nga “binaw” rorad, ni aram rarogorad nib spiritual. (Isaiah 66:8; Revelation 18:4) Ere ke lebug e thin ko Ezekiel 11:17 ko ngiyal’ ney. Kakrom ma ke war yu Babylon ma aram me yog ko piyu Israel ni ngar sulod nga binaw rorad. Ngiyal’ ney ma nap’an ni ke sul fare Israel rok Got nga rogon ma aram e mich riy ni ke war Babylon nib Gilbuguwan ni bochan fa Bin ni Baga’ e Cyrus. Aram e n’en ni weliy fa bin l’agruw e engel u Revelation guruy ni 14, ya ke tolul ni gaar: “Ke war! Fare binaw nu Babylon nib gilbuguwan e ke war! Ke pi’ e wain rok ngak girdien e pi nam ni urngin kar unumed, ni fare wain rok nib gel, ni wain ko darngal rok!” (Revelation 14:8) Aram ban’en nib thil ko Babylon nib Gilbuguwan ma Kristendom e baga’ riy! Ma ri ra flaab e tin riyul’ e Kristiano!

8. Mang e be yog ko babyor ni Ezekiel u morngaagen e falfalan’ ko girdi’ rok Got u tomren ni kan pithigrad ke puf rogorad ko duw ni 1919?

⁸ U Ezekiel 11:18-20, e be weliy e thin ko profet u morngaagen e falfalan’ ko girdi’ rok Got u tomren ni kar sulod nga rogon. Yay nsom’on ni ke lebug e pi thin nem e ke biech yu Israel u nap’an Ezra nge Nehemiah. Ma taareb rogon ni ke lebug ko ngiyal’ ney. Ngad guyed ko uw rogon. Begaar Jehovah: “Yad ra yib [ko binaw rorad] mi yad chuweg urngin e tin nib kireb nge tin nib puwlag riy.” Ma aram rogon ni ke lebug u nap’an e 1919, me biechnag Jehovah e girdi’ rok mar passiggad i pigpig ngak. Mar chuweged rorad urngin ban’en nib l’ag ko liyor ko Babylon nge pi machib ni ba alit u p’eowchen Got.

9. Mang taw’ath ni pi’ Jehovah ngak e girdi’ rok ka nap’an e duw ni 1919 iyib ngaray?

⁹ Ma be yog ko verse 19, ni begaar Jehovah: “Ma aram ma gu ra pi’ ngorad taab gumercha’, ma gu ra tay ba gelngin nib biech nga fithik’rad; ma gu ra chuweg e gumercha’ ni bod e malang u fithik’rad mu gu pi’ ngorad e gumercha’ nib ufin.” Ma ba puluw e re n’ey ko duw ni 1919, ya ke kunuy Jehovah e pi tapigpig rok ni kan dugliyrad me pi’ ngorad “taab gumercha’,” ni aram be yip’ fan ban’en, ni rayog ni ngar pigpiggad ngak ni yad be “maruwel u taabang.” (Zefaniah 3:9) Miki pi’ Jehovah e kan ni thothup ngak e girdi’ rok ni ngar pasiggad ko machib mar rin’ed fapi waamangin ni bay ko Galatia 5:22, 23. Ma de pi’ Jehovah ngorad ba gumercha’ nib el ni bod e malang, ya ke pi’ ngorad ba gumercha’ nib munguy, ma ma m’ag m’ag ir, ma ma fol, ni aram ba gumercha’ ni ra rin’ e tin nib m’agan’ ngay.

10. Mang fan ni ke flaabnag Jehovah e girdi’ rok ni kar sulod nga rogon ka nap’an e 1919 iyib ngaray?

¹⁰ Mang fan ni ke yodorom? Be weliy Jehovah ko mang fan. Be yog u Ezekiel 11:20 ni gaar: “Ma aram e rayog ni ngar ranod ko kanawo’ rog mi yad fol ko pi n’en ni kug turguy ni ngan rin’; ma aram e yad ra mang girdi’ rog ma gu ra mang Got rorad.” Fare Israel rok Got e ke fil rogon ni nge fol ko pi motochiyel rok Jehovah ma gathi lem rorad. Ur filed rogon ni ngar rin’ed e tin nib m’agan’ Got ngay ma dar rusgad ko girdi’. Ere ur lingagilgad ni yad ba thil ko pi Kristiano ni googsur nu Kristendom. Ya yad e girdi’ rok Jehovah. Me ere ke bung rogorad ni nge l’ograd Jehovah ni yad e “tapigpig nib yul’yul’” rok.​—Matthew 24:45-47.

Falfalan’ ni Ma Tay e Pi Ta Mol’og rok Got

11. Mang e be weliy u babyor ni Isaiah u morngaagen e falfalan’ ko girdi’ rok Jehovah?

¹¹ Rayog ni ngam guy rogon ni kar falfalan’gad u nap’an ni ke tamilangan’rad ni yad ba taw’ath fa? Ur rogned e pi thin ko Isaiah 61:10 ni be gaar: “Kug falfalan’ ni bochan e tin ni ke rin’ Jehovah. Yaal rog e ra falfalan’ ni bochan e Got rog.” Ke lebug e thin ko Isaiah 35:10 u dakenrad ni gaar: “Piin ni ke sulwegrad Jehovah nga rogorad e bay ra tawgad nga Zion ni yad be tolulnag e falfalan’; mi yad par nib falfalan’ ndariy n’umngin nap’an. Ma bay ur pared ni yad be falfalan’ ndab ki yib e kireban’ nge meyor ngorad.” Aram rogon e falfalan’ ko pi ta mol’og ko gapas rok Jehovah ko duw ni 1919 u nap’an ni kar machibnaged fare thin nib fel’ ngak urngin e girdi’. Ka aram nge mada’ ko chiney, ma dar talgad ko re maruwel ney, ma ke yoor e falfalan’ rorad. Ke weliy Jesus u daken fare Burey ni gaar: “Nge falan’ e piin ni yad be muruwliy ni nge aw e gapas u thilin e girdi’, ya ra yog Got ni yad ‘pi fak.’” (Matthew 5:9, footnote) Ke riyul’ e re thin nem u daken e tin ni ka bay e girdi’ ni kan dugliyrad ni yad “pi fak Got” ni ka nap’an e 1919 iyib ngaray.

12, 13. (a) Mini’ e ke un ko fare Israel rok Got mi yad pigpig ku Jehovah u taabang, ma mang maruwel ni kar uned ngay? (b) Mang fan ni ke falfalan’ e pi tapigpig rok Jehovah ni kan dugliyrad?

¹² Ma nap’an ni be yan e pi duw ma ke yoor e piin ni yad e Israel rok Got nge mada’ ko duw ni 1930 ya ke chugur ni nge m’ay i kunuy urngin e girdi’ ni kan dugliyrad. Me ere daki yoor e girdi’ ni be machibnag fare thin nib fel’ fa? Ri danga’. Ya ke yoor e Kristiano ni yad be athapeg e par u fayleng, ma yad ma un ko pi walagrad ni kan dugliyrad ko maruwel ko machib. Ke guy apostal John e re ulung ney nib baga’ me weliy ni gaar: “Kar sak’iygad u m’on u tagil’ Got ni yad be pigpig ngak ni rran nge nep’ u lan e tempel rok.” (Revelation 7:15) Arrogon ke maruwel fare ulung ni baga’ ni elmirin ni fan ko pigpig ku Got. Ma wenegan riy e nap’an ni ke lich iyan e girdi’ ni kan dugliyrad, ma tomren e 1935, me ke gel e machib ni be tay e pi walagrad nib yul’yul’.

¹³ Aram rogon me lebug e thin ko Isaiah 60:3, 4 ni be gaar: “Ma pi nam e bay ra leked ramaem i yib, ma pi pilung e bay ra leked ramaem i yib ni bod e woch ni puf ngorad. Mu sap u toobem i yan ngam guy e pi n’en ni yibe rin’! Be muulung e girdi’ rom ni ngar sulod nga taferad. Pi fakam ni pumoon e bay ra bad u mal’af, ma pi fakam ni ppin e bay ni fekrad i yib nrogon e bitir ni yima fek.” Rogon fene falfalan’ fare Israel rok Got ni bochan e pi n’ey ni be buch e kan weliy morngaagen u Isaiah 60:5, ni be gaar: “Bay mu guy ni ara’ rogon me yib e falfalan’ ngom; bayi mithmith gum’irchaem nib gel ni bochan e falfalan’. Fel’ rogon ko pi nam e bay ni fek i yib ngom; fel’ rogon rorad e bay th’ab e day nge yib ngom.”

Ulung rok Jehovah e Be Mon’og Iyan

14. (a) Mang boch ban’en ni guy Ezekiel u nap’an ni pig e changar rok, ma mang e kan tay chilen? (b) Mang e ke tamilang u wan’ e girdi’ rok Jehovah ko ngiyal’ ney, ma mang e kar nanged u wan’rad nib mil fan ngorad?

¹⁴ Nap’an e duw ni 613 B.C.E., me guy Ezekiel e ulung rok Jehovah u tharmiy ni bod e karro ni ma girngiy e os ni be yan. (Ezekiel 1:4-28) Nge mu’ me gaar Jehovah ngak: “Fak e girdi’, mman ngak e girdi’ nu Israel, ma tin ni gu ra yog ngom e ir e ngam weliy ngorad.” (Ezekiel 3:4) Nap’an e re duw ney ko 1997, ma gad manang ni ka be yan e ulung rok Jehovah u tharmiy ni nge lebuguy e tin nib m’agan’ Got ngay. Ere thingarda weliyed ko girdi’ morngaagen e pi n’en nem. Nap’an Ezekiel me weliy e thin ni ke thagthagnag Jehovah nga laniyan’. Ngiyal’ ney ma gad ma weliy e thin ni bay ko Thin ni thagthagnag Jehovah ni bay ko Bible. Ma rib gel fene fel’ e thin ni bay ko re babyor nem ni fan ko girdi’! Boor e girdi’ e be magafan’ ko gabul nge langleth, machane be yog e Bible ni kab gel e kireb​—maku kab gel e fel’ riy​—ko pi n’en ni yad be lemnag.

15. Mang fan ni kab kireb rarogon e fayleng ko rogon ni ma lemnag e girdi’ ko ngiyal’ ney?

¹⁵ Kab gel e kireb ya kad filed ko fa tinef e article ni dabki n’uw nap’an ma yira gathey Kristendom nge urngin e teliw ni googsur, ni bod rogon ni buch u Jerusalem ko duw ni 607 B.C.E. Maku urngin ban’en nib l’ag ko politic u gangin e fayleng ni be weliy morngaagen u Revelation ni be yip’ fan reb e gamanman ni maloboch ni bay medlip lolugen nge ragag e gagey rok ni bay ni thang, ni bod rogon ni kan chuweg e pi nam u charen Jerusalem. (Revelation 13:1, 2; 19:19-21) Nap’an Ezekiel me weliy Jehovah yaan e ngiyal’ nran thang yu Jerusalem. Machane kab gel rogon nra buch u nap’an nra nang e girdi’ ni bay ni thang e re fayleng ney. Yog Jehovah ngak Ezekiel ni gaar: “Fak e girdi’, mu gel’gel’ me rurur dorlem. Mu gel’gel’ u p’eowcherad u fithik’ e mooy. Ma faanra yad ra gaar ngom, ‘Ko mang fan ni ga be gel’gel’?’ ma thingar mu gaar, ‘Bochan reb e thin ni ka nog.’ Ya ra yib, ma gubin e gumercha’ e ra ranran ma pa’ urngin e girdi’ e ra aw ma ra mulan’ urngin e girdi’ me war bugrad me riyong e ran riy. Be gaar Jehovah ni Somol Nth’abi Ga’, ‘Mu sap! Ri ra yib ma ra buch.’ ” (Ezekiel 21:6, 7; Matthew 24:30) Bay yib boch ban’en nra k’aring e marus. Ma bochan ni gad ma lemnag e yugu girdi’ ma gad ma ginangrad ma gad ma weliy fare “thin ni ka nog” u morngaagen e damuwmuw rok Jehovah ni bay yib.

16. Mang fan ni kab fel’ rarogon e piin nib sobutan’ ko rogon ni ma lemnag e girdi’?

¹⁶ Machane salpen e piin nib sobutan’ e kab fel’ ko bin ni be lemnag e girdi’. Uw rogon? Ya ke yim’ Jesus Kristus ni nge pi’ puluwon e denen rodad ma chiney e be gagiyeg ni ir e Pilung ko Gil’ilungun Got. (1 Timothy 1:15; Revelation 11:15) Re gagiyeg nem nu tharmiy e ra pithig e pi magawon ni be m’ug riy ndabiyog ni ngan gel ngay. Ra thumur e yam’ nge m’ar nge sasalap nge uyungol nge bugel, ma ra par Gil’ilungun Got ndariy ban’en ni be togopuluw ngay ma ra gagiyegnag e fayleng nib paradis. (Revelation 21:3, 4) Ra par e girdi’ nib falfalan’ ko gapas rok Got​—ya ra gapas thilrad Jehovah Got nge thilrad e yug girdi’.​—Psalm 72:7.

17. Mang boch ban’en ni ke mon’og ma aram e ke falfalan’ e pi ta mol’og ko gapas rok Got ngay?

¹⁷ U yu yang u fayleng ma boor e girdi’ ni yad ba sobutan’ e yad ba adag fare thin u morngaagen e gapas rok Got. Fa binem e duw ma ke mun 17-percent oren e publisher u Ukraine. Ma ke mun 17-percent u Mozambique, me mun 29-percent u Lithuania. Ma Russia e ke mun 31-percent, me mun 52-percent e publisher u Albania. Ere ke yoor ni bokum biyu’ e girdi’ nib yul’yul’ ni ba adag ni ngar uned ko gapas rok Got mar turguyed ni ngar uned ko tin nib mat’aw ban’en. Rogon ni be yoor iyan nib pay e ma k’aring e falfalan’ ko urngin e pi walag ni Kristiano.

18. Demtrug ko ra motoyil e girdi’ ngodad fa danga’ machane ra par e lem rodad ni uw rogon?

¹⁸ Aram rogon e girdi’ u gin ni ga ma par riy fa? Faanra er rogon ma gad ra un ngom ko falfalan’. Machane bay boch e binaw ni boor ni boor e awa nge maruwel nge athamgil ni ngan tay mfini pirieg be’ ni ba adag e machib. Piin ni be pigpig ko pi binaw ni aram rogon e ke chuwan’rad ma dabkura athamgilgad nib elmirin fa? Danga’. Pi Mich Rok Jehovah e dabra paged talin e n’en ni yog Got ku Ezekiel faani yog ko re profet nem ni nge machibnag piyu Jew ni gaar: “Demtrug ko yad ra motoyil ngom fa dab ra motoyilgad​—ya yad e piin nib gelan’​—machane bay ra nanged ni bay ba profet u fithik’rad.” (Ezekiel 2:5, NW) Bod Ezekiel, ma gad ma ulul i weliy ko girdi’ u morngaagen e gapas rok Got ndemtrug ko yad ba adag fa danga’. Faanra yad ra motoyil ngodad ma gad ra falfalan’. Faanra yad ra pi’ keru’rad ngodad, ara yad ra moningnagdad, ara ra gafgownaged gadad, machane ka gad ra athamgil. Ya ba t’uf Jehovah rodad ma be gaar e Bible: “Be’ nib t’uf Got rok nge girdi’ e dabiyog ni nge pag ir ndab ki . . . gum’an’.” (1 Korinth 13:4, 7) Gad ma machib u fithik’ e gum’an’, me ere goo manang e girdi’ ko mini’ e Pi Mich Rok Jehovah. Ma yad manang e thin ni gad ma wereg. Ma nap’an nra taw ko tomur, ma yad ra nang ni ke athamgil e Pi Mich Rok Jehovah ni ngar ayuweged yad ngar uned ko gapas rok Got.

19. Bochan ni gad e pi tapigpig rok fa bin riyul’ e Got me ere mang taw’ath ni gad ma chaariy?

¹⁹ Ka bay reb e maruwel ni kab fel’ ko bin ni ngan pigpig ku Jehovah fa? Dariy! Bin th’abi gel e falfalan’ riy ni ma yib ngodad e bochan ni ke fel’ thildad Got ma gad manang ni gad be rin’ e tin nib m’agan’ ngay. “Ba felfelan’ e piin ni yad ma ta’ fam ko tang ni yad ma yin’, ni yad be par u fithik’ i ramaen fanam gol O Jehovah.” (Psalm 89:15, NW) Nguuda chaariyed fare falfalan’ ni bochan ni gad e pi ta mol’og ko gapas rok Got ngak e girdi’. Ngad lubeged e maruwel rodad nge mada’ ko ngiyal’ nra yog Jehovah ni ke m’ay.

Ka Ga Manang?

◻ Mini’ e yad e pi ta mol’og ko gapas rok Got ko ngiyal’ ney?

◻ Uw rogon ma gad manang ni ke war Babylon nib Gilbuguwan ko duw ni 1919?

◻ Mang e n’en th’abi ga’ fan u wan’ fare “ulung ni baga’”?

◻ Mang fan ni be kireb iyan rarogon e fayleng nga m’on ko bin ni ma lemnag e girdi’ ko ngiyal’ ney?

◻ Mang fan ni kab fel’ e ngiyal’ nga m’on ko piin nib mat’aw gumercharad ko bin ni yad ma lemnag?

[Sasing ko page 28]

Boor e girdi’ e ke mulan’rad u nap’an ni yad ma guy rarogon e fayleng ni be kireb iyan

[Sasing ko page 31]

Pi ta mol’og ko gapas rok Got e yad e tin th’abi falfalan’ e girdi’ u fayleng ko ngiyal’ ney